​ប្រែ​សម្រួល : កញ្ញា​ដា​លី​ស (​ដេល្លី​ម៉េល​) ៖ ព្យុះ​បិសាច ដែល​បាន​សម្លាប់​មនុស្ស​រាប់​សិប​នាក់​នៅក្នុង​សហរដ្ឋ​អាម៉េរិក​កាលពី​ចុង​សប្តាហ៍​ថ្ងៃ​បុណ្យ​ណូអែល​បាន​បន្ត​បង្ក​ទុក្ខសោក​ដល់​រដ្ឋ​ញូវយ៉ក​និង​អ្នក​ធ្វើ​​ដំណើរ​តាម​ផ្លូវអាកាស​ទូទាំងប្រទេស​កាលពី​ថ្ងៃ​អង្គារ​ទី​២៧​ធ្នូ ខណៈ​រឿងរ៉ាវ​នានា​បាន​លេចឡើង​អំពី​គ្រួសារ​ជាប់គាំង​អស់​ជាច្រើន​ថ្ងៃ​ក្នុងអំឡុងពេល “​ព្យុះ​ព្រិល​ប្រចាំ​សតវត្សរ៍​”​។​

​ចំនួន​អ្នក​ស្លាប់​ដោយសារ​ព្យុះ​រដូវរងា​បាន​កើនឡើង​ដល់​ជាង​៥០ នាក់ បន្ទាប់ពី​ក្រុម​មន្ត្រី​បាន​បញ្ជាក់​ពី​អ្នកស្លាប់​ចំនួន​បី​នាក់​បន្ថែម​ទៀត​នៅ​តំបន់​បឹង​អេ​រី​ខោ​ន​ធី (Erie County)​នៅ​ភាគ​​ខាងលិច​រដ្ឋ​ញូវយ៉ក ដែល​ជា​ចំណុចកណ្តាល​នៃ​វិបត្តិ​។​

​លោក ប៊ី​រ៉ុន ប្រោ​ន (Byron Brown) អភិបាលក្រុង​បា​ហ្វ​ហ្វា​ឡូ (Buffalo) ដ៏​ធំ​បំផុត​របស់​តំបន់​មាត់​បឹង​នេះ ដែល​ជាប់គាំង​អស់​រយៈពេល​ប្រាំ​ថ្ងៃ​ដោយសារ​ព្រិល​ក្រាស់​និង​ការ​ដាច់​ចរន្តអគ្គិសនី បាន​សរសេរ​បង្ហោះ​លើ Twitter ថា នាយកដ្ឋាន​ប៉ូលិស​ក្រុង “​រំពឹង​ថា​ចំនួន​នេះ​នឹង​កើនឡើង​”​។

​លោកស្រី កា​ធី ហូ​ឈុល (Kathy Hochul) អភិបាលរដ្ឋ​ញូវយ៉ក និង​ជា​អ្នក​កើត​នៅ​ទីក្រុង​បា​ហ្វ​ហ្វា​ឡូ បាន​ពណ៌នា​ពី​ឥទ្ធិពល​ព្យុះ​នេះ​ថា​ស្រដៀង​នឹង “​តំបន់​សង្គ្រាម​”​។​

​លោកស្រី​ហូ​ឈុល​បាន​ប្រាប់​អ្នកយក​ព័ត៌មាន​កាលពី​ថ្ងៃ​ចន្ទ​ថា “​ពិត​ណាស់​វា​គឺជា​ព្យុះកំបុតត្បូង​ប្រចាំ​សតវត្សរ៍​”​។​

​ខណៈ​សីតុណ្ហភាព​ធ្លាក់ចុះ អ្នក​ធ្វើ​ដំណើរ​និង​អ្នកស្រុក​មួយចំនួន​ដែល​ភៀសខ្លួន​ចេញពី​ផ្ទះ​ត្រជាក់​របស់​ពួកគេ​បាន​ជាប់គាំង​នៅ​លើ​ផ្លូវ​ហាយវេ មិន​អាច​ជួយសង្គ្រោះ​បាន​ទេ​។​

​បញ្ហា​នេះ​កាន់តែ​មាន​ការលំបាក​ខ្លាំង​ទៀត នៅពេល​ដែល​តំបន់​មួយចំនួន​ត្រូវបាន​ចាត់ទុក​ថា​មិន​អាច​ឱ្យ​រថយន្ត​សង្គ្រោះ​ចូល​ទៅ​ដល់​បាន​រាប់សិប​ម៉ោង​ហើយ​រថយន្ត​កាយ​ព្រិល​មិន​អាច​បំពេញ​ការងារ​​បាន​ដោយសារ​តែ​ភាព​សាហាវ​នៃ​ព្យុះ ដែល​តម្រូវ​ឱ្យ​គេ​មក​ជួយ​អ្នក​ជួយ​សង្គ្រោះ​វិញ​ទៀត​ផង​ក្នុង​ករណីខ្លះ​៕

​ព្យុះ​ព្រិល​សម្លាប់​មនុស្ស​៥០​នាក់​នៅ​ទូទាំង​សហរដ្ឋ​អាម៉េរិក