​ប្រែ​សម្រួលៈ​បំណង​(​ដេល្លី​ម៉េល​)៖ រដ្ឋមន្ត្រីការបរទេស​ចិន​លោក​វ៉ាង យី កាលពី​ថ្ងៃ​អាទិត្យ​បាន​ការពារ​ជំហ​ររបស់​ចិន​ស្តី​ពី​សង្គ្រាម​អ៊ុយ​ក្រែ​ន​និង​អោយ​សញ្ញា​ថា ចិន​នឹង​ពង្រឹង​ទំនាក់ទំនង​ជាមួយ​រុស្ស៊ី​នៅ​ឆ្នាំ​​ខាងមុខ​។​

​ថ្លែង​តាម​វីដេអូ​ផ្សាយ​បន្ត​ផ្ទាល់​នៅក្នុង​រដ្ឋធានី​ប៉េកាំង លោក​ក៏​បាន​បន្ទោស​អាម៉េរិក​ចំពោះ​ការចុះ​ដុនដាប​ខ្លាំង​ឡើង​នៃ​ទំនាក់ទំនង​រវាង​មហាអំណាច​ទាំងពីរ ដោយ​ថា​រដ្ឋាភិបាល​ទីក្រុង​ប៉េកាំង​«​ប្រឆាំង​​ជំទាស់​យ៉ាង​មុតមាំ​ចំពោះ​គោលនយោបាយ​ខុសឆ្គង​របស់​អាម៉េរិក​»​។​

​សូមបញ្ជាក់​ថា ចិន​ព្យាយាម​ទប់ទល់​នឹង​សម្ពាធ​លោកខាងលិច​លើ​ពាណិជ្ជកម្ម បច្ចេកវិទ្យា សិទ្ធិមនុស្ស​និង​ការអះអាង​របស់​ខ្លួន​លើ​ដែនទឹក​ធំ​ល្វឹងល្វើយ​នៅ​មហា​សមុទ្ធ​ប៉ាស៊ីហ្វិក​ខាងលិច ដោយ​ចោទ​ប្រកា​​ន់​អាម៉េរិក​ថា​សម្លុត​គំរាម​។​ចិន​ក៏​មិន​ព្រម​ថ្កោលទោស​ប្រតិបត្តិការ​យោធា​រុស្ស៊ី​ចូល​អ៊ុ​យក្រែន និងក៏​មិន​ចូលរួម​ការដាក់ទណ្ឌកម្ម​ប្រឆាំង​រុស្ស៊ី​ដែរ ដែល​កាន់តែ​ធ្វើអោយ​បែកបាក់​ជាមួយ​អឺរ៉ុប​និងអាម៉េរិក។​

​លោក​វ៉ាង​បាន​និយាយថា «​ចិន​នឹង​ពង្រឹង​ទំនុកចិត្ត​យុទ្ធសាស្ត្រ​ទ្វេភាគី​និង​កិច្ច​សហការ​ផ្តល់​ផលប្រយោជន៍​ទៅវិញទៅមក​»​ជាមួយ​រុស្ស៊ី​។​

​អំពី​វិបត្តិ​អ៊ុ​យក្រែន លោក​វ៉ាង យី បាន​និយាយថា «​យើង​ប្រកាន់ខ្ជាប់​គោលការណ៍​គ្រឹះ​ពិត​មិន​លម្អៀង ដោយ​គ្មាន​គាំទ្រ​ភាគី​ណាមួយ ឬ​ក៏​បន្ថែម​ប្រេង​លើ​ភ្លើង​ទេ និង​ក៏​មិន​ឆ្លៀត​កេងចំណេញ​ពី​ស្ថាន​​ការណ៍​នេះដែរ​»​។​

​រដ្ឋមន្ត្រីការបរទេស​ចិន វ៉ាង យី បាន​ការពារ​ជំហរ​ប្រទេស​លោក​អំពី​សង្គ្រាម​នៅ​អ៊ុ​យក្រែន និង​អោយ​សញ្ញា​ថា​នឹង​ពង្រឹង​ទំនាក់ទំនង​ជាមួយ​រុស្ស៊ី​ថែម ។ក្នុងរូប លោកវ៉ាង ថតជាមួយសមភាគីរុស្ស៊ី ក្នុងជំនួបទ្វេភាគីមួយនៅក្រៅកិច្ចប្រជុំរដ្ឋមន្រ្តីការបរទេសអាស៊ីបូព៌ាលើកទី១២នៅក្រុងភ្នំពេញកាលពីថ្ងៃ៥សីហា ២០២២

​ទោះជា​ចិន​និង​រុស្ស៊ី​ស្ថិត​ក្រោម​សម្ពាធ​ពី​លោក​ខាងលិច​ដូចគ្នា តែ​អនាគត​របស់​ចិន​នៅ​ពាក់ព័ន្ធ​នឹង​ទីផ្សារ​ព្រម​ទាំង​បច្ចេកវិទ្យា​អាម៉េរិក​និង​អឺរ៉ុប ។​ប្រធានាធិបតី ស៊ី ជីន​ភីង ជំរុញ​អោយ​ឧស្សាហកម្ម​ចិន​​កាន់តែ​ពឹង​លើ​ខ្លួនឯង​ច្រើនឡើង តែ​លោក​វ៉ា​ង​បាន​ទទួលស្គាល់ថា បទពិសោធន៍​បានបង្ហាញ​ថា​«​ចិន​និង​អាម៉េរិក​មិនអាច​ផ្តាច់ចេញ​ពី​គ្នា​បាន ឬ​បញ្ចប់​ខ្សែសង្វាក់​ផ្គត់ផ្គង់​»បានទេ​។​

​លោក​ថា​ចិន​នឹង​ខិតខំ​នាំ​ទំនាក់ទំនង​ជាមួយ​អាម៉េរិក​វិល​មក​រក​ផ្លូវ​ត្រឹមត្រូវ​វិញ ហើយ​ថា​ទំនាក់ទំនង​បាន​ធ្លាក់​ចុះ​កន្លងមកដោយសារ​តែ​អាម៉េរិក​ចាត់ទុក​ចិន​ជា​គូប្រជែង​ចម្បង​របស់​ខ្លួន និង​ចូលរួម​ក្នុង​ផែនការ​​បិទ​ខ្ទប់ គាបសង្កត់​និង​បង្ករឿង​ប្រឆាំង​ចិន​យ៉ាង​ច្បាស់ក្រឡែត​៕