​ប្រែ​សម្រួល : កញ្ញា​ដា​លី​ស (​ដេល្លី​ម៉េល​) ៖ ទីភ្នាក់ងារ​ចារកម្ម​អាម៉េរិក CIA​កំពុង​រួម​បញ្ចូល​គ្នា​ជាមួយ​សេវា​ចារកម្ម​របស់​សម្ពន្ធមិត្ត​ណាតូ​នៅ​អឺរ៉ុប​ដើម្បី​ធ្វើ​ប្រតិបត្តិ​ការបំផ្លិចបំផ្លា​ញ​ជាសម្ងាត់​នៅក្នុង​ប្រទេស​រុស្ស៊ី នេះ​បើ​តាម​ការអះអាង​ថ្មី​។​

​អ្នកជំនាញ​អាម៉េរិក លោក ជែក មឺ​ហ្វ៊ី (Jack Murphy) ជា​ទាហាន​ជើងចាស់​នៃ​កង​ប្រតិបត្តិការ​ពិសេស​របស់​អាម៉េរិក​អស់​រយៈពេល​ប្រាំបី​ឆ្នាំ បាន​និយាយថា​យុទ្ធនាការ​សម្ងាត់​នេះ​គឺ​នៅ​ពីក្រោយ​​ការផ្ទុះ​និង​អគ្គិភ័យ ដែល​មិន​អាច​ពន្យល់​បាន​ជាច្រើន ដែល​បាន​វាយប្រហារ​ទីតាំង​យុទ្ធសាស្ត្រ​ឬ​លេចធ្លោ​ក្នុង​ប៉ុន្មាន​ខែ​ថ្មីៗ​នេះ​។​

​ដោយឡែក សេវា​ស៊ើបការណ៍​សម្ងាត់​អឺរ៉ុប​ផ្សេងទៀត​ត្រូវ​គេ​និយាយ​ថា​កំពុង​ជ្រៀតចូល​ទៅក្នុង​ប្រទេស​រុស្ស៊ី​ដើម្បី​បង្កើត​ភាពចលាចល​ដោយ​គ្មាន​ជំនួយ​ពី CIA ក៏ដូចជា​អ៊ុយ​ក្រែន​ផងដែរ​។​

​ការអះអាង​របស់​គាត់​បាន​កើតឡើង ខណៈ​អគ្គិភ័យ​ថ្មី​បាន​វាយប្រហារ​ផ្សារ​ទំនើប​មួយ​ក្នុង​តំបន់​ក្រា​ស្នូ​ដា (Krasnodar)​ភាគ​ខាងត្បូង​ប្រទេស​រុស្ស៊ី​ដែល​វា​ជា​ឧបទ្ទវហេតុ​ចុងក្រោយ​បង្អស់​ក្នុង​ចំណោម​​ឧបទ្ទវហេតុ​បែបនេះ​រាប់សិប​លើក​។ រឿង​នេះ​កើតឡើង​ខណៈ​លោកពូ​ទីន​បាន​ចេញ​ការព្រមាន​ដ៏​ស្រៀវ​ឆ្អឹងខ្នង​មួយទៀត​ទៅ​កាន់​លោកខាងលិច​នៅ​ថ្ងៃ​បុណ្យ​ណូអែល​។​

​នៅ​ប្រទេស​អ៊ុយ​ក្រែន​កាលពី​ថ្ងៃអាទិត្យ ស៊ី​រ៉ែ​ន​អំពី​ការ​វាយឆ្មក់​តាម​អាកាស​បាន​បន្លឺ​ឡើង​នៅ​ទូទាំង​ប្រទេស​ខណៈ​អ្នកខ្លះ​សម្រេចចិត្ត​លើក​ពេល​អបអរ​ថ្ងៃបុណ្យ​ណូអែល​របស់​ពួកគេ​ដើម្បី​ចៀសវាង​ការ​​ប្រារព្ធ​ពិធី​នៅ​ថ្ងៃ​តែ​មួយ​ជាមួយ​រុស្ស៊ី​។​

​កន្លែង​ផលិត​ប្រេង​និង​ឧស្ម័ន ផ្លូវ​រថភ្លើង ឃ្លាំង​ប្រេងឥន្ធនៈ រោងចក្រ​ថាមពល និង​ផ្សារ​ទំនើប​ត្រូវបាន​វាយប្រហារ​នៅ​ទូទាំង​ប្រទេស​រុស្ស៊ី​ដោយ​ការផ្ទុះ​ដ៏​អាថ៌កំបាំង​ជាមួយ​នឹង​ពាក្យ​ចចាមអារ៉ាម​អំពី​​ការបំផ្លិចបំផ្លាញ​ជាច្រើន​ទៀត​។​

​លោកមឺ​ហ្វ៊ី​បាន​និយាយ​នៅក្នុងសារ​បង្ហោះ​មួយថា “​យុទ្ធនាការ​នេះ​គឺ​ជាប់​ពាក់ព័ន្ធ​នឹង​ក្រុម​លាក់​ខ្លួន​ជា​យូរយារ ដែល​សេវា​ចារកម្ម​របស់​សម្ពន្ធមិត្ត​បាន​ដំណើរការ​ដើម្បី​រារាំង​ការ​លុកលុយ​របស់​រដ្ឋាភិបាល​ក្រុង​មូ​ស្គូម​កលើ​អ៊ុ​យក្រែន ដោយ​ការ​ធ្វើ​សង្គ្រាម​ជាសម្ងាត់​នៅ​ពីក្រោយ​ខ្សែត្រៀម​ជួរមុខ​របស់​រុស្ស៊ី​”​។​

“​យុទ្ធនាការ​នេះ​គឺ​ទទួលខុសត្រូវ​ចំពោះ​ការផ្ទុះ​ជាច្រើន​ដែល​មិន​អាច​ពន្យល់បាន​និង​ឧបទ្ទវហេតុ​ផ្សេងទៀត ដែល​បាន​កើតមាន​លើ​បរិវេណ​ឧស្សាហកម្ម​យោធា​រុស្ស៊ី​ចាប់តាំងពី​ការឈ្លានពាន​ពេញទំហឹង​​របស់​រុស្ស៊ី​លើ​អ៊ុយ​ក្រែន​ក្នុង​ខែកុម្ភៈ​”​។​

​លោក​បាន​ដកស្រង់​ពី​ប្រភព​អនាមិក​របស់​សហរដ្ឋ​អាម៉េរិក​រួម​មាន​អតីត​ចារកម្ម​បីនាក់ និង​មន្ត្រី​យោធា​ពីរ​នាក់ និង​ប្រភព​ទី​ប្រាំមួយ ដែល​ទទួលបាន​ព័ត៌មាន​អំពី​យុទ្ធនាការ​នេះ​។​

​ទោះជា​យ៉ាងណា CIA​បាន​បដិសេធ​ការចោទប្រកាន់​នេះ​៕

លោក ជែក មឺ​ហ្វ៊ី អះអាងថា CIA ជា​អ្នកបង្ក​ការបំផ្លិចបំផ្លាញ​ដ៏​អាថ៍កំបាំង​នៅ​រុស្ស៊ី​