​ប្រែ​សម្រួល : កញ្ញា​ដា​លី​ស (​ដេល្លី​ម៉េល​) ៖ ប្រព័ន្ធ​ផ្សព្វផ្សាយ​រដ្ឋ​បាន​រាយការណ៍​កាលពី​ថ្ងៃ​ពុធ​ទី​២៨​ធ្នូ​ថា មេដឹកនាំ​កូរ៉េខាងជើង​លោក គីម ជុង​អ៊ុន​បាន​បង្ហាញ​នូវ​គោលដៅ​មិន​បាន​បញ្ជាក់​ជាច្រើន​​ដើម្បី​ពង្រឹង​អំណាច​យោធា​របស់​លោក​នៅ​ឆ្នាំ​ក្រោយ​នៅក្នុង​កិច្ចប្រជុំ​មួយ​របស់​មន្ត្រី​នយោបាយ​កំពូល នៅក្នុង​ការ​ចង្អុលបង្ហាញ​ថា លោក​នឹង​បន្ត​ការ​សម្ញែង​អាវុធ​ដ៏​បង្កហេតុ​របស់​លោក​បន្ត​ទៀត​។​

​សេចក្តីថ្លែងការណ៍​រប​ស់លោក​គីម​បាន​កើតឡើង​នៅពេល​ដែល​អរិភាព​ជាមួយ​គូប្រជែង​កូរ៉េខាងត្បូង​បាន​កើនឡើង​យ៉ាង​ខ្លាំង​នៅក្នុង​សប្តាហ៍​នេះ​ខណៈ​កូរ៉េខាងត្បូង​បាន​ចោទប្រកាន់​កូរ៉េខាងជើង​​ថា​បាន​បង្ហោះ​ដ្រូ​ន​ឆ្លងកាត់​ព្រំដែន​របស់​ខ្លួន​ជា​លើកដំបូង​ក្នុង​រយៈពេល​ប្រាំ​ឆ្នាំ​។

​នៅ​ឆ្នាំ​នេះ កូរ៉េ​ខាងជើង​បាន​ធ្វើកា​រ​សាកល្បង​មី​ស៊ី​ល​ជាច្រើន​លើក​រួចមកហើយ​នៅក្នុង​អ្វី​ដែល​អ្នកជំនាញ​ហៅ​ថា​ការប៉ុនប៉ង​ធ្វើ​ទំនើបកម្ម​ឃ្លាំង​អាវុធ​របស់​ខ្លួន​និង​បង្កើន​អានុភាព​របស់ខ្លួន​ក្នុងការ​​ដោះស្រាយ​នាពេល​អនាគត​ជាមួយ​សហរដ្ឋ​អាម៉េរិក​។​

​ក្នុងអំឡុង​សម័យប្រជុំ​កាលពី​ថ្ងៃ​អង្គារ លោក​គីម​បាន​វិភាគ​បញ្ហា​ប្រឈម​សន្តិសុខ​ថ្មី​នៅក្នុង​នយោបាយ​អន្តរជាតិ​និង​នៅ​ឧបទ្វីប​កូរ៉េ​ហើយ​បាន​បញ្ជាក់​ពី​គោលការណ៍​និង​ទិសដៅ​នានា​ដើម្បី​ទប់ទល់​នឹង​​ទំនាក់ទំនង​ពី​ខាងក្រៅ​និង​ការតស៊ូ​ប្រឆាំងនឹង​សត្រូវ​ដើម្បី​ការពារ​ផលប្រយោជន៍​ជាតិ និង​អធិបតេយ្យភាព នេះ​បើ​តាម​ទីភ្នាក់ងារ​សារព័ត៌មាន​កណ្តាល​កូរ៉េ​ផ្លូវការ (KCNA)​។​

KCNA បាន​និយាយ​ដោយ​មិន​បាន​បញ្ជាក់​លម្អិត​ថា លោក​គីម “​បាន​ដាក់ចេញ​នូវ​គោលដៅ​សំខាន់ៗ​ថ្មី​សម្រាប់​ការពង្រឹង​សមត្ថភាព​ការពារ​ខ្លួន​ដែល​ពឹងផ្អែក​លើ​ខ្លួនឯង ដែល​នឹង​ជំរុញ​ទៅ​មុខ​នៅ​ឆ្នាំ ២០២៣ ក្រោម​ស្ថានភាព​ប្រែប្រួល​ពហុភាគី​”​។​

​អ្នកសង្កេតការណ៍​ខ្លះ​និយាយថា គោលដៅ​ថ្មី​អាច​ទាក់ទង​នឹង​ការជំរុញ​របស់​លោក​គីម​ក្នុង​ការពង្រីក​ឃ្លាំង​អាវុធ​នុយក្លេអ៊ែរ​របស់​គាត់ និង​ណែនាំ​ប្រព័ន្ធ​អាវុធ​បច្ចេកវិជ្ជា​ខ្ពស់​ដូចជា​កាំជ្រួច​បំពាក់​ក្បាល​​គ្រាប់​ច្រើន​ប្រភេទ អាវុធ​រយៈ​ចម្ងាយ​ឆ្ងាយ​ដែល​រហ័ស​ជាង​មុន ផ្កាយរណប​ចារកម្ម និង​ដ្រូ​ន​ទំនើប​។ ពួកគេ​និយាយថា នៅ​ទីបំផុត​លោក​គីម​នឹង​មាន​បំណង​ប្រើប្រាស់​សមត្ថភាព​នុយក្លេអ៊ែរ​របស់គាត់ ដើម្បី​បង្ខំ​គូ​ប្រជែង​របស់​ខ្លួន​ឱ្យ​ទទួលស្គាល់​កូរ៉េខាងជើង​ជា​រដ្ឋ​នុយក្លេអ៊ែរ​ស្របច្បាប់ ជា​ឋានៈ​មួយ​ដែល​គាត់​គិតថា​មាន​សារៈសំខាន់​ក្នុង​ដក​ទណ្ឌកម្ម​អន្តរជាតិ​ពី​ប្រទេស​របស់​គាត់​។​

​កាលពី​ថ្ងៃ​ចន្ទ យោធា​កូរ៉េខាងត្បូង​បាន​បាញ់​ព្រមាន​និង​បើក​យន្តហោះ​ចម្បាំង​និង​ឧទ្ធម្ភាគចក្រ​ប្រដេញ បន្ទាប់ពី​បាន​រកឃើញ​អ្វី​ដែល​គេ​ហៅ​ថា​ដ្រូ​ន​របស់​កូរ៉េ​ខាងជើង​ចំនួន​ប្រាំ​គ្រឿង ដែល​បាន​រំលោភ​លើ​ដែនអាកាស​របស់​កូរ៉េខាងត្បូង​។ កូរ៉េខាងត្បូង​ក៏​បាន​បង្ហោះ​ដ្រូ​ន​ឃ្លាំ​មើល​ផ្ទាល់ខ្លួន​របស់​ខ្លួន​ឆ្លងកាត់​ព្រំដែន​ចូល​ទៅក្នុង​ប្រទេស​កូរ៉េខាងជើង​ជា​ការឆ្លើយតប​ផងដែរ​៕

មេដឹកនាំ​កូរ៉េខាងជើង​លោក គីម ជុង​អ៊ុន