​ប្រែ​សម្រួល : កញ្ញា​ដា​លី​ស (​ដេល្លី​ម៉េល​) ៖ ប៉េ​ឡេ ស្តេច​បាល់ទាត់​ប្រេ​ស៊ីល​ដែល​បាន​ឈ្នះ​ពាន​វើល​ខាប់​បីដង​បំបែក​ឯតទគ្គកម្ម និង​ក្លាយជា​តួអង្គ​កីឡា​ដ៏​ល្បី​បំផុត​ប្រចាំ​សតវត្សរ៍​ចុងក្រោយ​បានទទួល​​មរណភាព​កាលពី​ថ្ងៃ​ព្រហស្បតិ៍​ទី​២៩​ធ្នូ​នៅ​អាយុ ៨២ ឆ្នាំ​។​

ប៉េឡេ​ស្លាប់​នៅ​អាយុ ៨២ ឆ្នាំ​

​ម្ចាស់​រហស្សនាម “​ការប្រកួត​ដ៏​ស្រស់ស្អាត​” រូបនេះ​បាន​ទទួល​ការព្យាបាល​ជំងឺ​មហារីក​ពោះវៀនធំ​តាំងពី​ឆ្នាំ ២០២១​។ មជ្ឈមណ្ឌល​វេជ្ជសាស្ត្រ ដែល​គាត់​បាន​សម្រាក​ព្យាបាល​កាលពី​ខែ​មុន បាន​និយាយថា គាត់​បាន​ស្លាប់​ដោយសារ​ខ្សោយ​សរីរាង្គ​ជាច្រើន​ព្រោះតែ​ជំងឺមហារីក​។​

​នី​ម៉ា តារាបាល់ទាត់​ប្រេ​ស៊ីល​មួយរូប បាន​និយាយ​នៅលើ Instagram ថា “​ប៉េឡេ​បាន​ផ្លាស់ប្តូរ​អ្វីៗ​គ្រប់យ៉ាង​។ គាត់​បាន​ផ្លាស់ប្តូរ​បាល់ទាត់​ទៅជា​សិល្បៈ​នៃ​ការកម្សាន្ត​។​បាល់ទាត់​និង​ប្រេ​ស៊ីល​បាន​លើក​​កម្ពស់​ស្តង់ដារ​របស់​ខ្លួន​ដោយសារ​តែ​ស្តេច​បាល់ទាត់​រូបនេះ​! គាត់​បាន​លាចាក​លោក​ទៅហើយ ប៉ុន្តែ​វេទមន្ត​របស់គាត់​នឹង​បន្ត​។ ប៉េឡេ​គឺ​ស្ថិតស្ថិរ​ជា​អមតៈ​!”​។​

​ពិធី​បុណ្យ​សព​គ្រោង​ធ្វើ​នៅ​ថ្ងៃ​ចន្ទ​និង​ថ្ងៃ​អង្គារ ខណៈ​មឈូស​របស់គាត់​នឹង​ត្រូវ​ដង្ហែ​តាម​ដងផ្លូវ​នៃ​ទីក្រុង​សាន់​តូ​ស ជា​ទីក្រុង​ឆ្នេរសមុទ្រ​ដែល​អាជីព​រុងរឿង​របស់គាត់​បានចាប់ផ្តើម មុន​ពេល​បញ្ចុះ​។​

​ត្រូវបាន​ចាត់ទុក​យ៉ាង​ទូលំទូលាយ​ថា​ជា​កីឡាករ​ដ៏​អស្ចារ្យ​បំផុត​មួយ​រូប​ក្នុង​បាល់ទាត់ ប៉េឡេ​បាន​ចំណាយពេល​ជិត​ពីរ​ទសវត្សរ៍​ដើម្បី​ផ្តល់​ក្តីរំភើប​ដល់​អ្នក​គាំទ្រ​និង​គូប្រជែង​ក្នុងនាម​ជា​អ្នក​ស៊ុត​បញ្ចូល​​ទី​ច្រើនជាងគេ​បំផុត​ក្នុង​ការប្រកួត​ជាមួយ​ក្លិប Santos និង​ក្រុម​ជម្រើសជាតិ​ប្រេ​ស៊ីល​។​

​សេចក្តីថ្លៃថ្នូរ ភាព​ជា​អ្នកកីឡា និង​ក្បាច់​ញាក់​ដ៏​ទាក់ទាញ​របស់​គាត់​បាន​ផ្តល់​ក្តីរំភើប​ដល់​កីឡាករ​នានា​និង​អ្នកគាំទ្រ​។ គាត់​បាន​បង្កើត​ស្ទីល​លេង​ដ៏​រហ័សរហួន​និង​រលូន​ដែល​បាន​ធ្វើ​បដិវត្ត​ដល់​កីឡា​​បាល់ទាត់ ពោលគឺ​ក្បាច់​ញាក់​ដូច​របាំ​សាំ​បា ដែល​បង្ហាញ​ពី​ភាពឆើតឆាយ​របស់​ប្រទេស​គាត់​នៅលើ​ទីលាន​។​

​គាត់​បាន​ដឹកនាំ​ប្រេ​ស៊ីល​ឡើង​ដល់​ទី​កំពូល​នៃ​បាល់ទាត់ ហើយ​បាន​ក្លាយជា​ឯកអគ្គរដ្ឋទូត​ពិភពលោក​សម្រាប់​កីឡា​របស់​គាត់​ក្នុង​ដំណើរ​មួយ​ដែល​បាន​ចាប់ផ្តើម​នៅតាម​ដងផ្លូវ​នៃ​រដ្ឋ​សៅ​ប៉ូ​ឡូ ជា​កន្លែង​ដែល​គាត់​នឹង​ទាត់​ស្រោមជើង​ដែល​ញាត់​កាសែត​ឬ​ក្រណាត់​។​

​នៅក្នុង​ការសន្ទនា​អំពី​កីឡាករ​អស្ចារ្យ​បំផុត​របស់​បាល់ទាត់ មានតែ​ឌី​ហ្គោ ម៉ា​រ៉ាដូ​ណា​, លី​អូ​នែ​ល ម៉េស​ស៊ី និង គ្រីស្ទា​ណូ រ៉ូ​ណាល់​ដូ ប៉ុណ្ណោះ ដែល​ត្រូវបាន​លើក​មក​និយាយ​ទន្ទឹម​នឹង​ប៉េឡេ​។​

​ប្រភព​ផ្សេងៗ​គ្នា​ដែល​រាប់​ចំនួន​ការប្រកួត​ផ្សេងៗ​គ្នា​បាន​រាយ​បញ្ជី​គ្រាប់​បាល់​សរុប​របស់​ប៉េឡេ​នៅ​គ្រប់​ទីកន្លែង​រវាង ៦៥០ គ្រាប់ (​ការប្រកួត​លី​ក​) និង ១.២៨១ គ្រាប់ (​ការប្រកួត​ជាន់​ខ្ពស់​ទាំង​អស់ និង​ខ្លះ​ទល់​នឹង​ការប្រកួត​កម្រិត​ទាប​)៕