​ប្រែ​សម្រួល : កញ្ញា​ដា​លី​ស (​ដេល្លី​ម៉េល​) ៖ កែវ​យឺត​អវកាស James Webb​បាន​បំភ្លឺ​ឆ្នាំ ២០២២ ជាមួយនឹង​រូបភាព​ដ៏​អស្ចារ្យ​នៃ​ចក្រវាល​ដំបូង បន្ទាប់​ពី​បន្ទុះ Big Bang​ដោយ​ប្រកាស​​អំពី​យុគសម័យ​ថ្មី​នៃ​តារាសាស្ត្រ​និង​ការ​លាតត្រដាង​ដែល​មិន​អាច​បរិយាយ​បាន​អំពី​លោកធាតុ​ក្នុង​ប៉ុន្មាន​ឆ្នាំ​ខាងមុខ​ទៀត​នេះ​។​

​ឧបករណ៍​សង្កេត​ដ៏​មាន​ឥទ្ធិពល​បំផុត​នេះ​គឺជា​អ្នក​ស្នង​តំណែង​បន្ត​ពី​កែវយឹត Hubble​ដែល​នៅតែ​ដំណើរការ​នៅឡើយ និង​បាន​ចាប់ផ្តើម​បញ្ជូន​រូបភាព​លោកធាតុ​ដំបូង​របស់​ខ្លួន​ក្នុង​ខែកក្កដា​។​

​លោក ម៉ាស​ស៊ី​ម៉ូ ស្ទី​យ៉ា​វែល​លី (Massimo Stiavelli) ប្រធានការិយាល័យ​បេសកកម្ម​កែវ​យឹត Webb នៅ​វិទ្យាស្ថាន​វិទ្យាសាស្ត្រ​កែវ​យឺត​អវកាស នៅ​ទីក្រុង​បាល់​ទី​ម័រ (Baltimore) បាន​និយាយថា “​វា​ធ្វើ​បាន​ប្រសើរ​ជាង​ការរំពឹង​ទុក​នៅ​ស្ទើរ​គ្រប់​វិស័យ​ទាំងអស់​”​។​

​ក្រុម​អ្នកវិទ្យាសាស្ត្រ​បាន​និយាយ​រួចហើយ​ថា កែវ​យឹត Webb ដែល​ឥឡូវ​ធ្វើ​គោចរ​ជុំវិញ​ព្រះអាទិត្យ​នៅ​ចម្ងាយ ១,៦ លាន​គីឡូម៉ែត្រ​ពី​ផែនដី គួរតែ​មាន​អាយុកាល ២០ ឆ្នាំ​ដែល​ខ្ពស់​ជាង​ពីរ​ដង​នៃ​អាយុ​​កាល​ធានា​របស់​វា​។​

​លោកស្ទី​យ៉ា​វែល​លីបា​ននិយាយថា “​ឧបករណ៍​នេះ​កាន់តែ​មាន​ប្រសិទ្ធភាព អុប​ទិ​កកាន់តែច្បាស់​និងមាន​លំនឹ​ងជាង​មុន​។ យើង​មាន​ឥន្ធនៈ​ច្រើនជាង​មុន ហើយ​យើង​ប្រើប្រាស់​ឥន្ធនៈ​តិច​ជាង​មុន​”​។​

​លំនឹង​គឺ​សំខាន់​ណាស់​សម្រាប់​ភាពច្បាស់​នៃ​រូបភាព​។​

​ប្រមុខ​ការិយាល័យ​បេសកកម្ម​នេះ​បាន​បន្ថែមថា “​តម្រូវការ​របស់​យើង​គឺ​ស្រដៀង​គ្នា​ទៅ​នឹង​កែវ​យឹត Hubble ទាក់ទង​នឹង​ភាពត្រឹមត្រូវ​នៃ​ការចង្អុល​ទិសដៅ​។ ហើយ​យើង​បាន​បញ្ចប់​ទៅ​ដោយ​ធ្វើ​បាន​ប្រសើរ​ជាង​មុន ៧ ដង​”​។​

​ចំណង់​សាធារណៈ​សម្រាប់​ការ​រក​ឃើញ​ផ្កាយ​ថ្មីៗ​ត្រូវបាន​ផ្គាប់ចិត្ត​ជាមួយ​ពណ៌​ធម្មជាតិ​ដ៏​ស្រស់​ស្អាត​នៃ​រូបភាព​របស់​កែវយឹត​នេះ​។​

​ពន្លឺ​ពី​កាឡាក់ស៊ី​ឆ្ងាយ​បំផុត​ត្រូវ​បាន​លាតសន្ធឹង​ពី​វិសាល​គម​ដែល​អាច​មើលឃើញ​ដោយ​ភ្នែក​ទទេ​រហូត​ដល់​ពន្លឺ​អ៊ី​ន​ហ្វ្រា​រ៉េដ ដែល​កែវយឹត Webb ត្រូវបាន​បំពាក់​ដើម្បី​សង្កេត​ជាមួយនឹង​គុណភាព​បង្ហាញ​ច្បាស់​ថ្លា​មិន​ធ្លាប់​មាន​ពីមុនមក​។​

​នេះ​អាចឱ្យ​កែវយឹត​នេះ​រកឃើញ​ពន្លឺ​ភ្លឺ​ច្បាស់​បំផុត​ពី​ចក្រវាល​ដ៏​សែនឆ្ងាយ​ក្នុង​កម្រិត​រូបភាព​ច្បាស់​មិន​ធ្លាប់​មាន​ពីមុនមក ដែល​អាច​មើល​ធ្លុះ​ដល់​វាំងនន​ធូលី​ដែល​បាន​បិទបាំង​ការកកើត​ផ្កាយ​នៅ​ក្នុង​កញ្ចុំ​ផ្កាយ​នេ​ប៊ូឡា (Nebula) និង​វិភាគ​បរិយាកាស​នៃ​ភព​ក្រៅ ដែល​ធ្វើ​គោចរ​ជុំវិញ​ព្រះអាទិត្យ​របស់​វា​នៅ​ខាង​ក្រៅ​ប្រព័ន្ធ​សុរិយគតិ​របស់​យើង​៕

​រូបភាព​ផ្កាយ​នៅ​ឆ្ងាយៗ ដែល​ថត​បាន​ដោយ​កែវ​យឹត Webb ក្នុង​ឆ្នាំ ២០២២