​ប្រែ​សម្រួល : កញ្ញា​ដា​លី​ស (​ស្ត្រេត​ថែមស៍​) ៖ ក្រុម​ផ្តល់ជំនួយ​ជាច្រើន​កំពុង​ផ្អាក​ប្រតិបត្តិការ​ក្នុងប្រទេស​អា​ហ្វ​ហ្គានី​ស្ថាន​បន្ទាប់​ពី​ពួក​តា​លី​បង់​ដាក់​បម្រាម​ថ្មី​លើ​ស្ត្រី​ដែល​ធ្វើការ​ក្នុង​អង្គការ​មិនមែន​​រដ្ឋាភិបាល ដែល​អាច​រំខាន​ដល់​ជំនួយ​មនុស្សធម៌​ដល់​មនុស្ស​រាប់លាន​នាក់​ក្នុងអំឡុង​រដូវរងា​ដ៏​អាក្រក់​។​

​គណៈកម្មាធិការ​សង្គ្រោះ​អន្តរជាតិ (IRC) ដែលជា​អង្គការ​ជំនួយ​ដ៏​ធំ​បំផុត​មួយ​នៅ​អា​ហ្វ​ហ្គានី​ស្ថាន បាន​និយាយថា “​ប្រសិនបើ​យើង​មិន​ត្រូវបាន​អនុញ្ញាត​ឱ្យ​ជួល​ស្ត្រី​ទេនោះ​យើង​មិន​អាច​ផ្តល់ជំនួយ​​ឱ្យទៅ​អ្នក​ដែល​ត្រូវការ​នោះទេ​។ ដូច្នេះ IRC​បច្ចុប្បន្ន​កំពុង​ផ្អាក​សេវាកម្ម​របស់​យើង​នៅក្នុង​ប្រទេស​អា​ហ្វ​ហ្គានី​ស្ថាន​”​។​

​ស្ត្រី​មាន​ចំនួន ៣.០០០ នាក់​ក្នុងចំណោម​បុគ្គលិក ៨.០០០ នាក់​របស់​អង្គការ IRC នៅក្នុង​ប្រទេស​អា​ហ្វ​ហ្គានី​ស្ថាន​។​

​អង្គការ​សង្គ្រោះ​កុមារ (Save the Children) អង្គការ​ក្រុមប្រឹក្សា​ជនភៀសខ្លួនន័​រវែ​ស និង​អង្គការ​ថែទាំ​អន្តរជាតិ​គឺ​ស្ថិតក្នុង​ចំណោម​អង្គការ​ផ្សេង​ទៀត​ដែល​បាន​បញ្ឈប់​ប្រតិបត្តិការ​។​ទី​ភ្នាក់​​ងារ​ទាំង​បី​បាន​និយាយ​នៅក្នុង​សេចក្តីថ្លែងការណ៍​រួម​មួយ​ថា “​បើ​គ្មាន​បុគ្គលិក​ស្រី​របស់​យើង​ទេ យើង​មិន​អាច​ទៅ​ដល់​កុមារ ស្ត្រី​និង​បុរស​ដែល​ត្រូវការ​ជំនួយ​ទាំង​អស់សង្ឃឹម​ក្នុង​ប្រទេស​អា​ហ្វ​ហ្គានី​ស្ថាន​​ប្រកបដោយ​ប្រសិទ្ធភាព​នោះទេ​”​។​

​កាលពី​ចុង​សប្តាហ៍ រដ្ឋមន្ត្រីក្រសួង​សេដ្ឋកិច្ច​របស់​តា​លី​បង់ លោក ឌី​ន ម៉ូ​ហាម​ម៉េត ហា​នី​ហ្វ (Din Mohammad Hanif) បាន​ចុះហត្ថលេខា​លើ​បទ​បញ្ជា​មួយ​ដែល​រារាំង​ស្ត្រី​មិន​ឱ្យ​ធ្វើការ​នៅ​ក្នុង​អង្គ​​ការ​ក្រៅ​រដ្ឋាភិបាល​ជាតិ​និង​អន្តរជាតិ ដោយសារ​ពួកគេ​មិន​បាន​ពាក់​ស្បៃ​គ្រប​ក្បាល ហើយ​មិន​គោរព​ច្បាប់​អ៊ីស្លាម​ផ្សេងទៀត​។ លោក​បាន​ព្រមាន​ថា អង្គការ​ណា​ដែល​មិន​គោរព​តាម​បញ្ជា នឹង​ត្រូវ​ដកហូត​អាជ្ញាប័ណ្ណ​។​

​ចំណាត់ការ​នេះ​បាន​ទាក់ទាញ​ការ​ថ្កោលទោស​ពី​ជុំវិញ​ពិភពលោក រួម​ទាំង​សហរដ្ឋ​អាម៉េរិក​ផងដែរ​។ រដ្ឋមន្ត្រីការបរទេស​អាម៉េរិក​លោក អាន​ថូ​នី ប្លីង​កិន បាន​និយាយ​នៅក្នុង Twitter ថា ការហាមឃាត់​នេះ​នឹង “​រំខាន​ដល់​ជំនួយ​សង្គ្រោះ​ជីវិត​ដ៏​សំខាន់​ចំពោះ​មនុស្ស​រាប់លាន​នាក់​។ ការសម្រេចចិត្ត​នេះ​អាច​ជា​ការបំផ្លិចបំផ្លាញ​សម្រាប់​ប្រជាជន​អា​ហ្វ​ហ្គានី​ស្ថាន​”​។​

​អ្នកនាំពាក្យ​ក្រុម​តា​លី​បង់ លោក ហ្សា​ប៊ី​ហ៊ូ​លឡា មូចា​ហ៊ីដ (Zabihullah Mujahed) បាន​និយាយ​នៅលើ Twitter ថា សហរដ្ឋ​អាម៉េរិក​គួរតែបញ្ឈប់​ការជ្រៀតជ្រែក​ក្នុង​បញ្ហា​អា​ហ្វ​ហ្គានី​ស្ថាន​។ លោក​បាន​បន្ថែម​ថា​ក្រុម​សកម្មប្រយុទ្ធ​នេះ​នឹង​មិន​អនុញ្ញាត​ឱ្យ​”​នរណា​ម្នាក់​និយាយ​បែប​សំរាមៗ​ឬ​ធ្វើ​ការគំរាមកំហែង​ទាក់ទង​នឹង​ការសម្រេចចិត្ត​របស់​មេ​ដឹកនាំ​របស់​យើង​ក្រោមលេស​នៃ​ជំនួយ​មនុស្សធម៌​នោះឡើយ​”៕

ប្រជាជន​អា​ហ្វ​ហ្គានី​ស្ថាន​ឈរ​តម្រង់​ជួរ​ដើម្បី​ទទួល​ជំនួយ​ស្បៀងអាហារ​ពី​អង្គការក្រៅរដ្ឋាភិបាល​ក្នុង​ទីក្រុង​កា​ប៊ុល​កាលពី​ថ្ងៃទី​២៥ ខែ​ធ្នូ ឆ្នាំ​២០២២