​ប្រែ​សម្រួល : កញ្ញា​ដា​លី​ស,បំណង (​ដេល្លី​ម៉េល​) ៖ អាជ្ញាធរ​បាន​និយាយថា ជនភៀសខ្លួន​រ៉ូ​ហ៊ីង​យ៉ា​បាន​ទទួល​ការព្យាបាល​ជាបន្ទាន់ បន្ទាប់​ពី​ទូក​ដឹក​មនុស្ស​ជិត ២០០​នាក់​បាន​ចូល​ចត​ក្នុង​ប្រទេស​ឥណ្ឌូនេស៊ី​​កាលពី​ថ្ងៃ​ចន្ទ​ទី​២៦​ធ្នូ​នៅ​ក្នុង​ការចូល​ចត​បែបនេះ​ជា​លើក​ទី​បួន​នៅក្នុង​ប្រទេស​នេះ​ក្នុង​រយៈពេល​ប៉ុន្មាន​ខែ​ថ្មីៗ​នេះ​។​

​សូមបញ្ជាក់​ថា ជា​រៀងរាល់ឆ្នាំ ជន​មូស្លីម​រ៉ូ​ហ៊ីង​យ៉ា​រាប់ពាន់នាក់ ដែល​ត្រូវ​បាន​ធ្វើទុក្ខបុកម្នេញ​យ៉ាង​ខ្លាំង​នៅក្នុង​ប្រទេស​មី​យ៉ាន់​ម៉ា​ដែល​កាន់​សាសនាព្រះពុទ្ធ​ភាគច្រើន​បាន​ប្រថុយ​ជីវិត​របស់​ពួក​​គេ​ក្នុងការ​ធ្វើ​ដំណើរ​តាម​សមុទ្រ​ដ៏​ថ្លៃ​និង​ដ៏​យូរ ដែល​ជា​ញឹកញាប់​តាម​ទូក​គុណភាព​អន់ ក្នុង​ការប៉ុនប៉ង​ទៅកាន់​ប្រទេស​ម៉ាឡេស៊ី​ឬ​ឥណ្ឌូនេស៊ី​។​

​អ្នកនាំពាក្យ​ប៉ូលិស​ក្នុង​តំបន់​លោក វី​ណា​ឌី (Winardy)​បាន​និយាយថា ទូក​ឈើ​បាន​មក​ដល់​នៅ​ម៉ោង​ប្រហែល ៥៖៣០ ល្ងាច​នៅ​ឆ្នេរ​មួយ​ក្នុង​ខេត្ត​អាចេ (Aceh)​ចុង​ភាគ​ខាងលិច​របស់​ឥណ្ឌូនេស៊ី​។​

​លោក​បាន​និយាយ​នៅក្នុង​សេចក្តីថ្លែងការណ៍​មួយ​ថា “​ជនអន្តោប្រវេស​ន៍រ៉ូ​ហ៊ីង​យ៉ា​១៨៥​នាក់​បាន​ចូល​ចត​នៅ​ស្រុក​ភី​ឌី (Pidie)​។ តួលេខ​គឺ​បុរស​៨៣​នាក់ ស្ត្រី​៧០​នាក់ និង​កុមារ​៣២​នាក់​”​។​ជន​ភៀស​​ខ្លួន​ទាំង​នោះ​ត្រូវបាន​ផ្តល់​ជម្រក​បណ្ដោះអាសន្ន​នៅឯ​មណ្ឌល​មួយ​ក្នុងស្រុក ដោយ​បុគ្គលិក​សុខាភិបាល​កំពុង​ព្យាបាល​អ្នក​ឈឺ​។​

​យោងតាម​អ្នកកាសែត​របស់​ទីភ្នាក់ងារ​សារព័ត៌មាន AFP បានឱ្យដឹងថា អ្នកខ្លះ​ហាក់​ទន់ខ្សោយ​និង​ស្គម​ខ្លាំង ហើយ​ត្រូវបាន​បន្តោង​សេរ៉ូម​ដោយ​បុគ្គលិក​ពេទ្យ​។​

​បុគ្គលិក​សុខាភិបាល​ម្នាក់​បាន​ប្រាប់ AFP ថា អ្នកខ្លះ “​ទទួលរង​ការ​ខះ​ជាតិ​ទឹក​ធ្ងន់ធ្ងរ​។ កុមារ​ខ្លះ​ក្អួត​”​។​

​ព័ត៌មាន​លម្អិត​អំពី​រយៈពេល​និង​ស្ថានភាព​នៃ​ការធ្វើដំណើរ​របស់​ពួកគេ​មិន​អាច​រកបាន​ភ្លាមៗ​នោះទេ ប៉ុន្តែ​យុវជន​ដែល​មក​ដល់​ម្នាក់​បាន​និយាយថា ពួកគេ​បាន​ចេញដំណើរ​ពី​ប្រទេស​បង់​ក្លា​ដែស​។​

​អ៊ូ​ម៉ា ហ្វា​រូក (Umar Faruq) អាយុ ១៤ ឆ្នាំ​បាន​និយាយថា “​ពួកយើង​មកពី​ជំរំ​ជនភៀសខ្លួន​រ៉ូ​ហ៊ីង​យ៉ា​នៅ​ប្រទេស​បង់​ក្លា​ដែស​ក្នុង​ក្តីសង្ឃឹម​ថា ឥណ្ឌូនេស៊ី​នឹង​ផ្តល់​ឱ្យ​យើង​នូវ​ឱកាស​នៃ​ការអប់រំ​”។

ជនភៀសខ្លួន​រ៉ូ​ហ៊ីង​យ៉ា​១៨៥​នាក់​ត្រូវបាន​ព្យាបាល​ភ្លាមៗ​កាលពី​ថ្ងៃ​ចន្ទ​នៅ​ខេត្ត​អាឆេ​របស់​ឥណ្ឌូនេស៊ី

កាលពីថ្ងៃអាទិត្យជន​អ៊ីស្លាម​រ៉ូ​ហ៊ីង​យ៉ា​រាប់សិប​នាក់​ដែល​ហេវ​ហត់​និង​ខ្សោយ​ត្រូវបាន​ប្រទះឃើញ​នៅ​លើ​ឆ្នេរ​មួយ​ក្នុង​ខេត្ត​អាចេ​បន្ទាប់ពី​ពួកគេ​​ធ្វើ​ដំណើរ​ផ្សងព្រេង​ក្នុង​សមុទ្រ​អស់​ពេល​រាប់​សប្តាហ៍​។​​ក្រុម​ជនភៀសខ្លួន​ដែល​មាន​បុរស​សុទ្ធ៥៨​នាក់​នេះ បាន​ទៅ​ដល់​ឆ្នេរ​អ៊ី​នដ្រា​ប៉ាត្រា​(Indrapatra)​នៃ​ភូមិ​នេសាទឡា​ដុង​(Ladong)​កាលពីដើម​ថ្ងៃអាទិត្យ ។​ពួក​អ្នក​ភូមិ​ដែល​បាន​ឃើញ​ពួកគេ​នៅលើ​​ទូក​ឈើ​មួយ​បាន​ជួយ​ពួកគេ​អោយ​ឡើងគោក​និង​បន្ទាប់​មក​រាយការណ៍​ទៅ​អាជ្ញាធរ​។​

​មន្ត្រី​ឥណ្ឌូនេស៊ី​ម្នាក់​បាន​និយាយថា ពួក​គេ​មើល​ទៅ​ខ្សោយ​និង​ខ្សត់​ជាតិ​ទឹក ដោយ​ខ្លះ​ឈឺ​ក្រោយ​ការធ្វើដំណើរ​ក្នុង​សមុទ្រ​ដ៏​យូរ​។​ក្រោយ​ទទួល​ទឹក​និង​អាហារ​ពី​អ្នកភូមិ ពួកគេ​នៅ​រង់ចាំ​ការណែនាំ​ពី​ផ្នែក​​អន្តោប្រវេសន៍​និង​មន្ត្រី​មូលដ្ឋាន​។​

​សូមបញ្ជាក់​ថា ជន​អ៊ីស្លាម​រ៉ូ​ហ៊ីង​យ៉ា​ជាង​៧០០.០០០​នាក់​បាន​ភៀសខ្លួន​ចេញពី​មី​យ៉ាន់​ម៉ា​ទៅកាន់​បណ្តា​ជំរំ​នៅ​បង់​ក្លា​ដែ​សចាប់​តាំងពី​ខែ​សីហា​ឆ្នាំ​២០១៧ នៅពេល​យោធា​មី​យ៉ាន់​ម៉ា​ចាប់ផ្តើម​បង្ក្រាប​ក្នុងការ​​ឆ្លើយតប​នឹង​ការវាយប្រហារ​ដោយ​ក្រុម​ឧទ្ទាម​អ៊ីស្លាម​មួយ​នៅក្នុង​តំបន់​ជន​រ៉ូ​ហ៊ីង​យ៉ា​រស់នៅ​៕