ដោយ​៖​សុវណ្ណ​កុម្ភៈ​/​ភ្នំពេញ​៖​ការប្រកួត​កីឡា​ឡើង​ភ្នំ​ជ្រើសរើស​ជើងឯក​ថ្នាក់ជាតិ​ប្រចាំឆ្នាំ​២០២២​បានបញ្ចប់​ដោយ​ជោគជ័យ​នៅ​ក្លឹប Power Up PhnomPenh រាជធានី​ភ្នំពេញ​ក្រោយ​គណៈកម្មការ​បច្ចេកទេស​ម្រិ​ត​សម្រាំង​បាន​ម្ចាស់​ជ័យលាភី​លើ​វិញ្ញាសា​ចំនួន​ប្រាំមួយ​។​

អនុប្រធាន​សហព័ន្ធ​កីឡា​ឡើង​ភ្នំ​កម្ពុជា​លោក​ទុយ ប៊ុន​ហឿន​គូសបញ្ជាក់ថា​ដោយ​អនុ​វត្ត​តាម​ផែនការ​សកម្មភាព​ប្រចាំឆ្នាំ​២០២២ របស់​សហព័ន្ធ​កីឡា​ឡើង​ភ្នំ​កម្ពុជា​និង​ការអនុវត្ត​​ថវិកា​គាំទ្រ​របស់​ក្រសួង​អប់រំ​យុវជន​និង​កីឡា​សហព័ន្ធ​កីឡា​ឡើង​ភ្នំ​កម្ពុជា​បាន​ដំណើរ​ការរៀបចំ​ការប្រកួត​កីឡា​ឡើង​ភ្នំ​ជ្រើសរើស​ជើងឯក​ថ្នាក់ជាតិ​ឆ្នាំ​២០២២​។​លោក​បន្ដថា ការប្រកួត​នេះ​មាន​អ្នកចូលរួម​សរុប​ចំនួន​៦៨​នាក់ ក្នុងនោះ​កីឡាការិនី​២៤​នាក់ ប្រតិភូ គ្រូបង្វឹក​១៥​នាក់​។​

​លោក​ប៉ែន វុទ្ធី​អនុប្រធាន​ទទួលបន្ទុក​រួម​នាយក​ដ្ឋា​ន​អប់រំ​កាយ​និង​កីឡា​បាន​កោត​​សរសើរ​និង​វាយតម្លៃ​ខ្ពង់​ចំពោះ​សហព័ន្ធ​កីឡា​ឡើង​ភ្នំ​កម្ពុជា​ដែល​បាន​សហការគ្នា​រៀបចំ​ការប្រកួត​នេះ​បាន​ដំណើរការ​ដោយ​រលូន​រយៈពេល​៣​ថ្ងៃ​។ លោក​បញ្ជាក់ថា នេះ​ជាការ​ផ្តល់ឱកាស​ឱ្យ​កីឡាករ​កីឡាការិនី​បាន​បញ្ចេញ​នូវ​ទេពកោសល្យ​សមត្ថភាព​ក៏ដូចជា​វាស់​ស្ទង់​សមត្ថភាព​បច្ចេកទេស​ដែល​កីឡាករ​កីឡាការិនី​ម្នាក់ៗ​បាន​ហ្វឹកហាត់​កន្លងមក​និង​ការត្រៀម​ប្រកួត​ជា​លក្ខណៈ​អន្តរជាតិ​នានា​ទាំង​ក្នុងប្រទេស និង​ក្រៅប្រទេស​។​

​លោក​បានលើកឡើង​ពី​លទ្ធផល​របស់​កីឡាករ​កីឡាការិនី​ដែល​ទទួល​ជ័យលាភី​នា​​ពេលនេះ​ពិតជា​បានមកពី​ការខិតខំ​ហ្វឹកហាត់​ជាប្រចាំ​មាន​ការតស៊ូ​ព្យាយាម​គោរព​វិន័យ​បានល្អ យកចិត្តទុកដាក់​និង​គោរព​បាន​តាម​បទបញ្ជា​បច្ចេកទេស នៅក្នុង​ការប្រកួត​។​

​ក្នុងនាម​នាយកដ្ឋាន​ជំនាញ​នៃ​ក្រសួង​អប់រំ​យុវជន​និង​កីឡា​លោក ប៉ែន វុទ្ធី បាន ផ្តល់​អនុសាសន៍​មួយចំនួន​ជូន​ដល់​សហព័ន្ធ​កីឡា​ឡើង​ភ្នំ​កម្ពុជា ដូចជា​៖ ខិតខំ​បន្តទៀត ពង្រឹង​ការដឹកនាំ​ដោយ​អនុវត្តន៍​ទៅតាម​លក្ខន្តិកៈ​និង​បទបញ្ជាផ្ទៃក្នុង​របស់​ស​ហ​ព័ន្ធ​ដែល​បានចែង​។ ពង្រឹង និង​ពង្រីក​ក្លឹប​នៅតាម​បណ្តា​ខេត្ត​នានា ទាំង​ភ្នំ​ធម្មជាតិ និង​ភ្នំ​សិប្បនិម្មិត (Climbing Gym)៕/R​