​ប្រែ​សម្រួល : កញ្ញា​ដា​លី​ស (​ដេល្លី​ម៉េល​) ៖ យោធា​របស់​រដ្ឋាភិបាល​ក្រុង​សេ​អ៊ូ​ល​បាន​និយាយថា កូរ៉េ​ខាងជើង​បាន​បាញ់​មី​ស៊ី​ល​ផ្លោង​ចំនួន​បី​គ្រាប់​នៅ​ព្រឹក​ថ្ងៃ​សៅរ៍​ទី​៣១​ធ្នូ​នេះ​គឺ​តែ​ប៉ុន្មាន​ថ្ងៃ​បន្ទាប់​ពី​ដ្រូ​ន​របស់​​រដ្ឋាភិបាល​ក្រុង​ព្យុង​យ៉ាង​ចំនួន​ប្រាំ​គ្រឿង​បាន​ហោះ​ឆ្លងកាត់​ព្រំដែន​រួមគ្នា​និង​ចូលទៅក្នុង​ដែនអាកាស​របស់​កូរ៉េខាងត្បូង​។​

​ភាព​តានតឹង​ផ្នែក​យោធា​នៅ​ឧបទ្វីប​កូរ៉េ​បាន​កើនឡើង​យ៉ាង​ខ្លាំង​នៅ​ឆ្នាំ​នេះ ខណៈ​កូរ៉េ​ខាងជើង​បាន​សាកល្បង​អាវុធ​ក្នុង​ចំនួន​ដ៏​ច្រើន​មិន​ធ្លាប់​មាន​ពីមុន​មក​រួម​ទាំង​ការបាញ់​មី​ស៊ី​ល​ផ្លោង​អន្តរទ្វីប​​កម្រិត​ខ្ពស់​បំផុត​មិន​ធ្លាប់​មាន​កាលពី​ខែ​មុន​។​

​អគ្គសេនាធិការ​ចម្រុះ​របស់​កូរ៉េ​ខាងត្បូង​បាន​និយាយ​កាលពី​ថ្ងៃ​សៅ​រ៍ថា “​កូរ៉េ​ខាងជើង​បាន​បាញ់​មី​ស៊ី​ល​ផ្លោង​មិន​ស្គាល់​អត្តសញ្ញាណ​ចូល​ទៅ​សមុទ្រ​ខាងកើត​” ដោយ​សំដៅ​ទៅលើ​ដែនទឹក​ដែល​គេ​ស្គាល់​ដែរ​ថា សមុទ្រ​ជប៉ុន​។​

​ការបំពាន​ដែនអាកាស​កាលពី​ថ្ងៃ​ចន្ទ​ដោយ​ដ្រូ​ន​របស់​កូរ៉េខាងជើង ដែល​មួយ​គ្រឿង​ក្នុងចំណោម​នោះ​បាន​ហោះ​ជិត​រដ្ឋធានី​សេ​អ៊ូ​ល​បាន​ជំរុញ​ឱ្យ​យោធា​កូរ៉េខាងត្បូង​ដាក់ពង្រាយ​យន្តហោះ​ចម្បាំង​និង​​ឧទ្ធម្ភាគចក្រ​វាយប្រហារ​។​ប៉ុន្តែ​ទោះបីជា​មាន​ប្រតិបត្តិការ​រយៈពេល​ប្រាំ​ម៉ោង​ក៏​ដោយ ក៏​យោធា​នៅតែ​បរាជ័យ​ក្នុង​ការបាញ់​ទម្លាក់ដ្រូន​សូម្បី​មួយ​គ្រឿង ដែល​បង្ក​ឱ្យ​មាន​ការរិះគន់​យ៉ាង​ទូលំទូលាយ​ជុំវិញ​​ការឆ្លើយតប​និង​ការសុំ​ទោស​ពី​រដ្ឋមន្ត្រី​ការពារជាតិ​របស់​ប្រទេស​នេះ​។​

​ប្រធានាធិបតី​កូរ៉េខាងត្បូង​លោក យូ​ន ស៊ុក​យ៉ូល បាន​និយាយថា ឧបទ្ទវហេតុ​នេះ​គឺ “​មិន​អាច​អត់ឱន​ឱ្យ​បាន​ទេ​” ហើយ​បាន​បន្ថែមថា កូរ៉េខាងត្បូង​គួរតែ​ធានាថា រដ្ឋាភិបាល​ព្យុងយ៉ាង​នឹង​បាន​​ដឹងខ្លួន​ថា “​ការ​បង្កហេតុ​តែងតែ​ជួបប្រទះ​ជាមួយនឹង​ផលវិបាក​ដ៏​អាក្រក់​”​។​

​យោធា​របស់​រដ្ឋាភិបាល​ក្រុង​សេ​អ៊ូ​ល​បានធ្វើ​សមយុទ្ធ​ជា​បន្តបន្ទាប់​កាលពី​ថ្ងៃ​ព្រហស្បតិ៍​ដែល​មេទ័ព​កំពូល​របស់​ប្រទេស​និយាយ​ថា​នឹង​ធ្វើឱ្យ​ប្រសើរឡើង​នូវ​ការការពារ​របស់ខ្លួន​ប្រឆាំង​នឹង​ការ​បង្កហេតុ​​របស់ដ្រូន​នាពេល​អនាគត​។​

​ថ្ងៃ​ចន្ទ​បានកត់សម្គាល់​ជា​ថ្ងៃ​ទី​មួយ​ក្នុង​រយៈពេល​ប្រាំ​ឆ្នាំ ដែល​ដ្រូ​ន​របស់​កូរ៉េ​ខាងជើង​បាន​ហោះ​ចូលទៅក្នុង​ដែនអាកាស​របស់​កូរ៉េខាងត្បូង​៕

កូរ៉េ​ខាងជើង​បាន​សាកល្បង​អាវុធ​ក្នុង​ចំនួន​ដ៏​ច្រើន​មិន​ធ្លាប់​មាន​ពីមុន​មក​ក្នុង​ឆ្នាំ​២០២២