​ប្រែ​សម្រួលៈ​បំណង​(​ដេល្លី​ម៉េល​)៖​ចិន​កាលពី​ថ្ងៃ​សុក្រ​បានតែងតាំង​ឯកអគ្គរដ្ឋទូត​របស់​ខ្លួន​ប្រចាំ​សហរដ្ឋ​អាម៉េរិក​លោក​ឈីន ហ្កាង​( Qin Gang)​ជា​រដ្ឋមន្ត្រី​ការបរទេស​ថ្មី​។​

​ជា​អ្នកការទូត​កំពូល​មួយ​រូប​ដែល​ល្បី​ខាង​ប្រើ​ពាក្យសម្តី​ខ្លាំង​លើ​លោកខាងលិច លោក​ឈីន អាយុ​៥៦​ឆ្នាំ នឹង​ជំនួស​លោក​វ៉ាង យី ដែល​ជាមុខមាត់​កិច្ចការ​ទូត​ចិន​ចាប់តាំងពី​ឆ្នាំ​២០១៣​។​

​ឈីន ដែល​ជា​ជំនួយការ​ដ៏​ទុកចិត្ត​មួយ​រូប​របស់​ប្រធានាធិបតី ស៊ី ជីន​ភីង ត្រូវបាន​ដំឡើង​ឋានៈ​ចូល​ក្នុង​ការិយាល័យ​នយោបាយ​នៃ​បក្ស​កុំម្មុយនីស្ត​ចិន​កាលពី​ខែតុលា និង​ត្រូវ​រំពឹងទុក​ថា​នឹង​ដើរតួនាទី​​ធំ​មួយ​ក្នុង​គោលនយោបាយ​ការបរទេស​។​លោក​បាន​ឡើង​ឋានៈ​តាមរយៈ​តួនាទី​ផ្សេងៗ រួម​មាន​អ្នកនាំពាក្យ​ក្រសួងការបរទេស​ចិន​និង​មុខតំណែង​ជាច្រើន​នៅ​ស្ថានទូត​ចិន​ប្រចាំ​អង់គ្លេស​។​

ជា​អ្នក​ក្រុង​ទៀន​ជីន​(Tianjin)និងនិយាយ​ភាសា​អង់គ្លេស​យ៉ាង​ស្ទាត់​លោក​ធ្លាប់​បំរើ​ជា​នាយក​ពិធីការ​របស់លោក​ស៊ី​រវាង​ឆ្នាំ​២០១៤​និង​២០១៨​ មុនឡើងជា​អនុ​រដ្ឋមន្ត្រីការបរទេស​រវាង​ឆ្នាំ​២០១៨​និង​ឆ្នាំ​២០២១​។

​ក្រោយ​ត្រូវ​បាន​តែងតាំង លោក​ឈីន​នឹង​វិល​ពី​វ៉ាស៊ីនតោន​មក​កាន់​ទីក្រុង​ប៉េកាំង​ក្រោយ​បំរើការ​ជា​ឯកអគ្គរដ្ឋទូត​ចិន​ប្រចាំ​អាម៉េរិក​បាន​១៧​ខែ​។​សូមបញ្ជាក់ថា លោក​ត្រូវបាន​បញ្ជូន​ទៅ​អាម៉េរិក​នៅ​ឆ្នាំ​២០២១​និង​បាន​​ខិតខំ​ការពារ​ផលប្រយោជន៍​ចិន​ព្រមទាំង​បញ្ចេញ​កិច្ចការ​ទូត​ទន់ភ្លន់​របស់​ចិន​។​

​ក្នុង​អំឡុងពេល​ស្នាក់នៅ​ក្រុង​វ៉ាស៊ីនតោន​របស់លោក តំណាង​ចិន​រូបនេះ​ធ្លាប់​បាន​ចូល​លេង​បាល់បោះ​ក្នុង​ក្លឹប​ល្បី​របស់​អាម៉េរិក​និង​ជិះ​រថយន្ត​ជាមួយ មហាសេដ្ឋី​អ៊ី​ឡុន ម៉ាស ថែម​ទៀត​។​កាល​នៅ​ជា​អ្នក​នាំ​​ពាក្យ​ក្រសួងការបរទេស លោក​បាន​បញ្ចេញ​សារ​និយម​កណ្តាល​របស់​ចិនទៅ​លើ​ប្រធានបទ​ក្តៅៗ​។​លោក​បាន​និយាយថា រដ្ឋាភិបាល​ទីក្រុង​ប៉េកាំង​នឹង​ព្យាយាម​បញ្ឈប់​មិន​អោយ​រុស្ស៊ី​ចូល​ឈ្លានពាន​អ៊ុ​យក្រែន​​បើសិនជា​ខ្លួន​បានដឹង​ផែនការ​ជាមុន ហើយក៏​បាន​និយាយ​សម្រាល​អំពី​សង្គ្រាម​មួយ​ជាមួយ​តៃវ៉ាន់​។​

​ការតែងតាំង​លោក​ឈី​ញ​ជួន​ពេល​ដែល​លោក​ស៊ី​ជំរុញ​ការផ្សះផ្សារ​ទំនាក់ទំនង​ជាមួយ​អាម៉េរិក​និង​សម្ពន្ធមិត្ត​របស់​រដ្ឋាភិបាល​ទីក្រុង​វ៉ាស៊ីនតោន​។​​លោក​ស៊ី បាន​ជួន​ពិភាក្សា​ផ្ទាល់​ជាមួយ​ប្រធានាធិបតី​អាម៉េរិ​ក ចូ បៃ​ដិន ក្រៅ​ជំនួប​កំពូល​G20​នៅ​កោះ​បាលី និង​ក៏​បាន​ជួបក្រុម​មេដឹកនាំ​ដែល​ជា​ដៃគូ​កំពូលៗ​របស់​អាម៉េរិក រួម​មាន​ជប៉ុន​និង​អូស្ត្រាលី​។​

​លោក​វ៉ាង អាយុ​៦៩​ឆ្នាំ ត្រូវបាន​តែងតាំង​ទៅ​ក្នុង​ជួរ​ការិយាល័យ​នយោបាយ​ដែល​មាន​សមាជិក​២៤​រូប ក្រោយ​ការបញ្ចប់​សមាជ​បក្ស​កាលពី​ពេល​ថ្មីៗ​។​លោក​ទំនង​ជា​កាន់កាប់​គោលនយោបាយ​ការបរទេស​​សំរាប់​គណបក្ស​បន្ទាប់​ពី​លោក​យ៉ាង យី​ជិ​(ang Jiechi)​លាឈប់​ពី​ការិយាល័យ​នយោបាយ​និងចូលនិវត្តន៍។​

ក្រោយ​ដឹងថា​លោក​ក្លាយជា​ប្រមុខ​ការទូត​ថ្មី​របស់​ចិន រដ្ឋមន្ត្រី​ការ​បរ​​ទេស​អាម៉េរិក​លោក អ៊ែន​ថូ​នី ប្លីន​កិន បាន​និយាយថា​លោក​រំពឹងថា​នឹង​បន្ត​ទំនាក់ទំនង​ការងារ​បែប​ស្ថាបនា​មួយ​ជាមួយ​លោក​ឈីន ក្នុង​តួ​នា​ទី​ថ្មី​របស់​លោក​៕

​ឈីន ហ្កាង ត្រូវបានតែងតាំង​ជា​រដ្ឋមន្ត្រី​ការបរទេស​ចិន​ថ្មី​កាលពី​ថ្ងៃ​សុក្រ​។​លោក​តំណាង​អោយ​មុខមាត់​ចិន​នៅ​អាម៉េរិក​ចាប់តាំងពី​ឆ្នាំ​២០១៣ និង​ត្រូវ​គេ​ផ្តល់​រហស្សនាម​ថា​«​អ្នក​សង្គ្រាម​ចចក​»​ដោយ​​សារ​តែ​ពាក្យសម្តី​ឆ្លើយតប​ខ្លាំងក្លា​ទៅ​កាន់​បណ្តា​ប្រទេស​លោកខាងលិច ដែល​បាន​ធ្វើអោយ​ប៉ះពាល់​ផលប្រយោជន៍​ចិន​