​ប្រែ​សម្រួលៈ​បំណង​(​ស្ត្រេត​ថែមស៍​)៖ ការស៊ើបអង្កេត​មួយ​ត្រូវបាន​ធ្វើឡើង​ក្រោយ​ពី​គូស្នេហ៍​មួយគូ​បាន​តោង​ឡើង​អាគារ​កប់​ពពក​Merdeka 118​របស់​ម៉ាឡេស៊ី ដែល​ជា​សំណង់​ខ្ពស់​បំផុត​ទី​ពីរ​លើ​លោក​។​

​នៅក្នុង​សេចក្តីថ្លែងការណ៍​មួយ អ្នកនាំពាក្យ​ក្រុមហ៊ុន​ដែល​គ្រប់គ្រង​អាគារ​១១៨​ជាន់​កំពស់​៦៧៨,៩​ម៉ែត្រ​នៅ​ទីក្រុង​គូ​ឡា​ឡាំ​ពួរ​នេះ បាន​និយាយថា​ខ្លួន​នឹង​ប្តឹង​នរណា​ដែល​ត្រូវបាន​រកឃើញ​ថា​លួច​ចូល​​ទីតាំង​នេះ​។​«​យើង​ចង់​បង្ហាញថា អាគារ​Merdeka 118​នៅ​ជា​ការដ្ឋាន​សំណង់​មួយ និង​សុវត្ថិភាព​នៅតែ​ជា​អាទិភាព​របស់​យើង​។​ក្នុងនាម​ជា​ទ្រព្យសម្បត្តិ​ឯកជន​មួយ អ្នក​លួច​លបចូល​នឹង​ទទួលខុស​​ត្រូវ​ចំពោះ​មុខ​ច្បាប់​»​។​

«​យើង​នឹង​ផ្តល់​ការគាំទ្រ​និង​កិច្ចសហការ​ពេញលេញ​ជា​មួយ​អាជ្ញាធរ​លើ​បញ្ហា​នេះ​»​។​

​មេ​ប៉ូលិស​ក្រុង​បាន​និយាយថា អ្នក​ទាំង​ពីរ​នឹង​ត្រូវ​ហៅ​អោយ​ចូល​ខ្លួន​ហើយ​នឹង​ត្រូវ​ស៊ើបអង្កេត​។​

​កាលពី​ថ្ងៃ​ពុធ រូបភាព​អ្នក​ឡើង​ដល់​កំពូល​អាគារ​ខ្ពស់​នេះ​ពីរ​នាក់​ត្រូវ​បាន​បង្ហោះ​ចែកចាយ​ក្នុង​បណ្តាញ​សង្គម​ពី​មួយ​ទៅមួយ​។​អ្នក​ឡើង​ទាំងពីរ​ឈ្មោះ អ៊ី​វ៉ាន បៀ​គូស​(Ivan Beerkus)​និង​នាង ​អ៊ែន​ជេឡា នី​កូឡាវ​(Angela Nikolau)​ដែល​ពួកគេ​អះអាង​ខ្លួនឯង​ថា​ជា​អ្នក​ឡើង​ទីតាំង​ដែល​ប្រឈម​គ្រោះថ្នាក់​និង​ពិបាក​បំផុត​ក្នុង​លោក​។​ពួកគេ​បាន​ថត​បង្ហោះ​សកម្មភាព​របស់​ពួកគេ​នៅ​​ជុំវិញ​ពិភពលោក​។​

​បៀ​គូស មាន​អ្នកតាមដាន​ចូល​មើល​ជាង​២០០.០០០​នាក់​នៅក្នុង​អ៊ី​ន​ស្តា​ក្រាម នៅពេល​នី​កូឡាវ មាន​អ្នក​ចូល​មើល​ជាង​៧០០.០០០​នាក់​។​ពួកគេ​ក៏​លក់​រូបភាព​របស់គេ​ផងដែរ​។​

​ក្នុង​អ៊ី​ន​ស្តា​ក្រាម នាង​នី​កូឡាវ បាន​និយាយថា​នាង​កើត​និង​ធំ​ដឹងក្តី​នៅ​ក្រុង​មូ​ស្គូ ហើយ​«​មនុស្ស​ជាច្រើន​បាន​និយាយថា អារម្មណ៍​ចូល​ចិត្ត​នឹង​ភាព​ហួសហេតុ​ជា​អ្វី​មាន​ក្នុង​ឈាម​របស់​ខ្ញុំ​»​។​

​មនុស្ស​ជាច្រើន​ដំបូង​សួរ​ថា​តើ​រូបភាព​មនុស្ស​ប្រុស​ស្រី​មួយ​គូ​នៅលើ​ដំបូល​អាគារ​Merdeka 118​នេះ​ពិត​ឬ​មិន​ពិត ។​កាលពី​ថ្ងៃ​ពុធ​បៀ​គូ​សបាន​និយាយថា អាគារ​ខ្ពស់​បំផុត​ទី​ពីរ​ក្នុង​លោក​នេះ​«​មិនមែន​​ខ្ពស់​ដល់​ថ្នាក់​ឡើង​មិន​ដល់​ទេ​» ហើយ​នៅ​ថ្ងៃ​ព្រហស្បតិ៍​នេះ​លោក​បាន​បង្ហោះ​វីដេអូ​មួយ​ដែល​បង្ហាញ​លោក​ជាមួយ​នាង​នី​កូឡាវ​នៅលើ​ដំបូល​អាគារ​៕

​អ្នក​នៅ​លើដំបូល​អាគារ​កំពស់​១១៨​ជាន់ ជា​អ៊ី​វ៉ាន បៀ​គូស និង​នាង អ៊ែន​ជេឡា នី​កូឡាវ តែ​ប្រកាស​ខ្លួនឯង​ថា​ជា​អ្នក​ចូលចិត្ត​ឡើង​ប្រឈម​គ្រោះថ្នាក់​និង​ពិបាក​បំផុត​និង​ជា​អ្នកបង្កើត​អ្វីដែល​ថ្មី