ប្រែ​សម្រួល : កញ្ញា​ដា​លី​ស (​ដេល្លី​ម៉េល​) ៖ រដ្ឋមន្ត្រីការបរទេស​អ៊ុយ​ក្រែន​បាន​និយាយថា អ៊ុយ​ក្រែន​មាន​បំណង​រៀបចំ​កិច្ចប្រជុំ​កំពូល​សន្តិភាព​នៅ​ចុងខែ​កុម្ភៈ​។​

​លោក ឌី​មីត្រូ គូ​ឡេ​បា (Dmytro Kuleba)​បាន​និយាយថា អ៊ុយ​ក្រែន​នឹង​ធ្វើ​អ្វី​គ្រប់យ៉ាង​ដែល​ខ្លួន​អាច​ធ្វើបាន​ដើម្បី​យកឈ្នះ​សង្គ្រាម​នៅ​ឆ្នាំ ២០២៣ ដោយ​បន្ថែម​ថា ការទូត​តែងតែ​ដើរ​តួនាទី​សំខាន់​​ហើយ​កិច្ចប្រជុំ​កំពូល​សន្តិភាព​ដ៏​មាន​សក្តានុពល​មួយ​អាច​នឹង​ធ្វើឡើង​នៅ​អង្គការសហប្រជាជាតិ ដោយមាន​អគ្គលេខាធិកា​រលោក អង់​តូ​នីញ៉ូ គូថេ​រ៉េស ជា​អ្នក​សម្រុះសម្រួល​នៃ​ការចរចា​។​

​កិច្ចប្រជុំ​កំពូល​សន្តិភាព​ដ៏​មាន​សក្តានុពល​នេះ​អាច​ធ្វើឡើង​មួយ​ឆ្នាំ​បន្ទាប់ពី​រុស្ស៊ី​បាន​ឈ្លានពាន​អ៊ុយ​ក្រែន​នៅ​ចុងខែ​កុម្ភៈ​ឆ្នាំ ២០២២​។​

​ការអត្ថាធិប្បាយ​របស់​រដ្ឋមន្ត្រីការបរទេស​អ៊ុយ​ក្រែន​បាន​កើត​ឡើង​តែ​២៤​ម៉ោង​បន្ទាប់ពី​លោក វ្ល៉ា​ឌី​មៀ ពូ​ទីន លើកឡើងថា​លោក​ត្រៀម​ខ្លួន​អង្គុយ​ចរចា​។​

​នៅក្នុង​បទសម្ភាសន៍​ជាមួយ​ទីភ្នាក់ងារ​សារព័ត៌មាន Associated Press បន្ទាប់​ពី​ដំណើរ​ទស្សនកិច្ច​របស់​ប្រធានាធិបតី​អ៊ុយ​ក្រែនលោក វ៉ូ​ឡូ​ឌី​មៀ ហ្សេ​លេន​ស្គី​នៅ​សហរដ្ឋ​អាម៉េរិក​កាលពី​សប្តាហ៍​​មុន លោក ឌី​មីត្រូ គូ​ឡេ​បា បាន​និយាយថា លោក “​ពេញចិត្ត​ជាខ្លាំង​” ចំពោះ​ដំណើរ​ទស្សនកិច្ច​នេះ​និង​កិច្ចពិភាក្សា ដែល​បាន​កើតឡើង​។​

​លោក​គូ​ឡេ​បាបាន​និយាយថា “​រាល់​សង្គ្រាម​ទាំងឡាយ​បញ្ចប់​ដោយ​វិធី​ការទូត​។ រាល់​សង្គ្រាម​បញ្ចប់​ដោយសារ​សកម្មភាព​ដែល​បាន​ធ្វើឡើង​នៅ​សមរភូមិ​និង​នៅ​តុ​ចរចា​។​អង្គការសហប្រជាជាតិ​អាច​​ជា​កន្លែង​ដ៏​ល្អ​បំផុត​សម្រាប់​រៀបចំ​កិច្ចប្រជុំ​កំពូល​នេះ ពី​ព្រោះនេះ​មិនមែន​ជា​ការ​កាន់ជើង​ចំពោះ​ប្រទេស​ណាមួយ​នោះទេ​។ នេះ​គឺ​អំពី​ការនាំ​អ្នក​រាល់គ្នា​មក​តុ​ចរចា​”​។​

​លោក​គូ​ឡេ​បាក៏​បាន​និយាយ​ផងដែ​រ​ថា ប្រសិនបើ​រុស្ស៊ី​ត្រូវបាន​អញ្ជើញ​ឱ្យ​ចូលរួម​ក្នុង​កិច្ចប្រជុំ​កំពូល​នេះ រុស្ស៊ី​គួរតែ​ប្រឈម​មុខ​នឹង​ការកាត់ទោស​ពី​បទ​ឧក្រិដ្ឋកម្ម​សង្គ្រាម​នៅ​តុលាការ​អន្តរជាតិ​ជាមុនសិន​។​

​លោក​បាន​និយាយថា “​ពួកគេ​អាច​ត្រូវបាន​អញ្ជើញ​ឱ្យ​ចូលរួម​ក្នុង​ដំណើការ​នេះ​តាម​វិធី​នេះ​តែប៉ុណ្ណោះ​”​។​

​រដ្ឋមន្ត្រីការបរទេស​អ៊ុយ​ក្រែនក៏​បាន​និយាយ​សម្រា​ល​ផងដែរ​នូវ​ការអត្ថាធិប្បាយ​របស់​អាជ្ញាធរ​រុស្ស៊ី​ដែល​ថា​ពួកគេ​ត្រៀម​ខ្លួន​រួច​ជាស្រេច​សម្រាប់​ការចរចា​បើទោះបីជា​មាន​ការលើកឡើង​កាលពី​ថ្ងៃអាទិត្យ​​ពី​លោក វ្ល៉ា​ឌី​មៀ ពូ​ទីន ថា​ពួកគេ​បាន​ត្រៀម​ខ្លួន​ហើយ​ក៏​ដោយ​។​

​លោក​គូ​ឡេ​បាបាន​និយាយថា “​ពួកគេ​និយាយ​ជា​ទៀងទាត់​ថា ពួកគេ​ត្រៀម​ខ្លួន​សម្រាប់​ការចរចា តែ​មិនមែន​ជា​ការពិត​នោះ​ទេ​ពីព្រោះ​អ្វី​គ្រប់យ៉ាង​ដែល​ពួកគេ​ធ្វើ​នៅលើ​សមរភូមិ​បង្ហាញឱ្យឃើញ​​ផ្ទុយ​ពី​នេះ​ទាំងអស់​”៕

​រដ្ឋមន្ត្រីការបរទេស​អ៊ុ​យក្រែន លោក ឌី​មីត្រូ គូ​ឡេ​បា