​ប្រែ​សម្រួលៈ​បំណង​(​ស៊ីន​ហួរ​)៖ អាម៉េរិក​បាន​កត់ត្រា​ឃើញ​អ្នក​ឆ្លងកូវី​ដ​១៩​ផ្លូវការ​ជាង​១០០​លាន​នាក់​ហើយ​នៅ​រយៈពេល​ជិត​បី​ឆ្នាំ​មកនេះ​ចំ​ពេល​មាន​កំណើន​នៃ​ការឆ្លង​មួយ​លើក​ទៀត​ក្នុង​រដូវ​ធ្វើដំណើរ​​កម្សាន្ត​ច្រើន នេះ​បើ​តាម​ទិន្នន័យ​ចុងក្រោយ​របស់​មជ្ឈមណ្ឌល​គ្រប់គ្រង​និង​បង្ការ​ជំងឺ​អាម៉េរិក​(CDC)​។​

​ក្មេង​ទទួល​វ៉ាក់សាំង​កូវី​ដ​១៩​នៅ​ក្រុង​ឡូ​ស អ៊ែន​ជើ​ឡេស សហរដ្ឋ​អាម៉េរិក​កាល​ពី​ង្ងៃ​១៧​ធ្នូ ២០២២

​យោង​តាម​ទិន្នន័យ​ដែល​CDC​បាន​បង្ហោះ​កាលពី​ថ្ងៃ​ពុធ​ទី​២៨​ធ្នូ ចំនួន​អ្នក​ឆ្លងកូវី​ដ​១៩​នៅ​សហរដ្ឋ​អាម៉េរិក​ឡើងដល់ ១០០.២១៦.៩៨៣​នាក់ គិត​ត្រឹម​ថ្ងៃ​២១​ធ្នូ​។​

​ពួក​អ្នកជំនាញការ​បាន​និយាយ​ថា​ចំនួន​ឆ្លង​ពិតប្រាកដ​អាច​ខ្ពស់​ជាង​នេះ ដោយសារ​ប្រជាជន​អាម៉េរិក​អាចធ្វើតេ​ស្តិ៍​រក​មេរោគ​និង​ព្យាបាល​ដោយ​ខ្លួន​ឯង​នៅ​តាម​ផ្ទះ ដោយ​មិន​ឆ្លងកាត់​ការពិនិត្យ​និង​​ព្យាបាល​ដោយ​ភ្នាក់ងារ​របស់​ក្រសួង​សុខាភិបាល ខណៈ​មនុស្ស​ជា​ច្រើន​ថែម​ទាំង​មិនបាន​ធ្វើតេស្តិ៍​រក​មេ​រោគផង​។​

​ថម ហ្វ្រី​ដិន (Tom Frieden) អតីត​នាយក​CDC​ក្រោម​រដ្ឋបាល​លោក​អូ​បា​ម៉ា បាន​វាយ​តំលៃ​ថា ទិន្នន័យ​ដែល​បាន​រាយការណ៍​តិចជាង​ចំនួន​ឆ្លង​ជាក់ស្តែង​ជាង​ពាក់កណ្តាល​។​លោក​បាន​ប្រាប់​សារព័ត៌​​មាន​CNBC​ថា មាន​អ្នក​ឆ្លង​យ៉ាងតិច​២០០​លាន​នាក់​នៅ​អាម៉េរិក «​ដូច្នេះ​ទិន្នន័យ​ផ្លូវការ​នេះ​ជា​ចំណែក​តូច​មួយ​ប៉ុណ្ណោះ​។​បញ្ហា​នៅត្រង់ថា​តើ​យើង​មាន​បាន​ត្រៀម​ខ្លួន​សំរាប់​ការផ្ទុះកូ​វីដ​១៩​មួយលើកទៀត​​ហើយ​ឬ​នៅ​»​។​

​ជេន​នី​ហ្វើ នូ​ហ្ស៍​ហ្សូ​( Jennifer Nuzzo)​អ្នកជំនាញ​រោគ​ឆ្លង​និង​ជា​នាយក​មជ្ឈមណ្ឌល​ជំងឺឆ្លង​នៅ​សកល​វិទ្យាល័យ​សុខាភិបាល​ប្រោន​(Brown)​បាន​និយាយថា​«​វា​ពិបាក​នឹង​បញ្ឈប់​វីរុស​នេះ ហើយ​វា​ជា​​ហេតុផល​មួយ​ដែល​យើង​បង្វែរ​ការយកចិត្តទុកដាក់​លើ​ការ​ចូល​ដេកពេទ្យ​និង​ការស្លាប់ ដោយ​មិន​ត្រឹម​គ្រាន់តែ​រាប់​ចំនួន​ឆ្លង​ទេ​»​។​

​នៅ​អាម៉េរិក អ្នកជំងឺ​កូវី​ដ​១៩​ជាង​១,០៨​លាន​នាក់​បាន​ស្លាប់​គិត​ចាប់តាំងពី​ពេល​ផ្ទុះ​ជំងឺ​នេះ​ដំបូង​មក គឺ​ច្រើន​ជាង​ប្រទេស​ណាៗ​ទាំងអស់​នៅក្នុង​លោក​។

​ប្រជាជន​ដើរកាត់​កន្លែង​ធ្វើតេស្តិ៍​រក​កូវី​ដ​១៩​នៅ​ក្រុង​ញូវយ៉ក កាលពី​ថ្ងៃ​៧​ធ្នូ ២០២២

​អាម៉េរិក​បច្ចុប្បន្ន ជា​មធ្យម​មាន​អ្នក​ឆ្លង​ថ្មី​ប្រមាណ​៦៥.០០០​នាក់ ចូល​ដេកពេទ្យ​៥.០០០​នាក់​និង​ស្លាប់​៣៩០​នាក់​ក្នុង​មួយថ្ងៃៗ​ដោយ​ជំងឺ​កូ​វូដ​១៩ នេះ​បើ​តាម​ទិន្នន័យ​របស់​CDC៕