​ប្រែ​សម្រួលៈ​បំណង​(​ដេល្លី​ម៉េល​)៖ ចិន​បាន​អះអាងថា ទិន្នន័យ​ដែល​ខ្លួន​ចេញ​ផ្សាយ​ស្តីពី​ចំនួន​ស្លាប់​ដោយកូវី​ដ​១៩​តែងតែ​មាន​តម្លាភាព​ទោះជា​តួ​លេខអ្នកស្លាប់​​ផ្លូវការ​ដោយកូវីដ១៩ទាប​ឆ្ងាយ​ជាង​តួលេខ​នៅក្នុង​​ប្រទេស​នានា​និង​ចំពេលបណ្តា​មន្ទីរពេទ្យ​របស់​ខ្លួន​កំពុង​ជោរជន់​ដោយ​អ្នកជំងឺ​ក្តៅខ្លួន​ក៏ដោយ​។​

​ទីភ្នាក់ងារ​សារ​ព័ត៌មានរដ្ឋ​ស៊ីនហួរ​បាន​និយាយ​កាលពី​យប់​ថ្ងៃ​ព្រហស្បតិ៍​ថា​មន្រ្តីសុខាភិបាល​ជាន់ខ្ពស់​មួយរូប​បាន​និយាយ​នៅក្នុង​សន្និសីទកាសែត​មួយ​ថា ការបញ្ចេញ​ព័ត៌មាន​ស្តីពី​កូវី​ដ​១៩​ត្រូវបាន​​ធ្វើឡើង​ក្នុង​«​ស្មារតី​បើកចំហ​»​។​

​អង្គការ​គ្រប់គ្រង​ជំងឺ​ថ្នាក់​ជាតិ​មួយ​បាន​និយាយ​ថា មាន​ការឆ្លង​ថ្មី​ប្រមាណ​៥.៥០០​នាក់​និង​ស្លាប់​ម្នាក់​កាលពី​ថ្ងៃ​សុក្រ តែ​បន្ទាប់​ពី​ការឈប់​ធ្វើតេស្តិ៍​រក​មេរោគ​ទ្រង់ទ្រាយ​ធំ​និង​ការកំណត់​លក្ខណវិនិច្ឆ័យ​ថ្មី​​សំរាប់​អ្នកស្លាប់​ដោយកូវី​ដ​១៩ តួលេខ​ផ្សាយ​ដោយ​រដ្ឋ​ចិន​លែង​ត្រូវ​បាន​គេ​ជឿ​តទៅទៀត​ហើយ​។​អ្នកជំនាញការ​ខ្លះ​បាន​ប៉ាន់ស្មាន​ថា ចំនួន​ស្លាប់​អាច​ច្រើន​ដល់​ទៅ​៩.០០០​នាក់​ក្នុង​មួយថ្ងៃ​។​

​ឆា​វ យ៉ាវ​វី​(Jiao Yahui)​មន្ត្រី​នៅ​គណៈកម្មាធិការ​សុខាភិបាល​ជាតិបានប្រាប់​អ្នកយក​ព័ត៌មាន​កាលពី​ថ្ងៃ​ព្រហស្បតិ៍​ថា «ចិន​តែងតែ​ចេញផ្សាយ​ព័ត៌មាន​ស្តីការ​ស្លាប់ដោ​យ​កូវី​ដ​១៩​និង​ករណី​ឆ្លង​ធ្ងន់ៗ​នៅ​ក្នុង​ស្មារតី​នៃ​ការបើកចំហ​និង​មាន​តម្លាភាព​»​។​

​លោក​ឆាវ បាន​និយាយថា ចិន​រាប់បញ្ចូល​ឬ​ចាត់ទុក​ថា​ស្លាប់​ដោយកូវី​ដ​១៩ លើ​អ្នកជំងឺ​ណា​ដែល​ស្លាប់​ដោយ​រោគ​ផ្លូវដង្ហើម​បង្កឡើង​ដោយ​វីរុស​កូវី​ដ​១៩​ក្រោយ​ពី​ការ​ធ្វើតេស្តិ៍​ឃើញ​ថា​ជនរងគ្រោះ​មាន​វិជ្ជមាន​​កូវី​ដ​១៩​ដោយ​ប្រើ​ម៉ាស៊ីន​ធំ ដោយ​ខុស​ពី​ប្រទេស​ផ្សេង​ដែល​រាប់បញ្ចូល​ថា​ស្លាប់​ដោយកូវី​ដ​១៩​ដែរ​ក្រោយ​ការ​ធ្វើតេស្តិ៍​ឃើញវ​ត្តមាន​ជំងឺ​នេះ​នៅក្នុង​ខ្លួន​ជន​រង​គ្រោះ​ក្នុង​រយៈពេល​២៨​ថ្ងៃ​។​

«​ចិន​តែងតែ​គោរព​លក្ខណវិនិច្ឆ័យ​បែប​វិទ្យាសាស្ត្រ​សំរាប់កំណត់​ការស្លាប់​ដោយកូវី​ដ​១៩ ចាប់តាំងពី​ដើមដំបូង​រហូត​ដល់​ចុងបញ្ចប់ ដែល​វា​ស្រប​នឹង​លក្ខណវិនិច្ឆ័យ​របស់​អន្តរជាតិ​»​។​

​ក្រុមហ៊ុន​វិភាគ​ហានិភ័យ​សុខភាព​Airfinity​ដែលមានមូលដ្ឋាននៅអង់គ្លេសបាន​និយាយថា ខ្លួន​វាយ​តំលៃ​ថា​បច្ចុប្បន្ន​មាន​អ្នកជំងឺ​កូវី​ដ​១៩​ស្លាប់​មួយ​ថ្ងៃ​ប្រមាណ​៩.០០០​នាក់​ក្នុង​មួយថ្ងៃនិង​១,៨​លាន​នាក់​ឆ្លង​ក្នុង​មួយថ្ងៃៗ​ផងដែរ​​នៅក្នុង​ប្រទេស​ចិន ។​ក្រុមហ៊ុន​ក៏បាន​និយាយថា ខ្លួន​រំពឹងថា​ត្រឹម​ចុងខែ​មេសា​ឆ្នាំ​២០២៣ មនុស្ស​១,៧​លាន​នាក់​អាច​ស្លាប់​ដោយ​ជំងឺឆ្លង​នេះ​នៅ​ចិន​។​

​សូមបញ្ជាក់​ថា ចិន​នៅ​សប្តាហ៍​នេះ​បាន​និយាយថា​ខ្លួន​នឹង​បញ្ចប់​ការធ្វើ​ចត្តា​ឡី​សំ​រាប់អ្នក​ចូលមក​ពី​ខាងក្រៅ ក្រោយ​ការបោះបង់​ចោល​របប​គ្រប់គ្រង​កូវី​ដ​១៩​ដ៏​តឹងរឹង​ដែល​បាន​អនុវត្ត​អស់​ពេល​ជិត​បី​​ឆ្នាំ​។​ប្រទេស​ដែល​មាន​ប្រជាជន​ច្រើន​បំផុត​ក្នុង​លោក​នេះ​ក៏​នឹង​បន្ទាប​ចំណាត់​ថ្នាក់កូ​វីដ​១៩​បច្ចុប្បន្ន​ពី​ការឆ្លង​កំរិត​A​មក​កំរិត​B​។​ការផ្លាស់ប្តូរ​នេះ​មាន​មិន​មានន័យថា ចិន​ទុកអោយ​មេរោគ​ឆ្លង​នេះ​រាល​​ដាល​ដោយ​សេរី​ទេ តែ​ខ្លួនចង់​រៀបចំ​ប្រភពធនធាន​តំរង់​ទៅ​កាន់​ផ្នែក​សំខាន់ៗ​បំផុត​ក្នុង​ការគ្រប់គ្រង និង​ព្យាបាល​អ្នក​កើត​ជំងឺ​៕

​រដ្ឋាភិបាល​ទីក្រុង​ប៉េកាំង​នឹង​លុបចោល​ចត្តា​ឡីស័​ក​សំរាប់​អ្នក​ចូល​ស្រុក ជាហេតុ​នាំ​អោយ​ប្រជាជន​ចិន​សំរុក​ទិញ​សំបុត្រ​យន្តហោះ​ធ្វើដំណើរ​ទៅ​បរទេស​ដោយសារ​មិន​ខ្វល់​នឹង​ការ​រឹតបន្តឹងពេលចូល​មក​វិញ​