​ប្រែ​សម្រួលៈ​បំណង​(​ដេល្លី​ម៉េល​)៖​រុស្ស៊ី​និង​ចិនទើប​បញ្ចប់​សមយុទ្ធ​ទ័ពជើងទឹក​នៅក្នុង​សមុទ្រ​ចិន​ខាងកើត ក្រោយ​ការហ្វឹកហាត់​រួម​គ្នា​អស់​មួយ​សប្តាហ៍​ដែល​រួម​មាន​ការអនុវត្ត​ស្ទាក់ចាប់​នាវាមុជទឹក​របស់​​សត្រូវ​ក្នុង​ការ​ប្រដេញ​ក្នុង​ជំរៅ​សមុទ្រ និង​ការ​បាញ់កាំភ្លើង​ធំ​សំដៅ​នាវាចម្បាំង នេះ​បើ​តាម​ក្រសួង​ការពារជាតិ​រុស្ស៊ី​។​

​ទីភ្នាក់ងារ​សារព័ត៌មាន​ចិន​ស៊ីន​ហួរ​បាន​និយាយនៅថ្ងៃពុធនេះថា សមយុទ្ធ​ចាប់ពី​ថ្ងៃ​២១​ដល់​២៧​ធ្នូ​ឈ្មោះថា​«​អន្តរ​សកម្ម​ក្នុង​សមុទ្រ​ឆ្នាំ​២០២២»​រួម​មាន​កង​នាវា​ប៉ាស៊ីហ្វិក​របស់​រុស្ស៊ី​និង​ត្រូវបាន​អនុវត្ត​នៅក្នុង​ដែនទឹក​​នៅ​ឯនាយ​ក្រុង​ចូ​សាន​(Zhoushan)​និង​ថា​យ​ចូ​(Taizhou)​ក្នុង​ខេត្ត​ជេ​ជាំង​(Zhejiang)​របស់​ចិន ។​

ចំណែក​ក្រសួងការពារជាតិ​រុស្ស៊ី​បាន​និយាយថា «​ក្រុម​នាវា​ទៅ​ពី​កង​នាវា​ប៉ាស៊ីហ្វិក​និង​កងទ័ពជើងទឹក​របស់​កងទ័ព​រំដោះប្រជាជ​ន​ចិន​បានបញ្ចប់​ការងារ​ហ្វឹកហាត់​ក្នុង​ក្រប​ខណ្ឌ​សមយុទ្ធ​ទ័ពជើងទឹក​ទ្វេភាគី​។​​នាវា​នៃ​ប្រទេស​ទាំង​ពីរ ជាមួយ​នឹង​ការគាំទ្រ​ពី​កង​យន្តហោះ​ប្រឆាំង​នាវា​មុជទឹក បាន​ធ្វើ​ការស្វែងរក​នា​វា​មុជទឹក​រួមគ្នា និង​បាន​បាញ់​គ្រាប់​ចូល​ទឹក​»​។​

​ក្រសួង​បាន​ចេញផ្សាយ​វីដេអូ​ដែល​បង្ហាញ​នាវា​រុស្ស៊ី​និង​ចិន​មួយក្រុម​នៅក្នុង​សមុទ្រ​ចិន​ខាងកើត ដោយ​ទាហានជើងទឹក​រុស្ស៊ី​និយាយ​ជា​ភាសា​ចិន​ទៅកាន់​សម​ភាគី​ចិន​របស់គេ ហើយ​នាវា​រុស្ស៊ី​បាន​បាញ់​​កាំ​ជ្រួច​។​

​ដោយ​ស្ថិត​ក្រោម​សម្ពាធជុំទិស​និង​ទណ្ឌកម្ម​ពី​លោកខាងលិច រុស្ស៊ី​ឥឡូវ​ចាប់​ដៃគូ​ជាមួយ​ចិន​ដើម្បី​ទប់ទល់​ការ​គំរាម​ដឹកនាំ​ដោយ​អាម៉េរិក​៕