​ប្រែ​សម្រួលៈ​បំណង​(​ដេល្លី​ម៉េល​)៖ ជន​អ៊ីស្លាម​រ៉ូ​ហ៊ីង​យ៉ា​រាប់សិប​នាក់​ដែល​ហេវ​ហត់​និង​ខ្សោយ​ត្រូវបាន​ប្រទះឃើញ​នៅ​លើ​ឆ្នេរ​មួយ​ក្នុង​ខេត្ត​អាចេ​(Aceh)​របស់​ឥណ្ឌូនេស៊ី​កាល​ពី​ថ្ងៃអាទិត្យ​បន្ទាប់ពី​ពួកគេ​​ធ្វើ​ដំណើរ​ផ្សងព្រេង​ក្នុង​សមុទ្រ​អស់​ពេល​រាប់​សប្តាហ៍​។​

​ក្រុម​ជនភៀសខ្លួន​ដែល​មាន​បុរស​៥៨​នាក់​នេះ បាន​ទៅ​ដល់​ឆ្នេរ​អ៊ី​នដ្រា​ប៉ាត្រា​(Indrapatra)​នៃ​ភូមិ​នេសាទឡា​ដុង​(Ladong)​កាលពីដើម​ថ្ងៃអាទិត្យ ។​ពួក​អ្នក​ភូមិ​ដែល​បាន​ឃើញ​ពួកគេ​នៅលើ​​ទូក​ឈើ​មួយ​បាន​ជួយ​ពួកគេ​អោយ​ឡើងគោក​និង​បន្ទាប់​មក​រាយការណ៍​ទៅ​អាជ្ញាធរ​។​

​មន្ត្រី​ឥណ្ឌូនេស៊ី​ម្នាក់​បាន​និយាយថា ពួក​គេ​មើល​ទៅ​ខ្សោយ​និង​ខ្សត់​ជាតិ​ទឹក ដោយ​ខ្លះ​ឈឺ​ក្រោយ​ការធ្វើដំណើរ​ក្នុង​សមុទ្រ​ដ៏​យូរ​។​ក្រោយ​ទទួល​ទឹក​និង​អាហារ​ពី​អ្នកភូមិ ពួកគេ​នៅ​រង់ចាំ​ការណែនាំ​ពី​ផ្នែក​​អន្តោប្រវេសន៍​និង​មន្ត្រី​មូលដ្ឋាន​។​

​អង្គការសហប្រជាជាតិ​និង​ក្រុម​សិទ្ធិ​មនុស្ស​កាលពី​ថ្ងៃ​សុក្រ​បាន​ទទូច​សុំ​អោយ​ប្រទេស​នានា​នៅ​អាស៊ី​ខាងត្បូង​ជួយសង្គ្រោះ​មនុស្ស​ប្រមាណ​១៩០​នាក់​ដែល​គេ​ជឿ​ថា​ជា​ជន​រ៉ូ​ហ៊ីង​យ៉ា នៅ​លើ​ទូក​តូច​មួយ​ដែល​​កំពុង​រសាត់អណ្តែត​អស់​ពេល​ជា​ច្រើន​សប្តាហ៍​នៅក្នុង​សមុទ្រ​អាន់ដាម៉ាន់​(Andaman)​។​

​ទីភ្នាក់ងារ​ជនភៀសខ្លួន​អង្គការសហប្រជាជាតិ​បាន​និយាយ​នៅក្នុង​សេចក្តីថ្លែងការណ៍​មួយ​ថា​« របាយការណ៍​បង្ហាញ​ថា មនុស្ស​ទាំងនោះ​នៅ​ក្នុង​សមុទ្រ​នៅ​ឡើយ​ក្រោយ​ការធ្វើដំណើរ​ខ្វះ​ទឹក​និង​អាហារ​​គ្រប់គ្រាន់​អស់​ពេល​មួយ​ខែ និង​ដោយ​គ្មាន​កិច្ចខិតខំ​ពី​រដ្ឋ​ណាមួយ​ដើម្បី​ជួយសង្គ្រោះ​ជីវិត​ពួកគេទេ​។​ពួកគេ​ជាច្រើន​នាក់​ជា​ស្ត្រី​និង​កុមារ​។​របាយការណ៍​បាន​និយាយថា មនុស្ស​២០​នាក់​បាន​ស្លាប់​ក្នុងអំឡុង​​ពេល​ធ្វើដំណើរ​»​។​

​មន្ត្រី​ឥណ្ឌូនេស៊ី ពិនិត្យ​ក្រុម​ជន​រ៉ូ​ហ៊ីង​យ៉ា នៅ​ឆ្នេរ​អ៊ី​នដ្រា​ប៉ាត្រា​នៃ​ភូមិ​នេសាទឡា​ដុង ដោយ​ជនភៀសខ្លួន​ខ្លះ​ឈឺ​និង​ទទួលបាន​ការពិនិត្យ​ព្យាបាល​នៅ​នឹង​កន្លែង​កាលពី​ថ្ងៃ​២៥​ធ្នូ​

​គេ​នៅ​មិនទាន់​ដឹង​ថា​ក្រុម​ជន​រ៉ូ​ហ៊ីងយ៉ាង​ជាង​៥០​នាក់​នេះ​មកពីណា ឬ​ក៏​ពួកគេ​ជា​ផ្នែក​នៃ​ក្រុម​ជនភៀសខ្លួន​១៩០​នាក់​ដែល​រសាត់អណ្តែត​ក្នុង​សមុទ្រ​អាន់ដាម៉ាន់​។​តែ​ពួកគេ​ខ្លះ​បាន​និយាយថា ពួកគេ​​បាន​នៅក្នុង​សមុទ្រ​អស់​មួយ​ខែ​និង​មាន​បំណង​ទៅ​កាន់​ម៉ាឡេស៊ី ដើម្បី​ស្វែងរក​ជីវិត​ល្អប្រសើរ​ឡើង​។​

​សូមបញ្ជាក់​ថា ជន​អ៊ីស្លាម​រ៉ូ​ហ៊ីង​យ៉ា​ជាង​៧០០.០០០​នាក់​បាន​ភៀសខ្លួន​ចេញពី​មី​យ៉ាន់​ម៉ា​ទៅកាន់​បណ្តា​ជំរំ​នៅ​បង់​ក្លា​ដែ​សចាប់​តាំងពី​ខែ​សីហា​ឆ្នាំ​២០១៧ នៅពេល​យោធា​មី​យ៉ាន់​ម៉ា​ចាប់ផ្តើម​បង្ក្រាប​ក្នុងការ​​ឆ្លើយតប​នឹង​ការវាយប្រហារ​ដោយ​ក្រុម​ឧទ្ទាម​អ៊ីស្លាម​មួយ​នៅក្នុង​តំបន់​ជន​រ៉ូ​ហ៊ីង​យ៉ា​រស់នៅ​។​

ជារៀងរាល់ឆ្នាំ ​ជន​រ៉ូ​ហ៊ីង​យ៉ា​គ្មាន​រដ្ឋ​នេះ​ទាំង​ក្រុមៗ​បាន​ព្យាយាម​ចាកចេញ​ពី​ជំរំ​នៅ​បង់​ក្លា​ដែល​ដោយ​ធ្វើដំណើរ​តាម​ទូក​ឈើ​ដ៏​គ្រោះ​ថ្នាក់​ដើម្បី​ទៅកាន់​បណ្តា​ប្រទេស​កាន់សាសនា​អ៊ីស្លាម​នៅក្នុង​តំបន់​ជាពិសេស​ក្នុងអំឡុង​​រដូវប្រាំង​ដែល​សមុទ្រ​ស្ងប់​ខ្យល់​៕