​ប្រែ​សម្រួលៈ​បំណង​(​ដេល្លី​ម៉េល​)៖ ប្រធានាធិបតី​រុស្ស៊ី​លោក​វ្ល៉ា​ឌី​មៀ ពូ​ទីន និង​សម​ភាគី​ចិន ស៊ី ជីន​ភីង កាលពី​រសៀល​ថ្ងៃ​សុក្រ​បាន​ជួប​សន្ទនា​គ្នា​តាម​វីដេអូ​បន្ត​ផ្ទាល់​ដោយ​មេដឹកនាំ​ទាំង​ពីរ​បាន​ប្តេជ្ញា​​ពង្រឹង​កិច្ច​សហការ​ទ្វេភាគី​របស់​ប្រទេស​ទាំង​ពីរ​ចំពេល​អ៊ុយ​ក្រែន​ជួប​ការវាយប្រហា​រដោ​យ​រ៉ុក្កែត​និង​ដ្រូ​ន​ពេញ​មួយ​យប់​ទៀត​បន្ទាប់​ពី​រង​ការបាញ់​កាំជ្រួច​ទ្រង់ទ្រាយ​ធំ​ពី​កងកម្លាំង​រុស្ស៊ី​។​

​ពូ​ទីន កាលពី​ថ្ងៃ​សុក្រ​បានប្រាប់សម​ភាគី​ចិន ស៊ី ជីន​ភីង ថា​«​យើង​មាន​បំណង​ពង្រឹង​កិច្ច​សហការ​យោធា​រវាង​កងកម្លាំង​រុស្ស៊ី​និង​ចិន​»

​ការសន្ទនា​តាម​វីដេអូ​នៅ​ថ្ងៃ​ចុង​ឆ្នាំ​របស់​លោក​ទាំង​ពីរ បញ្ជាក់​ការពឹង​អាស្រ័យ​កាន់តែខ្លាំង​ឡើង​របស់​រុស្ស៊ី​លើ​រដ្ឋាភិបាល​ទីក្រុង​ប៉េកាំង​។​លោកពូ​ទីន​បាន​និយាយថា លោក​រំពឹង​ថា​ប្រធានាធិបតី​ចិន ស៊ី​​ជីន​ភីង នឹង​ទៅ​ធ្វើ​ទស្សនកិច្ច​ផ្លូវ​រដ្ឋ​នៅ​រុស្ស៊ី​នៅ​ឆ្នាំ​២០២៣ ក្នុង​អ្វី​ដែល​អាច​ជា​ការបង្ហាញ​សាមគ្គីភាព​ជា​សាធារណៈ​មួយ​ពី​រដ្ឋាភិបាល​ក្រុង​ប៉េកាំង​ចំ​ពេល​យុទ្ធនាការ​យោធា​របស់​ក្រុង​មូ​ស្គូនៅរយៈពេលដប់ខែមកនេះ​មិនសូវ​ទទួលបាន​​ជោគជ័យ​។​

​ក្នុង​ការចាប់ផ្តើម​សន្ទនា​គ្នា​ដែល​ត្រូវបាន​ផ្សាយ​តាម​ទូរទស្សន៍​រដ្ឋ លោកពូ​ទីន បាន​និយាយថា​«​យើង​រំពឹងថា​លោក​ប្រធាន​ជាទី​ស្រា​ឡា​ញ់ មិត្ត​ជា​ទីស្រឡាញ់​នឹង​មក​ធ្វើ​ទស្សនកិច្ច​ផ្លូវ​រដ្ឋ​នៅក្រុង​មូ​ស្គូ​នា​និទា​​ឃ​រដូវ​ខាងមុខ​»​។​

​លោក​បាន​បន្តថា​ដំណើរ​ទស្សនកិច្ច​នេះ​នឹង​បង្ហាញ​ពិភពលោក​អំពី​ទំនាក់ទំនង​ជិតស្និទ្ធ​រវាង​ចិន​និង​រុស្ស៊ី​។​លោក​ថា ទំនាក់ទំនង​រុស្ស៊ី​-​ចិន​បាន​និង​កំពុង​រីកចំរើន​ឡើង​ដោយ​វា​ប្រើ​ជា​កក្តា​បង្កើត​ស្ថិរភាព​​មួ​យ​និង​ថា​លោក​មាន​បំណង​ពង្រឹង​កិច្ច​សហការ​យោធា​រវាង​ប្រទេស​ទាំង​ពីរ​ហើយ​អបអរ​កិច្ចខិតខំ​របស់​រដ្ឋាភិបាល​ទីក្រុង​មូ​ស្គូ​និង​ប៉េកាំង​ក្នុងការ​វាយបក​លើ​សម្ពាធ​និង​ការបង្ក​រឿង​ពី​លោកខាងលិច​។​

​ក្នុង​ការឆ្លើយតប លោក​ស៊ី​បាន​បញ្ជាក់ថា​ចិន​ត្រៀម​ខ្លួន​បង្កើន​កិច្ចសហប្រតិបត្តិការ​យុទ្ធសាស្ត្រ​ជា​មួយ​រុស្ស៊ីដើម្បី​ប្រឆាំងនឹង​អ្វី​ដែល​លោក​ហៅថា​«​ស្ថានការណ៍​លំបាក​»​មួយ​នៅក្នុង​ពិភពលោក​។​លោក​ថា ផ្លូវ​​ទៅកាន់​កិច្ចពិភាក្សា​សន្តិភាព​ស្តី​អ៊ុ​យក្រែ​ន​នឹង​មិន​រលោង​ទេ និង​ថា​ចិន​នឹង​«​បន្ត​ប្រកាន់​គោលជំហរ​មិន​លម្អៀង​និង​ត្រឹមត្រូវ​»​របស់​ខ្លួន​លើ​បញ្ហា​នេះ ។​

​លោក​ស៊ី​ក៏​បាន​អរគុណ​លោកពូ​ទីន​ចំពោះ​ការផ្ញើ​សារ​អបអរ​មួយ​បន្ទាប់​ពី​សមាជ​បក្ស​កាលពី​ខែ​តុលា​បាន​ប្រគល់​អំណាច​សំរាប់​អាណត្តិ​ទី​បី​ដល់​រូបលោក​និង​ថា​ចិន ត្រៀម​ខ្លួន​ពង្រីក​«​ភាព​ជា​ដៃគូ​យុទ្ធ​សា​​ស្ត្រ​»៕