​ប្រែ​សម្រួលៈ​បំណង​(Xinhua,Cgtn)៖ យន្តហោះ​ដឹក​អ្នកដំណើរ​ផលិត​ដោយ​ក្រុមហ៊ុន​ចិន C919​បានសំរេច​ការហោះហើរ​សំរាប់​វាយ​តំលៃ​និង​កែសម្រួល​ប្រព័ន្ធ​ហោះហើរ​និង​សុវត្ថិភាព​របស់​វា​ជា​លើកដំបូង​​កាលពី​ថ្ងៃ​ចន្ទ ដោយ​បាន​យន្តហោះ​បាន​ចេញពី​ទីក្រុង​សៀង​ហៃ និង​ចុះ​នៅ​អាកាសយានដ្ឋាន​ក្រុង​ប៉េកាំង​។​

​វា​កត់សំគាល់​ការចាប់​ផ្តើម​​ដំណើរការ​ហោះហើរ​វាយ​តំលៃ​រយៈពេល​១០០​ម៉ោង ដែល​នឹង​ត្រូវ​អនុវត្ត​រហូតដល់​ពាក់កណ្តាល​ខែ​កុម្ភៈ​ឆ្នាំ​២០២៣​។​ដំណើរការ​សាកល្បង​នេះ ធ្វើឡើង​ដើម្បី​បញ្ជាក់​លើ​ជំនឿ​ចិត្ត​​ទៅលើ​យន្តហោះ​ដឹកអ្នកដំណើរខ្នាតធំដំបូងរបស់ចិនសំរាប់ប្រតិបត្តិ​ការ​ពាណិជ្ជកម្ម គឺ​ដើម្បី​ធានា​ទាំង​សុវត្ថិភាព​អ្នកដំណើរ​និង​ប្រសិទ្ធភាព​របស់​វា​។​

​សូមបញ្ជាក់​ថា C919 ជា​យន្តហោះ​ដឹក​អ្នកដំណើរ​ខ្នាត​ធំ​ផលិត​នៅក្នុង​ស្រុក​ចិន​ជា​លើកដំបូង​។​

​ដំណើរការ​ហោះហើរ​វាយ​តំលៃ​១០០​ម៉ោង​នេះ នឹង​នាំអោយ​គេ​ឃើញ​យន្តហោះ C919​ចុះ​ចត​នៅ​ទីក្រុង​ចិន​ជា​ច្រើន រួមមាន​ទីក្រុង​ប៉េកាំង ឆឹង​ឌូ​(Chengdu) ស៊ី​អាន​(Xi’an)​ហៃ​កូ​(Haikou)​និង​ឈី​ញ​​ដាវ​(Qingdao)​។​

​ក្រុមហ៊ុន​អាកាសចរណ៍​China Eastern Airlines​បាន​និយាយថា អាកាសយានិក អ្នក​បំរើការ​លើ​យន្តហោះ​និង​បុគ្គលិក​ថែ​ទាំង​ជួសជុល​បាន​ប​ញ្ចប់​ការហ្វឹកហាត់​រួចហើយ និង​ការហ្វឹកហាត់​​សំរាប់​បុគ្គលិក​ក្នុង​មុខតំណែង​សំខាន់ៗ​បាន​អនុវត្ត​រួច​ហើយ​ដែរ​។​

​លទ្ធផល​នៃ​ការហោះហើរ​វាយ​តំលៃ​នេះ​នឹង​ត្រូវ​ពិនិត្យ​វាយ​តំលៃ​ដោយ​រដ្ឋ​បាល​អាកាសចរណ៍​ស៊ីវិល​ចិន ហើយ​ការចេញ​ច្បាប់​អោយ​ដំណើរការ​យន្តហោះ​C919​នេះ​អាច​ធ្វើទៅបាន​ដរាបណា​លទ្ធផល​ហោះហើរ​​សាកល្បង​នេះ​បង្ហាញ​ថា​ល្អ​។​យន្តហោះ​​នេះ​ត្រូវ​រំពឹងថា​នឹង​ដាក់​អោយ​ដំណើរការ​ផ្លូវការ​ដោយ​ក្រុមហ៊ុន​China Eastern Airlines​នៅពេល​ណា​មួយ​ក្នុង​ឆ្នាំ​២០២៣៕

​យន្តហោះ​C919​ហោះ​សាកល្បង​ចេញពី​ទីក្រុង​សៀង​ហៃ​ទៅ​កាន់​ក្រុង​ប៉េកាំង​កាលពី​ថ្ងៃ​ចន្ទ​