​ប្រែ​សម្រួល : កញ្ញា​ដា​លី​ស (​ដេល្លី​ម៉េល​) ៖ នាយករដ្ឋមន្ត្រី​ជប៉ុន​លោក ហ្វ៊ុយ​មី​អូ គី​ស៊ី​ដា បាន​ប្រកាស​កាលពី​ថ្ងៃ​អង្គារ​ទី​២៧​ធ្នូ​ថា ជប៉ុន​នឹង​រឹតបន្តឹង​ការគ្រប់គ្រង​ព្រំដែន​សម្រាប់កូ​វីដ​១៩​ដោយ​តម្រូវ​​ឱ្យ​ធ្វើតេស្តិ៍​សម្រាប់​ភ្ញៀវ​ទាំង​អស់​ពី​ប្រទេស​ចិន​ចាប់ពី​ថ្ងៃ​សុក្រ​តទៅ សម្រាប់​ជា​វិធានការ​បន្ទាន់​បណ្តោះអាសន្ន​ប្រឆាំង​នឹង​កំណើន​ករណី​ឆ្លង​នៅ​ទីនោះ​។​

​ការប្រកាស​នេះ​ធ្វើឡើង​ប៉ុន្មាន​ថ្ងៃ​បន្ទាប់ពី​អង្គការ​សុខភាព​ពិភពលោក​បាន​និយាយថា ខ្លួន​មាន​ការព្រួយបារម្ភ​យ៉ាងខ្លាំង​អំពី​ការកើនឡើង​នៃ​របាយការណ៍​ករណី​ឆ្លង​ធ្ងន់ធ្ងរ​នៅ​ទូទាំង​ប្រទេស​ចិន បន្ទាប់​ពី​ប្រទេស​នេះ​បាន​បោះបង់​ចោល​ភាគច្រើន​នូវ​គោលនយោបាយ “​កូ​វីដ​សូន្យ​” របស់ខ្លួន​។​

​ការ​ធ្វើតេស្តិ៍​អង់​ទី​ហ្សែ​ន ដែល​ត្រូវបាន​ធ្វើឡើង​រួច​ហើយ​លើ​អ្នក​ចូល​មក​សង្ស័យ​មានកូ​វីដ​១៩ នឹង​តម្រូវ​ឱ្យធ្វើ​ជា​ចាំបាច់​សម្រាប់​មនុស្ស​ទាំង​អស់​ដែល​មកពី​ចិន​ដីគោក​។​អ្នក​ដែល​ធ្វើតេស្តិ៍​វិជ្ជមា​ននឹងត្រូវ​​ដាក់​ឱ្យ​នៅ​ដាច់​ដោយឡែក​រយៈពេល​ប្រាំពីរ​ថ្ងៃ​នៅឯ​កន្លែង​ដែល​បានកំណត់ ហើយ​សំណាករ​បស់​ពួកគេ​នឹង​ត្រូវ​ប្រើ​សម្រាប់​ការវិភាគ​ហ្សែ​ន​។​

​វិធានការ​នេះ​នឹង​ចាប់ផ្តើម​នៅ​ថ្ងៃ​សុក្រ ស្របពេល​ដែល​ជប៉ុន​ឈាន​ចូល​រដូវ​បុណ្យចូលឆ្នាំ​ថ្មី ដែល​កត់សម្គាល់​ដោយ​ពិធី​ជប់លៀង​និង​ការធ្វើដំណើរ​នៅពេលដែល​ការឆ្លង​មេរោគ​កូរ៉ូណា​ត្រូវ​គេ​រំពឹងថា​នឹង​​កើនឡើង​។​

​កាលពី​សប្តាហ៍​មុន ឥណ្ឌា​ក៏​បាន​បញ្ជា​ឱ្យ​ធ្វើ​តេ​ស្តិ៍​រក​កូ​វីដ​១៩​ផងដែរ​សម្រាប់​អ្នកដំណើរ​មក​ពី​ចិន ជប៉ុន ហុងកុង កូរ៉េខាងត្បូង និង​ថៃ​ខណៈ​បញ្ជា​ឱ្យធ្វើ​ចត្តា​ឡីស័​ក​សម្រាប់​អ្នក​ដែល​មាន​រោគសញ្ញា​ឬ​ធ្វើ​​តេស្តិ៍​វិជ្ជមាន​។ ឥណ្ឌា​ក៏​បាន​ចាប់ផ្តើម​ធ្វើតេស្តិ៍​ចោះៗ​លើ​អ្នកដំណើរ​អន្តរជាតិ​២​ភាគរយ ដែល​មក​ដល់​អាកាសយានដ្ឋាន​ផងដែរ​។​

​លោក​គី​ស៊ី​ដា​បាន​និយាយថា កង្វះ​ព័ត៌មាន​និង​តម្លាភាព​របស់​ចិន​អំពី​ការឆ្លង​កូ​វីដ​បាន​ធ្វើឱ្យមាន​ការលំបាក​ក្នុង​ការវាយតម្លៃ​និង​ដោះស្រាយ​វិធានការ​សុវត្ថិភាព​។ លោក​បាន​បន្តថា​មាន​ភាពខុសគ្នា​យ៉ាងខ្លាំង​រវាង​ព័ត៌មាន​ពី​អាជ្ញាធរ​ថ្នាក់លើ​និង​ថ្នាក់មូលដ្ឋាន និង​រវាង​រដ្ឋាភិបាល​និង​អង្គការ​ឯកជន​នានា​។ “​មាន​ការបារម្ភ​ខ្លាំង​ឡើង​នៅ​ជប៉ុន​។​យើង​បាន​សម្រេចចិត្ត​ចាត់វិធានការ​ពិសេស​បណ្តោះ​​អាសន្ន​ដើម្បី​ឆ្លើយតប​នឹង​ស្ថានភាព​នេះ​”​។​

​ថ្វីបើ​មាន​ការរីក​រាលដាល​មេរោគ​យ៉ាង​ទូលំ​ទូលាយ​ដែល​កំពុង​ធ្វើឱ្យប៉ះពាល់​ដល់​ធនធាន​វេជ្ជសាស្ត្រ​និង​រំខាន​ដល់​អាជីវកម្ម​យ៉ាងណាក៏ដោយ ក៏​ចិន​កាលពី​ថ្ងៃ​ចន្ទ​បាន​និយាយថា​អ្នកដំណើរ​ដែល​មក​​ដល់​ពី​បរទេស​នឹង​លែង​ត្រូវ​ធ្វើ​ចត្តា​ឡីស័​ក​ទៀត​ហើយ​ចាប់ពី​ថ្ងៃទី ៨ ខែ​មករា ទោះបីជា​លទ្ធផល​តេស្តិ៍​អវិជ្ជមាន​ក្នុងរយៈពេល ៤៨​ម៉ោង​នៃ​ការ​ចេញ​ដំណើរ​និង​ការពាក់​ម៉ាស់​ក្នុង​យន្តហោះ​នៅតែ​តម្រូវ​​ឱ្យ​មាន​ដដែល​ក៏ដោយ​៕

​ប្រជាជន​ចិន​ដើរ​ទៅ​ធ្វើការ​នៅ​ទីក្រុង​ប៉េកាំង​កាលពី​ថ្ងៃទី​២០​ខែ​ធ្នូ ឆ្នាំ​២០២២​