​ប្រែ​សម្រួល : កញ្ញា​ដា​លី​ស (​ដេល្លី​ម៉េល​) ៖ ជនជាតិ​ស៊ែ​ប​កាលពី​ថ្ងៃ​អង្គារ​ទី​២៧​ធ្នូ​បាន​ដំឡើងរ​បាំង​បិទផ្លូវ​បន្ថែម​ទៀត​នៅ​ភាគ​ខាង​ជើងកូ​សូ​វ៉ូ​និង​បាន​ផ្គើន​នឹង​ការទាមទារ​របស់​អន្តរជាតិ​ដើម្បី​ដក​​ចេញ​នូវ​អ្វី​ដែល​បាន​ដាក់​បាំង​ផ្លូវ ពោលគឺ​មួយថ្ងៃ​បន្ទាប់​ពី​ស៊ែ​ប៊ី​បាន​ដាក់​កងទ័ព​រប​ស់​ខ្លួន​នៅ​ជិត​ព្រំដែន​ឱ្យ​ត្រៀមប្រយុទ្ធ​ក្នុង​កម្រិត​ខ្ពស់​។​

​របាំង​ថ្មី ដែល​ធ្វើ​ពី​ឡាន​ដឹក​ទំនិញ​ធុន​ធ្ងន់ បាន​ដំឡើង​នៅពេល​យប់​នៅ​ទីប្រជុំជន​មីត្រូ​វីកា (Mitrovica)​នៅ​ភាគ​ខាង​ជើងកូ​សូ​វ៉ូ​ដែល​បែងចែក​រវាង​ជនជាតិ​ស៊ែ​ប​កូ​សូ​វ៉ូ​និង​ជនជាតិដើម​អាល់​បា​នី ដែល​តំណាង​ឱ្យ​ចំនួន​ភាគច្រើន​នៅ​កូ​សូ​វ៉ូ​ទាំងមូល​។​

​វា​ជា​លើកទីមួយ​ហើយ​ចាប់តាំងពី​វិបត្តិ​ថ្មីៗ​នេះ​បាន​ចាប់ផ្តើម ដែល​ជនជាតិ​ស៊ែ​ប​បាន​បិទផ្លូវ​នៅក្នុង​ទីប្រជុំជន​សំខាន់​មួយ​។ រហូតមកទល់​ពេលនេះ របាំង​ត្រូវបាន​ដាក់​នៅ​លើ​ផ្លូវ​ដែល​នាំ​ទៅកាន់​ព្រំដែនកូសូ​វ៉ូ​-​ស៊ែ​ប៊ី​។​

​ប្រធានាធិបតី​ស៊ែ​ប៊ី លោក អា​ឡិច​សាន់​ឌឺ វូ​ស៊ិក (Aleksandar Vucic) បាន​និយាយថា លោក​បាន​បញ្ជា​ឱ្យ​កងទ័ព​ប្រុង​ជើងការ​ខ្ពស់បំផុត “​ដើម្បី​ការពារ​ប្រជាជន​របស់​យើង (​នៅ​កូ​សូ​វ៉ូ​)​និង​​ការពារ​ប្រទេស​ស៊ែ​ប៊ី​”​។​

​លោក​បាន​អះអាង​ថា រដ្ឋាភិបាល​ក្រុងព្រី​ស្ទីណា (Pristina) កំពុង​ត្រៀម “​វាយប្រហារ​” លើ​ជនជាតិ​ស៊ែ​ប​កូ​សូ​វ៉ូ​នៅ​ភាគ​ខាងជើង​ប្រទេស ហើយ​ប្រើ​កម្លាំង​ដកចេញ​នូវ​របាំង​បិទផ្លូវ ដែល​ជនជាតិ​ស៊ែ​ប​បាន​ដំឡើង​កាលពី ១៨ ថ្ងៃមុន​ដើម្បី​តវ៉ា​ប្រឆាំង​នឹង​ការចាប់ខ្លួន​អតីត​មន្ត្រីប៉ូលិស​ស៊ែ​ប​កូ​សូ​វ៉ូ​។​

​កាលពី​ថ្ងៃ​អង្គារ​លោក​វូ​ស៊ិ​ក​បាន​និយាយ​ទៅកាន់​អ្នក​សារព័ត៌មាន​រួមគ្នា​ជាមួយ​បុព្វ​ជិត​ស៊ែ​ប​ដែល​ត្រូវបាន​ហាមឃាត់​ដោយ​អាជ្ញាធរ​កូ​សូ​វ៉ូ​កាលពី​ថ្ងៃ​ចន្ទ​មិន​ឱ្យ​ចូល​កូ​សូ​វ៉ូ​និង​ចុះ​ទៅ​ព្រះវិហារ​ស៊ែ​ប​មជ្ឈិម​​សម័យ​នៅ​ទីនោះ មុន​ពេល​បុណ្យ​ណូអែល​របស់​សាសនា​គ្រិស្ត​អូ​ស្សូដ​ក់​ស៊ែប ដែល​ត្រូវ​ប្រារព្ធ​នៅ​ថ្ងៃទី ៧ ខែ​មករា​។​

​លោក​វ៉ូ​ស៊ិ​កបាន​រិះគន់​ខ្លាំងៗ​លើ​លោក​ខាងលិច​និង​អាជ្ញាធរ​ជនជាតិដើម​អាល់​បា​នី​របស់កូ​សូ​វ៉ូ​ចំពោះ​ផែនការ​រួមគ្នា​ដើម្បី “​បង្ក​ភាពចលាចល​និង​សម្លាប់​ជនជាតិ​ស៊ែ​ប​” ដែល​កំពុង​ការពារ​របាំង​បិទផ្លូវ​។​

​លោក​បាន​និយាយថា​”​គោលបំណង​របស់​ពួកគេ​គឺ​បណ្តេញ​ជនជាតិ​ស៊ែ​ប​ចេញពី​កូ​សូ​វ៉ូ​…​ជាមួយ​ជំនួយ​ពី​ភ្នាក់ងារ​របស់​ពួកគេ​នៅ​ទីក្រុង​បែ​ល​ក្រា​ដ​”​ដែល​ទំនង​សំដៅ​ទៅលើ​ក្រុមប្រឆាំង​ដ៏​កម្រ​និង​ប្រព័ន្ធ​​ផ្សព្វផ្សាយ​ឯករាជ្យ ដែល​រិះគន់​ការដោះស្រាយ​វិបត្តិកូសូ​វ៉ូ​និង​គោលនយោបាយ​ផ្តាច់ការ​ខ្លាំង​ឡើង​របស់​គាត់​។​

​ទោះយ៉ាងណា លោក​បាន​និយាយថា បច្ចុប្បន្ន​លោក​កំពុង​ចរចា​ជាមួយ​សហភាព​អឺរ៉ុប​និង​អ្នក​សម្រុះសម្រួល​របស់​ស​ហ​រដ្ឋ​អាម៉េរិក “​លើ​ការរក្សា​សន្តិភាព​និង​ការស្វែងរក​ដំណោះស្រាយ​សម្របសម្រួល​” សម្រាប់​វិបត្តិ​បច្ចុប្បន្ន​៕

ផ្លូវ​ឆ្លងកាត់​ទីប្រជុំជន​មីត្រូ​វីកាត្រូវ​បានបិទ​ដោយ​ជនជាតិ​ស៊ែប

​ទាហាន​ស៊ែ​ប​ប្រុង​ជើង​ការប្រយុទ្ធ​ខ្ពស់ ខណៈ​ភាព​តានតឹង​កើនឡើង​នៅ​កូ​សូ​វ៉ូ