ដោយ៖ សុផល / កំពង់ឆ្នាំង-ពោធិ៍សាត់៖ នៅក្នុងខែធ្នូនេះ កម្មវិធីស្បៀងអាហារ ពិភពលោករបស់ អង្គការសហប្រជាជាតិ (WFP) និងក្រសួងអប់រំ យុវជន និងកីឡា ក្រោមកិច្ចគាំទ្ររបស់កយកា (​KOICA) បានបង្ហាញនូវការទទួល​ស្គាល់ នូវតួនាទីដ៏សំខាន់របស់ចុងភៅសាលា ក្នុងការញ៉ាំងឱ្យកម្មវិធីអាហារ តាមសាលា​រៀន​អាចដំណើរការទៅបានដោយរលូន តាមរយៈកម្មវិធីប្រកួត ចម្អិនម្ហូប។

លោកស្រី គ្លែរ កូណាន់ អ្នកតំណាង និងជានាយិការបស់ WFP បានមាន ប្រសាសន៍ថាៈ ​”កម្មវិធីអាហារតាមសាលារៀន មានឥទ្ធិពលយ៉ាងជាក់ច្បាស់​លើសុខភាព ការលូតលាស់​និងភាពជោគជ័យរបស់សិស្ស នៅក្នុងថ្នាក់រៀន។ កម្មវិធីប្រកួតចម្អិនម្ហូបតាមសាលា គឺជាវិធីដ៏រីករា​មួយក្នុងការទទួលស្គាល់នូវ​កិច្ចខិតខំប្រឹងប្រែង និងការលះបង់របស់ចុងភៅសាលា ចំនួន ៣.០០០ នាក់ នៅក្នុងកម្មវិធីអាហារ តាមសាលារៀននៅកម្ពុជា។ អាហារពេលព្រឹកក្តៅៗ មានជីវជាតិ ដែលចម្អិនរៀងរាល់ព្រឹក បានធ្វើដំណើរដ៏វែងឆ្ងាយ ឆ្ពោះទៅអនាគត ដ៏ត្រចះត្រចង់ សម្រាប់កុមារកម្ពុជា។”

លោកវេជ្ជបណ្ឌិត យង់ គន្ធារិទ្ធ អនុប្រធាននាយកដ្ឋានសុខភាពសិក្សា បានមាន ប្រសាសន៍ថាៈ “វាក៏ជាឱកាសមួយផងដែរ សម្រាប់ចុងភៅ ក្នុងការស្វែងយល់ ពីសារៈសំខាន់នៃអនាម័យផ្ទះបាយ​និងការអនុវត្តដែលនាំមក នូវសុវត្ថិភាព ចំណីអាហារ ចែករំលែកបទពិសោធន៍ធ្វើម្ហូប និងបង្កើនការយល់ដឹងរបស់ពួកគាត់ អំពីតម្រូវការអាហារ និងមូលដ្ឋានគ្រឹះ នៃអាហារូបត្ថម្ភ នៅតាមសាលារៀន។”

នៅដើមឆ្នាំសិក្សា២០១៦-២០១៧ កម្មវិធីប្រកួតធ្វើម្ហូបនៅសាលា គឺជាការប្រកួត ប្រជែងមួយ ដែលលើកកម្ពស់មុខម្ហូបសុខភាព ដែលមានរសជាតិឆ្ងាញ់ សម្រាប់សិស្សានុសិស្ស និងជំរុញភាពច្នៃប្រឌិត និងការចំណាយដែលមានប្រសិទ្ធ​ភាព។ ចុងភៅម្នាក់ៗ ទទួលបានប្រាក់ប្រាំដុល្លារ សម្រាប់ទិញ​គ្រឿងផ្សំ។ ពួកគាត់ត្រូវប្រើប្រាស់គ្រឿងផ្សំ យ៉ាងតិចបី ដែលផលិត និងដាំដុះ នៅក្នុងសហគមន៍ និងត្រូវតែអនុលោម តាមគោលការណ៍អាហារូបត្ថម្ភ​សម្រាប់កុមារ។ មុខម្ហូប ត្រូវបានវាយតម្លៃ ដោយគណៈកម្មការ មកពីនាយកដ្ឋានសុខភាពសិក្សា និងកម្មវិធីស្បៀងអាហារពិភពលោក ដោយដាក់ពិន្ទុលើគំនិតដើម រសជាតិ សណ្ឋាន និងរូបរាងរបស់មុខម្ហូប។ ការរៀបចំបង្ហាញមុខម្ហូបបានស្អាតល្អ​នឹងទទួលបាន​ពិន្ទុបន្ថែម។

បេក្ខជនដែលទទួលបានជ័យលាភី ចំនួន៣នាក់ មកពីស្រុកនីមួយៗ នឹងចូលរួម ការប្រកួតវគ្គចុងក្រោយ នៅថ្នាក់ខេត្ត ដែលគ្រឿងផ្សំ និងមុខម្ហូ ​ត្រូវបានបង្ហាញ ភ្លាមៗ ក្នុងពេលការប្រកួតចម្អិន។ ចុងភៅជ័យលាភីចំនួនបីរូបនឹងត្រូវបានជ្រើសរើស ហើយនឹងទទួលបានរង្វាន់។

កាលពីសប្តាហ៍មុន​បេក្ខជនដែលឈ្នះ ក្នុងការប្រកួតថ្នាក់ស្រុក សរុបចំនួន ១៥ នាក់ មកពីស្រុកចំនួន៥ ក្នុងខេត្តពោធិ៍សាត់ បានឈានចូល​ដល់ការប្រកួតវគ្គ ចុងក្រោយ។

ចំណែកនៅខេត្តកំពង់ឆ្នាំង បេក្ខជនដែលឈ្នះចំនួន ១៨ រូប មកពីស្រុកចំនួន៦ ក៏បានចូលរួ​ក្នុងវគ្គចុងក្រោយដែរ ក្នុងសប្តាហ៍នេះ​ផងដែរ។

ចុងភៅទទួលជ័យលាភីលេខ១ ប្រចាំខេត្តនីមួយៗ នឹងទទួលបានប្រាក់រង្វាន់ ចំនួន ១៥០ ដុល្លារ លេខ២ បាន ១២០ ដុល្លារ និងលេខ៣ បាន ១០០​ ដុល្លារ។ ចុងភៅជ័យលាភីទាំងអស់ ក៏នឹងទទួលបានប្រាក់រង្វាន់ សម្រាប់សាលារៀនរបស់ គាត់ផងដែរ ចំនួន ១០០ ដុល្លារ ក្នុងមួយសាលា សម្រាប់ទិញសម្ភារៈផ្ទះបាយ​របស់សាលា។

សព្វថ្ងៃនេះ មានចុងភៅសាលាជាង ៣.០០០ នាក់ ធ្វើការនៅក្នុងសាលា ចំនួន ១.១១៣ ក្រោមកម្មវិធីផ្ដល់ស្បៀងអាហារ​តាមសាលារៀន។ អាហារពេលព្រឹក ដែលពួកគាត់ជាអ្នកចម្អិន បានទទួលទានដោយកុមារ នៅសាលាមត្តេយ្យ និងបឋមសិក្សា​ ប្រហែល ៣០០.០០០ នាក់​នៅតាមទីជនបទនៅកម្ពុជា៕/V/R