​ប្រែ​សម្រួលៈ​បំណង​(​ស្ត្រេត​ថែមស៍​)៖ លោក​អ៊ី​ឡុន ម៉ាស ជា​បុគ្គល​ទី​ពីរ​លើ​លោក​ដែល​ធ្លាប់​មាន​ទ្រព្យធន​ជាង​២០០​ពាន់​លាន​ដុល្លារកាលពី​ខែ​មករា​ឆ្នាំ​២០២១ នៅ​ពេល​តែ​ប៉ុន្មាន​ខែ​ក្រោយ​ពី​មហាសេដ្ឋី​​ក្រុមហ៊ុន​Amazon​លោក ហ្សេ​ហ្វ បេ​ហ្សូ​ស កើន​បាន​ទ្រព្យ​ប៉ុណ្ណោះ​។​

​នាយក​ក្រុមហ៊ុន​Tesla​នេះ​ឥឡូវ​សំរេច​កំណត់ត្រា​ថ្មី​មួយទៀត​តែ​ឯង​ទេនៅ​ក្នុង​ប្រវត្តិសាស្ត្រ​គឺជា​បុគ្គល​បាន​ខាតបង់​ប្រាក់​២០០​លាន​ដុល្លារ​ពី​ទ្រព្យ​សុទ្ធ​របស់លោក​។​

​លោក​ម៉ាស អាយុ​៥១​ឆ្នាំ បានឃើញ​ទ្រព្យ​របស់​លោក​១៣៧​ពាន់​លាន​រលាយបាត់​ក្រោយ​ពី​ភាគហ៊ុន​ក្រុមហ៊ុន​រថយន្ត​Tesla​ដាំ​ក្បាល​ចុះ​នៅ​ប៉ុន្មាន​សប្តាហ៍​ចុងក្រោយ​នេះ រួមមានការ​ធ្លាក់ចុះ​១១​ភាគរយ​កាលពី​​ថ្ងៃ​អង្គារ នេះ​បើ​តាម​ស​ន្ទ​ស្សន៍​Bloomberg Billionaires Index​។​

​ទ្រព្យ​របស់​លោក​បាន​កើន​ដល់​៣៤០​ពាន់​លាន​ដុល្លារ​កាលពី​ថ្ងៃ​៤ វិច្ឆិកា ឆ្នាំ​២០២១ ហើយ​លោក​បាន​ក្លាយជា​អ្នក​មាន​បំផុត​លើ​លោក​រហូត​ទាល់តែ​មហាសេដ្ឋី​ជំនួញ​បារាំង ប៊ែរ​ណាត អា​ណូល​(Bernard Arnault)​ចូល​ជំនួស​រូបលោក​កាលពី​ខែ​ធ្នូ​ឆ្នាំ​២០២២​។​ក្រុមហ៊ុន​Tesla​បាន​ឡើងថ្លៃ​ហួស​១​ទ្រី​លាន​ដុល្លារ​ជា​លើកដំបូង​នៅ​ខែតុលា​ឆ្នាំ​២០២១ ដោយ​ចូលរួម​ជាមួយ​ក្រុមហ៊ុន​ធំៗ​និង​ល្បី​បំផុត​ក្នុង​លោក​Apple, Microsoft, Amazon​និង Alphabet ទោះ​ជា​រថយន្ត​អគ្គិសនី​របស់​វា​តំណាង​អោយ​ចំណែក​តូច​មួយ​នៃ​ទីផ្សារ​រថយន្ត​សរុប​ក្តី​។​

​ឥឡូវ ការត្រួតត្រា​របស់​Tesla​នៅក្នុង​ទីផ្សារ​រថយន្ត​អគ្គិសនី កំពុង​ជួប​ការ​ប្រជែង​ខ្លាំង​នៅពេល​គូប្រជែង​កាន់តែ​កើតមាន​ច្រើន​។​ក្រុមហ៊ុន​ប្រកាស​លក់​ចុះថ្លៃ​ដល់​ទៅ​៧.៥០០​ដុល្លារក្នុងមួយគ្រឿង​សំរាប់រ​ថយ​ន្ត​ពីរ​ម៉ូ​ដែល​​ថ្លៃ​បំផុត​របស់​ខ្លួន​នៅមុន​ដំណាច​ឆ្នាំ​នេះ ក្នុងពេល​ប្រកាស​កាត់បន្ថយ​ផលិតកម្ម​នៅ​រោងចក្រ​របស់​ខ្លួន​នៅ​សៀង​ហៃទៀតផង​។​

​ក្នុងពេល​លោក​ម៉ាស​ជួប​សម្ពាធ​ខ្លាំង​នៅ​Tesla លោក​ក៏​ជួប​គ្រោះ​ធំ​នៅក្នុង​ហ៊ុន​បណ្តាញ​សង្គម​Twitterដែល​លោកបាន​កៀរគរ​ទុន​៤៤​ពាន់​លាន​រួម​ទាំង​លុយ​ពី​ការលក់​ភាគហ៊ុន​Tesla​ដើម្បី​ទិញ​វា​កាល​​ពី​ខែ​តុលា​។​លោក​បាន​ចាត់វិធានការ​បែប​ថៅកែ ដោយ​បណ្តេញចោល​បុគ្គលិក​រាប់ពាន់​នាក់​ភ្លាមៗរួមទាំង​អ្នក​ចាត់ចែង​ការ ចូល​គ្រប់គ្រង​ដោយ​ខ្លួនឯង ប្រកាស​ខាតបង់​រាប់រយ​លាន​និង​ព្រមាន​ក្ស័យ​​ធន​ចំពេល​បុគ្គលិក​ប្រឆាំង​របៀប​ដឹកនាំ​របស់​លោក​។​

​ភាគហ៊ុន​Tesla​ធ្លាក់ចុះ​ថ្លៃ​ខ្លាំង គឺ​ធ្លាក់​អស់​៦៥​ភាគរយ​នៅ​ឆ្នាំ​២០២២ ហើយ​លោក​ម៉ាស​បាន​លក់​វា​ចេញ​ភាគច្រើន​នៅ​ឆ្នាំ​២០២២​ដើម្បី​យក​លុយ​ទៅ​បង្គ្រប់​ការទិញ​Twitter ដែល​ក៏​ជា​ការខាតបង់​​ប្រាក់​សន្ធឹកសន្ធាប់​របស់លោក​។​

​លោក​ម៉ាស​ឥឡូវ​មាន​ភាគហ៊ុន​៤២,២​ភាគរយ​នៅ​ក្រុមហ៊ុន​SpaceX​។​

លោក ម៉ាស​ច្រាន​ចោល​ការព្រួយបារម្ភ​អំពី​ក្រុមហ៊ុន​Tesla​និង​ជាថ្មីទៀត​លោក​បាន​ប្រើ​បណ្តាញ​សង្គម​Twitter​ដើម្បី​រិះគន់​ធនាគារ​កណ្តាល​អាម៉េរិក​ចំពោះ​ការ​ដំ​ឡើង​អត្រា​កា​ប្រាក់​ក្នុង​​ល្បឿន​លឿន​បំផុត​ក្នុង​ជំនាន់​មួយ​។​លោក​បាន​និយាយថា​«Tesla​នឹង​ល្អ​ប្រសើរ​ឡើង​ជាង​មុន​!​។​យើង​មិន​គ្រប់គ្រង​ធនាគារ​កណ្តាល​ទេ​។​នោះ​ជា​បញ្ហា​ពិត​នៅ​ទីនេះ​»៕

​លោក​អ៊ី​ឡុន ម៉ាស ជា​បុរស​មាន​បំផុត​លើ​លោក មុន​មហាសេដ្ឋី​បារាំង​ចូល​ជំនួស​កាលពី​ចុងឆ្នាំ​២០២២

អ៊ីឡុន ម៉ាស(ឆ្វេង) ហ្សេហ្វ បេហ្សូស,ចាវ ឆាងប៉េង និងម៉ាក ហ្សាក់ឃឺប៊ឺក ឃើញទ្រព្យរបស់គេ៣៩២ពាន់លានដុល្លាររលាយបាត់ក្នុងឆ្នាំ២០២២