​ប្រែ​សម្រួល : កញ្ញា​ដា​លី​ស (​ដេល្លី​ម៉េល​) ៖ មី​ស៊ី​ល​រុស្ស៊ី​ថ្មីៗ​ជាច្រើន​បាន​វាយប្រហារ​អ៊ុយ​ក្រែន​កាលពី​ថ្ងៃ​ព្រហស្បតិ៍​ទី​២៩​ធ្នូ​ដោយ​មនុស្ស​យ៉ាងតិច​បីនាក់​ត្រូវបាន​សម្លាប់​និង​ដាច់​ចរន្តអគ្គិសនី​នៅក្នុង​​តំបន់​ភាគច្រើន​នៅ​មុន​ថ្ងៃ​ចូលឆ្នាំ​សកល​។​

​ដំបូង​ឡើយ បេឡា​រូ​សបាន​និយាយថា មី​ស៊ី​ល​របស់​អ៊ុយ​ក្រែន​បាន​ធ្លាក់​មក​លើ​ទឹកដី​របស់​ខ្លួន ដែល​បង្ក​ឱ្យមាន​ការតវ៉ា​ផ្នែក​ការទូត​និង​នាំអោយ​មាន​ការ​លើ​ឡើង​ពី​រដ្ឋាភិបាល​ក្រុង​គៀវ​ថា​ឧបទ្ទវហេតុ​នេះ​​ប្រហែលជា​ត្រូវ​បាន​បង្កើតឡើង​ដោយ​រដ្ឋាភិបាល​ក្រុង​មូ​ស្គូ​។​

​នៅ​ព្រឹក​ថ្ងៃ​ព្រហស្បតិ៍ ការផ្ទុះ​ជាច្រើន​ត្រូវបាន​រាយការណ៍​នៅ​ទូទាំង​ប្រទេស​អ៊ុ​យក្រែន រួម​ទាំង​នៅ​ទីក្រុង​គៀវ ទីក្រុង​ធំ​ទី​ពីរ​ខា​គី​វ​នៅ​ភាគ​ខាងកើត និង​ទីក្រុង​ភាគ​ខាងលិច ល្វីវ (Lviv)​ក្បែរ​ព្រំដែន​​ជាមួយ​ប៉ូឡូញ​។​

​រដ្ឋមន្ត្រីក្រសួង​មហាផ្ទៃ​អ៊ុ​យក្រែន លោក ដេ​នីស ម៉ូ​ណា​ស្ទី​ស្គី (Denys Monastyrskyi) បាន​និយាយ​អំពី​ការបាញ់ប្រហារ​នេះ​ថា “​យើង​មាន​មនុស្ស​បីនាក់​ស្លាប់ និង​ប្រាំមួយ​នាក់​រងរបួស ក្នុងនោះ​មាន​កុមារ​ម្នាក់​”​។​

​ប្រធានាធិបតី​អ៊ុយ​ក្រែនលោក វ៉ូ​ឡូ​ឌី​មៀ ហ្សេ​លេន​ស្គី បាន​និយាយថា តំបន់​ភាគច្រើន​គ្មាន​ថាមពល​នៅក្នុង​សីតុណ្ហភាព​ត្រជាក់​ខ្លាំង បន្ទាប់​ពី​ការ​បាញ់ស្រោច​នេះ​។​

​មេដឹកនាំ​អ៊ុយ​ក្រែន​បាន​និយាយថា “​វា​មាន​ការលំបាក​ណាស់ ជាពិសេស​នៅក្នុង​តំបន់​ទីក្រុង​គៀវ​និង​រដ្ឋធានី តំបន់​ទីក្រុង​ល្វីវ តំបន់​ទីក្រុង​អូ​ដេស​សា និង​តំបន់​ទីក្រុង​ឃើ​សុន តំបន់​ទីក្រុង​វីន​នី​ត​សៀ (Vinnytsia) និង​ត្រាន់​ស្កា​ផា​ធៀ (Transcarpathia)”​។​

​មី​ស៊ី​ល​បាន​វាយប្រហារ​ដល់​តំបន់​ភាគ​ខាងលិច អ៊ី​វ៉ាណូ​ហ្វ្រែង​គីវ (Ivano-Frankivsk) នៅឯ​ជើងភ្នំ​ខា​ផា​ធៀន (Carpathian) ដ៏​ស្រស់ស្អាត ដែល​មាន​ចម្ងាយ​ជិត ១.០០០​គីឡូម៉ែត្រ​​ពី​ប្រទេស​រុស្ស៊ី​។​

​ឧត្តមសេនីយ៍ វ៉ាល់​ឡឺរី ហ្សា​លូ​ស្ន៊ី (Valeriy Zaluzhny) អគ្គមេបញ្ជាការ​របស់​អ៊ុ​យក្រែន បាន​និយាយថា រុស្ស៊ី​បាន​បាញ់​មី​ស៊ី​ល​នាំ​ផ្លូវ ៦៩ គ្រាប់ ក្នុងនោះ ៥៤ គ្រាប់​ត្រូវបាន​បាញ់​ទម្លាក់​៕

មី​ស៊ី​ល​រុស្ស៊ី​បាន​កម្ទេច​ហេដ្ឋារចនាសម្ពន្ធ​អ៊ុយ​ក្រែន​ឥតឈប់ឈរ