​ប្រែ​សម្រួល : កញ្ញា​ដា​លី​ស (​ដេល្លី​ម៉េល​) ៖ អាជ្ញាធរ​ចិន​កំពុង​ចុះ​តាម​ផ្ទះ​ហើយ​បង់ប្រាក់​ឱ្យ​មនុស្ស​ចាស់​អាយុ​៦០​ឆ្នាំ​ឡើង​ដើម្បី​ចាក់​វ៉ាក់សាំង​ការពារកូ​វីដ​១៩​។​ប៉ុន្តែ​ទោះបីជា​ករណី​ឆ្លង​កំពុង​កើន​ឡើង​ខ្លាំង​​ក៏ដោយ ក៏​លោក លី លាំង​សេង (Li Liansheng) អាយុ ៦៤ ឆ្នាំ​នៅ​តែ​និយាយថា មិត្តភក្តិ​របស់​គាត់​មាន​ការបារម្ភ​ចំពោះ​រឿង​រ៉ាង​នានា​អំពី​គ្រុ​នក្តៅ កំណក​ឈាម និង​ផលប៉ះពាល់​ផ្សេងទៀត​។​

​លោក​លី ដែល​បាន​ចាក់​វ៉ាក់សាំង​មុន​ពេល​គាត់​ឆ្លងកូវី​ដ បាន​និយាយថា “​នៅពេល​មនុស្ស​ឮ​អំពី​ឧបទ្ទវហេតុ​បែបនេះ ពួកគេ​ប្រហែលជា​មិន​ព្រម​ចាក់​ថ្នាំ​បង្ការ​ទេ​”​។ ប៉ុន្មាន​ថ្ងៃក្រោយ​ឆ្លងកូវី​ដ​លោកលី​​កំពុង​ចាប់ផ្តើម​ឈឺបំពង់ក​និង​ក្អក​។ លោក​បាន​និយាយថា វា​ដូចជា “​ផ្តាសាយ​ធម្មតា​” ជាមួយ​គ្រុនក្តៅ​ស្រាល​។​

​ចិន​បាន​ចូលរួម​ជាមួយ​ប្រទេស​ផ្សេងទៀត​ក្នុង​ការព្យាបាល​ករណី​ឆ្លង​ជាជាង​ព្យាយាម​លុបបំបាត់​មេរោគ​ទាំងស្រុង ដោយ​បាន​ទម្លាក់​ចុះ​ឬ​បន្ធូរបន្ថយ​ច្បាប់​ស្តីពី​ការធ្វើ​តេស្តិ៍ ការធ្វើ​ចត្តា​ឡី​ស័ក និង ការធ្វើ​បំលាស់​ទី ខណៈ​ចិន​ព្យាយាម​ទាញ​បញ្ច្រាស​មក​វិញ​ការធ្លាក់ចុះ​សេដ្ឋកិច្ច​។ ប៉ុន្តែ​ចំណាត់ការ​នេះ​បាន​ធ្វើឱ្យ​មន្ទីរពេទ្យ​ជន់​លិច​ដោយ​អ្នកជំងឺ​គ្រុនក្តៅ​និង​ពិបាក​ដកដង្ហើម​។​

​គណៈកម្មការ​សុខភាព​ជាតិ​បាន​ប្រកាស​យុទ្ធនាការ​ថ្ងៃទី ២៩ ខែ​វិច្ឆិកា​ដើម្បី​បង្កើន​អត្រា​ការចាក់​វ៉ាក់សាំង​ក្នុងចំណោម​ជន​ជាតិចិន​វ័យ​ចំណាស់​ដែល​អ្នកជំនាញ​សុខភាព​និយាយថា​មាន​សារៈសំខាន់​​ក្នុង​ការបញ្ចៀស​វិបត្តិ​ថែទាំ​សុខភាព​។ វា​ក៏​ជា​ឧបសគ្គ​ដ៏​ធំ​បំផុត​ផងដែរ​មុនពេល​ដែល​បក្ស​កុម្មុយនីស្ត​កាន់អំណាច​អាច​លុប​ចោលការ​រឹតបន្តឹង​សម្រាប់​កម្ចាត់​មេរោគ​ដ៏​តឹងរ៉ឹង​បំផុត​ចុងក្រោយបង្អស់​​របស់​ពិភពលោក​។​

​ចិន​បាន​រក្សា​ចំនួន​ករណី​ឆ្លង​ឱ្យ​នៅ​ទាប​ក្នុង​រយៈពេល​ពីរ​ឆ្នាំ​ជាមួយនឹង​យុទ្ធសាស្ត្រ “​កូ​វីដ​សូន្យ​” ដែល​ផ្តាច់​ទីក្រុង​នានា​ឱ្យ​នៅ​ឯកោ​និង​បង្ខាំង​មនុស្ស​រាប់លាន​នាក់​ឱ្យ​នៅ​តែ​ក្នុងផ្ទះ​របស់​ពួកគេ​។ ឥឡូវនេះ ខណៈ​ចិន​ដកខ្លួន​ចេញពី​វិធីសាស្ត្រ​នេះ ចិន​កំពុង​ប្រឈម​មុខ​នឹង​ការឆ្លង​រាលដាល ដែល​ប្រទេស​ផ្សេងទៀត​បាន​ឆ្លងកាត់​រួចហើយ​។​

​គណៈកម្មការ​សុខាភិបាល​បាន​កត់ត្រា​ចំនួន​អ្នក​ស្លាប់​ដោយសារកូ​វីដ​១៩​ត្រឹមតែ​ប្រាំ​មួយ​នាក់​ប៉ុណ្ណោះ​ក្នុង​ខែ​នេះ ដែល​នាំ​ឱ្យ​ចំនួន​អ្នក​ស្លាប់​ផ្លូវការ​របស់​ប្រទេស​ឡើងដល់ ៥.២៤១ នាក់​។ នេះ​ត្បិត​មាន​ការរាយការណ៍​ជាច្រើន​ពី​ក្រុមគ្រួសារ​សាច់ញាតិ ដែល​បាន​ស្លាប់​ក៏​ដោយ​៕

​គិលានុបដ្ឋាយិកា​ម្នាក់​រៀបចំ​ការចាក់​វ៉ាក់សាំង​កូ​វីដ​នៅមណ្ឌល​សុខភាព​សហគមន៍​នៅ​ទីក្រុង​ណាន​តុង ក្នុង​ខេត្ត​ជាំ​ង​ស៊ូ ភាគ​ខាងកើត​ប្រទេស​ចិន នៅ​ថ្ងៃទី ៩ ខែ​ធ្នូ ឆ្នាំ ២០២២