​ប្រែ​សម្រួល : កញ្ញា​ដា​លី​ស (​ស្ត្រេត​ថែមស៍​) ៖ ក្រសួង​ការពារជាតិ​កូរ៉េខាងត្បូង​បាន​និយាយ​កាលពី​ថ្ងៃ​សុក្រ​ទី​៣០​ធ្នូ​ថា​យាន​ចម្រុះ​មុខងារ​មិន​ស្គាល់​អត្តសញ្ញាណ​មួយ​គ្រឿង​ដែល​ហោះ​ពីលើ​រដ្ឋធានី​សេ​អ៊ូ​ល​​គឺជា​ការសាកល្បង​ដោយ​ជោគជ័យ​នៃ​រ៉ុក្កែត​អវកាស​ឥន្ធនៈ​រឹង​របស់​ខ្លួន ដោយ​បំបាត់​ក្តីបារម្ភ​ថា​វា​អាច​ជា​យាន​ភព​ក្រៅ​ដែល​មក​លេង​ផែនដី​។​

​ក្រសួង​បាន​និយាយថា ការហោះហើរ​សាកល្បង​នេះ​គឺ​ធ្វើឡើង​បន្ទាប់​ការបាញ់​បង្ហោះ​រ៉ុក្កែត​មួយ​ផ្សេង​ទៀត​ដែល​ធ្វើឡើង​កាលពី​ថ្ងៃទី ៣០ ខែ​មីនា​។​

​ក្រសួង​បាន​បន្ថែមថា ការបាញ់​បង្ហោះ​នេះ​ធ្វើឡើង​ដើម្បី​ពង្រឹង​សមត្ថភាព​ការពារ​ជាតិ​លើ​វិស័យ​នានា​ដូចជា ឯករាជ្យ ការឃ្លាំមើល​តាម​លំហ​អាកាស និង​ឈ្លបយកការណ៍​។​

​ក្រសួង​ក៏​បាន​សុំ​ទោស​ផង​ដែរ​ដែល​មិន​បាន​ព្រមាន​សាធារណ​ជន​ជា​មុន​។​

​នៅ​ម៉ោង​ប្រហែល ៦ ល្ងាច ពន្លឺ​ពណ៌​ឥន្ទធនូ​ចម្លែក​ត្រូវបាន​ប្រទះឃើញ​នៅ​លើ​មេឃ​ពាសពេញ​ប្រទេស​កូរ៉េខាងត្បូង រួម​ទាំង​នៅក្នុង​ទីក្រុង​សេ​អ៊ូ​ល និង​ផ្នែក​ខ្លះ​នៃ​ខេត្ត​កាង​វ៉ុន (Gangwon) ខេត្ត​ក្យឹង​ជី (Gyeonggi) និង ខេត្ត​ជុង​ឆឹង​ខាងត្បូង (South Chungcheong)​។​

​វិថី​រាង​កោង​និង​ពណ៌​របស់​រ៉ុក្កែត​បានធ្វើឱ្យ​សាក្សី​មួយ​ចំនួន​សន្និដ្ឋាន​បឋម​ថា វា​ជា​ថាសហោះ​ឬ​ហៅថា UFO រហូត​ដល់​ក្រសួង​ធ្វើការ​ប្រកាស​បកស្រាយ​។​

​កូរ៉េខាងត្បូង​បាន​បាញ់​បង្ហោះ​រ៉ុក្កែត​អវកាស​ឥន្ធនៈ​រឹង​ជា​លើកដំបូង​ក្នុង​ខែមីនា ដែល​ជា​ផ្នែក​មួយ​នៃ​គម្រោង​អភិវឌ្ឍន៍​ផ្កាយរណប​ឃ្លាំ​មើល​ស៊ីវិល​និង​យោធា​៕

អ្នកក្រុង​សេ​អ៊ូ​ល​ចោមរោម​មើល​ពន្លឺ​ចម្លែក​កាលពី​ថ្ងៃ​សុក្រ ដោយ​នាំគ្នា​ស្មានថា​ជា​ថាសហោះ​មកពី​ភព​ក្រៅ​មកលេង​ផែនដី​