​ប្រែ​សម្រួល : កញ្ញា​ដា​លី​ស (​ដេល្លី​ម៉េល​) ៖ សហរដ្ឋ​អាម៉េរិក​និង​អ៊ីតាលី​បាន​ប្រកាស​អំពី​ការធ្វើតេ​ស្តិ៍​រក​កូវី​ដ​១៩​ជា​ចាំបាច់​សម្រាប់​អ្នកដំណើរ​មកពី​ប្រទេស​ចិន​ខណៈ​ការបោះបង់ចោល​ភ្លាមៗ​របស់​​រដ្ឋាភិបាល​ក្រុង​ប៉េកាំង​នូវ​វិធានការ​តឹងរ៉ឹង​ដើម្បី​ទប់ស្កាត់​កូវី​ដ​និង​ការកើនឡើង​នៃ​ករណី​ឆ្លង​បាន​បង្កចលាចល​ជុំវិញ​ពិភពលោក​។​

​មន្ទីរពេទ្យ​និង​កន្លែង​បូជាសព​នៅ​ទូទាំង​ប្រទេស​ចិន​បន្ត​ជោរជន់​ដោយ​អ្នកជំងឺ​និង​សាកសព ដែល​គេ​សង្ស័យ​ថា​ឆ្លងកូវី​ដ​១៩​ដែល​បាន​វាយប្រហារ​មនុស្ស​ចាស់​យ៉ាងធ្ងន់ធ្ងរ​។​

​ការកើនឡើង​ករណី​ឆ្លង​នៅ​រដូវរងា​នេះ​កើត​ឡើង​មុន​ថ្ងៃ​ឈប់សម្រាក​ចូល​ឆ្នាំ​ចិន​នៅ​ខែ​ក្រោយ​ដែល​ក្នុងនោះ​មនុស្ស​រាប់រយ​លាន​នាក់​រំពឹង​ធ្វើដំណើរ​ទៅ​កាន់​ស្រុកកំណើត​របស់​ពួកគេ​ដើម្បី​ជួបជុំ​ជា​​មួយ​សាច់ញាតិ​។​

​ដោយ​លើកឡើង​ពី​តម្រូវការ​ដើម្បី​ការពារ​សុខភាព​របស់​ជនជាតិ​អាម៉េរិក មជ្ឈមណ្ឌល​គ្រប់គ្រង​និង​បង្ការ​ជំងឺ​របស់​សហរដ្ឋ​អាម៉េរិក​បានប្រកាសថា ចាប់ពី​ថ្ងៃទី ៥ ខែ​មករា​អ្នក​ធ្វើ​ដំណើរ​តាម​យន្តហោះ​​ទាំងអស់​ដែល​មកពី​ចិន ត្រូវ​ផ្តល់​ការធ្វើ​តេស្តិ៍​អវិជ្ជ​មាន​ថ្មី​ដល់​ក្រុមហ៊ុន​អាកាសចរណ៍ មុន​ពេល​ពួកគេ​ចាកចេញ​។​

​មន្ត្រី​សុខាភិបាល​ជាន់ខ្ពស់​របស់​អាម៉េរិក​ម្នាក់​បាន​ប្រាប់​អ្នកយកព័ត៌មាន​នៅ​ក្នុង​សន្និសីទ​តាម​ទូរស័ព្ទ​ថា​”​ការកើនឡើង​យ៉ាង​រហ័ស​នៃ​ការ​ឆ្លងកូវី​ដ​១៩​ក្នុង​ប្រទេស​ចិន​បាន​បង្កើន​សក្តានុពល​សម្រាប់​​មេរោគ​កូរ៉ូណា​បំប្លែង​ថ្មីៗ​”​។​

​ទោះយ៉ាងណា មន្ត្រី​រូប​នោះ​បាន​និយាយថា រដ្ឋាភិបាល​ក្រុង​ប៉េកាំ​ង​បាន​ផ្តល់​ទិន្នន័យ​តិចតួច​អំពី​ចរាចរណ៍​នៃ​មេរោគ​បំប្លែង​នៅក្នុង​ប្រទេស​ចិន​ទៅកាន់​មូលដ្ឋាន​ទិន្នន័យ​សកល​ហើយ​ការ​ធ្វើតេស្តិ៍​និង​ការ​​រាយការណ៍​អំពី​ករណី​ឆ្លង​ថ្មីៗ​របស់​ខ្លួន​ក៏​បាន​ថយ​ចុះ​ដែរ​។​

​ចំណាត់ការ​របស់​សហ​រដ្ឋ​អាម៉េរិក​បាន​កើតឡើង​បន្ទាប់​ពី​អ៊ីតាលី ជប៉ុន ឥណ្ឌា និង​ម៉ាឡេស៊ី​បានប្រកាស​វិធានការ​ផ្ទាល់ខ្លួន​របស់​ពួកគេ​ដើម្បី​ការពារ​ប្រឆាំង​នឹង​ការ​នាំចូល​កូវី​ដ​បំ​ប្លែង​ថ្មី​ពី​ចិន​។​

​រដ្ឋ​មន្ត្រី​សុខាភិបាល​អ៊ីតាលី លោក អូ​រ៉ា​ហ្ស៊ី​អូ ស៊ី​ល​ឡា​ស៊ី (Orazio Schillaci)​បាន​និយាយ​កាលពី​ថ្ងៃ​ពុធ​ទី​២៨​ធ្នូ​ថា​”​ខ្ញុំ​បាន​បញ្ជា​ឱ្យ​ធ្វើ​តេ​ស្តិ៍​រក​កូ​វីដ​ជា​ចាំបាច់​និង​ការធ្វើតេ​ស្តិ៍ពា​ក់​ព័ន្ធនា​នា​​សម្រាប់​អ្នកដំណើរ​ទាំងអស់​ដែល​មកពី​ប្រទេស​ចិន​និង​ឆ្លងកាត់​ប្រទេស​អ៊ីតាលី​”​។​

​តៃវ៉ាន់​ក៏​និយាយ​កាលពី​ថ្ងៃ​ពុធ​ដែរ​ថា ខ្លួន​នឹង​ពិនិត្យ​អ្នក​ធ្វើ​ដំណើរ​មក​ពី​ចិនដីគោក​ដើម្បី​រក​មេរោគ​កូរ៉ូណា​៕

​អ្នកជំងឺ​កូ​វីដ​កំពុង​ណែន​ពេញ​មន្ទីរពេទ្យ​ក្នុង​ទីក្រុង​ធៀន​ជីន