​ប្រែ​សម្រួល : កញ្ញា​ដា​លី​ស (​ដេល្លី​ម៉េល​) ៖ ក្រុមហ៊ុន Tesla បាន​បញ្ចេញ​វីដេអូ​លឿនៗ​នៃ​ឡាន​ដឹកទំនិញ Semi​ដើរ​ដោយ​ថាមពល​អគ្គិសនី​ទាំងស្រុង​របស់​ខ្លួន ដែល​បើក​បរ​បាន​ចម្ងាយ ៨០០ គីឡូម៉ែត្រ ខណៈ​ផ្ទុក​ទម្ងន់​បាន​ជាង​៣៧​តោន​ក្នុង​ពេល​សាក​ភ្លើង​ពេញ​។​

​វីដេអូ​នេះ​បានបង្ហាញ​រថយន្ត​ដឹក​ទំនិញ​ធុន​ធំ​នេះ​ធ្វើដំណើរ​ពេញ​មួយ​យប់​និង​រុករក​តាម​ដងផ្លូវ​ហាយវេ​ជាច្រើន​ដោយ​សុវត្ថិភាព​។ អ្នកបើកបរ​មាន​វត្ត​មាន​ជាប់លាប់​រហូត​ក្នុង​ការបើកបរ​នេះ​។​

​ក្រុមហ៊ុន​របស់​លោក​អេ​ឡុន ម៉ាស​បានប្រគល់​រថយន្ត​ដឹកទំនិញ Semi ទី​មួយ​របស់​ខ្លួន​ឱ្យ​ទៅ​ក្រុមហ៊ុន PepsiCo កាលពី​ថ្ងៃ​ព្រហស្បតិ៍​សប្តាហ៍​មុន​ពោលគឺ​ប្រាំ​ឆ្នាំ​បន្ទាប់​ពី​រថយន្ត​នេះ​ត្រូវបាន​បង្ហាញ​​ជា​សាធារណៈ​ជា​លើកដំបូង​។ ក្រុមហ៊ុន​ម្ហូបអាហារ​និង​ភេសជ្ជៈ​នេះ​បាន​បញ្ជា​ទិញ​រថយន្ត​ដឹកទំនិញ​ចំនួន ១០០ គ្រឿង​ក្នុង​ឆ្នាំ ២០១៧​។​

​លោក​ម៉ា​សបាន​និយាយ​នៅក្នុង​ព្រឹត្តិការណ៍​ប្រគល់​រថយន្ត​ដឹកទំនិញ Semi កាលពី​ថ្ងៃ​ព្រហស្បតិ៍​ថា “​ប្រសិនបើ​អ្នក​ជា​អ្នក​បើក​ឡាន​ដឹក​ទំនិញ ហើយ​អ្នក​ចង់​បាន​ឡាន​ឡូយ​បំផុត​នៅលើ​ផ្លូវ នេះ​ហើយ​ជា​ឡាន​បែប​នោះ​”​។​

​លោក​បាន​បន្ថែមថា “​យើង​បាន​បញ្ចប់​ដំណើរការ​ដឹកទំនិញ​ដំបូង​របស់​យើង​ជាមួយ​នឹង​ចំនួន​ទំនិញ​ដ៏​ច្រើន​សន្ធឹកសន្ធាប់​របស់​ក្រុមហ៊ុន PepsiCo”​។​

​ត្រឡប់​ទៅ​ឆ្នាំ ២០២០ មហាសេដ្ឋី​បច្ចេកវិជ្ជា​លោក ប៊ី​ល ហ្គេត បានប្រកែក​នៅក្នុង​សារ​បង្ហោះ​មួយ​ថា រថយន្ត​ដឹកទំនិញ​អគ្គិសនី​នឹង “​ប្រហែលជា​មិន​ដំណើរការ​ទេ​” ដោយសារ​តែ​អាគុយ​នឹង​មាន​ទម្ងន់​ធ្ងន់​។​

​នៅពេលដែល​លោក​ម៉ាស​ត្រូវ​បាន​សួរ​អំពី​រឿង​នេះ​នៅលើ Twitter លោក​បាន​និយាយថា លោក​ហ្គេត​មិនដឹង​រឿងស្អី​នោះទេ​។​

​យោង​តាម​វេបសាយ​របស់​ក្រុមហ៊ុន Tesla រថយន្ត Semi បាន​ភ្ជាប់​មក​ជាមួយ​នូវ​លក្ខណៈ​សុវត្ថិភាព ដែល​អម​ជាមួយ​នឹង​ការគ្រប់គ្រង​ម៉ូទ័​រនិង​ហ្វ្រាំង​កម្រិត​ខ្ពស់​សម្រាប់​លំនឹង​និង​ការ​អូស​ទំនិញ​ក្នុង​គ្រប់​លក្ខខណ្ឌ​ទាំងអស់​។​

​ក្រុមហ៊ុន​ក៏​អះអាង​ដែរ​ថា អាគុយ​របស់​រថយន្ត Semi អាច​បញ្ចូល​ថ្ម​ពេញ ៧០ ភាគរយ​ក្នុងពេល​តែ ៣០ នាទី​ប៉ុណ្ណោះ​។​

​អ្នកបើកបរ​មាន​ទីតាំង​អង្គុយ​នៅ​កណ្តាល​ដើម្បី​ផ្តល់ឱ្យ​ពួកគេ​នូវ​ការមើលឃើញ​កាន់តែ​ប្រសើរ​ឡើង ខណៈ​ក្រុមហ៊ុន​និយាយថា ការ​រចនា​អគ្គិសនី​ទាំងស្រុង​នេះ​បាន​កាត់បន្ថយ​ទាំង​ហានិភ័យ​នៃ​ការ​ក្រឡាប់​និង​ការ​អង្គុយ​នៅ​ខាង​កាប៊ីន​ក្នុងករណី​មាន​គ្រោះថ្នាក់​។​

​ក្រុមហ៊ុន Pepsi និង​ក្រុមហ៊ុន​ដទៃ​ទៀត​ដូចជា UPS, FedEx, Walmart និង Anheuser-Busch ដែល​បាន​ចុះ​កុងត្រា​បញ្ជា​ទិញ​ទុក​ជាមុន នឹង​ប្រើប្រាស់​រថយន្ត Semi ដើម្បី​កាត់បន្ថយ​ការបំភាយ​ឧស្ម័ន​ផ្ទះក​ញ្ចក់​នៅ​គ្រា​ដែល​ប្រទេស​ជាច្រើន​កំពុង​ជួប​ការលំបាក​ក្នុង​ការសម្រេច​បាន​ការ​បញ្ចេញ​កាបូន្យ​សូន្យ ដែល​កំណត់​ដោយ​បណ្តា​ទីភ្នាក់ងារ​អន្តរជាតិ​ជាច្រើន​៕

រថយន្ត​ដឹកទំនិញ Semi ទី​មួយ​ត្រូវបាន​ប្រគល់ជូន​ក្រុមហ៊ុន Pepsi កាលពី​ថ្ងៃ​ព្រហស្បតិ៍