​ប្រែ​សម្រួលៈ​បំណង​(​ដេល្លី​ម៉េល​)៖ ចំនួន​មនុស្ស​ស្លាប់​ដោយ​ទឹក​ជំនន់​នៅ​ហ្វីលីពីន​បាន​កើន​ដល់​២៦នាក់ នេះ​បើ​តាម​ការបញ្ជាក់​ពី​ពួក​មន្ត្រី​កាលពី​ថ្ងៃ​ពុធ ដោយ​ព្យុះ​ជាច្រើន​ទៀត​ត្រូវ​រំពឹងថា​នឹង​ទម្លាក់់​​ទឹកភ្លៀង​បន្ថែមទៀត​នៅ​តំបន់​ខាងត្បូង​និង​កណ្តាល​ប្រទេស​។​

​មនុស្ស​រាប់​ម៉ឺន​នាក់​ត្រូវ​បង្ខំ​អោយ​ភៀសខ្លួន​ចេញពីផ្ទះ​របស់​គេ​នៅ​ពេល​ការ​ធ្លាក់ភ្លៀង​ខ្លាំង​បាន​ពន្លិច​ភូមិ​ជាច្រើន ទីប្រជុំជន​និង​ផ្លូវ​ហាយវ៉េ​នៅ​ថ្ងៃបុណ្យ​គ្រី​សម៉ាស ដោយ​បង្អាក់​សកម្មភាព​អបអរ​សប្បាយ​​នៅក្នុង​ប្រជាជាតិ​មាន​អ្នក​កាន់​សាសនា​កា​តូ​លិច​ភាគច្រើន​មួយ​នេះ​។​

​យ៉ាងហោច​ណាស់​មនុស្ស​១៣​នាក់​បាន​ស្លាប់​ដោយ​ការ​លង់ទឹក​នៅ​ក្នុង​ខេត្ត មី​សាមី​ស អុក​ស៊ីដេនថ​ល​(Misamis Occidental)​នៅលើ​កោះ​មីន​ដា​ណាវ​ខាងត្បូង​។​មនុស្ស​២៦​នាក់​ទៀត​នៅ​បាត់​ខ្លួន​​និង​ប្រាំបួន​នាក់​រងរបួស​។​

​ខេត្ត មី​សាមី​ស អុក​ស៊ីដេនថ​ល ជួបការធ្លាក់ភ្លៀងឥតឈប់និងជន់លិចតាំងពីថ្ងៃ២៤ធ្នូ

​ផ្នែក​ឧតុនិយម​បាន​និយាយថា ការធ្លាក់ភ្លៀង​ពី​មធ្យម​ទៅ​ខ្លាំង​ទំនងជា​នឹងកើតមាន​នៅ​ទូទាំង​តំបន់​ខាងត្បូង​និង​កណ្តាល​នៅ​ថ្ងៃ​ពុធ និង​ព្រហស្បតិ៍​ដោយសារ​តែ​តំបន់​សម្ពាធ​ទាប​នៅ​ឯនាយ​ឆ្នេរ​ដែល​​អាច​វិវត្ត​ទៅ​ជា​វិសម្ពាធ​ត្រូពិ​ចមួយ​។​

​ក្នុងពេល​ជាមួយគ្នា ទីភ្នាក់ងារ​គ្រោះមហន្តរាយ​បាន​និយាយថា ការងារ​ជួយ​សង្គ្រោះ​កំពុង​ធ្វើ​ឡើង​ដើម្បី​ជួយ​មនុស្ស​នៅ​តំបន់​ជន់​លិច​ខ្លាំង នៅពេល​មនុស្ស​ជាង​៨១.០០០​នាក់​កំពុង​ជ្រក​តាម​មណ្ឌល​ភៀស​​ខ្លួន​។​

​ហ្វីលីពីន​ជាប់​ជា​ប្រទេស​ងាយ​រងគ្រោះ​បំផុត​ពី​ការប្រែប្រួល​អាកាសធាតុ និង​ពួក​អ្នកវិទ្យាសាស្ត្រ​បាន​ព្រមាន​ថា​ព្យុះ​ជាច្រើន​នឹង​ធ្វើដំណើរ​មក​កាន់​ប្រទេស​នេះ​ជាមួយនឹង​កម្លាំង​កាន់តែ​ខ្លាំង​ឡើងៗ​នៅពេល​​ផែនដី​កាន់តែ​ក្តៅ​ឡើង​៕

​ព្យុះ​និង​ទឹកជំនន់​វាយប្រហារ​ហ្វីលីពីន​ចំ​ថ្ងៃ​គ្រី​សម៉ាស​និង​បន្ត​ដល់​ចុង​ខែ​