​ប្រែ​សម្រួលៈ​បំណង​(​ដេល្លី​ម៉េល​)៖ ប្រព័ន្ធ​ផ្សព្វផ្សាយ​រដ្ឋ​ចិន​បាន​និយាយថា ការ​តំរូវ​អោយ​ធ្វើតេស្តិ៍​កូវី​ដ​១៩​លើ​អ្នកដំណើរ​ទៅ​ពី​ចិន​នៅក្នុង​ប្រទេស​ជាច្រើន​នៅក្នុង​លោក​ដើម្បី​ឆ្លើយតប​នឹង​កំណើន​នៃ​ការ​​ឆ្លង​នៅ​ចិន​ជា​«​ការរើសអើង​»​។​

​ក្រោយ​បិទ​ព្រំដែន​និង​អនុវត្ត​វិធានការ​គ្រប់គ្រង​កូវី​ដ​១៩ដ៏តឹងរឹង​អស់​ពេល​ជិត​បី​ឆ្នាំ ចិន​បាន​ងាក​មក​រក​ផ្លូវ​រស់នៅ​ជាមួយកូ​វីដ​កាលពី​ថ្ងៃ​៧​ធ្នូ តែ​សញ្ញា​នៃ​ការផ្ទុះ​ជំងឺ​ត្រូវ​បាន​ឃើញ​នៅ​ទូទាំង​ប្រទេស​ចិន​។​ប្រទេស​​ខ្លះ​បាន​បង្ហាញ​ការមិនជឿ​តួលេខ​ផ្លូវការ​របស់​ចិន​អំពី​ចំនួន​ឆ្លង​និង​ស្លាប់​ប្រចាំថ្ងៃ ហើយជាការឆ្លើយតប​ប្រទេស​អាម៉េរិក កូរ៉េខាងត្បូង ជប៉ុន ឥណ្ឌា អ៊ីតាលី​និង​កោះ​តៃវ៉ាន់ តំរូវ​អោយមាន​ការធ្វើតេ​ស្តិ៍​រក​កូ​វីដ​ពី​អ្នក​​ដំណើរ​ទៅ​ពី​ចិន​។​

​ម៉ាឡេស៊ី​នៅថ្ងៃនេះ​បាន​និយាយថា ខ្លួន​នឹង​ពិនិត្យ​អ្នកដំណើរ​អន្តរជាតិ​ទាំងអស់​ដើម្បី​រក​សញ្ញា​នៃ​ការ​ក្តៅខ្លួន​។​

​ដោយ​ហៅការ​រឹតត្បិត​លើ​អ្នកដំណើរ​ចិន​នេះ​ថា​«​គ្មាន​មូលដ្ឋា​និង​ជា​ការរើសអើង​»​កាសែត​គ្រប់គ្រង​ដោយ​រដ្ឋ Global Timesបាន​និយាយ​ក្នុង​អត្ថបទ​ចុះ​ផ្សាយ​កាលពី​ថ្ងៃ​ព្រហស្បតិ៍​ថា « បំណង​ពិត​​គឺ​បំផ្លិញបំផ្លាញ​កិច្ចខិតខំ​គ្រប់គ្រង​កូវី​ដ​១៩​អស់​ពេល​បី​ឆ្នាំ​របស់​ចិន​និង​វាយប្រហារ​ប្រព័ន្ធ​របស់​ប្រទេស​»​។​

​សូមបញ្ជាក់​ថា ចិន​ឈប់​តំរូវអោយ​អ្នកដំណើរ​ចូល​ប្រទេស​ខ្លួន​ទៅ​កាន់​កន្លែង​ធ្វើ​ចត្តា​ឡីស័​កចាប់​ពី​ថ្ងៃ​៨​មករា ឆ្នាំក្រោយ​តែ​នៅ​តំរូវអោយ​មាន​ការបញ្ជា​ក់ថា​បានធ្វើតេ​ស្តិ៍​រក​កូ​វីដនៅ​៤៨​ម៉ោង​មុន​ចេញដំណើរ​។​

​អ៊ីតាលី​កាល​ពីថ្ងៃ​ព្រហស្បតិ៍​បាន​ទទូច​សុំ​អោយ​ផ្នែក​ផ្សេង​ទៀត​នៃ​សហភាព​អឺរ៉ុប​ធ្វើ​ដូច​ខ្លួន តែ​បារាំង អាល្លឺម៉ង់​និង​ព័រទុយហ្កាល់​បាន​និយាយថា​ពួកគេ​មិនចាំបាច់​ដាក់​ការ​រឹតត្បិត​ថ្មី​ទេ នៅពេល​អូស្ត្រាលី​​បាន​សង្កត់ធ្ងន់​លើ​ផលប្រយោជន៍​សេដ្ឋកិច្ច​ជាមួយនឹង​ការវិលត្រឡប់នៃ​អ្នកទេសចរ​ចិន​វិល​ទៅកាន់​អឺរ៉ុប​វិញ​។​

​ការចំណាយ​របស់​អ្នកទេសចរ​ចិន​នៅ​ទូទាំង​ពិភពលោក​មុនពេល​ផ្ទុះ​កូវី​ដមាន​ចំនួន​ជាង​២៥០​ពាន់​លាន​ដុល្លារ​ក្នុង​មួយឆ្នាំ​។​

​អាម៉េរិក​បាន​លើកឡើង​អំពី​លទ្ធភាព​នៃ​ការ​បំប្លែង​ខ្លួន​វីរុស​កូវី​ដ​១៩​នៅពេល​វា​កំពុង​ឆ្លង​ពាសពេញ​ប្រទេស​ដែល​មាន​ប្រជាជន​ច្រើន​បំផុត​លើ​លោក​នេះ ព្រមទាំង​មន្ទិល​អំពី​តម្លាភាព​របស់​អាជ្ញាធរ​​ចិន​ទៀតផងស្តីពីទិន្នន័យកូវីដ១៩​៕

​ម៉ាឡេស៊ី​នឹង​ចូលរួមជាមួយប្រទេសដទៃទៀត បង្កើន​ការពិនិត្យ​អ្នកដំណើរ​មក​ពី​ចិន