​ប្រែ​សម្រួល : កញ្ញា​ដា​លី​ស (​ស្ត្រេត​ថែមស៍​) ៖ ប្រធានាធិបតី​កូរ៉េខាងត្បូង​លោក យូ​ន ស៊ុក​យ៉ូល បាន​និយាយ​កាលពី​ថ្ងៃ​អង្គារ​ទី​២៧​ធ្នូ​ថា លោក​នឹង​ជំរុញ​ការបង្កើត​អង្គភាព​យោធា​ដែល​មាន​ឯកទេស​ខាង​ដ្រូ​ន ដោយ​រិះគន់​ការឆ្លើយតប​របស់​យោធា​របស់​លោក​ចំពោះ​ការ​ឈ្លានពាន​ព្រំដែន​ដោយ​ដ្រូ​ន​របស់​កូរ៉េ​ខាងជើង​។​

​ដ្រូ​ន​របស់​កូរ៉េខាងជើង​ចំនួន​ប្រាំ​គ្រឿង​បាន​ឆ្លង​ចូល​ទៅក្នុង​ប្រទេស​កូរ៉េខាងត្បូង​កាលពី​ថ្ងៃ​ចន្ទ​ដោយ​ជំរុញ​ឱ្យ​រដ្ឋាភិបាល​ក្រុង​សេ​អ៊ូ​ល​ចេញ​យន្តហោះ​ចម្បាំង​និង​ឧទ្ធម្ភាគចក្រ​ដើម្បី​បាញ់​ទម្លាក់​ពួកវា​​នៅក្នុង​ការឈ្លានពាន​លើកដំបូង​ចាប់តាំងពី​ឆ្នាំ ២០១៧​។​

​ឧបទ្ទវហេតុ​នេះ​បាន​ធ្វើឱ្យ​មាន​ចម្ងល់​ឡើងវិញ​អំពី​ខែល​ការពារ​ដែនអាកាស​របស់​កូរ៉េ​ខាងត្បូង នៅពេល​ដែល​ខ្លួន​កំពុង​ព្យាយាម​ទប់ទល់​នឹង​ការគំរាមកំហែង​នុយក្លេអ៊ែរ​និង​មី​ស៊ី​ល​របស់​កូរ៉េខាងជើង​។​

​យោធា​បាន​បាញ់​ព្រមាន​ប្រហែល​១០០ គ្រាប់​ពី​ឧទ្ធម្ភាគចក្រ​ដែល​បំពាក់​កាំភ្លើងយន្ត ប៉ុន្តែ​បរាជ័យ​ក្នុង​ការ​ទម្លាក់ដ្រូន​ណាមួយ ខណៈ​ពួកវា​បាន​ហោះ​លើ​ទីក្រុង​ជាច្រើន​របស់​កូរ៉េ​ខាងត្បូង​រួម​ទាំង​រដ្ឋធានី​​សេ​អ៊ូ​ល​អស់​រយៈពេល​ប្រហែល​ប្រាំ​ម៉ោង​។​

​លោក​យូ​ន​បាន​ប្រាប់​កិច្ចប្រជុំ​គណៈ​រដ្ឋមន្ត្រី​ថា “​ឧបទ្ទវហេតុ​នេះ​បាន​បង្ហាញ​ពី​ការខ្វះខាត​យ៉ាងខ្លាំង​នៃ​ការត្រៀមខ្លួន និង​ការ​ហ្វឹកហ្វឺន​របស់​យោធា​យើង​អស់​រយៈពេល​ជាច្រើន​ឆ្នាំ​កន្លងមកនេះ​ហើយ​​បាន​បញ្ជាក់​យ៉ាង​ច្បាស់​ពី​តម្រូវការ​សម្រាប់​ការត្រៀមខ្លួន និង​ការហ្វឹកហ្វឺន​កាន់តែ​ខ្លាំង​ជាង​មុន​”​។​

​លោក​យូ​ន​បាន​ស្តីបន្ទោស​ការ​មិន​បាន​ត្រៀម​ខ្លួន​សម្រាប់​គោលនយោបា​យ​កូរ៉េខាងជើង “​ដ៏​គ្រោះថ្នាក់​” របស់​អ្នក​កាន់​តំណែង​មុន​របស់​គាត់ ដែល​ពឹងផ្អែក​លើ “​ចេតនា​ល្អ​” របស់​រដ្ឋាភិបាល​ក្រុង​ព្យុង​យ៉ាង និង សន្ធិសញ្ញា​យោធា​អន្តរ​កូរ៉េ​ឆ្នាំ ២០១៨ ដែល​ហាមឃាត់​សកម្មភាព​អរិភាព​នៅ​តំបន់​ព្រំដែន​។​

​លោក​បាន​បន្ថែមថា “​យើង​បាន​គ្រោង​នឹង​បង្កើត​អង្គ​ភាពដ្រូន​ដើម្បី​ត្រួតពិនិត្យ​និង​កំណត់​ទី​តាំង​ឡើង​វិញ​នូវ​ទីតាំង​យោធា​សំខាន់ៗ​របស់​កូរ៉េ​ខាងជើង​ហើយ​ឥឡូវនេះ​នឹង​ពន្លឿន​ផែនការ​នេះ​ឱ្យបាន​​ច្រើន​តាម​ដែល​អាច​ធ្វើទៅបាន​” ដោយ​ប្តេជ្ញា​ថា​នឹង​បង្កើន​សមត្ថភាព​ឃ្លាំមើល និង​ឈ្លបយកការណ៍​ជាមួយនឹង​ដ្រូ​ន​បំបាំងកាយ​ដ៏​ទំនើប​៕

ដ្រូ​ន​របស់​កូរ៉េខាងត្បូង​នៅក្នុង​សមយុទ្ធ​ប្រឆាំង​ភេរវកម្ម​ដើម្បី​ត្រៀម​ទប់ទល់​នឹង​ការវាយប្រហារ​ដោយសារ​ធាតុគីមី និង​ដ្រូ​ន​នៅ​កូរ៉េខាងត្បូង កាលពី​ថ្ងៃទី ២៧ ខែតុលា ឆ្នាំ ២០២២