​ប្រែ​សម្រួល : កញ្ញា​ដា​លី​ស (​ដេល្លី​ម៉េល​) ៖ រដ្ឋមន្ត្រី​ការពារជាតិ​របស់​អ៊ីស្រាអែល​បាន​និយាយ​កាលពី​ថ្ងៃ​ពុធ​ទី​២៨​ធ្នូ​ថា អ៊ីស្រាអែល​អាច​នឹង​វាយប្រហារ​ទីតាំង​នុយក្លេអ៊ែរ​អ៊ីរ៉ង់​ក្នុង​រយៈពេល​២​ឬ​៣​ឆ្នាំ​ទៀត នៅក្នុង​ការគំរាមកំហែង​ពិសេស​ខុសពី​ធម្មតា ដែល​បង្កើន​ភាព​តានតឹង​រវាង​ប្រទេស​ទាំង​ពីរ និង​បង្កើន​ការភ័យខ្លាច​អំពី​ការផ្ទុះ​សង្គ្រាម​លោក​មួយទៀត​។​

​រដ្ឋមន្ត្រី​អ៊ីស្រាអែល លោក បិ​ន​នី ហ្គាន​ហ្ស៍ (Benny Gantz)​បាន​ប្រាប់​ក្រុមនិស្សិត​បញ្ចប់​ការសិក្សា​ផ្នែក​ទ័ពអាកាស​ក្នុង​ខែ​នេះ​ថា​ពួកគេ​អាច​នឹង​ចេញ​ដំណើរ​ទៅ​វាយប្រហារ​ទីតាំង​នុយក្លេអ៊ែរ​អ៊ីរ៉ង់​​នៅ​ឆ្នាំ ២០២៤ ឬ​ឆ្នាំ ២០២៥​។​

​រឿង​នេះ​កើតឡើង ខណៈ​ភាព​តានតឹង​រវាង​អ៊ីរ៉ង់​និង​អ៊ីស្រាអែល​កើនឡើង បន្ទាប់​ពី​ប្រទេស​ទាំង​ពីរ​មាន​ជម្លោះ​ក្នុង​របៀប​ដូច​ក្នុង​សង្គ្រាមត្រជាក់​អស់​រយៈពេល​ជាច្រើន​ឆ្នាំ​។​

​ខណៈ​កិច្ចខិតខំ​ប្រឹងប្រែង​អន្តរជាតិ​ដើម្បី​បន្ត​កិច្ច​ព្រមព្រៀង​នុយក្លេអ៊ែរ​ឆ្នាំ ២០១៥ ជាមួយ​អ៊ីរ៉ង់​បាន​ជាប់គាំង អ៊ីរ៉ង់​បាន​បង្កើន​ការ​ចម្រាញ់​សារធាតុ​អ៊ុយ​រ៉ា​ញ៉ូម​ដែល​បង្ក​ឱ្យ​មាន​ការបារម្ភ​ថា​ពួកគេ​មាន​​បំណង​បង្កើត​អាវុធ​នុយក្លេអ៊ែរ​។​

​ត្បិត​កំពុងដំណើរការ​ជាមួយនឹង​ការប្រើប្រាស់​ជា​លក្ខណៈ​ស៊ីវិល ក៏​ប៉ុន្តែ​ការ​ចម្រាញ់​នេះ​ក៏​អាច​ផ្តល់​ជា​ឥន្ធនៈ​សម្រាប់​គ្រាប់បែក​នុយក្លេអ៊ែរ​ផង​ដែរ​ទោះបីជា​អ៊ីរ៉ង់​បដិសេធថា​មិន​មាន​គោលបំណង​បែប​​នេះ​ក្នុង​ចិត្ត​ក៏ដោយ​។​

​អ្នកជំនាញ​និយាយថា អ៊ីរ៉ង់​អាច​បង្កើន​ភាព​សុទ្ធ​នៃ​សារធាតុ​អ៊ុយ​រ៉ា​ញ៉ូម​របស់​ខ្លួន​ទៅ​ជា​កម្រិត​អាវុធ​ក្នុង​រយៈពេល​ដ៏​ខ្លី​ប៉ុន្តែ​ពួកគេ​និយាយថា ការបង្កើត​ក្បាល​គ្រាប់​នុយក្លេអ៊ែរ​អាច​ចំណាយ​ពេល​ច្រើន​ឆ្នាំ​៕

លោ​កបិន​នី ហ្គាន​គំរាម​វាយ​ទីតាំងនុយ​ក្លេ​អ៊ែរ​របស់​អ៊ីរ៉ង់​ក្នុង​ឆ្នាំ​២០២៤​ឬ​២០២៥