​ប្រែ​សម្រួល : កញ្ញា​ដា​លី​ស (​ដេល្លី​ម៉េល​) ៖ រដ្ឋមន្ត្រីការបរទេស​រុស្ស៊ី​លោក សឺ​ហ្គេ ឡាវ​រ៉ូវ (Sergei Lavrov)​បាន​ផ្តល់​ឱសានវាទ​ដល់​អ៊ុយ​ក្រែន​កាលពី​ថ្ងៃ​ចន្ទទី​២៦​ធ្នូ​ឱ្យបំពេញ​សំណើ​របស់​រដ្ឋាភិបាល​ក្រុង​​មូ​ស្គូ រួម​ទាំង​ការប្រគល់​ទឹកដី​ដែល​រុស្ស៊ី​គ្រប់គ្រង ឬ​មិន​អ៊ីចឹង​ទេ​កងទ័ព​របស់​ខ្លួន​នឹង​សម្រេច​ចិត្ត​លើ​បញ្ហា​នេះ ពោលគឺ​មួយថ្ងៃ​គត់​បន្ទាប់​ពី​ប្រធានាធិបតី វ្ល៉ា​ឌី​មៀ ពូ​ទីន និយាយថា​លោក​បើកចំហ​​សម្រាប់​កិច្ចចរចា​។​

​រដ្ឋាភិបាល​ក្រុង​គៀវ​និង​សម្ពន្ធ​មិត្ត​លោកខាងលិច​របស់​ខ្លួន​បាន​ច្រាន​ចោល​ការផ្តល់ជូន​របស់​លោកពូ​ទីន​ក្នុង​ការចរចា​ក្នុងពេល​ដែល​កងកម្លាំង​របស់​លោក​បាន​វាយប្រហារ​ទីក្រុង​នានា​របស់​អ៊ុ​យក្រែន​​ដោយ​មី​ស៊ី​ល​និង​គ្រាប់​រ៉ុក្កែត ហើយ​រដ្ឋាភិបាល​ក្រុង​មូ​ស្គូ​នៅតែ​បន្ត​ទាមទារ​ឱ្យ​រដ្ឋាភិបាល​ក្រុង​គៀវ​ទទួលស្គាល់​ការដណ្តើម​កាន់កាប់​របស់​ខ្លួន​លើ​ទឹកដី​អ៊ុ​យក្រែ​ន​មួយ​ភាគ​ប្រាំ​។​

​ទីក្រុង​គៀវ​និយាយថា ខ្លួន​នឹង​ប្រយុទ្ធ​រហូត​ដល់​ទាហាន​រុស្ស៊ី​ដកចេញ​អស់​។​

​ទីភ្នាក់ងារ​សារព័ត៌មាន​រដ្ឋ TASS​បាន​ដកស្រង់​សម្តី​លោក​ឡាវ​រ៉ូវ​កាលពី​ថ្ងៃ​ចន្ទថា “​សំណើ​របស់​យើង​សម្រាប់​ការ​រំសាយកងទ័ព​និង​ការលុបបំបាត់​ពួក​ណា​ស៊ី​និយម​ចេញពី​ទឹកដី​ដែល​គ្រប់គ្រង​ដោយ​របប​នេះ ពោលគឺ​ការលុបបំបាត់​ការគំរាមកំហែង​ដល់​សន្តិសុខ​របស់​រុស្ស៊ី​ចេញពី​ទីនោះ រួម​ទាំង​ទឹកដី​ថ្មី​របស់​យើង ត្រូវបាន​ដឹង​យ៉ាងច្បាស់​ចំពោះ​សត្រូវ​”​។

“​ចំណុច​សំខាន់​គឺ​សាមញ្ញ ៖ បំពេញ​តាម​សំណើ​សម្រាប់​ផលប្រយោជន៍​ផ្ទាល់ខ្លួន​របស់​អ្នក​។ បើ​មិន​ដូច្នេះ​ទេ​បញ្ហា​នឹង​ត្រូវ​សម្រេច​ដោយ​កងទ័ព​រុស្ស៊ី​”​។​

​លោកពូ​ទីន​បានចាប់ផ្តើម​ការ​លុកលុយ​របស់​លោក​នៅ​អ៊ុយ​ក្រែន​កាលពី​ថ្ងៃទី ២៤ ខែ​កុម្ភៈ ដោយ​ហៅ​វា​ថា​ជា “​ប្រតិបត្តិការ​ពិសេស​” ដើម្បី “​លុបបំបាត់​ពួក​ណា​ស៊ី​” និង “​លុបបំបាត់​យោធា​ចេញពី​អ៊ុ​យក្រែន​” ដែល​លោក​និយាយថា​ជា​ការគំរាមកំហែង​ដល់​រុស្ស៊ី​។ រដ្ឋាភិបាល​ក្រុង​គៀវ​និង​លោកខាងលិច​និយាយថា ការឈ្លានពាន​របស់​ពូ​ទីន​គ្រាន់តែ​ជា​ការដណ្តើមយក​ទឹកដី​របស់​ពួក​ចក្រពត្តិនិយម​ប៉ុណ្ណោះ​។​

​ខណៈ​សង្គ្រាម​បាន​ឈាន​ចូល​ដល់​ខែ​ទី ១១ របស់ខ្លួន កងកម្លាំង​រុស្ស៊ី​បាន​ចូលរួម​ក្នុងការ​ប្រយុទ្ធ​យ៉ាង​ខ្លាំងក្លា​នៅ​ភាគ​ខាងកើត​និង​ភាគខាងត្បូង​នៃ​ប្រទេស​អ៊ុ​យក្រែន បន្ទាប់​ពី​រង​បរាជ័យ​ក្នុង​សមរភូមិ​ដ៏​អាម៉ាស់​៕

រដ្ឋមន្ត្រីការបរទេស​រុស្ស៊ី​លោក សឺ​ហ្គេ ឡាវ​រ៉ូវ