​ប្រែ​សម្រួលៈ​បំណង​(​ដេល្លី​ម៉េល​)៖ ចំនួន​មនុស្ស​ស្លាប់​ពី​ព្យុះ​ព្រិល​ដែល​បាន​វាយប្រហារ​អាម៉េរិក​តាំងពី​ពេល​បុណ្យ​គ្រី​សម៉ាស​បាន​កើន​ដល់​យ៉ាងតិច​៦១​នាក់​គិត​ត្រឹម​ថ្ងៃ​ព្រហស្បតិ៍​។​

​មន្ត្រី​អាម៉េរិក​លោក​ម៉ាក ផូ​លឹ​នខាស៍​(Mark Poloncarz )​បាន​និយាយថា​អ្នក​ស្លាប់​ពីរ​នាក់​ទៀត​ត្រូវបាន​រកឃើញ​នៅ​តំបន់​ញូវយ៉ក​ខាងលិច​ដែល​រង​ការវាយប្រហារ​ពី​ព្យុះ​ព្រិល​ខ្លាំង​បំផុត​ប្រចាំ​​សតវត្សរ៍ ជាហេតុ​នាំ​អោយ​ចំនួន​ជនរងគ្រោះ​ដល់​ជីវិត​នៅទូទាំង​រដ្ឋ​ញូវយ៉ក​ឡើងដល់​៣៩​នាក់​។​

​លោក ផូ​លឹ​នខាស៍ បាន​និយាយថា អ្នកស្លាប់​១៧​នាក់​ត្រូវបាន​រកឃើញ​នៅ​ក្រៅ​ផ្ទះ ​១១​នាក់​នៅក្នុង​ផ្ទះ បួន​នាក់​នៅក្នុង​រថយន្ត បួន​នាក់​ស្លាប់​ក្នុងអំឡុងពេលចូក​កាយ​ព្រិល​ចេញ​និង​បី​នាក់​ស្លាប់​ដោយសារ​​តែ​ផ្នែក​ឆ្លើយតប​គ្រាអាសន្ន​ចូល​ទៅ​ជួយ​មិនទាន់​។​

​ជនរងគ្រោះ​ប្រាំបួន​នាក់​ទៀត​ត្រូវបាន​រាយការណ៍​ថា បាន​ស្លាប់​ដោយ​គ្រោះថ្នាក់​រថយន្ត​បណ្តាល​មក​ពី​ព្យុះនិងទឹកកក​នៅក្នុង​រដ្ឋ​អូ​ហាយ​អូ ។​

​ពួក​មន្ត្រី​នៅ​ក្រុង​ញូវយ៉ក​បាន​និយាយថា ស្ថានភាព​ព្យុះ​ទឹកកក​ឥឡូវ​បាន​ប្រសើរ​ឡើង​វិញ​បន្តិច តែ​នៅពេល​សីតុណ្ហភាព​ឡើង​ក្តៅ​និង​ព្រិល​ចាប់ផ្តើម​រលាយ នាំអោយ​មាន​ការព្រួយបារម្ភ​អំពី​ទឹក​ជំនន់​វិញ​​ម្តង​តែ​លោកផូ​លឹ​នខាស៍​បាន​និយាយថា​«​វា​មិន​ពេកអាក្រក់​ទេ​។​ការ​ជន់​លិច​ទំនង​ជា​តិចតួច​»​។​លោក​បាន​បន្តថា ចរន្តអគ្គិសនី​ក៏​ត្រូវបាន​ស្តារឡើងវិញ​សំរាប់​អ្នកស្រុក​ទាំងអស់​ក្នុង​ខណ្ឌ​។​

​ព្យុះ​ព្រិល​កាលពី​ចុង​សប្តាហ៍​ក៏​បាន​បញ្ជូន​អាកាសធាតុ​ត្រជាក់​ខុសធម្មតា​ទៅកាន់​រដ្ឋ​នានា​ដូចជា តិច​សាស់​និង​ផ្លរីដា​ព្រមទាំង​បង្ក​ភាពវឹកវរ​ក្នុងការ​ធ្វើ​ដំណើរ​តាម​ផ្លូវអាកាស ដោយ​ជើងហោះហើរ​រាប់​ពាន់​ត្រូវ​លុបចោល​៕

​ស្ថានភាព​ធ្លាក់​ព្រិល​ទឹកកក​បាន​វិល​មក​ល្អប្រសើរ​បន្តិច​វិញ តែ​ពួក​មន្ត្រី​បារម្ភ​អំពី​ការ​ជន់​លិច​ពេល​ព្រិល​រលាយ​