​ប្រែ​សម្រួលៈ​បំណង​(​ដេល្លី​ម៉េល​)៖ ប្រធានាធិបតី​រុស្ស៊ី​លោក វ្ល៉ា​ឌី​មៀ ពូ​ទីន​បាន​ប្តេជ្ញា​បំផ្លាញចោល​ប្រព័ន្ធ​កាំជ្រួច​ស្ទាក់​កំទេច​ទំនើប​ធុន​ភែត​ធ្រៀ​ត​(Patriot)​ដែល​អាម៉េរិក​នឹង​បញ្ជូន​អោយ​អ៊ុ​យក្រែន​។​​លោក​ថា​១០០​ភាគរយ កងកម្លាំង​របស់​លោក​អាច​កំទេច​ប្រព័ន្ធ​សព្វាវុធ​មួយឈុត​ថ្លៃ​៦​លាន​ដុល្លារ​នេះ​។​

​ក្នុង​សុន្ទរកថា​មួយ​កាលពី​ថ្ងៃអាទិត្យ លោក​ទំនងជា​មិន​ញញើត​អី​បន្តិច​សោះ​នៅ​ពេល​ត្រូវ​បាន​សួរ​អំពី​ប្រព័ន្ធ​ការពារ​ដែន​អាកាស​ថ្មី​ដែល​អាម៉េរិក​នឹង​ផ្តល់​អោយ​អ៊ុ​យក្រែន​។​

​ប្រធានាធិបតី​រុស្ស៊ី​និយាយថា កងកម្លាំង​របស់​លោក​១០០​ភាគរយ​អាច​បំផ្លាញចោល​ប្រព័ន្ធ​ប្រឆាំង​យន្តហោះ​តំលៃ​៦​លាន​ដុល្លារ​នេះ​

​ពាក់ព័ន្ធ​ការផ្តល់​ប្រព័ន្ធ​កាំជ្រួច​ទំនើប​ដែល​អាច​ស្ទាក់​កំទេច​ទាំង​យន្តហោះ ដ្រូ​ន​និង​កាំជ្រួច​ហោះចូល​មកនេះ លោកពូ​ទីន​បាន​និយាយថា​«ពិតណាស់ យើង​អាច​កំទេច​វា ១០០​ភាគរយ​!»​។​

​យោង​តាម​គេហទំព័រ​វិមាន​ក្រឹម​ឡាំង ប្រធានាធិបតី​រុស្ស៊ី​បាន​និយាយថា «​ប្រព័ន្ធ​កាំជ្រួច​Patriot​នេះ​អាច​ត្រូវបាន​បញ្ជូន​ទៅ​អ៊ុយ​ក្រែន​រួច​ស្រេចទៅ​ហើយ​។​អោយ​ពួកគេ​ធ្វើទៅ រួចយើង​នឹង​បោសសម្អាត​វា​​ចោល​ទាំងអស់​»​។​

​ពូ​ទីន បាន​ចោទប្រកាន់​គូ​ប្រជែង​ភូមិសាស្ត្រ​នយោបាយ​របស់​ប្រទេស​លោក​ថា​មាន​បំណង​ហែក​រុស្ស៊ី គឺ​រុស្ស៊ី​ប្រវត្តិសាស្ត្រ ជា​ចំរៀកៗ​។​លោក​ប្រើពាក្យ​«​រុស្ស៊ី​ប្រវត្តិសាស្ត្រ​»ចង់​និយាយ​ថា​ប្រជាជន​អ៊ុយ​ក្រែ​ននិង​​រុស្ស៊ី​ជា​ប្រជាជន​តែ​មួយ ដែល​វា​រំលោភ​អធិបតេយ្យភាព​អ៊ុយ​ក្រែ​ន​និង​ធ្វើ​អោយ​ទៅជា​ស្របច្បាប់​សង្គ្រាម​ចំណាស់​ដប់​ខែ​របស់​លោក​នៅ​អ៊ុ​យក្រែន​។​

​លោក​ថា «​បំបែក​ហើយ​កំចាត់ នេះ​ជា​អ្វី​ដែល​ពួកគេ​តែងតែ​ស្វះស្វែង​ធ្វើអោយ​សំរេច​បាន​និង​កំពុង​ប្រឹងប្រែង​ធ្វើ​វា​។​តែ​គោលដៅ​របស់​យើង​ផ្សេង វា​គឺ​ត្រូវ​បង្រួបបង្រួម​ប្រជាជន​រុស្ស៊ី​»​។​

​លោក​ក៏​បាន​ប្រកាសថា រដ្ឋាភិបាល​របស់​លោក​បាន​ធ្វើ​ក្នុងទិសដៅ​ត្រឹមត្រូវ​…«​ដើម្បី​ការពារ​ផលប្រយោជន៍​ជាតិ ផលប្រយោជន៍​ពលរដ្ឋ​របស់​យើង​»​។​

​បើ​តាម​សារព័ត៌មាន​លោកខាងលិច ទាហាន​រុស្ស៊ី​ដល់​ទៅ​ជាង​១០០.០០០​នាក់​ត្រូវបាន​សម្លាប់​ក្នុង​សង្គ្រាម​ដប់​ខែ​មកនេះ និង​រថក្រោះ​រុស្ស៊ី​ប្រមាណ​ពាក់កណ្តាល​ត្រូវបាន​បំផ្លាញ​ចោល ខណៈ​ដែល​គ្រាប់រំសេវ​​ប្រើ​ស្ទើរ​អស់​ពី​ឃ្លាំង​។​

​ក្នុងពេល​ជាមួយគ្នា រដ្ឋាភិបាល​ទីក្រុង​គៀវ​បានបញ្ជាក់​ថា កងកម្លាំង​របស់​ខ្លួន​នឹង​មិន​ឈប់​ប្រយុទ្ធ​ទេ​ដរាបណា​ទាហាន​រុស្ស៊ី​នៅ​មិនទាន់​វាយ​បណ្តេញចេញ​ពី​ទឹកដី​អ៊ុយ​ក្រែន​អស់​។ចំណែក​រដ្ឋាភិបាល​របស់​វិមាន​ក្រឹម​​ឡាំង​ក៏​បាន​បញ្ជាក់​ហើយ​ថា ខ្លួន​បើកចំហរ​សំរាប់​ការចរចា​បញ្ចប់​សង្គ្រាម​ តែ​ក្នុង​លក្ខខណ្ឌ​ដែល​អ៊ុយ​ក្រែន​ព្រម​ទទួលស្គាល់​ទឹកដី​ដែល​ខ្លួន​វាយ​កាន់កាប់​និង​ដាក់​ជា​ឧបសម្ពន្ធ​នោះ​ជា​ផ្នែក​នៃ​ទឹកដី​រុស្ស៊ី​៕