ភ្នំពេញៈនៅក្នុង​ឆ្នាំ​២០២២ មាន​ព្រឹត្តិការណ៍​ជាតិ​សំខាន់ៗ ជាច្រើន បានកើត​ឡើង ដូចជា កម្ពុជា ជា​ប្រធាន​អាស៊ាន បញ្ហា​ឆ្លង​កូ​វីដ​១៩ រួមទាំង​ព្រឹត្តិការណ៍​ជាច្រើន​ទៀត​។

១- យុទ្ធនា​ការចាក់​វ៉ាក់សាំង​ដូ​ស​ទី​៣ ដល់​កុមារ និង​យុវវ័យ អាយុ​ពី ១២​ឆ្នាំ ដល់​ក្រោម ១៨​ឆ្នាំ ចាប់ផ្តើម​ពី​រាជធានី ខេត្ត ចំនួន ៤

​កូ​វីដ​១៩ នៅ​ដើមឆ្នាំ​២០២២ គឺ​បាន​បន្ត​ឆ្លង​រាលដាល​ខ្លាំង​ដែរ ហើយ​ដំណើរ​ការចាក់​វ៉ាក់សាំង​ក៏​បន្ត ពិសេស​ចាក់​ដូ​ស​ទី​៣ ដល់​កុមារ និង​យុវវ័យ ដែលមាន​អាយុ​ចាប់ពី ១២​ឆ្នាំ ដល់​អាយុ​ក្រោម ១៨​ឆ្នាំ​។ ការចាក់​វ៉ាក់សាំង ដូ​ស​ជំរុញ ដូ​ស​ទី​៣ ដូ​ស​ទី​៤ និង​ដូ​ស​ទី​៥ ដើម្បី​រួមចំណែក​ការពារ​យើង​ពី​ជំងឺ​កូ​វីដ​១៩ បន្ថែម​ពីលើ​វិធានការ ៣​កុំ និង ៣​ការពារ​។ កូ​វីដ​យើង​កាលណោះ ផ្ទុះ​ឆ្លង​ខ្លាំង​ឡើងវិញ នៅ​អំឡុង​ខែកុម្ភៈ ដោយ​វាយលុក​ប្រភេទ​អូ​មី​ក្រុង​។ ប៉ុន្តែ​យើង​មិនមាន​អ្នកស្លាប់​បន្តទៀត​ឡើយ ហើយ​អ្នក​ឈឺ ដែល​ឆ្លង​កូ​វីដ​ថ្មី ស្ទើរតែ​ទាំងអស់ អាច​ព្យាបាល​ដោយ​ខ្លួនឯង នៅផ្ទះ ដោយ​ត្រឹមតែ ១​សប្តាហ៍ បានជា​សះស្បើយ​វិញ​ហើយ​។​

២- ប្រធានាធិបតី​ឥណ្ឌូនេស៊ី គាំទ្រ​កម្ពុជា ក្នុងនាម​ជា​ប្រធាន​អាស៊ាន​ប្តូរ​វេន ឆ្នាំ​២០២២

​នៅ​ព្រឹក​ថ្ងៃទី​៤ ខែមករា សម្ដេច​តេ​ជោ ហ៊ុន សែន នាយករដ្ឋមន្ត្រី​កម្ពុជា បាន​ជួប​តាម​ទូរស័ព្ទ ជាមួយ​ឯកឧត្តម Joko Widodo ប្រធានាធិបតី​ឥណ្ឌូនេស៊ី​។ កិច្ចប្រជុំ​នេះ បានធ្វើ​ឡើង មុនពេល​សម្តេច​តេ​ជោ អញ្ជើញ​ទៅកាន់​ប្រទេស​មី​យ៉ាន់​ម៉ា នា​ថ្ងៃទី​៧​មករា​។ ក្នុងជំនួប​ជាមួយ​ឯកឧត្តម Joko Widodo បានបង្ហាញ​នូវ​ការគាំទ្រ​ចំពោះ​សម្តេច​តេ​ជោ ក្នុងនាម​ជា​ប្រធាន​ប្តូរ​វេន​អាស៊ាន នៅ​ឆ្នាំ​២០២២ នេះ​។

៣-​សម្តេច​តេ​ជោ ហ៊ុន សែន ផ្តើម​ដំណើរ​ទស្សនកិច្ច ២​ថ្ងៃ នៅ​ប្រទេស​មី​យ៉ាន់​ម៉ា

​ដូច​ការគ្រោងទុក កាលពី​ព្រឹក​ថ្ងៃទី​៧ ខែមករា សម្តេច​តេ​ជោ ហ៊ុន សែន នាយករដ្ឋមន្ត្រី​កម្ពុជា បាន​អញ្ជើញ​ទៅ​បំពេញ​ទស្សនកិច្ច ២​ថ្ងៃ នៅ​ប្រទេស​មី​យ៉ាន់​ម៉ា​។ នៅពេល​អញ្ជើញ​ទៅដល់​អាកាសយានដ្ឋាន​អន្តរជាតិ​ណៃ​ពិដោរ សម្ដេច​តេ​ជោ​នាយករដ្ឋមន្ត្រី​កម្ពុជា បាន​អញ្ជើញ​ជា​អធិបតី​ប្រគល់​អំណោយ​មនុស្សធម៌ សម្ភារៈ​បរិក្ខារ​វេជ្ជសាស្ត្រ​របស់​ប្រជាជន និង​រាជរដ្ឋាភិបាល​កម្ពុជា ជូន​ទៅដល់​ប្រជាជន និង​រដ្ឋាភិបាល​មី​យ៉ាន់​ម៉ា​។ បន្ទាប់មក នៅ​រសៀល​ថ្ងៃ​ដដែល​នេះ សម្ដេចនាយក​រដ្ឋមន្ត្រី​កម្ពុជា ក៏បាន​ជួបពិភាក្សា​ការងារ​ទ្វេភាគី​ជាមួយនឹង​ប្រមុខរដ្ឋ​របប​យោធា​មី​យ៉ាន់​ម៉ា ឧ​ត្ត​ម​សេនីយ៍ មីន អោ​ង​ឡាំង តាម​កម្មវិធី ដែល​បាន​គ្រោងទុក​ផងដែរ​។​

​នៅក្នុង​ឱកាស​អញ្ជើញ​ជា​អធិបតី​សម្ពោធ​ដាក់​ឲ្យ​ប្រើប្រាស់​ជា​ផ្លូវការ​កំណាត់​ផ្លូវជាតិ​លេខ​៥ ពី​បាត់ដំបង ទៅ​ទីក្រុង​សិរី​សុភ័ណ ក្នុង​ខេត្តបន្ទាយមានជ័យ កាលពី​ថ្ងៃទី​១០​មករា សម្តេច​តេ​ជោ ក៏បាន​ប្រកាសថា ដំណើរ​ទស្សនកិច្ច​រប​ស់ស​ម្ដេច ទៅកាន់​ប្រទេស​មី​យ៉ាន់​ម៉ា តាមរយៈ​ការជួបពិភាក្សា​ការងារ​ដោយផ្ទាល់ ជាមួយ​ឧ​ត្ត​ម​សេនីយ៍ មីន អ៊ុង​ឡាំង កាលពី​ថ្ងៃទី​៧-៨​មករា ទទួលបាន​ជោគជ័យ លើស​ការរំពឹងទុក​។ ក្រៅពី​លើកឡើង​ពី​ភាពជោគជ័យ សម្ដេចនាយក​រដ្ឋមន្ត្រី​កម្ពុជា ក៏បាន​ថ្លែង​ប្រតិកម្ម​សាជាថ្មី ជុំវិញ​ការរិះគន់​នានា រាប់ទាំង​ការលើកឡើង​របស់​មន្ត្រី​ការទូត​សិង្ហ​បុរី ដែលជា​អតីត​អគ្គលេខាធិការ​អាស៊ាន​ផងដែរ​។​

៤- ករណី​មី​យ៉ាន់​ម៉ា​៖ ចិន ឥណ្ឌា អង់គ្លេស និង​ជប៉ុន សុទ្ធតែ​គាំទ្រ ហើយ​សរសើរ​កម្ពុជា

​រដ្ឋាភិបាល​មហាអំណាច នៅ​អាស៊ី មាន​ចិន ឥណ្ឌា និង​ជប៉ុន ជាដើម រួមទាំង​ចក្រភព​អង់គ្លេស ដែលជា​ជើង​ខ្លាំង​មួយ នៅ​លោកខាងលិច សុទ្ធតែ​បានបញ្ជាក់​អំពី​ការគាំទ្រ និង​កោត​ស​សើរ​កម្ពុជា សម្រាប់​ការដោះស្រាយ​វិបត្តិ​នៅ​មី​យ៉ាន់​ម៉ា​។ ការបញ្ជាក់​នេះ ត្រូវបាន​ធ្វើឡើង ដោយ​រដ្ឋមន្ត្រីការបរទេស អនុរដ្ឋមន្ត្រី​ការបរទេស និង​អ្នកនាំពាក្យ​ក្រសួងការបរទេស ពិសេស​ក្នុងជំនួប​ពិភាក្សា​ជាមួយ​ប្រមុខ​ការទូត​ខ្មែរ កាលពីពេល​ថ្មីៗ​នេះ​។​

៥- អគ្គលេខាធិការ​អាស៊ាន ប្រកាស​គាំទ្រ​ពេញទំហឹង ជួយ​ការងារ​កម្ពុជា ក្នុងនាម​ជា ប្រធាន​អាស៊ាន ឆ្នាំ​២០២២​នេះ អោយ​ទទួលបាន​ជោគជ័យ

​លោក លឹម ចុក ហ៊ុយ អគ្គលេខាធិការ​ការ​អា​ស៊ាន បាន​បំពេញ​ទស្សនកិច្ច នៅ​កម្ពុជា ចាប់ពី​ថ្ងៃទី​១៥ ដល់​ថ្ងៃទី​១៩ ខែមករា​។ ក្នុងឱកាស​ចូលជួប​សំដែង​ការគួរសម និង​ពិភាក្សា​ការងារ​ជាមួយ​សម្តេច​តេ​ជោ ហ៊ុន សែន នាយករដ្ឋមន្ត្រី និង​ជា​ប្រធាន​អាស៊ាន​ក្នុង​ឆ្នាំ​២០២២​នេះ នៅ​វិមាន​សន្តិភាព ក្នុង​រាជធានី​ភ្នំពេញ កាលពី​ថ្ងៃទី​១៧ ខែមករា លោក លឹម ចុក​ហ៊ុយ បានប្រកាស​គាំទ្រ​ពេញទំហឹង ដើម្បី​ជួយ​ការងារ​កម្ពុជា​អោយ​ទទួលបាន​ជោគជ័យ ក្នុងនាម​ប្រធាន​អាស៊ាន នៅ​ឆ្នាំ​២០២២​នេះ​។ នៅ​ឆ្នាំ​២០២២​នេះ អាស៊ាន​មានការ​ងារ​ច្រើន ដែល​ត្រូវធ្វើ​ជាអាទិ៍ រួមមាន ការដោះស្រាយ​បញ្ហា​ស្តារ​សេដ្ឋកិច្ច ជំរុញ​ការតភ្ជាប់​ឡើងវិញ​នៅក្នុង​តំបន់ ក្រោយ​ការគំរាមកំហែង​ដោយសារ​ជំងឺ​កូ​វីត​១៩ បញ្ហា​សន្តិភាព​នៅ​មី​យ៉ាន់​ម៉ា និង​ការជំរុញ​ព​ន្លឿ​ន​ការបញ្ចូល​ទី​ម័​រ​ខាងកើត ជា​សមាជិក​អាស៊ាន ជាដើម​។​

៦-​រាជធានី​ភ្នំពេញ ចាប់​បើក​យុ​ទ្ធា​នា​ការចាក់​វ៉ាក់សាំង ដូ​ស​ទី​៤ ជូន​ពលរដ្ឋ ដែលមាន​អាយុ ៦០​ឆ្នាំ​ឡើង

​កាលពី​ថ្ងៃទី​២១ ខែមករា រដ្ឋបាល​រាជធានី​ភ្នំពេញ បាន​បើក​យុទ្ធនា​ការចាក់​វ៉ាក់សាំង​បង្ការ​ជំងឺ​កូ​វីដ​-១៩ ដូ​ស​ទី​៤ ជូន​ប្រជាពលរដ្ឋ ដែលមាន​អាយុ​ចាប់ពី ៦០​ឆ្នាំ​ឡើង បន្ទាប់ពី​ចាក់​ជូន​មន្ត្រីរាជការ​ជួរមុខ កាលពី​សប្តាហ៍​មុន​។ ជាមួយគ្នានេះ រដ្ឋបាល​រាជធានី​ភ្នំពេញ បាន​អំពាវនាវ​ដល់​ប្រជាពលរដ្ឋ អាយុ​ចាប់ពី ៦០​ឆ្នាំ​ឡើង ដែល​បាន​ចាក់​ដូ​ស​ទី​៣​រួច មាន​គម្លាត​ចាប់ពី ៤​ខែ​ឡើង បន្ទាប់ពី​ការចាក់​ដូ​ស​ទី​៣ អោយ​រួសរាន់ មកចាក់​វ៉ាក់សាំង ដើម្បី​ធានា​ឱ្យបាន​នូវ​ភាពស៊ាំ​សហគមន៍​សំដៅ​ទប់ស្កាត់ និង​កាត់បន្ថយ​គ្រោះថ្នាក់​បណ្តាលមកពី​ការឆ្លង​រាលដាល​នៃ​មេរោគ​បំប្លែង​ខ្លួន​ថ្មី ប្រភេទ​អូ​មី​ក្រុង​។

៧-​សម្តេច​តេ​ជោ ហ៊ុន សែន ជួបពិភាក្សា​ការងារ​តាម​វិ​ដេ​អូ​ខន​ហ្វឺ​រេ​ន ជាមួយ​នាយ​ឧ​ត្ត​ម​សេនីយ៍ មីង អោ​ង ឡាំង ដើម្បី​បន្ត​រក​ដំណោះស្រាយ លើ​វិបត្តិ​នៅ​មី​យ៉ាន់​ម៉ា​

​សម្តេច​តេ​ជោ ហ៊ុន សែន នាយករដ្ឋមន្ត្រី​កម្ពុជា និង​ឯកឧត្តម នាយ​ឧ​ត្ត​ម​សេនីយ៍ មីង អោ​ង ឡាំង មេដឹកនាំ​ជាន់ខ្ពស់​របស់​មី​យ៉ាន់​ម៉ា កាលពី​រសៀល​ថ្ងៃទី​២៦ ខែមករា បាន​ជួប​ពិភាក្សាគ្នា តាម​ប្រព័ន្ធ​វីដេអូ ដើម្បី​បន្ត​ពិភាក្សា​រក​ដំណោះស្រាយ​លើ​វិបត្តិ​នៅ​មី​យ៉ាន់​ម៉ា​។​

៨- ស្ពាន​អាកាស​ថ្មី តម្លៃ​ជិត ១០​លាន​ដុល្លារ នៅ​ផ្លូវជាតិ​លេខ​៥ បើក​ការដ្ឋាន​សាងសង់

​កាលពី​ព្រឹក​ថ្ងៃទី​៣១ ខែមករា សម្តេច​តេ​ជោ ហ៊ុន សែន នាយករដ្ឋមន្ត្រី បាន​អញ្ជើញ​ជា​អធិបតី​បើកសម្ពោធ​ការដ្ឋាន​សាងសង់​ស្ពាន​អាកាស​ថ្មី​មួយ នៅ​ផ្លូវជាតិ​លេខ​៥ ក្នុង​ខណ្ឌឫស្សីកែវ រាជធានី​ភ្នំពេញ ដែល​គ្រោង​ចំណាយ​ថវិកា​សាងសង​ជិត ១០​លាន​ដុល្លារ​សហរដ្ឋអាមេរិក​។ ការសាងសង់​ស្ពាន​អាកាស​ថ្មី ដោយ​ប្រើប្រាស់​រូបមន្ត​យក​ស្លឹកត្នោត​ខ្ចប់​ស្ករត្នោត​នេះ ត្រូវបាន​សម្តេច​តេ​ជោ ហ៊ុន សែន អះអាងថា នឹងចូលរួម​ចំណែក​សំខាន់​បន្ថែមទៀត ជួយ​សម្រួល ក៏ដូចជា​ការរំដោះ​ការកកស្ទះ​ចរាចរណ៍ នាពេល​បច្ចុប្បន្ន ក្នុង​រាជធានី​ភ្នំពេញ​។​

៩- ព្រះមហាក្សត្រ ផ្តល់​សញ្ជាតិ​ខ្មែរ​ដល់​ក្រុមគ្រួសារ​លោក បេន ដែល​ការពារ​ព្រៃឈើ នៅ​ខេត្តព្រះវិហារ​

​ព្រះករុណា ព្រះមហាក្សត្រ សម្តេចព្រះ​បរមនាថ នរោត្តម សីហមុនី បានចេញ​ព្រះរាជក្រឹត្យ ផ្តល់​សញ្ជាតិ​ខ្មែរ ដល់​ក្រុមគ្រួសារ លោក បេន ជា​ជនជាតិ​អាមេរិក ដែល​បាន​ចូលមក​រស់នៅ និង​ការពារ​ធនធានធម្មជាតិ អស់​ជាច្រើន​ឆ្នាំ​មកហើយ នៅក្នុង​សហគមន៍​ភ្នំ​ត្នោត​-​ភ្នំ​ពក ក្នុង​ខេត្តព្រះវិហារ​។ គ្រួសារ​លោក បេន មាន​សមាជិក ៤​នាក់ រួមមាន លោក បេន សញ្ជាតិ​អាមេរិក និង​ប្រពន្ធ ជា​ជនជាតិ​អូស្ត្រាលី រួមទាំង​កូនស្រី ២​នាក់​របស់លោក បេន ដែលមាន​សញ្ជាតិ​អូស្ត្រាលី​។​

១០- សម្តេច​តេ​ជោ ហ៊ុន សែន អញ្ជើញ​បំពេញ​ទស្សនកិច្ច នៅ​កូរ៉េខាងត្បូង

​កាលពី​ព្រឹក​ថ្ងៃ​ព្រហស្បតិ៍ ទី​១០ ខែកុម្ភៈ សម្តេច​តេ​ជោ ហ៊ុន សែន នាយករដ្ឋមន្ត្រី​កម្ពុជា បាន​ដឹកនាំ​គណៈប្រតិភូ​ជាន់ខ្ពស់ អញ្ជើញ​ទៅ​បំពេញ​ទស្សនកិច្ច នៅ​ប្រទេស​កូរ៉េខាងត្បូង ដើម្បី​ចូ​លួ​ម​ជា​សហប្រធាន​កិច្ចប្រជុំ​កំពូល​សន្តិភាព​ពិភពលោក ឆ្នាំ​២០២២ ក្រោម​មូលបទ «​ឆ្ពោះទៅកាន់​សន្តិភាព​នៅ​ឧបទ្វីប​កូរ៉េ​»​។ ក្រៅពី​អញ្ជើញ​ចូលរួម​កិច្ចប្រជុំ សម្តេច​តេ​ជោ ក៏​ជួប​អតីត​អគ្គលេខាធិការ​អង្គការសហប្រជាជាតិ លោក បាន គី​មូ​ន ប្រធានាធិបតី​កូរ៉េ រួមទាំង​ឥស្សរជន​ជាច្រើន​ទៀត​។ សម្តេច​តេ​ជោ និង​គណៈប្រតិភូ នឹង​វិល​ត្រលប់មក​កម្ពុជា​វិញ នា​ថ្ងៃទី​១៣ ខែកុម្ភៈ​។

១១- រដ្ឋបាល​រាជធានី​ភ្នំពេញ ក្រើនរំលឹក​ពី​ការអនុវត្ត​វិធានការ​ទប់ស្កាត់​កូ​វីដ ក្នុង ១​តុ ត្រូវ​អង្គុយ​ត្រឹម ៧​នាក់​ប៉ុណ្ណោះ

​រដ្ឋបាល​រាជធានី​ភ្នំពេញ កាលពី​ថ្ងៃទី​១០ ខែកុម្ភៈ បានចេញ​សេចក្តីណែនាំ ដោយ​ក្រើនរំលឹក​ជាថ្មី​លើ​ការអនុវត្ត​វិធានការ​សុខាភិបាល ដើម្បី​ទប់ស្កាត់​ការចម្លង​ជំងឺ​កូ​វីដ​-១៩ បំប្លែង​ខ្លួន​ថ្មី ប្រភេទ​អូ​មី​ក្រុង​។ ក្នុងការ​ក្រើនរំលឹក​ជាថ្មី​នេះ រដ្ឋបាល​រាជធានី​ភ្នំពេញ បាន​កំណត់ថា ការជួបជុំ ក្នុង​ពិធីមង្គលការ ភោជនីយដ្ឋាន ឬ​ពិធីបុណ្យ​នានា ត្រូវ​រៀបចំ​កន្លែង​អង្គុយ ឲ្យ​មាន​គម្លាត ដោយ​ត្រូវមាន​ចំនួន​យ៉ាងច្រើន​ត្រឹមតែ ៧​នាក់​ប៉ុណ្ណោះ ក្នុង ១​តុ​។​
​ចំណែក​ក្រសួងសុខាភិបាល បាន​ក្រើនរំលឹក​ឲ្យ​ពង្រឹង​ការអនុវត្ត​នីតិវិធី​ប្រតិបត្តិ​ស្តង់ដារ សម្រាប់​គ្រប់គ្រង ថែទាំ និង​ព្យាបាល​ជំងឺ​កូ​វីដ​-១៩ នៅតាម​ផ្ទះ ខណៈ​ចំនួន​អ្នក​ឆ្លង​កូ​វីដ​១៩ បាន​ហក់​ឡើងវិញ គួរ​ឲ្យ​ព្រួយបារម្ភ​។ ជាមួយគ្នា​នោះ ក្រសួងសុខាភិបាល បាន​ណែនាំ​ឱ្យ​អ្នកជំងឺ ត្រូវ​ស្នាក់នៅ​ដាច់ដោយឡែក នៅ​ទីតាំង ដែលមាន​អនាម័យ មាន​ចរន្ត​ខ្យល់​ចេញចូល​ល្អ ត្រូវ​ប្រើ​ឱសថ​ព្យាបាល តាម​រោគសញ្ញា តាម​ការចាំបាច់ និង​ប្រើ​ឱសថ​ប្រឆាំង​វីរុស ដោយ​គោរព​នូវ​កម្រិត​ដូ​ស​ប្រើប្រាស់​។

១២- ក្រសួង​អប់រំ ដាក់ចេញ​វិធានការ ៩​ចំណុច ដើម្បី​ទប់ស្កាត់​ការឆ្លង​រាលដាល​កូ​វីដ​១៩ អូ​មី​ក្រុង

​កាលពី​ថ្ងៃទី​១៨ ខែកុម្ភៈ ក្រសួង​អប់រំ បានចេញ​សេចក្តីណែនាំ ចំនួន ៩​ចំណុច ដើម្បីឱ្យ​មន្ត្រី​អប់រំ បម្រើការ​នៅតាម​អង្គភាព​ថ្នាក់ជាតិ និង​រាជធានី​ខេត្ត ចូលរួម​បង្ការ និង​ទប់ស្កាត់​ការ​រាតត្បាត​នៃ​ជំងឺ​កូ​វីដ​-១៩ ប្រភេទ​អូ​មី​ក្រុង​។ ក្នុងនោះ បុគ្គលិក​អប់រំ ដែល​បាន​ចេញទៅ​បំពេញបេសកកម្ម​នៅតាម​រាជធានី​ខេត្ត ឬ​ធ្វើដំណើរ​ទៅ​កន្លែង ដែលមាន​ហានិភ័យ ត្រូវធ្វើ​តេស្ត Rapid test មុននឹង​ត្រឡប់​មកកាន់​ទីកន្លែង​បម្រើការ​វិញ​។​

១៣- សម្តេច​តេ​ជោ ហ៊ុន សែន ចូលរួម​បើក​កិច្ចប្រជុំ​កំពូល​សន្តិភាព​ពិភពលោក ឆ្នាំ​២០២២

​កាលពី​ព្រឹក​ថ្ងៃទី​១១ ខែកុម្ភៈ សម្ដេច​តេ​ជោ ហ៊ុន សែន បាន​អញ្ជើញ​ជា​សហប្រធាន​បើក​កិច្ចប្រជុំ​កំពូល​សន្តិភាព​ពិភពលោក ឆ្នាំ​២០២២​។ ក្រៅពី​ចូលរួម​កិច្ចប្រជុំ​កំពូល នៅ​ទីក្រុង​សេ​អ៊ូ​ល កាលពី​ព្រឹក​ថ្ងៃទី​១១ ខែកុម្ភៈ សម្តេច​តេ​ជោ ហ៊ុន សែន ក៏បាន​ទទួល​ជួបពិភាក្សា​ការងារ​ជាមួយ​ឯកឧត្តម បាន គី​មូ​ន អតីត​អគ្គលេខាធិការ​អង្គការសហប្រជាជាតិ លើកឡើង​ពី​បញ្ហា​មី​យ៉ាន់​ម៉ា ផងដែរ​។​

១៤-​សម្តេច​តេ​ជោ ហ៊ុន សែន អញ្ជើញ​សម្ពោធ​ដាក់ឱ្យ​ប្រើប្រាស់​ជា​ផ្លូវការ​នូវ​ស្ពាន ៧​កន្លែង ក្នុង​ខេត្តក្រចេះ និង​ខេត្តព្រៃវែង តម្លៃ ៣៥​លាន​ដុល្លារ

​កាលពី​ថ្ងៃទី​១៦ ខែកុម្ភៈ សម្តេច​តេ​ជោ ហ៊ុន សែន នាយករដ្ឋមន្ត្រី​កម្ពុជា បាន​អញ្ជើញ​ជា​អធិបតី ជាមួយ​ឯកអគ្គរាជទូត​ជប៉ុន សម្ពោធ​ដាក់ឱ្យ​ប្រើប្រាស់​ជា​ផ្លូវការ​ស្ពាន ៧​កន្លែង ស្ថិតនៅក្នុង​ខេត្តក្រចេះ និង​ខេត្តព្រៃវែង​។ ស្ពាន​ទាំង ៧​កន្លែង​នេះ ប្រើប្រាស់​ពេល​សាងសង់ ចំនួន ២៩​ខែ ចំណាយ​ថវិកា​អស់​ប្រមាណ ៣៥​លាន​ដុល្លារ​អាមេរិក​។ នៅក្នុង​ពិធី​នេះ សម្តេច​តេ​ជោ ហ៊ុន សែន បានប្រកាស​ណែនាំ​អោយ​អាជ្ញាធរ​គ្រប់លំដាប់​ថ្នាក់ ត្រូវ​បង្កលក្ខណៈ​ឲ្យ​គណបក្សនយោបាយ មាន​សិទ្ធិ​ធ្វើ​នយោបាយ​ពេញលេញ សម្រាប់​ការបោះឆ្នោត​ក្រុមប្រឹក្សាឃុំ​សង្កាត់ នា​ខែមិថុនា​ខាងមុខ​។​

១៥-​សម្តេច​តេ​ជោ ហ៊ុន សែន អញ្ជើញ​ទទួល​ជួបពិភាក្សា​ការងារ​ជាមួយ​រដ្ឋមន្ត្រីការបរទេស​សិង្ហ​បុរី និង​ឡាវ

​សម្ដេច​តេ​ជោ ហ៊ុន សែន នាយករដ្ឋមន្ត្រី​កម្ពុជា កាលពី​រសៀល​ថ្ងៃទី​១៦ ខែកុម្ភៈ បានទទួល​ជួបពិភាក្សា​ការងារ​ដាច់ដោយឡែក​ពីគ្នា ជាមួយ​រដ្ឋមន្ត្រីក្រសួង​ការបរទេស​សិង្ហ​បុរី និង​រដ្ឋមន្ត្រីការបរទេស​ឡាវ នៅ​វិមាន​សន្តិភាព​។ ជំនួប​ពិភាក្សា​ការងារ​នេះ ធ្វើឡើង​គ្រា​ដែល​រដ្ឋមន្ត្រីការបរទេស​នៃ​ប្រទេស​ទាំងពីរ បាន​អញ្ជើញ​មក​បំពេញ​ទស្សនកិច្ច​នៅ​កម្ពុជា និង​ចូលរួម​កិច្ចប្រជុំ​ចង្អៀត​រដ្ឋមន្ត្រីការបរទេស​អាស៊ាន ដែល​កម្ពុជា ធ្វើជា​ម្ចាស់ផ្ទះ​។

១៦- កិច្ចប្រជុំ​ចង្អៀត​ប្រមុខ​ការទូត​អាស៊ាន ផ្ដោតលើ​ការស្ដារ​សេដ្ឋកិច្ច ទប់ស្កាត់​ឥទ្ធិពល​មហាអំណាច និង​បញ្ហា​មី​យ៉ាន់​ម៉ា

​កិច្ចប្រជុំ​ចង្អៀត​រដ្ឋមន្ត្រីការបរទេស​អាស៊ាន នៅ​រាជធានី​ភ្នំពេញ កាលពី​ថ្ងៃទី​១៧ ខែកុម្ភៈ បាន​បិទ​បញ្ចប់​ហើយ​។ ក្រោយ​កិច្ចប្រជុំ រដ្ឋមន្ត្រី​ក្រសួងការបរទេស​កម្ពុជា បាន​ចេញមក​ធ្វើ​សន្និសីទកាសែត​។ ការស្ដារ​សេដ្ឋកិច្ច​ឡើងវិញ ក្រោយ​វិបត្តិ​កូ​វីដ​-១៩ ការទប់ស្កាត់​ឥទ្ធិពល​មហាអំណាច ទំនាក់ទំនង​ដៃគូ និង​បញ្ហា​មី​យ៉ាន់​ម៉ា គឺជា​ប្រធានបទ​នៃ​កិច្ចប្រជុំ​នេះ​។ ជាការ​កត់សម្គាល់ ក្រោយ​កិច្ចប្រជុំ ប្រមុខ​ការទូត​ខ្មែរ អះអាងថា ក្នុងឋានៈ​ជា​ប្រធាន​អាស៊ាន នឹង​អញ្ជើញ​ទៅ​បំពេញ​ទស្សនកិច្ច និង​ជួប​ភាគី​ពាក់ព័ន្ធ នៅ​មី​យ៉ាន់​ម៉ា នា​ខែមីនា​ខាងមុខនេះ​។​

១៧-​យុទ្ធនា​ការចាក់​វ៉ាក់សាំង​កូ​វីដ​-១៩ ដល់​កុមារ​អាយុ​ពី ៣​ឆ្នាំ ដល់​ក្រោម ៥​ឆ្នាំ នឹង​ចាប់ផ្តើម​នៅ​សប្តាហ៍​ក្រោយនេះ​

​គណៈកម្មការ​ចំពោះ​កិច្ច​ចាក់​វ៉ាក់សាំង​កូ​វីដ​-១៩ ក្នុង​ក្របខណ្ឌ​ទូទាំងប្រទេស បើកចាក់​វ៉ាក់សាំង​កូ​វីដ​-១៩ ដល់​កុមារ ដែលមាន​អាយុ​ចាប់ពី ៣​ឆ្នាំ ដល់​អាយុ​ក្រោម ៥​ឆ្នាំ ចាប់ពី​ថ្ងៃទី​២៣ ខែកុម្ភៈ​។ ចំពោះ​ដំណើរ​ការចាក់​វ៉ាក់សាំង ដែល​ចាប់​ផ្តើមដំបូង​ដល់​កូនចៅ​មន្ត្រីរាជការ​មុនគេ​នេះ គឺ​ប្រើប្រាស់​វ៉ាក់សាំង​ស៊ី​ណូ​វ៉ា​ក់ ហើយ​គម្លាត​រវាង​ដូ​ស​ទី​១ និង​ដូ​ស​ទី​២ មាន​រយៈពេល ២៨​ថ្ងៃ​។ ក្នុងនោះ នៅ​ភ្នំពេញ ក៏​ចាប់ផ្តើម​ចាក់​វ៉ាក់សាំង ដល់​កុមារ​អាយុ ៣​ឆ្នាំ ដល់​ក្រោម ៥​ឆ្នាំ នា​ថ្ងៃទី​២៣​កុម្ភៈ នៅតាម​មន្ទីរពេទ្យ និង​មណ្ឌល​សុខភាព​ក្នុង​ខណ្ឌ​ទាំង ១៤ ផងដែរ​។

១៨-​សម្តេច​តេ​ជោ ហ៊ុន សែន អញ្ជើញ​បើក​ការដ្ឋាន​សាងសង់​ស្ថានីយ​ប្រព្រឹត្តិកម្ម​ទឹក​កខ្វក់ បឹង​ជើងឯក

​កាលពី​ថ្ងៃទី​២២ ខែកុម្ភៈ សម្តេច​តេ​ជោ ហ៊ុន សែន នាយករដ្ឋមន្ត្រី​កម្ពុជា បាន​អញ្ជើញ​ជា​អធិបតី ក្នុង​ពិធីបើកការដ្ឋាន​សាងសង់​ស្ថានីយ​ប្រព្រឹត្តិកម្ម​ទឹក​កខ្វក់​បឹង​ជើងឯក ដែល​ចំណាយ​ប្រាក់​សាងសង់ ជាង ២០​លាន​ដុល្លារ ជា​ជំនួយឥតសំណង​របស់​ប្រទេស​ជប៉ុន​។ ស្ថានីយ​ប្រព្រឹត្តិកម្ម​ទឹក​កខ្វក់​នេះ មាន​សមត្ថភាព​បំប្លែង​ទឹក​កខ្វក់ អោយទៅជា​ទឹកស្អាត​វិញ​បាន​ចំនួន ៥,០០០​ម៉ែត្រគូប ក្នុង​មួយថ្ងៃ​។ តាម​ផែនការ ស្ថានីយ​ប្រព្រឹត្តិកម្ម​ទឹក​កង្វក់​បឹង​ជើងឯក​នេះ នឹង​បញ្ចប់​ការសាងសង់​ជា​ស្ថាពរ នៅក្នុង​ខែវិច្ឆិកា ឆ្នាំ​២០២៣ ខាងមុខ​។

១៩- សម្តេច​តេ​ជោ ហ៊ុន សែន ចូលរួម​ពិធី​បិទ​សន្និបាត​ក្រសួងមហាផ្ទៃ​

​ក្នុង​ពិធី​បិទ​សន្និបាត​ក្រសួងមហាផ្ទៃ កាលពី​រសៀល​ថ្ងៃទី​២៣ ខែកុម្ភៈ សម្តេច​តេ​ជោ ហ៊ុន សែន បានប្រកាស​អំពាវនាវ​ដល់​អ្នកប្រើប្រាស់​ឡាន​គេចពន្ធ ត្រូវ​មក​បង់ពន្ធ ដែល​នៅសល់​ប្រហែល ៥​ពាន់​គ្រឿង​ទៀត ក្នុងចំណោម​ឡាន​គេចពន្ធ​សរុប​នៅ​កម្ពុជា មាន​ជាង ១​ម៉ឺន​គ្រឿង និង​មានតម្លៃ​ជាង ១០០​លាន​ដុល្លារ ហើយ​កន្លងមក ការប្រមូល​ពន្ធ​លើ​ឡាន ដែល​មិន​បង់ពន្ធ បាន​ជាង ៥០​លាន​ដុល្លារ​ហើយ​។ សម្តេច ក៏បាន​ណែនាំ​ឱ្យ​មន្ត្រី​ទាំងអស់ ត្រូវ​យកចិត្តទុកដាក់​លើ​ការចំណាយ​មិនចាំបាច់ ដើម្បី​ទុក​ថវិកា​ចំណាយ​លើ​ការព្យាបាល​កូ​វីដ ក៏ដូចជា​ការបើកប្រាក់​ខែ​ជូន​មន្ត្រីរាជការ ដែល​មិន​ត្រូវឱ្យ​ខ្វះ​ឡើយ​។ សម្តេច ក៏បាន​ស្តីបន្ទោស​រដ្ឋមន្ត្រីក្រសួង​កសិកម្ម រុក្ខាប្រមាញ់ និង​នេសាទ ឯកឧត្តម វេ​ង សុខុន ថា​ធ្វើការ​បែប​ជិះសេះ មើល​ផ្កា​។ សម្តេច​បាន​ណែនាំ​ដល់​រដ្ឋមន្ត្រី​កសិកម្ម ត្រូវ​សហការ​ជាមួយ​ស្ថាប័ន​ពាក់ព័ន្ធ ដើម្បី​រៀបចំ​ឱ្យមាន​ការដេញថ្លៃ នាំ​ជ្រូក​ចូល​ពី​ប្រទេសជិតខាង​។ ការ​នាំចូល​ជ្រូក តាមរយៈ​ការដេញថ្លៃ​នេះ គឺ​ដើម្បី​បំពេញតម្រូវការ​ខ្វះខាត​ជ្រូក​ក្នុងស្រុក និង​ទប់ស្កាត់ ដើម្បី​កុំឱ្យ​សាច់ជ្រូក នៅ​កម្ពុជា​យើង ឡើងថ្លៃ​ប៉ុណ្ណោះ​។​

២០-​ដំណើរ​ទស្សនកិច្ច​ផ្លូវការ ២​ថ្ងៃ​របស់​នាយករដ្ឋមន្ត្រី​ម៉ាឡេស៊ី មក​កម្ពុជា ប្រទេស​ទាំងពីរ កម្ពុជា​-​ម៉ាឡេស៊ី បានសម្រេច​សេចក្តីថ្លែងការណ៍​រួម ១៤ ចំណុច

​ឯកឧត្តម ដា​តុ ស្រ៊ី អ៊ី​ស្មា​អែល សា​ប្រ៊ី ប៊ី​ន យ៉ា​កុប នាយករដ្ឋមន្ត្រី​ម៉ាឡេស៊ី បាន​ដឹកនាំ​គណៈប្រតិភូ​ជាន់ខ្ពស់ អ​ញ្ជើំ​ក​បំពេញ​ទស្សនកិច្ច​ផ្លូវការ នៅ​កម្ពុជា ពីរ​ថ្ងៃ នៅ​ថ្ងៃទី​២៣ និង​ថ្ងៃទី​២៤ ខែកុម្ភៈ​។ កាលពី​ព្រឹក​ថ្ងៃទី​២៤ ខែកុម្ភៈ ឯកឧត្តម​នាយករដ្ឋមន្ត្រី​ម៉ាឡេស៊ី បាន​អញ្ជើញ​ជួបពិភាក្សា​ការងារ​ជាមួយ​សម្តេច​តេ​ជោ នាយករដ្ឋមន្ត្រី នៅ​វិមាន​សន្តិភាព ក្នុង​រាជធានី​ផ្នំ​ពេញ​។ កម្ពុជា និង​ម៉ាឡេស៊ី បានសម្រេច​ចេញ​នូវ​សេចក្តីថ្លែងការណ៍​រួម ចំនួន ១៤​ចំណុច​។ ក្នុងនោះ ក៏មាន​ការប្ដេជ្ញាចិត្ត​រួមគ្នា អនុវត្ត​ឱ្យបាន​ពេញលេញ​នូវ​ក្រម​ប្រតិបត្តិ​សមុទ្រ​ចិន​ខាងត្បូង ក៏ដូចជា​ការរួមវិភាគទាន​គ្នា ជួយ​ដោះស្រាយ​បញ្ហា​វិបត្តិ នៅ​មី​យ៉ាន់​ម៉ា​។​

២១- សម្តេច​តេ​ជោ ហ៊ុន សែន លើកឡើងថា កងទ័ព​រុ​ស្ស៉ី មិនអាច​ផ្តួលរំលំ​អ៊ុយ​ក្រែ​ន តាមរយៈ​កម្លាំងយោធា​បានទេ

​កាលពី​យប់​ថ្ងៃអាទិត្យ ទី​២៧ ខែកុម្ភៈ ដែលជា​ថ្ងៃទី​៤ ដែល​កងទ័ព​រុស្ស៊ី លើកទ័ព​ចូល​ឈ្លានពាន​ប្រទេស​អ៊ុយ​ក្រែ​ន ចាប់តាំងពី​ថ្ងៃទី​២៤ ខែកុម្ភៈ សម្តេច​តេ​ជោ នាយករដ្ឋមន្ត្រី ហ៊ុន សែន បាន​លើកឡើងថា កងទ័ព​រុ​ស្ស៉ី មិនអាច​ផ្តួលរំលំ​អ៊ុយ​ក្រែ​ន តាមរយៈ​កម្លាំងយោធា​បានទេ ឯ​អ៊ុយ​ក្រែ​ន ក៏​មិនអាច​កំទេច​កម្លាំងយោធា​របស់​រុ​ស្ស៉ី​បានដែរ ពោលគឺ​មិនអាច​យក​សង្គ្រាម​បញ្ចប់សង្គ្រាម​បានទេ ច្រកចេញ​តែមួយគត់ គឺ​ការចរចា​ដោយ​សន្តិវិធី​។​

២២- រដ្ឋមន្ត្រីការបរទេស​អាស៊ាន បារម្ភ​ខ្លាំង​ពី​ការប៉ះទង្គិច​អាវុធ​រវាង​កងទ័ព​រុស្ស៊ី និង​អ៊ុយ​ក្រែ​ន ព្រមទាំង​អំពាវនាវ​អោយ​ភាគី​ទាំងពីរ អត់ធ្មត់​ជា​អតិបរមា​

​រដ្ឋមន្ត្រីការបរទេស​អាស៊ាន បាន​សំដែង​ការព្រួយបារម្ភ​យ៉ាងខ្លាំង ចំពោះ​ការប៉ះទង្គិច​ដោយ​អាវុធ នៅ​ប្រទេស​អ៊ុយ​ក្រែ​ន រវាង​កងទ័ព​រុស្ស៊ី និង​អ៊ុយ​ក្រែ​ន​។ តាមរយៈ​សេចក្តីថ្លែងការណ៍ កាលពី​ថ្ងៃអាទិត្យ ទី​២៧ ខែកុម្ភៈ រដ្ឋមន្ត្រីការបរទេស​អាស៊ាន បានប្រកាស​ឱ្យ​ភាគី​រុស្ស៊ី និង​អ៊ុយ​ក្រែ​ន អនុវត្ត​ការអត់ធ្មត់​ជា​អតិបរមា ដើម្បី​បន្ត​ការសន្ទនា តាម​គ្រប់​ច្រក​ផ្លូវ រួមទាំង​មធ្យោបាយ​ការទូត ដើម្បី​ទប់ស្កាត់​ស្ថានការណ៍ កុំអោយ​កាន់តែ​ធ្ងន់ធ្ងរ​។​

២៣-​ការចាប់អារម្មណ៍​រប​ស់​ពលរដ្ឋ​ខ្មែរ ជុំវិញ​ជម្លោះ​រវាង​រុស្ស៊ី និង​អ៊ុយ​ក្រែ​ន

​ស្ថានការណ៍​ដែល​កងទ័ព​រុស្ស៊ី ចូល​ឈ្លានពាន​ប្រទេស​អ៊ុយ​ក្រែ​ន បង្ក​ជា​សង្គ្រាម ចាប់តាំងពី​ថ្ងៃ​ព្រហស្បតិ៍ ទី​២៤​កុម្ភៈ បានធ្វើឱ្យ​ប្រជាពលរដ្ឋ​ខ្មែរ​មួយចំនួន បាន​តាមដាន​យ៉ាង​យកចិត្តទុកដាក់​។ ប្រជាពលរដ្ឋ​មួយចំនួន បាន​ប្រដូច​ស្ថានភាព នៅក្នុង​ប្រទេស​អ៊ុយ​ក្រែ​ន បច្ចុប្បន្ន ទៅនឹង​ស្ថានភាព​សង្គ្រាម នៅក្នុង​ប្រទេស​កម្ពុជា កាលពី​អតីតកាល​។ សង្គ្រាម​នៅ​អ៊ុយ​ក្រែ​ន ក៏បាន​ធ្វើឱ្យ​ប្រជាពលរដ្ឋ​ខ្មែរ​យើង នឹកឃើញ​ឡើងវិញ​ពីបទ​ពិសោធន៍​ជីវិត ក្រោម​ស្នូល​គ្រាប់កាំភ្លើង ដ៏​សែន​លំបាក​។ ពួកគាត់ បាន​អះអាងថា មានតែ​សន្តិភាព​ទេ ដែល​អាចធ្វើ​ឲ្យ​ប្រជាពលរដ្ឋ រស់នៅ​ដោយ​ភាពសុខសាន្ត មាន​សេរីភាព ប្រកប​អាជីវកម្ម និង​ការអភិវឌ្ឍ​ប្រទេសជាតិ​ទៅមុខ​។​

២៤-​សម្តេច​តេ​ជោ ហ៊ុន សែន បន្ត​អំពាវនាវ​ឱ្យ​អ្នកបើកបរ​ទាំងអស់ គោរព​ច្បាប់​ចរាចរណ៍ និង​កុំ​បើកបរ​លើស​ល្បឿន​កំណត់

​ក្នុងឱកាស​អញ្ជើញ​ជា​អធិបតី ក្នុង​ពិធី​សម្ពោធ​ដាក់​ឲ្យ​ប្រើប្រាស់​ផ្លូវជាតិ​លេខ​៣ ភ្នំពេញ​-​កំពត កាលពី​ថ្ងៃទី​២ ខែមីនា សម្ដេច​តេ​ជោ ហ៊ុន សែន នាយករដ្ឋមន្ត្រី បាន​បន្ត​អំពាវនាវ​ឱ្យ​អ្នកបើកបរ​ទាំងអស់ គោរព​ច្បាប់​ចរាចរណ៍ និង​កុំ​បើកបរ​លើស​ល្បឿន​កំណត់​។ បើតាម​សម្ដេចនាយក​រដ្ឋមន្ត្រី អ្នកស្លាប់​ដោយសារ​គ្រោះថ្នាក់​ចរាចរណ៍ កើនឡើង​ខ្ពស់​ច្រើនជាង​អ្នកស្លាប់​ដោយសារ​កូ​វីដ ដែល​ទាមទារ​ឱ្យ​ពលរដ្ឋ​គ្រប់រូប ជា​អ្នកបញ្ជា​មធ្យោបាយ​ធ្វើដំណើរ​លើផ្លូវ​សាធារណៈ ត្រូវ​បង្កើន​នៃ​កា​យកចិត្តទុកដាក់​រប​ស់​ខ្លួន បន្ថែមទៀត​។

២៥- កម្ពុជា ប្រកាស​ជំហរ​ប្រឆាំង​ការ​បំបែក​រដ្ឋ និង​អំពាវនាវ​ឲ្យ​មេដឹកនាំ​រុស្ស៊ី​-​អ៊ុយ​ក្រែ​ន ស្វែងរក​ការចរចា​

​ក្នុងឱកាស​អញ្ជើញ​សម្ពោធ​ដាក់​ឲ្យ​ប្រើប្រាស់​ជា​ផ្លូវការ​ផ្លូវជាតិ​លេខ​៣ ភ្នំពេញ​-​កំពត នៅ​ព្រឹក​ថ្ងៃទី​២ ខែមីនា​នេះ សម្ដេច​តេ​ជោ ហ៊ុន សែន នាយករដ្ឋមន្ត្រី​កម្ពុជា បានប្រកាស​ជំហរ​ផ្លូវការ​របស់​កម្ពុជា ប្រឆាំងនឹង​ការ​បំបែក​រដ្ឋ និង​ជំរុញ​ឲ្យ​មេដឹកនាំ​រុស្ស៊ី និង​អ៊ុយ​ក្រែ​ន ស្វែងរក​ការចរចា ជាជាង​ប្រើប្រាស់​សង្គ្រាម បញ្ចប់សង្គ្រាម​។ តាម​មេដឹកនាំ​កម្ពុជា សង្គ្រាម​មិន​ត្រឹមតែ​មិនអាច​បញ្ចប់សង្គ្រាម​នោះទេ តែ​នឹង​ធ្វើឱ្យ​រីក​រាលដាល​កាន់តែ​ធំ​ជាងនេះទៅទៀត នាពេលខាងមុខ​។​

២៦-​លោក ប្រាក់ សុខុន បំពេញ​ទស្សនកិច្ច ៣​ថ្ងៃ នៅ​មី​យ៉ាន់​ម៉ា ក្នុងឋានៈ​ជា​ប្រេសិត​ពិសេស​ប្រធាន​អាស៊ាន

​លោក ប្រាក់ សុខុន ឧបនាយករដ្ឋមន្ត្រី រដ្ឋមន្ត្រី​ក្រសួងការបរទេស​កម្ពុជា នឹង​ចាប់ផ្ដើម​ទស្សនកិច្ច ៣​ថ្ងៃ នា​ថ្ងៃទី​២០ ដល់​ថ្ងៃទី​២៣ ខែមីនា​នេះ នៅ​ប្រទេស​មី​យ៉ាន់​ម៉ា ក្នុងឋានៈ​ជា​ប្រេសិត​ពិសេស​របស់​ប្រធាន​អាស៊ាន​។ ព័ត៌មាន​នេះ ត្រូវបាន​បញ្ជាក់​ផ្ទាល់​ដោយ​ប្រមុខ​ការទូត​កម្ពុជា ក្នុង​ពិធី​ចុះហត្ថលេខា​ទទួល​ជំនួយ​ពី​ប្រទេស​ជប៉ុន កាលពី​ថ្ងៃទី​២ ខែមីនា​។​

២៧-​សម្តេច​តេ​ជោ ហ៊ុន សែន លើកទឹកចិត្ត​ឱ្យ​នគរបាលជាតិ​នៃ​សមាជិក​អាស៊ាន បន្ត​កិច្ចសហប្រតិបត្តិការ ទប់ស្កាត់​អំពើ​ភេរវកម្ម

​សម្ដេច​តេ​ជោ នាយករដ្ឋមន្ត្រី ហ៊ុន សែន បាន​លើកទឹកចិត្ត​ឱ្យ​នគរបាលជាតិ​នៃ​សមាជិក​អាស៊ាន បន្ត​កិច្ចសហប្រតិបត្តិការ ជាពិសេស​ទប់ស្កាត់​នូវ​អំពើ​ភេរវកម្ម ដើម្បី​ប្រែក្លាយ​អាស៊ាន ជា​តំបន់ ដែល​គ្មាន​អំពើ​ភេរវកម្ម​។ សម្ដេច​តេ​ជោ ហ៊ុន សែន បានលើកឡើង​ដូច្នេះ នៅក្នុង​ជំនួប​ពិភាក្សា​ការងារ​ជាមួយ​ប្រតិភូ​នគរបាលជាតិ នៃ​បណ្ដា​ប្រទេស​សមាជិក​អាស៊ាន នៅ​វិមាន​សន្តិភាព កាលពី​ព្រឹក​ថ្ងៃទី​៣ ខែមីនា​។​

២៨- រដ្ឋមន្ត្រី​មហាផ្ទៃ ណែ​នាំឱ្យ​បង្កើន​ការការពារ​គោលដៅ​ស្ថានទូត នៅ​ភ្នំពេញ ក្នុងពេល​កើត​វិបត្តិ​នៅ​អ៊ុយ​ក្រែ​ន

​ក្នុង​ពិធី​បិទ​សន្និបាត​រដ្ឋបាល​សាលា​រាជធានី​ភ្នំពេញ កាលពី​ថ្ងៃ​ព្រហស្បតិ៍ ទី​៣​មីនា សម្ដេច​ក្រឡាហោម ស ខេង ឧបនាយករដ្ឋមន្ត្រី រដ្ឋមន្ត្រី​ក្រសួងមហាផ្ទៃ បាន​ណែនាំ​ផ្ទាល់មាត់ ទៅកាន់​រដ្ឋបាល​រាជធានី​ភ្នំពេញ និង​សមត្ថកិច្ច​ពាក់ព័ន្ធ ត្រូវ​បង្កើន​ការការពារ​សន្តិសុខ នៅតាម​បណ្ដា​ស្ថានទូត​ពាក់ព័ន្ធ នៅ​កម្ពុជា​។ ជាការ​ណែនាំ ដែល​សម្ដេច ស ខេង សំដៅ​ភ្ជាប់​ទៅនឹង​ក្រោយ​ការកើតមាន​វិបត្តិ​សង្គ្រាម ដែល​រុស្ស៊ី លើកទ័ព ចូល​វាយប្រហារ​ប្រទេស​អ៊ុយ​ក្រែ​ន​។

២៩- ព្រះមហាក្សត្រ និង​សម្តេចម៉ែ យាង​ទៅពិនិត្យ​ព្រះរាជសុខភាព នៅ​ទីក្រុង​ប៉េកាំង ប្រទេស​ចិន

​នៅ​ព្រឹក​ថ្ងៃ​សុក្រ ទី​៤ ខែមីនា ព្រះករុណា ព្រះមហាក្សត្រ សម្តេចព្រះ​បរមនាថ នរោត្តម សីហមុនី និង​សម្តេចព្រះ​មហាក្សត្រី មុនិនាថ សីហនុ បាន​យាង​ទៅ​ទីក្រុង​ប៉េកាំង ប្រទេស​ចិន ដើម្បី​ពិនិត្យ​ព្រះរាជសុខភាព​។ ព្រះករុណា ព្រះមហាក្សត្រ និង​សម្តេចព្រះ​មហាក្សត្រី តែងតែ​យាង​ទៅពិនិត្យ និង​ព្យាបាល​ព្រះរាជសុខភាព​ជា​ទៀងទាត់ តាម​កាលបរិច្ឆេទ​កំណត់​ថ្វាយ​ដោយ​ក្រុម​វេជ្ជបណ្ឌិត​ចំណានៗ នៃ​ប្រទេស​ចិន នៅ​រៀងរាល់ ៦​ខែម្តង​។​

៣០- មន្ទីរពេទ្យ​មិត្តភាព​កម្ពុជា​-​ចិន ត្បូងឃ្មុំ សាងសង់​អស់​ទឹកប្រាក់ ៤៥​លាន​ដុល្លារ​សហរដ្ឋអាមេរិក សម្ពោធ​ដាក់ឱ្យ​ប្រើប្រាស់​ជា​ផ្លូវការ

​មន្ទីរពេទ្យ​មិត្តភាព​កម្ពុជា​-​ចិន ត្បូងឃ្មុំ ដែលជា​មន្ទីរពេទ្យ​ធំជាងគេ​របស់​កម្ពុជា ចំណាយ​ប្រាក់​សាងសង់​ប្រមាណ ៤៥​លាន​ដុល្លារ​អាមេរិក ជា​ជំនួយឥតសំណង​របស់​រដ្ឋាភិបាល និង​ប្រជាជន​ចិន ត្រូវបាន​សម្ពោធ​ដាក់ឱ្យ​ប្រើប្រាស់​ជា​ផ្លូវការ​ហើយ កាលពី​ព្រឹក​ថ្ងៃទី​៧ ខែមីនា ក្រោម​អធិបតីភាព សម្តេច​តេ​ជោ ហ៊ុន សែន និង​ឯកអគ្គរដ្ឋទូត​ចិន ប្រចាំ​កម្ពុជា​។

៣១- សម្តេច​តេ​ជោ ហ៊ុន សែន​៖ ពលរដ្ឋ​កម្ពុជា មិនត្រូវ​ឈាន​ហួស រហូតដល់​ស្ម័គ្រចិត្ត ទៅធ្វើ​សង្គ្រាម​នៅ​អ៊ុយ​ក្រែ​ន​នោះទេ

​ក្នុងឱកាស​អញ្ជើញ​ជា​អធិបតី សម្ពោធ​ដាក់ឱ្យ​ប្រើប្រាស់​មន្ទីរពេទ្យ​មិត្តភាព​កម្ពុជា​-​ចិន ត្បូងឃ្មុំ កាលពី​ព្រឹក​ថ្ងៃទី​៧ ខែមីនា សម្តេច​តេ​ជោ ហ៊ុន សែន នាយករដ្ឋមន្ត្រី បាន​លើកឡើងថា បច្ចុប្បន្ន ប្រជាជន​កម្ពុជា ទាំង​ក្មេង ទាំងចាស់​មានការ​ចាប់​អារម្មណ៍​ខ្លាំង ទៅលើ​បញ្ហា​សង្គ្រាម​នៅ​អ៊ុយ​ក្រែ​ន​។ សម្រាប់​កម្ពុជា គាំទ្រ​ឱ្យមាន​បទ​ឈប់​បាញ់ និង​ឈានទៅ​បើក​កិច្ចចរចា​ស្វែងរក​សន្តិភាព​រវាង​គូភាគី​ពាក់ព័ន្ធ​លើ​អ៊ុយ​ក្រែ​ន និង​រុស្ស៊ី​។ យ៉ាងណាក៏ដោយ សម្តេចនាយក​រដ្ឋមន្ត្រី​កម្ពុជា មិន​លើកទឹកចិត្ត​ឡើយ ឱ្យ​ពលរដ្ឋ​ខ្លួន ទៅធ្វើ​ទ័ព​នៅ​អ៊ុយ​ក្រែ​ន​។ សម្តេច​ពន្យល់ថា វា​ជា​រឿង​មិនអាច​ទៅរួច ដោយសារ​គ្មានអ្វី ដែល​ត្រូវ​ដឹក​ពួកគេ ទៅ​អ៊ុយ​ក្រែ​ន​ឡើយ ហើយក៏​មិនគួរ​យក​សាំង ទៅ​ចា​ក់លើ​ភ្លើង​នោះដែរ​។​

៣២- ការបោះឆ្នោត​ឃុំ​សង្កាត់ មាន ១៧​គណបក្ស ដាក់​បេក្ខជន​ប្រកួតប្រជែង​ការបោះឆ្នោត នា​ថ្ងៃទី​៥​មិថុនា​

​មាន​គណបក្សនយោបាយ ចំនួន ១៧ បានដាក់​បេក្ខជន​ចូលរួម​ប្រកួតប្រជែង​ការបោះឆ្នោត​ជ្រើសរើស​ក្រុមប្រឹក្សាឃុំ​សង្កាត់ អាណត្តិ​ទី​៥ ដែល​នឹង​ធ្វើឡើង នា​ថ្ងៃទី​៥ ខែមិថុនា​ខាងមុខនេះ​។ តា​មគ​.​ជ​.​ប គណបក្ស​ប្រជាជន​កម្ពុជា បានដាក់​បេក្ខជន នៅ​គ្រប់​ឃុំ​សង្កាត់ ទូទាំងប្រទេស ចំនួន ១៦៥២​ឃុំ​សង្កាត់​។ ចំណែក​គណបក្ស ដែល​ដាក់​បេក្ខជន​ឈរឈ្មោះ​តិចជាងគេ គឺ​គណបក្ស​ខ្មែរ​អភិវឌ្ឍ​សេដ្ឋកិច្ច ដែល​តែ ៤​ឃុំ​សង្កាត់​ប៉ុណ្ណោះ​។

៣៣-​កម្ពុជា ផ្តល់ជំនួយ​រថយន្ត​ដឹក​វ៉ាក់សាំង ចំនួន ១០​គ្រឿង ជូន​ឡាវ

​កម្ពុជា សម្រេច​ផ្តល់ជំនួយ​រថយន្ត​ដឹក​វ៉ាក់សាំង​ចំនួន ១០​គ្រឿង​បន្ថែមទៀត ជូន​ប្រទេស​ឡាវ​។ អំណោយ​ទាំងនេះ បានប្រគល់​ឱ្យ​ឡាន នៅ​ព្រឹក​ថ្ងៃទី​១២ ខែមីនា នៅ​ច្រកព្រំដែន​អន្តរជាតិ ត្រពាំង​ក្រៀល ស្ថិតនៅក្នុង​ខេត្តស្ទឹងត្រែង ជាប់​ព្រំដែន​ខេត្ត​ចម្ប៉ា​សាក់ ប្រទេស​ឡាវ​។ កម្ពុជា រំពឹងថា ជំនួយ​រថយន្ត​ដឹក​វ៉ាក់សាំង សរុប ១៣​គ្រឿង ដែល​កម្ពុជា បានផ្តល់​ឱ្យ​ឡាវ ទាំង​លើក​មុន និង​ទាំង​លើក​នេះ នឹង​រួមចំណែក​បន្ថែមទៀត ជួយ​ដល់​ប្រទេស​ឡាវ នៅក្នុង​ការឆ្លើយតប​ទៅនឹង​វិបត្តិ​ជំងឺ​កូ​រីដ​-១៩ ជាពិសេស​លើ​កិច្ច​ការចាក់​វ៉ាក់សាំង​កូ​វីដ​-១៩ ជូន​ដល់​ប្រជាជន​ឡាវ ឱ្យ​កាន់​តែមាន​ភាពល្អប្រសើរ​ឡើង​។​

៣៤-​សម្ដេច ស ខេង ណែនាំ​ឱ្យ​ថែទាំ​ព្រៃឈើ​សេសសល់​ចុងក្រោយ នៅ​បាត់ដំបង

​ក្នុង​ពិធី​បិទ​សន្និបាត​រដ្ឋបាលខេត្ត​បាត់ដំបង កាលពី​ព្រឹក​ថ្ងៃទី​១០ ខែមីនា សម្ដេច​ក្រឡាហោម ស ខេង បាន​ណែ​នាំឱ្យ​រដ្ឋបាលខេត្ត យកចិត្តទុកដាក់​ទាំ​ព្រៃឈើ នៅ​សេសសល់​ចុងក្រោយ ដែល​ស្ថិតនៅ​ស្រុក​សំឡូត​។ បើតាម​សម្ដេច​ក្រឡាហោម អ្នកជំនាន់ក្រោយ នឹង​ស្ដីបន្ទោស ប្រសិនបើ​អាជ្ញាធរ បច្ចុប្បន្ន មិន​យកចិត្តទុកដាក់​លើ​ការងារ​ថែរក្សា​ព្រៃឈើ​នេះ​ទេ​។

៣៥- ដីព្រៃ​លិច​ទឹក​ក្នុង​តំបន់​ទន្លេសាប ជាង ៦​ម៉ឺន​ហិកតា ត្រូវបាន​ពលរដ្ឋ​ស្ម័គ្រចិត្ត ប្រគល់ជូន​រដ្ឋ​វិញ

​កាលពី​វិច្ឆិកា ឆ្នាំ​២០២១ ប្រមុខ​រាជរដ្ឋាភិបាល បានចេញ​បទបញ្ជា​យ៉ាង​ម៉ឺងម៉ាត់​មួយ ឱ្យ​ក្រសួង​ស្ថាប័ន​ពាក់ព័ន្ធ និង​អភិបាលខេត្ត ជាប់​បឹង​ទន្លេសាប ត្រូវធ្វើ​ការទប់ស្កាត់ និង​បង្ក្រាប​ជាបន្ទាន់ ចំពោះ​ការ​លួច​កាប់​ព្រៃ​លិច​ទឹក និង​វាទទី​យក​ដី​នៅតាម​បឹង​ទន្លេសាប​។ ជា​លទ្ធផល រហូតមកដល់​ថ្ងៃទី​១០ ខែមីនា ឆ្នាំ​២០២២ មាន​ប្រជាពលរដ្ឋ​ស្ម័គ្រចិត្ត ប្រគល់​ដី​ជូន​រដ្ឋ​វិញ ចំនួន​ជាង ១​ម៉ឺន​គ្រួសារ ស្មើនឹង​ផ្ទៃ​ទំហំ​ជាង​៦​ម៉ឺន​ហិកតា ។​

៣៦-​ថ្នាំ​ព្យាបាល​កូ​វីដ ម៉ូ​ល​នូ​ភី​រ៉ា​វៀ (Molnupiravir) ចាប់ផ្តើម​លក់​ក្នុងតម្លៃ ៥០​ដុល្លារ​អាមេរិក ក្នុង​មួយ​ប្រអប់ ក្រោយពី​កម្ពុជា​ផលិត​ឱសថ​នេះ ខ្លួនឯង

​នៅ​ដើម​សប្តាហ៍​នេះ ថ្នាំ​ព្យាបាល​ជំងឺ​កូ​វីដ​១៩ ម៉ូ​ល​នូ​ភី​រ៉ា​វៀ ត្រូវបាន​លក់ ក្នុងតម្លៃ​ថ្មី គឺ ៥០​ដុល្លារ ក្នុង​មួយ​ដូ​ស ឬ​១​ដប​។ ការបញ្ចុះ​តម្លៃ ៥​ដុល្លារ ក្នុង ១​ដប​នេះ ក្រោយពី​ក្រសួងសុខាភិបាល បាន​បញ្ជាក់ថា ឱសថ​នេះ ត្រូវបាន​ផលិត​ដោយ​ក្រុមហ៊ុន​ផលិត​ឱសថ​ក្នុងស្រុក ដែលមាន​ការអនុញ្ញាត​ដោយ​រាជរដ្ឋាភិបាល ក្នុង​គោលបំណង​ឱ្យ​មានការ​ចរាចរណ៍​ប្រភេទ​ឱសថ​នេះ កាន់តែ​ទូលំទូលាយ និង​មានតម្លៃ​ទាប​ជាង​មុន​។

៣៧- សង្គ្រាម​រុស្ស៊ី និង​អ៊ុយ​ក្រែ​ន បាន​ជំរុញ​ឱ្យ​តម្លៃ​ប្រេងឥន្ធនៈ និង​ទំនិញ​មួយចំនួន នៅ​កម្ពុជា ឡើងថ្លៃ

​ក្រោយ​សង្គ្រាម​ផ្ទុះឡើង​រវាងរ​ស្ស៊ី និង​អ៊ុយ​ក្រែ​ន ចាប់តាំងពី​ថ្ងៃទី​២៤ ខែកុម្ភៈ បានធ្វើឱ្យ​តម្លៃ​ប្រេង នៅលើ​ពិភពលោក ហក់​ឡើង​កាន់តែ​ខ្ពស់ ដែល​កំពុង​ចោទ​ជា​បញ្ហា​កាន់តែច្រើន​សេដ្ឋកិច្ចពិភពលោក​។ ជាក់ស្តែង តម្លៃ​ប្រេងសាំង នៅតាម​ស្ថានីយ ក្នុងប្រទេស​កម្ពុជា ក៏​ឡើងថ្លៃ​ដែរ​។ ឯកឧត្តម ប៉ែន សុ​វិជាតិ អ្នកនាំពាក្យ​ក្រសួងពាណិជ្ជកម្ម បាន​បញ្ជាក់ថា សង្គ្រាម​រវាង​រុស្ស៊ី និង​អ៊ុយ​ក្រែ​ន គឺជា​កត្តា​ផ្គួប​ផ្សំ​មួយ ជំរុញ​ឱ្យ​តម្លៃ​ប្រេង​ហក់​ឡើង ហើយ​បញ្ហា​នេះ ក៏បាន​ជះឥទ្ធិពល​ដល់​ប្រទេស​នាំចូល​ប្រេង ដូចជា​កម្ពុជា ជាដើម​។​

៣៨-​ក្រុមហ៊ុន​អាកាសចរណ៍ Thai Vietjet Airline ភ្ជាប់​ការហោះហើរ​ពី​បាងកក មក​ភ្នំពេញ​ឡើងវិញ

​ក្រោយពី​ផ្អាក​ជើងហោះហើរ​របស់​ក្រុមហ៊ុន​អាកាសចរណ៍​ជាច្រើន ដោយសារ​វិបត្តិ​នៃ​ជំងឺ​កូ​វីដ​១៩ នៅ​ព្រឹក​ថ្ងៃទី​១៦​មីនា ជើងហោះហើរ ដែល​ហោះ​ត្រង់​ពី​ទីក្រុង​បាងកក មកកាន់​រាជធានី​ភ្នំពេញ​របស់​ក្រុមហ៊ុន​អាកាសចរណ៍ Thai Vietjet Airline ត្រូវបាន​ចាប់ផ្តើម​ដំណើរការ​ឡើងវិញ និង​ត្រូវ​បានទទួល​ស្វាគមន៍​ជាថ្មី នៅ​អាកាស​យាន្ត​ដ្ឋា​ន​អន្តរជាតិ​ភ្នំពេញ​។

៣៩-​ភូមិ​កុមារ SOS ក្នុង​ខេត្តព្រៃវែង សាងសង់​លើ​ផ្ទៃដី​ជាង ១​ម៉ឺន​ម៉ែត្រក្រឡា សម្ពោធ​ដាក់​ឲ្យ​ប្រើប្រាស់​ជា​ផ្លូវការ

​ភូមិ​កុមារ អេស​អូ​អេស ក្នុង​ខេត្តព្រៃវែង សាងសង់​លើ​ផ្ទៃដី​ជាង ១​ម៉ឺន​ម៉ែត្រក្រឡា ចំណាយ​ថវិកា ប្រមាណ​ជាង ១​លាន ៥​សែន​ដុល្លារ​សហរដ្ឋអាមេរិក ត្រូវបាន​សម្ពោធ​ដាក់​ឲ្យ​ប្រើប្រាស់​ជា​ផ្លូវការ​ហើយ នៅ​ថ្ងៃទី​១៧ ខែមីនា ក្រោម​អធិបតីភាព​សម្ដេច​តេ​ជោ ហ៊ុន សែន នាយករដ្ឋមន្ត្រី​កម្ពុជា​។​

៤០- សម្ដេច​តេ​ជោ ហ៊ុន សែន ពន្យល់​ពី​មូលហេតុ ដែល​ប្រេងឥន្ធនៈ​ឡើងថ្លៃ នៅ​កម្ពុជា និង​ប្រកាស​ទទួលយក​ជនភៀសខ្លួន​អ៊ុយ​ក្រែ​ន

​ក្នុងឱកាស​អញ្ជើញ​ជា​អធិបតី​សម្ពោធ​ដាក់​ឲ្យ​ប្រើប្រាស់​ជា​ផ្លូវការ​ភូមិ​កុមារ​អេស​អូ​អេស នៅក្នុង​ខេត្តព្រៃវែង កាលពី​ថ្ងៃទី​១៧ ខែមីនា សម្តេច​តេ​ជោ ក៏បាន​ពន្យល់​ប្រជាពលរដ្ឋ​អំពី​មូលហេតុ ដែល​តម្លៃ​ប្រេងឥន្ធនៈ​ឡើងថ្លៃ នៅ​កម្ពុជា​។ នោះ​គឺ​មិនមែនជា​ការសម្រេច​ដំឡើងថ្លៃ ដោយ​កម្ពុជា​ខ្លួនឯង​ទេ តែ​ជាការ​ជះឥទ្ធិពល​នៃ​សង្គ្រាម​រវាង​រុស្ស៊ី និង​អ៊ុយ​ក្រែ​ន ដែល​បច្ចុប្បន្ននេះ បាន​ជះឥទ្ធិពល​យ៉ាងខ្លាំង​ជារួម​ដល់​សេដ្ឋកិច្ចពិភពលោក​ទាំង​មូល​។ សម្តេច​តេ​ជោ ហ៊ុន សែន ក៏បាន​ប្រកាស​ទទួលយក​ជនភៀសខ្លួន​អ៊ុយ​ក្រែ​ន ក្រោម​ហេតុផល​មនុស្សធម៌ ដូច​អ្វីដែល​កម្ពុជា​ធ្លាប់ធ្វើ នៅពេល​កន្លងមក ក្នុង​ការទទួល និង​ផ្ដល់ជំនួយ​ដល់​ជនបរទេស​ជាក់ស្តែង ដូចជា​បុរស​ជនជាតិ​អាល្លឺម៉ង់ ដែល​កំពុង​រស់នៅ​អនាថា​នៅ​កម្ពុជា នាពេល​បច្ចុប្បន្ន ជា​ឧទាហរណ៍​ជាក់ស្ដែង​ស្រាប់​។

៤១- កម្ពុជា សម្រេច​លុបចោល​នូវ​ការធ្វើ​តេស្តរ​កកូ​វីដ​១៩ លើ​អ្នកដំណើរ​ពី​បរទេស

​កាលពី​ថ្ងៃទី​១៧ ខែមីនា កម្ពុជា បានសម្រេច​លុបចោល​នូវ​ការធ្វើ​តេស្ត​រក​មេរោគ​កូ​វីដ​-១៩ សម្រាប់​អ្នកដំណើរ ដែល​មកដល់​កម្ពុជា ទោះជា​តាម​ម៉ាស៊ីន​ធំ PCR និង​តាម​តេស្ត​រហ័ស Rapid Test​។ ប៉ុន្តែ​សម្រាប់​អ្នក​មិនបាន​ចាក់​វ៉ាក់សាំង បង្ការ​កូ​វីដ​១៩ នៅពេល​ចូល​មកដល់​កម្ពុជា ត្រូវធ្វើ​ច​ត្តា​ឡី​ស័ក រយៈពេល ១៤​ថ្ងៃ​។ ក្នុងនោះ កម្ពុជា ក៏បាន​សម្រេច​អនុញ្ញាតឱ្យ​បើក​ដំណើរការ​ឡើងវិញ​នូវ​ការផ្តល់​ទិដ្ឋាការ​ពេលមកដល់ (Visa on Arrival) សម្រាប់​អ្នកដំណើរ​អន្តរជាតិ​ទាំងអស់ ទាំង​អ្នកដំណើរ​តាមផ្លូវ​អាកាស ផ្លូវគោក និង​ផ្លូវទឹក​។​

៤២-​កម្ពុជា ប្រារព្ធ​ពិធី​ទទួល​ជំនួយ​វ៉ាក់សាំង​កូ​វីដ​-១៩ ជាង ៥២​ម៉ឺន​ដូ​ស ពី​រដ្ឋាភិបាល និង​ប្រជាជន​ហុង​គ្រី

​នៅ​ព្រឹក​ថ្ងៃទី​១៨ ខែមីនា ប្រទេស​កម្ពុជា បាន​ប្រារព្ធ​ពិធី​ទទួល​ជំនួយ​ផ្លូវការ​នូវ​វ៉ាក់សាំង បង្ការ​ជំងឺ​កូ​វីដ​-១៩ ជាង ៥២​ម៉ឺន​ដូ​ស ពី​រដ្ឋាភិបាល និង​ប្រជាជន​ហុង​គ្រី​។ ពិធី​ប្រគល់ និង​ទទួល​ជំនួយ​វ៉ាក់សាំង​នេះ បានរៀបចំ​ធ្វើ នៅ​វិមាន​សន្តិភាព ក្នុង​រាជធានី​ភ្នំពេញ ក្រោម​អធិបតីភាព​សម្តេច​តេ​ជោ ហ៊ុន សែន និង​ភារធារី​ស្តីទី​នៃ​ស្ថានទូត​ហុង​គ្រី ប្រចាំ​កម្ពុជា​។​

៤៣- មន្ទីរពេទ្យ​មិត្តភាព​កម្ពុជា​-​ចិន ព្រះកុសុមៈ ត្រូវបាន​សម្ពោធ​ដាក់​ឲ្យ​ប្រើប្រាស់​ជា​ផ្លូវការ​

​មន្ទីរពេទ្យ​មិត្តភាព​កម្ពុជា​-​ចិន ព្រះកុសុមៈ ចំណាយ​ថវិកា​សាងសង់​ជាង ៨៥​លាន​ដុល្លារ​អាមេរិក ជា​ជំនួយឥតសំណង​របស់​រដ្ឋាភិបាល​ចិន ត្រូវបាន​សម្ពោធ​ដាក់​ឲ្យ​ប្រើប្រាស់​ជា​ផ្លូវការ​ហើយ នៅ​ថ្ងៃទី​២១ ខែមីនា​។ មន្ទីរពេទ្យ​មន្ទីរពេទ្យ​មិត្តភាព​កម្ពុជា​-​ចិន ព្រះកុសុមៈ ដែល​គេ​ស្គាល់​ជាទូទៅ​ថា មន្ទីរពេទ្យ​ព្រះសង្ឃ នៅក្នុង​រាជធានី​ភ្នំពេញ បាន​បំពាក់​ដោយ​ឧបករណ៍​វេជ្ជសាស្ត្រ​ទំនើបៗ ដែលមាន​សមត្ថភាព ក្នុងការ​ព្យាបាល​ជំងឺ​ទូទៅ​ច្រើន​ប្រភេទ រួមទាំង​ការវះកាត់​ដូរ​ក្រលៀន សួត និង​សរីរាង្គ​ជាច្រើន​ទៀត​។ បន្ថែម​លើសពីនេះ​ទៀត​មន្ទីរពេទ្យ​មិត្តភាព​កម្ពុជា​-​ចិន​ព្រះ​កុស​មៈ ក៏មាន​ចំណត​ឧទ្ធម្ភាគចក្រ​លើដំបូល​អាគារ ដែល​អនុញ្ញាត​ឲ្យ​ឧទ្ធម្ភាគចក្រ ទម្ងន់​ពី ៣​តោន ទៅ ៥​តោន ចុះចត​បាន​ផងដែរ​។​

៤៤- នាយករដ្ឋមន្ត្រី​ជប៉ុន បញ្ចប់​ទស្សនកិច្ច​នៅ​កម្ពុជា​

​នាយករដ្ឋមន្ត្រី​ជប៉ុន លោក គី​ស៊ី​ដា ហ្វឺ​មី​អូ បាន​ចាក​ចេញពី​ប្រទេស​កម្ពុជា​ហើយ កាលពី​ព្រឹក​ថ្ងៃទី​២១​មីនា បន្ទាប់ពី​បាន​បំពេញ​ទស្សនកិច្ច រយៈពេល ២​ថ្ងៃ នៅ​កម្ពុជា​។ លោក គី​ស៊ី​ដា ហ្វឺ​មី​អូ បាន​អញ្ជើញ​ដាក់​កម្រងផ្កា​គោរព​វិញ្ញាណក្ខន្ធ​នៅ​វិមានឯករាជ្យ និង​នៅ​មណ្ឌប​ព្រះករុណា «​ព្រះ​បរម​រតន​កោដ្ឋ​» ,​និង​គោរព​វិញ្ញាណក្ខន្ធ​អតីតមន្ត្រី​ជប៉ុន​ចំនួន ២​រូប ដែល​បាន​ពលី​ជីវិត​នៅក្នុង​បេសកកម្ម​ការងារ​របស់​អង្គការសហប្រជាជាតិ​នៅ​កម្ពុជា​កាលពី ៣០​ឆ្នាំមុន​។ នៅក្នុង​ជំនួប​ទ្វេភាគី​ជាមួយ​សម្តេច​តេ​ជោ ហ៊ុន សែន រយៈពេល​ប្រមាណ ២​ម៉ោង នៅ​វិមាន​សន្តិភាព កាលពី​ថ្ងៃអាទិត្យ ទី​២០ ខែមីនា ភាគី​ទាំងពីរ បានចេញ​សេចក្តីថ្លែងការណ៍​រួម ២៤​ចំណុច ដែល​គ្របដណ្តប់​ទាំង​ទំនាក់ទំនង​ទ្វេភាគី បញ្ហា​តំបន់ និង​អន្តរជាតិ​។

៤៥- លោក ប្រាក់ សុខុន បំពេញ​ទស្សនកិច្ច​នៅ​មី​យ៉ាន់​ម៉ា ក្នុងនាម​ប្រេសិត​ពិសេស​របស់​ប្រធាន​អាស៊ាន

​ឯកឧត្តម ប្រាក់ សុខុន ឧបនាយករដ្ឋមន្ត្រី និង​ជា​រដ្ឋមន្ត្រីការបរទេស និង​សហប្រតិបត្តិការ​អន្តរជាតិ បាន​អញ្ជើញ​ចាក​ចេញពី​កម្ពុជា​ហើយ កាលពី​ព្រឹក​ថ្ងៃទី​២១ ខែមីនា ដើម្បី​ទៅ​បំពេញ​ទស្សនកិច្ច​ការងារ​លើក​ដំបូង នៅ​ប្រទេស​មី​យ៉ាន់​ម៉ា ក្នុងនាម​ប្រេសិត​ពិសេស​ប្រធាន​អាស៊ាន​។ ទស្សនកិច្ច​នេះ មាន​រយៈពេល ៣​ថ្ងៃ ចាប់ពី​ថ្ងៃទី​២១ ដល់​ថ្ងៃទី​២៣ ខែមីនា ឆ្នាំ​២០២២​។​

៤៦- ក្រសួងសុខាភិបាល ដាក់ចេញ​យុទ្ធនា​ការអប់រំ​សុខភាព រួមគ្នា​ប្រយុទ្ធប្រឆាំង​អូ​មី​ក្រុង

​កាលពី​ថ្ងៃទី​២២ ខែមីនា ក្រសួងសុខាភិបាល បាន​បើក​យុទ្ធនា​ការអប់រំ​សុខភាព ក្រោម​ប្រធានបទ «​រួមគ្នា​ប្រយុទ្ធ​វីរុស​កូ​វីដ​-១៩ បំប្លែង​ថ្មី អូ​មី​ក្រុង ដែល​ឆ្លង​លឿន​ខ្លាំង​ជាង​មុន អាច​បង្កឱ្យមាន​ហានិភ័យ​ធ្ងន់ធ្ងរ​ដល់​អ្នក និង​គ្រួសារ​»​។ យុទ្ធនាការ នៅ​ខេត្តកំពង់ស្ពឺ​នេះ មាន​គោលដៅ ដាស់​ស្មារតី​ប្រជាពលរដ្ឋ ក៏ដូចជា​គ្រួសារ សហគមន៍ និង​ក្រសួង​ស្ថាប័ន​នានា ឲ្យ​ពួតដៃគ្នា អនុវត្ត​វិធានការ​ចាំបាច់​នានា ដែល​ដាក់ចេញ​ដោយ​ប្រមុខ​រាជរដ្ឋាភិបាល កាលពី​ថ្ងៃទី​១៧ ខែកុម្ភៈ​កន្លងទៅ ស្តីពី ការពង្រឹង​ការអនុវត្ត​វិធានការ​ប្រយុទ្ធប្រឆាំង និង​ទប់ស្កាត់​ការរីក​រាលដាល​នៃ​មេរោគ​បំប្លែង​ថ្មី​ប្រភេទ អូ​មី​ក្រុង ចូលក្នុង​សហគមន៍​។​

៤៧-​សម្តេច​ហ៊ុន សែន បញ្ជា​ឱ្យ​កងទ័ព និង​ប៉ូលិស ប្រើ​ឧទ្ធម្ភាគចក្រ កម្ចាត់​ក្រុម​ទុច្ចរិត ដែល​បំផ្លាញ​ត្រី នៅ​បឹង​ទន្លេសាប​

​ក្នុង​ពិធី​បិទ​សន្និបាត​ក្រសួងកសិកម្ម រុក្ខាប្រមាញ់ និង​នេសាទ កាលពី​រសៀល​ថ្ងៃទី​២៣ ខែមីនា សម្តេច​តេ​ជោ នាយករដ្ឋមន្ត្រី ហ៊ុន សែន បានចេញ​បទបញ្ជា​ដល់​មេបញ្ជាការ​កងទ័ព និង​មេ​ប៉ូលិស ត្រូវ​សហការ​ជាមួយ​អាជ្ញាធរ​សមត្ថកិច្ច​ពាក់​ព័ន្ធ ចាត់វិធានការ កម្ចាត់​ក្រុម​ទុច្ចរិត ដែល​បំផ្លាញ​ត្រី នៅ​បឹង​ទន្លេសាប​។ នោះ​គឺ​សម្តេច​តេ​ជោ បាន​បញ្ជា​ឱ្យ​ត្រៀម​ប្រើប្រាស់​ឧទ្ធម្ភាគចក្រ សម្រាប់​ចេញ​ប្រតិបត្តិ​ការបង្ក្រាប​ក្រុម​ទុច្ចរិត​ទាំងនេះ ដោយ​គ្មាន​ការលើកលែង​។ បើ​ចាត់វិធានការ​មិនបាន​ទេ ទាំង​រដ្ឋមន្ត្រី ទាំង​ចៅហ្វាយខេត្ត ទាំង​មេទាហាន និង​ទាំង​មេ​ប៉ូលិស មិនចាំបាច់​កាន់តំណែង​ទៀត​នោះទេ​។​

៤៨- ផ្លូវជាតិ​លេខ​២១ ត​ភ្ជាប់​ពី​ក្រុង​តាខ្មៅ ទៅកាន់​ព្រំដែន​វៀតណាម ត្រូវបាន​សម្ពោធ​ដាក់ឱ្យ​ប្រើប្រាស់​ជា​ផ្លូវការ​ហើយ

​ផ្លូវជាតិ​លេខ​២១ ប្រវែង ៦៤​គីឡូម៉ែត្រ ត​ភ្ជាប់​ពី​ទីក្រុង​តាខ្មៅ ទៅកាន់​ព្រំដែន​វៀតណាម ចំណាយ​ថវិកា​សាងសង់​ជាង ៦១​លាន​ដុល្លារ​សហរដ្ឋអាមេរិក ត្រូវបាន​សម្ពោធ​ដាក់​ឲ្យ​ប្រើប្រាស់​ជា​ផ្លូវការ​ហើយ នៅ​ថ្ងៃទី​២៣ ខែមីនា ក្រោម​អធិបតីភាព​របស់​សម្ដេច​តេ​ជោ ហ៊ុន សែន នាយករដ្ឋមន្ត្រី​កម្ពុជា និង​ឯកអគ្គរដ្ឋទូត​កូរ៉េ ប្រចាំ​នៅ​កម្ពុជា​។​

៤៩- អ្នកសារព័ត៌មាន ១៤​រូប ក្នុង ៥​សម័យកាល ចាប់ពី​ទសវត្សរ៍ ៧០ រហូតដល់​បច្ចុប្បន្ន ទទួល​ពានរង្វាន់​លើកទឹកចិត្ត​

​អ្នកសារព័ត៌មាន​ចំនួន ១៤​រូប ដែល​ក្នុងនោះ រួមមាន លោក ទាវ សារៈ​មុនី និពន្ធ​នាយក​កាសែត​រស្មី​កម្ពុជា ១​រូប​ផង ទទួលបាន​ពានរង្វាន់​អ្នកសារព័ត៌មាន ៥​សម័យកាល ចាប់ពី​ទសវត្សរ៍ ៧០​រហូតមកដល់​បច្ចុប្បន្ន​។ កម្មវិធី​នេះ រៀបចំ​ដោយ​ក្រសួង​ព័ត៌មាន សហការ​ជាមួយ​សារព័ត៌មាន​ត្នោត និង​សារព័ត៌មាន​អេ​ឡិច​ត្រូ​និ​ច ថ្មីៗ​។ ពានរង្វាន់​នេះ ធ្វើឡើង ដើម្បី​លើកទឹកចិត្ត​ដល់​អ្នកសារព័ត៌មាន​ខ្មែរ ដែល​បាន​ចូលរួម​សាង​ស្នាដៃ លើកកម្ពស់ និង​កែលម្អ​វិស័យ​ព័ត៌មាន នៅក្នុង​ប្រទេស​កម្ពុជា រាប់​តាំងពី​ឆ្នាំ ១៩៧០ រហូតដល់​ឆ្នាំ​២០២០​។​

៥០-​ផ្លូវជាតិ​លេខ​៥១ ប្រវែង​ជិត ៣៨​គីឡូម៉ែត្រ ភ្ជាប់​ផ្លូវជាតិ​លេខ​៤ និង​ផ្លូវជាតិ​លេខ​៥ ត្រូវបាន​សម្ពោធ​ដាក់ឱ្យ​ប្រើប្រាស់

​ផ្លូវជាតិ​លេខ​៥១ ប្រវែង​ជិត ៣៨​គីឡូម៉ែត្រ ភ្ជាប់​ផ្លូវជាតិ​លេខ​៤ និង​ផ្លូវជាតិ​លេខ​៥ ចំណាយ​ថវិកា​សាងសង់​ជាង ៤១​លាន​ដុល្លារ​សហរដ្ឋអាមេរិក ត្រូវបាន​សម្ពោធ​ដាក់​ឲ្យ​ប្រើប្រាស់​ជា​ផ្លូវការ​ហើយ កាលពី​ព្រឹក​មិញ​នេះ ក្រោម​វត្តមាន​សម្ដេច​តេ​ជោ ហ៊ុន សែន នាយករដ្ឋមន្ត្រី​កម្ពុជា និង​តំណាង​ស្ថានទូត​ចិន ប្រចាំ​នៅ​កម្ពុជា​។

៥១- សម្ដេច ហ៊ុន សែន ណែនាំ​មន្ត្រី និង​អាជ្ញាធរ​មូលដ្ឋាន ត្រៀមខ្លួន សម្រាប់​ពិធីបុណ្យ​ចូលឆ្នាំថ្មី​ខាងមុខ

​ក្នុងឱកាស​អញ្ជើញ​ជា​អធិបតី សម្ពោធ​ដាក់ឱ្យ​ប្រើប្រាស់រ​ផ្លូវជាតិ​លេខ ៥១ កាលពី​ព្រឹក​ថ្ងៃទី​២៥ ខែមីនា សម្ដេច ហ៊ុន សែន នាយករដ្ឋមន្ត្រី​កម្ពុជា បាន​ណែនាំ​ឱ្យ​អាជ្ញាធរ​មូលដ្ឋាន ព្រមទាំង​មន្ត្រី​ទេសចរណ៍ ចាប់ផ្ដើម​រៀបចំ​តុបតែង ទទួល​ទេសចរ តាម​ខេត្ត​រៀងៗ​ខ្លួន ក្នុង​ពិធីបុណ្យ​ចូលឆ្នាំ​ប្រ​ណៃ​ពី​ខ្មែរ នៅ​ថ្ងៃទី​១៤ ដល់​ថ្ងៃទី​១៦ ខែមេសា ខាងមុខនេះ​។ ក្រៅពី​ប្រកាស​ណែនាំ​មន្ត្រី និង​អាជ្ញាធរ​មូលដ្ឋាន ត្រៀមខ្លួន សម្រាប់​ពិធីបុណ្យ​ចូលឆ្នាំថ្មី​ខាងមុខ សម្តេចនាយក​រដ្ឋមន្ត្រី ក៏បាន​បង្ហើប​ពី​ផែនការ​ជួបជុំ​ក្រុមគ្រួសារ​របស់​សម្តេច ដើម្បី​ទទួល​អំណរ​ឆ្នាំ​ថ្មី រយៈពេល ៣​ថ្ងៃ​នៅ​ខេត្ត​ព្រះសីហនុ​ផងដែរ​។​

៥២- អគារ ត្រចៀក ច្រមុះ បំពង់ក​មិត្តភាព​កម្ពុជា​-​កូរ៉េ​នៃ​មន្ទីរពេទ្យ​ព្រះអង្គ​ឌួង ត្រូវបាន​សម្ពោធ​ដាក់ឱ្យ​ប្រើប្រាស់

​អគារ​ត្រចៀក ច្រមុះ បំពង់ក​មិត្តភាព​កម្ពុជា​-​កូរ៉េ នៃ​មន្ទីរពេទ្យ​ព្រះ​អង្គឌួង មាន​កម្ពស់ ៥​ជាន់ រាប់ទាំង​ជាន់​ផ្ទាល់​ដី ចំណាយ​ថវិកា​សាងសង់​ជាង ៨​លាន​ដុល្លារ​សហរដ្ឋអាមេរិក ត្រូវបាន​សម្ពោធ​ដាក់​ឲ្យ​ប្រើប្រាស់​ជា​ផ្លូវការ​ហើយ នៅថ្ងៃនេះ ក្រោម​អធិបតីភាព​សម្ដេច​តេ​ជោ ហ៊ុន សែន នាយករដ្ឋមន្ត្រី​កម្ពុជា និង​ឯកឧត្តម​ឯកអគ្គរដ្ឋទូត​វិសាមញ្ញ និង​ពេញ​សមត្ថភាព​របស់​សាធារណរដ្ឋ​កូរ៉េ ប្រចាំ​កម្ពុជា​។ អគារ​មិត្តភាព​កម្ពុជា​-​កូរ៉េ​ថ្មី​នៃ​មន្ទីរពេទ្យ​ព្រះ​អង្គឌួង ត្រូវបាន​បើក​ការដ្ឋាន​សាងសង់ កាលពី​អំឡុង​ខែមីនា ឆ្នាំ​២០២០ ជា​ជំនួយ​របស់​សាធារណរដ្ឋ​កូរ៉េ តាមរយៈ​ទីភ្នាក់ងារ​សហប្រតិបត្តិ​ការ​អន្តរជាតិ​កូរ៉េ ក​យ​កា (KOICA)​។​

៥៣- សម្តេច​តេ​ជោ ហ៊ុន សែន ឆ្លើយតប​អ្នកវិភាគ​មួយចំនួន ដោយ​ប្រកាស​ជំហរ​របស់​កម្ពុជា​សាជាថ្មី ប្រឆាំង​ការឈ្លានពាន​របស់​រុស្ស៊ី ទៅលើ​អ៊ុយ​ក្រែ​ន

​ក្នុងឱកាស​អញ្ជើញ​ជា​អធិបតី​សម្ពោធ​ដាក់​ឲ្យ​ប្រើប្រាស់​ជា​ផ្លូវការ​អគារ​ច្រមុះ​ត្រចៀក​បំពង់ក​មិត្តភាព​កម្ពុជា​កូរ៉េ​នៃ​មន្ទីរពេទ្យ​ព្រះ​អង្គឌួង នា​ព្រឹក​មិញ សម្តេច​តេ​ជោ ហ៊ុន សែន បាន​អះអាង​សាជាថ្មី​នូវ​ជំហរ​ឥត​កែប្រែ​របស់​កម្ពុជា គឺ​ប្រឆាំង​ទៅនឹង​ការឈ្លានពាន ដោយ​ប្រើប្រាស់​កម្លាំង​របស់​ប្រទេសមួយ ទៅលើ​ប្រទេសមួយ​ផ្សេងទៀត​។

៥៤-​កម្ពុជា ស្នើ​បណ្ដា​ប្រទេស​និយាយ​ភាសា​បារាំង មក​វិនិយោគ នៅ​កម្ពុជា​

​សម្ដេច​តេ​ជោ ហ៊ុន សែន នាយករដ្ឋមន្ត្រី​កម្ពុជា ក្នុងឱកាស​ជួបពិភាក្សា​ការងារ​ជាមួយ​លោកជំទាវ ល្វី​ស មូ​ស៊ី​គី​វ៉ា​បូ (Louise Mushikiwabo) អគ្គលេខាធិការ​នៃ​អង្គការ​អន្តរជាតិ​ហ្វ្រ​ង់ កូ​ហ្វូ​នី (OIF) នៅ​វិមាន​សន្តិភាព​ក្នុង​ក្រុងភ្នំពេញ​នា​ថ្ងៃទី 29 ខែ​មិនា​នេះ បានស្នើ​ឱ្យ​បណ្ដា​ប្រទេស​និយាយ​ភាសា​បារាំង​សិក្សា​អំពី​លទ្ធភាព​និង​ឱកាស​ដើម្បី​ធ្វើការ​វិនិយោគ​នៅក្នុង​ប្រទេស​កម្ពុជា​។​

៥៥-​ស្ពាន​អាកាស និង​ផ្លូវ​ក្រោម​ដី​ចោមចៅ ត្រូវបាន​សម្ពោធ​ដាក់ឱ្យ​ប្រើប្រាស់ ជា​ផ្លូវការ នៅថ្ងៃនេះ

​ស្ពាន​អាកាស និង​ផ្លូវ​ក្រោម​ដី​ចោមចៅ ដែល​ចំណាយ​ថវិកា​សាងសង់​ប្រមាណ ២២​លាន​ដុល្លារ​សហរដ្ឋអាមេរិក លើ​ផ្ទៃដី​ជាង ៦​ម៉ឺន​ម៉ែត្រការ៉េ ត្រូវបាន​សម្ពោធ​ដាក់​ឲ្យ​ប្រើប្រាស់​ជា​ផ្លូវការ​ហើយ នៅ​ថ្ងៃទី​៣១ ខែមីនា ក្រោម​អធិបតីភាព​សម្ដេច​តេ​ជោ ហ៊ុន សែន នាយករដ្ឋមន្ត្រី​នៃ​ព្រះរាជាណាចក្រ​កម្ពុជា​។ ស្ពាន​អាកាស និង​ផ្លូវ​ក្រោម​ដី​ចោមចៅ​នេះ វិនិយោគ​ដោយ​រាជរដ្ឋាភិបាល​កម្ពុជា សាងសង់​ដោយ​ក្រុមហ៊ុន OCIC ដោយ​ប្រើប្រាស់​រូបមន្ត យក​ទីក្រុង ចិញ្ចឹម​ទីក្រុង ឬ​យក​ស្លឹកត្នោត ខ្ចប់​ស្ករត្នោត​។

៥៦- សម្តេច​តេ​ជោ ហ៊ុន សែន រម្លឹក​ប្រជាពលរដ្ឋ​ជាថ្មី ពី​តម្លៃ​នៃ​សន្តិភាព

​ក្នុង​ពិធី​សម្ពោធ​ដាក់ឱ្យ​ប្រើប្រាស់​ជា​ផ្លូវការ​ស្ពាន​អាកាស និង​ផ្លូវ​ក្រោម​ដី​ចោមចៅ នៅ​ព្រឹក​ថ្ងៃ​ព្រហស្បតិ៍ ទី​៣១ ខែមីនា នេះ សម្តេច​តេ​ជោ ហ៊ុន សែន បាន​បញ្ជាក់ថា នៅពេលនេះ កម្ពុជា កំពុង​កសាង​ហេដ្ឋារចនាសម្ព័ន្ធ​នានា នៅក្នុង​ប្រទេស ដែល​អំណោយផល​ដោយ​សន្តិភាព ខណៈដែល​អ៊ុយ​ក្រែ​ន ដែលមាន​សង្គ្រាម កំពុង​រង​ការបំផ្លាញ​ហេដ្ឋារចនាសម្ព័ន្ធ​នានា​។

៥៧- សម្ដេច​តេ​ជោ មានប្រសាសន៍ថា រយៈពេល ៩​ខែ កម្ពុជា ផលិត​រ៉ែ​មាស បាន​ចំនួន​ជាង ២​តោន

​សម្តេច​តេ​ជោ​នាយករដ្ឋមន្ត្រី ហ៊ុន សែន បានប្រកាសថា កម្ពុជា​ទទួលបាន​រ៉ែ​មាស ហើយ​ផលិត​ចេញ​ជា​មាសទឹកដប់ បាន​ជាង ២​តោន បន្ទាប់ពី​បើក​ឱ្យ​ដំណើរការ​ជា​ផ្លូវការ​នូវ​ការដ្ឋាន​អាជីវកម្ម និង​រោងចក្រ​ចម្រាញ់​រ៉ែ​មាស នៅ​ខេត្តមណ្ឌលគិរី​។

៥៨- ផ្លូវ​ថ្មី ៣៨​ខ្សែ និង​ការស្ដារ​លើកកម្ពស់​សោភ័ណភាព​ដងស្ទឹង​សៀមរាប ត្រូវបាន​សម្ពោធ​ដាក់ឱ្យ​ប្រើប្រាស់

​ផ្លូវ​ថ្មី ៣៨​ខ្សែ និង​គម្រោង​ស្ដារ​លើកកម្ពស់​សោភ័ណភាព​ដងស្ទឹង​សៀមរាប ដែល​វិនិយោគ​ដោយ​ថវិកាជាតិ​ចំណាយ​ថវិកា​ប្រមាណ ២០០​លាន​ដុល្លារ​សហរដ្ឋអាមេរិក ត្រូវបាន​សម្ពោធ​ដាក់​ឲ្យ​ប្រើប្រាស់​ជា​ផ្លូវការ​ហើយ នៅ​ព្រឹក​ថ្ងៃទី​៤ ខែមេសា ក្រោម​អធិបតីភាព​ដ៏​ខ្ពង់ខ្ពស់​របស់​សម្ដេច​តេ​ជោ ហ៊ុន សែន នាយករដ្ឋមន្ត្រី​កម្ពុជា​។

៥៩- សម្ដេច ហ៊ុន សែន បង្ហើប​ពី​គម្រោង​កែលម្អ​ផ្លូវ​រថភ្លើង​ចាស់ ទៅជា​ផ្លូវដែក​ល្បឿន​លឿន នៅពេល​ខាងមុខ

​ក្នុង​ពិធី​សម្ពោធ​ដាក់ឱ្យ​ប្រើប្រាស់​ផ្លូវ ៣៨​ខ្សែ ក្នុង​ក្រុង​សៀមរាប កាលពី​ព្រឹក​ថ្ងៃទី​៤​មេសា សម្តេច ហ៊ុន សែន ក៏បាន​ណែនាំ​ឱ្យ​ឯកឧត្តម ស៊ុន ចាន់ថុល រដ្ឋមន្ត្រីក្រសួង​សាធារណការ និង​ដឹកជញ្ជូន ពិនិត្យ​លទ្ធភាព​កែលម្អ​ផ្លូវ​រថភ្លើង​ចាស់ ជំនួស​ដោយ​ផ្លូវ​រថភ្លើង​ល្បឿន​លឿន​វិញ​។

៦០-​កម្ពុជា បោះឆ្នោត​អនុបវាទ​ក្នុង​ការព្យួរ​សមាជិកភាព​រុស្ស៊ី ពី​ក្រុមប្រឹក្សា​សិទ្ធិមនុស្ស​អង្គការសហប្រជាជាតិ​

​មហាសន្និបាត​អង្គការសហប្រជាជាតិ (UNGA) បាន​បោះឆ្នោត​ព្យួរ​សមាជិកភាព​ប្រទេស​រុស្ស៊ី ពី​ក្រុមប្រឹក្សា​សិទ្ធិមនុស្ស​ហើយ កាលពី​ថ្ងៃ​សុក្រ បើ​គិត​តាម​ម៉ោង​នៅ​កម្ពុជា​។ ដំណោះស្រាយ​បែបនេះ ត្រូវបាន​ផ្តួចផ្តើម​ដោយ​សហរដ្ឋអាមេរិក បន្ទាប់ពី​មានការ​លើកឡើងថា ទាហាន​រុស្ស៊ី បានសម្លាប់​ជន​ស៊ីវិល ក្នុងពេល​កំពុង​ដកថយ​ចេញពី​តំបន់​ជុំវិញ​រដ្ឋធានី​អ៊ុយ​ក្រែ​ន​។ ការបោះឆ្នោត​ព្យួរ​សមាជិកភាព​រុស្ស៊ី ពី​ក្រុមប្រឹក្សា​សិទ្ធិមនុស្ស​សហប្រជាជាតិ ទទួលបាន​សំឡេងគាំទ្រ​ពី​ប្រទេស​ចំនួន ៩៣ ខណៈដែល​ប្រទេស​ចំនួន ២៤ បាន​បោះឆ្នោត​ប្រឆាំង និង​៥៨​ប្រទេស​ផ្សេងទៀត ក្នុងនោះ ក៏មាន​ទាំង​កម្ពុជា​ដែរ បាន​បោះឆ្នោត​អនុបវាទ​។​

៦១- សម្ពោធ​ដាក់ឱ្យ​ប្រើប្រាស់​គម្រោងការ​ពារ​ទឹកជំនន់ និង​កែលម្អ​ប្រព័ន្ធ​ប្រឡាយ​-​លូ ក្នុង​រាជធានី​ភ្នំពេញ
​សមិទ្ធផល​នានា ក្នុង​គម្រោង​ការពារ​ទឹកជំនន់ និង​កែលំអ​ប្រព័ន្ធ​ប្រឡាយ​លូ ក្នុង​រាជធានី​ភ្នំពេញ ជំហាន​ទី​៤ ចំណាយ​ថវិកា​ប្រមាណ ៣០​លាន​ដុល្លារ​អាមេរិក ជា​ជំនួយឥតសំណង​របស់​រដ្ឋាភិបាល​ជប៉ុន ត្រូវបាន​សម្ពោធ​ដាក់ឱ្យ​ប្រើប្រាស់ កាលពី​ព្រឹក​ថ្ងៃទី​២០ ខែមេសា ក្រោម​អធិបតីភាព សម្តេច​តេ​ជោ ហ៊ុន សែន នាយករដ្ឋមន្ត្រី​កម្ពុជា និង​តំណាង ឯកអគ្គរដ្ឋទូត​ជប៉ុន ប្រចាំ​នៅ​កម្ពុជា​។​

៦២- សម្តេច​តេ​ជោ ហ៊ុន សែន អំពាវនាវ​ឱ្យ​អាជ្ញាធរ បង្ក​បរិយាកាស​ល្អ យុត្តិធម៌ និង​តម្លាភាព​ដល់​គ្រប់​គណបក្សនយោបាយ

​ក្នុងឱកាស​អញ្ជើញ​ជា​អធិបតី​សម្ពោធ​ដាក់ឱ្យ​ប្រើប្រាស់​សមិទ្ធផល​នានា​នៃ​គម្រោង​ការពារ​ទឹកជំនន់ និង​កែលំអ​ប្រព័ន្ធ​ប្រឡាយ​-​លូ ក្នុង​រាជធានី​ភ្នំពេញ ជំហាន​ទី​៤ កាលពី​ថ្ងៃទី​២០ ខែមេសា សម្តេច​តេ​ជោ ហ៊ុន សែន នាយករដ្ឋមន្ត្រី​កម្ពុជា ក៏បាន​អំពាវនាវ​ឱ្យ​អាជ្ញាធរ​គ្រប់លំដាប់​ថ្នាក់ បង្ក​បរិ​យា​ល្អ យុត្តិធម៌ តម្លាភាព​ដល់​គ្រប់​គណបក្សនយោបាយ ក្នុងការ​ឃោសនាបោះឆ្នោត​ឃុំ​សង្កាត់ នាពេលខាងមុខ​។ ជាមួយនេះ​នឹង​ការអំពាវនាវ​នេះ សម្តេចនាយក​រដ្ឋមន្ត្រី ប្រធាន​គណបក្ស​ប្រជាជន​កម្ពុជា ក៏បាន​ប្រកាស មិន​ចេញមុខ​ឃោសនា​រក​សំឡេងឆ្នោត សម្រាប់​ការបោះឆ្នោត​ក្រុមប្រឹក្សាឃុំ​-​សង្កាត់ អាណត្តិ​ទី​៥ នៅ​ខែឧសភា​ខាងមុខ​នេះឡើយ​។​

៦៣- អ្នកជំនាញ​ថា ចំនួន​ភ្ញៀវទេសចរ ក្នុងពេល​ចូលឆ្នាំ​ខ្មែរ ជា​សញ្ញា​ថា វិស័យ​ទេ​ចរណ៍ ត្រលប់​រក​ប្រក្រតីភាព​វិញ​ហើយ

​អ្នកជំនាញ​ខាង​វិស័យ​ទេសចរណ៍ អះអាងថា ចំនួន​ភ្ញៀវទេសចរ ដែល​កើនឡើង​យ៉ាងគំហុក នៅ​ក្នុងឱកាស​បុណ្យចូលឆ្នាំ​ខ្មែរ កន្លងទៅនេះ មិន​គ្រាន់តែ​ជាការ​បញ្ជាក់​អំពី​ភាពល្អប្រសើរ​ឡើងវិញ​នៃ​វិស័យ​ទេសចរណ៍​នៅ​កម្ពុជា​ប៉ុណ្ណោះ​ទេ ប៉ុន្តែ​ការថត​បង្ហោះ​រូបភាព​ទាំងនោះ ក៏​ជាការ​ផ្សព្វផ្សាយ​ទៅកាន់​ពិភពលោក​អំពី​ភាពល្អប្រសើរ នៃ​ប្រទេស​កម្ពុជា​ដែរ​។ ហេតុនេះ សូម​ប្រតិបត្តិ​ករ និង​សេវាករ​ទាំងអស់ ត្រៀមខ្លួន​ឱ្យបាន​ល្អ ដើម្បី​ចាប់យក​ឱកាស​ដ៏​មានតម្លៃ​នេះ​។​

៦៤-​កម្ពុជា​-​ចិន កំពុង​រួមគ្នា​កសាង «​សហគមន៍​វាសនា​រួម​» ក្រោម​មគ្គុទេសក៍​ដ៏​ឆ្នើម​របស់​គណបក្ស​ប្រជាជន​កម្ពុជា និង​គណបក្ស​កុម្មុយនីស្ត​ចិន

​កម្ពុជា​-​ចិន កំពុង​រួមគ្នា កសាង «​សហគមន៍​វាសនា​រួម​» ក្រោម​មគ្គុទេសក៍​ដ៏​ឆ្នើម​របស់​គណបក្ស​ប្រជាជន​កម្ពុជា និង​គណបក្ស​កុម្មុយនីស្ត​ចិន​។ នេះ​បើ​យោងតាម​ខ្លឹមសារ​ក្នុងជំនួប​តាម​ប្រព័ន្ធ​វីដេអូ​រវាង​ឯកឧត្តម ប្រាក់ សុខុន សមាជិក​គណៈអចិន្ត្រៃយ៍ និង​ជា​ប្រធាន​គណៈ​ទាក់ទង​បរទេស នៃ​គណៈកម្មាធិការ​កណ្តា​លគ​ណ​បក្ស​ប្រជាជន​កម្ពុជា និង​ឯកឧត្តម សុង ថាវ រដ្ឋមន្ត្រីក្រសួង​ទំនាក់ទំនង​អន្តរជាតិ​នៃ​គណៈកម្មាធិការ​ម​ជ្ឈឹ​ម​បក្ស​កុម្មុយនីស្ត​ចិន កាលពី​ថ្ងៃទី​២០ មេសា ២០២២​។​

៦៥- កម្ពុជា បន្ថយ​រយៈពេល​ធ្វើ​ច​ត្តា​ឡី​ស័ក ពី ១៤​ថ្ងៃ មក​ត្រឹម ៧​ថ្ងៃ ចំពោះ​អ្នកដំណើរ​មកពី​បរទេស ដែល​មិនបាន​ចាក់​វ៉ាក់សាំង

​កម្ពុជា បានសម្រេច​កែសម្រួលរ​យៈ​ពេលធ្វើ​ច​ត្តា​ឡី​ស័ក ចំពោះ​អ្នកដំណើរ មកពី​បរទេស ដែល​មិនបាន​ចាក់​វ៉ាក់សាំង​បង្ការ​ជំងឺ​កូ​វីដ​១៩ ពី ១៤​ថ្ងៃ មក​នៅត្រឹម ៧​ថ្ងៃ​។ ក្រៅពីនោះ លក្ខខណ្ឌ​នៃ​ការធ្វើ​តេស្តរ​កកូ​វីដ​១៩ ក្នុងអំឡុង​ពេលធ្វើ​ច​ត្តា​ឡី​ស័ក​នេះ ក៏​ត្រូវបាន​កែសម្រួល​ផងដែរ​។​

៦៦-​សម្តេច​តេ​ជោ ហ៊ុន សែន អញ្ជើញ​ទៅ​ប្រទេស​ជប៉ុន ចូលរួម​កិច្ចប្រជុំ​កំពូល លើក​ទី​៤ ស្តីពី បញ្ហា​ទឹក នៅ​តំបន់​អាស៊ី​-​ប៉ា​ស៊ី​ហ្វី​ក

​នៅ​ព្រឹក​ថ្ងៃទី​២២ ខែមេសា សម្តេច​តេ​ជោ ហ៊ុន សែន នាយករដ្ឋមន្ត្រី បាន​ដឹកនាំ​គណៈប្រតិភូ​ជាន់ខ្ពស់​រាជរដ្ឋាភិបាល​កម្ពុជា អញ្ជើញ​ទៅ​ប្រទេស​ជប៉ុន ដើម្បី​ចូលរួម​កិច្ចប្រជុំ​កំពូល លើក​ទី​៤ ស្តីពី បញ្ហា​ទឹក នៅ​តំបន់​អាស៊ី​-​ប៉ាស៊ីហ្វិក​។ កិច្ចប្រជុំ​កំពូល ដែល​ជប៉ុន​ជា​ម្ចាស់ផ្ទះ​នេះ ធ្វើឡើង​នៅ​ថ្ងៃទី​២៣​មេសា ហើយ​នៅ​រសៀល​ថ្ងៃទី​២៤​មេសា សម្តេច​តេ​ជោ ហ៊ុន សែន នឹង​អញ្ជើញ​វិលត្រឡប់​មកដល់​ភ្នំពេញ​វិញ​។
…………………………………………………………………….
៦៧-​សម្ដេច​តេ​ជោ ហ៊ុន សែន ជួប​ប្រតិភូ​អ្នកវិនិយោគ​ចិន មកពី​ក្រុមហ៊ុន ៣ ដើម្បី​ពិភាក្សា​ការងារ

​កាលពី​ថ្ងៃទី​២៥ ខែមេសា សម្ដេច​តេ​ជោ ហ៊ុន សែន នាយករដ្ឋមន្ត្រី​កម្ពុជា បានអនុញ្ញាត​ឱ្យ​ប្រតិភូ​អ្នកវិនិយោគ មកពី​ក្រុមហ៊ុន​ចិន​ចំនួន​៣ ដឹកនាំ​ដោយ​អ្នកឧកញ៉ា ចេ​ន ហ្ស៊ី ប្រធាន​សម្ព័ន្ធ​ក្រុមហ៊ុន ព្រី​នស៍ គ្រុប ចូលជួប​សំដែង​ការគួរសម និង​ពិភាក្សា​ការងារ នៅ​វិមាន​សន្តិភាព ក្នុង​រាជធានី​ភ្នំពេញ​។ អ្នកវិនិយោគ​មកពី​ក្រុមហ៊ុន​ចិន​ទាំង​៣ មានបំណង​វិនិយោគ​លើ​វិស័យ​ឧស្សាហកម្ម​រ៉ែ ហេដ្ឋារចនាសម្ព័ន្ធ អចលនវត្ថុ ពាណិជ្ជកម្ម សំណង់ ឡូ​ជី​ស្ទីក មូល​ប​ត្រ និង​ពាណិជ្ជកម្ម​មូល​ប​ត្រ នៅ​កម្ពុជា​។​

៦៨- កម្ពុជា ទទួល​អំណោយ​វ៉ាក់សាំង Covid 19 ចំនួន​ជាង ១​លាន ៥​ម៉ឺន​ដូ​ស ពី​អ៊ីតាលី

​កាលពី​ថ្ងៃទី​២៥ ខែមេសា កម្ពុជា បានទទួល​អំណោយ​ថ្នាំ​វ៉ាក់សាំង​កូ​វីដ​-១៩ ប្រភេទ AstraZeneca ចំនួន​ជាង ១​លាន ៥​ម៉ឺន​ដូ​ស ពី​រដ្ឋាភិបាល និង​ប្រជាជន​អ៊ីតាលី​។ ពិធី​ប្រគល់ និង​ទទួល​ជំនួយ​ថ្នាំ​វ៉ាក់សាំង​ទាំងនេះ ត្រូវបាន​រៀបចំ​ធ្វើ នៅ​វិមាន​សន្តិភាព ក្នុង​រាជធានី​ភ្នំពេញ ក្រោម​អធិបតីភាព​ដ៏​ខ្ពង់ខ្ពស់​របស់​សម្តេច​តេ​ជោ ហ៊ុន សែន នាយករដ្ឋមន្ត្រី​កម្ពុជា និង​ឯកអគ្គរដ្ឋទូត​អ៊ីតាលី ប្រចាំ​នៅ​កម្ពុជា​។​

៦៩- កម្ពុជា សម្រេច​លុបចោល​កាតព្វកិច្ច​ពាក់​ម៉ាស់ នៅ​ទីសាធារណៈ

​កាលពី​ថ្ងៃទី​២៦​ខែមេសា រាជរដ្ឋាភិបាល បានសម្រេច​ជា​ផ្លូវការ លុបចោល​កាតព្វកិច្ច​ពា​ក់​ម៉ាស់ នៅតាម​ទីសាធារណៈ ក្រោយ​ករណី​ឆ្លង​កូ​វីដ​-១៩ បាន​ធូរស្បើយ​។ ពោលគឺ​នៅ​ទីកន្លែង​សាធារណៈ និង​កន្លែង​បើកចំហ​នានា នៅ​ទូទាំងប្រទេស គឺ​ទុកឱ្យ​ប្រជាជន​ទាំងអស់ សម្រេចចិត្ត​ដោយ​ខ្លួនឯង ពាក់​ម៉ាស់ ឬ​មិន​ពាក់​ម៉ាស់​។ ចំពោះ​បន្ទប់​បិទ​ជិត នៅតែ​កំណត់ឱ្យ​ពាក់​ម៉ាស់​ជាធម្មតា​។

៧០-​សម្តេច​តេ​ជោ ហ៊ុន សែន ប្រកាសថា ប្រជាពលរដ្ឋ មិនតិចជាង ៦០% នៅ​បន្ត​ពាក់​ម៉ាស់

​ក្នុង​ពិធី​បិទ​សន្និបាត​ក្រសួង​អប់រំ នា​រសៀល​ថ្ងៃទី​២៧ ខែមេសា សម្តេច​តេ​ជោ ហ៊ុន សែន បានប្រកាសថា មកដល់​ថ្ងៃនេះ មាន​ប្រជាពលរដ្ឋ​មិនតិចជាង ៦០%​ទេ ដែល​នៅតែ​បន្ត​ពាក់​ម៉ាស់ ខណៈដែល​រាជរដ្ឋាភិបាល បានសម្រេច​ដកចេញ​នូវ​កាតព្វកិច្ច​ពាក់​ម៉ាស់ នៅតាម​ទីសាធារណៈ​។ នេះ​បង្ហាញថា ប្រជាពលរដ្ឋ​យើង យល់ដឹង​ពី​វិធានការ​ការពារ​ខ្លួន​។ ជាមួយគ្នា​នោះ សម្តេច​តេ​ជោ ក៏​ចាប់ផ្តើម​អនុវត្ត​មុនគេ ដោយ​ឱ្យ​ភ្ញៀវ ដែល​មកជួប​សម្តេច​តេ​ជោ ហ៊ុន សែន នៅ​វិមាន​សន្តិភាព គឺ​មិន​ពាក់​ម៉ាស់​ឡើយ ហើយ​សម្តេច​បានធ្វើ​រួចហើយ ក្នុងពេល​ជួប​ជាមួយ​អតីត​មេបញ្ជាការ​អ៊ុនតាក់ កាលពី​ព្រឹក​មិញ​។​

៧១- សម្ដេច​តេ​ជោ ហ៊ុន សែន អនុញ្ញាតឱ្យ​អតីត​មេបញ្ជាការ​អ៊ុនតាក់ ចូលជួប​សម្ដែង​ការគួរសម និង​ពិភាក្សា​ការងារ

​កាលពី​ព្រឹក​ថ្ងៃទី​២៧ ខែមេសា សម្ដេច​តេ​ជោ ហ៊ុន សែន នាយករដ្ឋមន្ត្រី​កម្ពុជា បានអនុញ្ញាត​ឱ្យ​ឯកឧត្តម ឧ​ត្ត​ម​សេនីយ​ឯក ច​ន​សេន ដឺ​សុន (Jonh Sanderson) អតីត​មេបញ្ជាការ​របស់​កងក​ម្លាំ​ង​អន្តរជាតិ នៃ​អាជ្ញាធរ​បណ្តោះអាសន្ន​អង្គការសហប្រជាជាតិ​ប្រចាំ​កម្ពុជា ហៅ​កាត់​ថា UNTAC ចូលជួប​សំដែង​ការគួរសម និង​ពិភាក្សា​ការងារ នៅ​វិមាន​សន្តិភាព ក្នុង​រាជធានី​ភ្នំពេញ​។

៧២-​សម្ដេច​តេ​ជោ ហ៊ុន សែន ជួប​សំណេះសំណាល​ជាមួយ​កីឡាករ និង​ប្រតិភូ​កីឡា​កម្ពុជា ជាង ៥០០​នាក់ មុន​ចេញទៅ​ប្រកួត​ស៊ី​ហ្គេម នៅ​វៀតណាម

​កាលពី​ថ្ងៃទី​២៨ ខែមេសា សម្ដេច​តេ​ជោ ហ៊ុន សែន នាយករដ្ឋមន្ត្រី​កម្ពុជា បាន​អញ្ជើញ​ជា​អធិបតី ជួប​សំណេះសំណាល និង​ផ្ដល់​អនុសាសន៍​ដល់​កីឡាករ​កីឡាការិនី ក៏ដូចជា ប្រតិភូ​កីឡា​កម្ពុជា ជាង ៥០០​នាក់ មុន​ចាក​ចេញពី​កម្ពុជា ទៅ​ចូលរួម​ប្រកួត​កីឡា​ស៊ី​ហ្គេម នៅ​ប្រទេស​វៀតណាម​។ សម្ដេចនាយក​រដ្ឋមន្ត្រី នៅតែ​បន្ត​ក្រើនរម្លឹក​ជាថ្មី​ម្ដងទៀត ឱ្យ​កីឡាករ​កីឡាការិនី និង​ប្រតិភូ​កីឡា​របស់​កម្ពុជា​ទាំងអស់ គោរព​វិន័យ ក្នុងការ​ប្រកួត បញ្ចៀស​នូវ​ការប្រើប្រាស់​សារធាតុ​ញៀន និង​សារធាតុ​ហាមឃាត់ ក៏ដូចជា ខិតខំ​ថែរក្សា​សុខភាព​បញ្ចៀស​ពី​ជំងឺ​កូ​វីដ​ផងដែរ​។ សម្ដេច​តេ​ជោ ចាត់ទុកថា ការបញ្ជូន​កីឡាករ​ដ៏​ច្រើន​របស់​កម្ពុជា ទៅ​ចូលរួម​ប្រកួត​កីឡា​ស៊ី​ហ្គេម នៅ​វៀតណាម នៅ​ឆ្នាំ​២០២២ នេះ ជាការ​ចូលរួម​ដកស្រង់​បទពិសោធន៍ និង​ការពង្រឹង​សមត្ថភាពរ​បស់​កីឡាករ​បន្ថែមទៀត ដើម្បី​ត្រៀម​ប្រកួត​ក្នុងនាម​ជា​ម្ចាស់ផ្ទះ​កីឡា​ស៊ី​ហ្គេម នៅ​ឆ្នាំ​២០២៣ ខាងមុខនេះ​។

៧៣- សម្ដេច​តេ​ជោ ហ៊ុន សែន ណែនាំ​ឲ្យ​ផ្ទេរ​អ្នកជំងឺ​កូ​វីដ ចេញពី​ស្តា​ត​អូរ​ឡាំ​ពិ​ក ខណៈ​កូ​វីដ​បន្ត​ថមថយ​នៅ​កម្ពុជា

​ក្នុងឱកាស​អញ្ជើញ​ជា​អធិបតី សំណេះសំណាល និង​ផ្ដល់​អនុសាសន៍​ដល់​កីឡាករ​កម្ពុជា ដែល​ត្រូវ​ទៅ​ចូលរួម​ប្រកួត​កីឡា​ស៊ី​ហ្គេម នៅ​ប្រទេស​វៀតណាម កាលពី​ថ្ងៃទី​២៨ ខែមេសា សម្ដេច​តេ​ជោ ហ៊ុន សែន នាយករដ្ឋមន្ត្រី​កម្ពុជា ក៏បាន​ណែនាំ​ដល់​មន្ត្រី​ពាក់ព័ន្ធ ត្រូវ​ពិភាក្សាគ្នា ដើម្បី​ផ្ទេរ​អ្នកជំងឺ​កូ​វីដ ចេញពី​ស្តា​ត​អូរ​ឡាំ​ពិ​ក ខណៈ​កូ​វីដ បន្ត​ថមថយ​នៅ​កម្ពុជា​។​

៧៤- សៀវភៅ « ក្តីសង្ឃឹម ហ៊ុន ម៉ា​នី​» បោះពុម្ពផ្សាយ​ដោយសារ​ព័ត៌មាន​ឌីជីថល​ថ្មីៗ បង្ហាញ​ឱ្យ​សាធារណជន​ដឹង​កាន់តែច្បាស់ អំពី​អត្ត​ច​រិ​ក និង​ជីវិត​របស់​កូនប្រុស​នាយករដ្ឋមន្ត្រី

​សៀវភៅ «​ក្តីសង្ឃឹម ហ៊ុន ម៉ា​នី​» ត្រូវបាន​បោះពុម្ពផ្សាយ ដោយសារ​ព័ត៌មាន​ឌីជីថល​ថ្មីៗ និង​ជា​ស្នាដៃ​និពន្ធ​របស់លោក លាង ដឺ​លុច ដែលជា​អ្នកកាសែត ដ៏​មានបទពិសោធន៍​មួយរូប​។ សៀវភៅ​នេះ បាន​រៀបរាប់​ពី អត្តចរិត ផ្នត់គំនិត បទពិសោធន៍ និង​ជីវិត​របស់លោក ហ៊ុន ម៉ា​នី ដើម្បីឱ្យ​សាធារណជន កាន់តែ​យល់ច្បាស់​អំពី​លោក​ថែមទៀត​។ ពិធី​សម្ពោធ​បើក​ដំណើរ​ការលក់​សៀវភៅ​ថ្មី​នេះ បានធ្វើ​ឡើង កាលពី​ថ្ងៃទី​២៨ ខែមេសា​។​

៧៥-​ច្រកព្រំដែន​កម្ពុជា​-​ថៃ ចាប់ផ្ដើម​បើក​ដំណើរការ​ឡើងវិញ​ហើយ

​ច្រកព្រំដែន​កម្ពុជា​-​ថៃ ចាប់ផ្ដើម​បើក​ដំណើរការ​ឡើងវិញ ដោយ​វិធានការ​សុខាភិបាល ត្រូវបាន​អនុវត្ត​យ៉ាង​តឹងរ៉ឹង​។ ការបើក​ច្រកព្រំដែន​កម្ពុជា​-​ថៃ​ឡើងវិញ ចាប់ពី​ថ្ងៃទី​១ ខែឧសភា ឆ្នាំ​២០២២ នេះ​តទៅ គឺ​អ្នកដំណើរ​ចូល​ប្រទេស​ថៃ ត្រូវ​បែង​ចែកជា ៣ ប្រភេទ គឺ (១) អ្នកដំណើរ ដែល​បាន​ចាក់​វ៉ាក់សាំង​ពេញលេញ (២) អ្នកដំណើរ ដែល​មិន​ចាក់​វ៉ាក់សាំង ឬ​ចាក់​វ៉ាក់សាំង​មិន​ពេញលេញ និង (៣) អ្នកដំណើរ​ដែលជា​ប្រជាជន ក្នុង​ខេត្ត​ជាប់​ព្រំដែន ដែល​កាន់​ប័ណ្ណ​ព្រំដែន​។ ខេត្ត​ថៃ ជាប់​ច្រកព្រំដែន​អន្តរជាតិ​កម្ពុជា​-​ថៃ ដែល​ធ្វើដំណើរ​ចេញចូល​ប្រទេស​ថៃ រួមមាន​៖ ១-​ខេត្ត​ស្រះកែវ ២-​ខេត្ត​សុ​រិ​ន ៣-​ខេត្ត​ត្រាត ៤-​ខេត្ត​ចាន់​ថៈ​បុរី​។ នេះ​បើតាម​ស្ថានទូត​កម្ពុជា ប្រចាំ​ប្រទេស​ថៃ​។​

៧៦-​សម្តេច​តេ​ជោ ហ៊ុន សែន ជួប​សំណេះសំណាល និង​ផ្តល់រ​ង្វាន់​ដល់​សិស្ស​និទ្ទេស A ចំនួន ១,៧៥៣​នាក់

​កាលពី​ព្រឹក​ថ្ងៃ​អង្គារ ទី​៣ ខែឧសភា សម្តេច​តេ​ជោ នាយករដ្ឋមន្ត្រី ហ៊ុន សែន បាន​អញ្ជើញ​ជួប​សំណេះសំណាល ព្រមទាំង​ផ្តល់រ​ង្វាន់​លើកទឹកចិត្ត​ដល់​សិស្ស​ប្រលង​ជាប់​និទ្ទេស A ក្នុង​ឆ្នាំ​សិក្សា​២០២០-២០២១ សរុប ១,៧៥៣​នាក់​។ ពិធី​សំណេះសំណាល​នេះ បានធ្វើ​ឡើង​នៅ​សាល​ពិព័រណ៍ OCIC ជ្រោយចង្វារ​។

៧៧- សម្ដេច​តេ​ជោ ហ៊ុន សែន ស្នើឱ្យ​អ្នកសារព័ត៌មាន ជៀសវាង​ការផ្សាយ​ព័ត៌មាន​បំភ្លៃ​ការពិត និង​ត្រូវខិតខំ​អភិវឌ្ឍន​សមត្ថភាព​ខ្លួន ឆ្លើយតប​នឹង​ការវិវត្ត​នៃ​បច្ចេកវិទ្យា​ឌីជីថល

​ក្នុងឱកាស «​ទិវា​សេរីភាព​សារព័ត៌មាន​សកលលោក​» ថ្ងៃទី​៣ ខែឧសភា ប្រមុខ​រាជរដ្ឋាភិបាល​កម្ពុជា សម្ដេច​តេ​ជោ ហ៊ុន សែន បាន​ស្នើឱ្យ​អ្នកសារព័ត៌មាន ចៀសវាង​ការផ្សាយ​ព័ត៌មាន​បំភ្លៃ​ការពិត ដែល​ធ្វើឱ្យ​សាធារណជន បាត់បង់​ជំនឿ និង​ធ្វើឱ្យប៉ះពាល់​ដល់​តម្លៃ​កិត្តិយស សេចក្តីថ្លៃថ្នូរ​របស់ខ្លួន និង​តម្លៃ​របស់​សា្ថ​ប័ន​សារព័ត៌មាន​។ ទន្ទឹមនឹងនោះ សម្តេច​ក៏បាន​ស្នើឱ្យ​អ្នកសារព័ត៌មាន ត្រូវខិតខំ​អភិវឌ្ឍន​សមត្ថភាព​ខ្លួន​បន្ថែមទៀត ដើម្បី​ឆ្លើយតប​ការវិវត្ត​នៃ​បច្ចេកវិទ្យា​ប្រព័ន្ធ​ផ្សព្វផ្សាយ​ព័ត៌មាន​ឌីជីថល​។​

៧៨- អ្នកជំនាញ​ជឿជាក់ថា ព័ត៌មាន ដែលមាន​វិជ្ជាជីវៈ នឹងមិន​ដួលរលំ នៅ​ចំពោះមុខ​ឌីជីថល​ឡើយ

​ថ្ងៃទី​៣​ឧសភា ទិវា​សេរីភាព​សារព័ត៌មាន​ពិភពលោក​។ កម្ពុជា​ក៏បាន​ប្រារព្ធ​ពិធី​ជួបជុំ​ថ្នាក់ជាតិ ក្រោម​អធិបតីភាព​ឯកឧត្តម ហ៊ុន ម៉ា​ណែ​ត តំណាង​ដ៏​ខ្ពង់ខ្ពស់​របស់​សម្តេច​តេ​ជោ នាយករដ្ឋមន្ត្រី ហ៊ុន សែន​។ នៅ​ចំពោះមុខ​ស្ថានភាព​សារព័ត៌មាន​ដ៏​សម្បូរបែប ក្នុងសម័យ​ឌីជីថល​នេះ អ្នកជំនាញ ដោយ​រួមទាំង​ឯកឧត្តម ហ៊ុន ម៉ា​ណែ​ត ផង យល់ថា ស្ថាប័ន​សារព័ត៌មាន ដែលមាន​រចនាសម្ព័ន្ធ​ច្បាស់លាស់ និង​មាន​ក្រមសីលធម៌​វិជ្ជាជីវៈ​ត្រឹមត្រូវ នៅតែ​មិន​ដួលរលំ​ឡើយ គ្រាន់តែ​ត្រូវ​ប្រែប្រួល​ទៅតាម​បច្ចេកវិជ្ជា​តែប៉ុណ្ណោះ​។​

៧៩- វ៉ាក់សាំង​កូ​វីដ​១៩ ដែលជា​ជំនួយ​របស់​សហរដ្ឋអាមេរិក តាមរយៈ​មជ្ឈមណ្ឌល​កូ​វ៉ា​ក់ ចំនួន ២​លាន​ដូ​ស បាន​ដឹក​មកដល់​កម្ពុជា

​វ៉ាក់សាំង​បង្ការ​ជំងឺ​កូ​វី​១៩ ចំនួន ២​លាន​ដូ​ស ដែលជា​ជំនួយ​របស់​សហរដ្ឋអាមេរិក តាមរយៈ​មជ្ឈមណ្ឌល​កូ​វ៉ា​ក់ បាន​ដឹក​មកដល់​កម្ពុជា​ហើយ កាលពី​ព្រឹក​ថ្ងៃទី​៣ ខែឧសភា​។ រដ្ឋមន្ត្រី​ក្រសួងសុខាភិបាល បាន​រំពឹងថា វ៉ាក់សាំង​នេះ នឹង​បម្រើ​ដល់​ការចាក់​ជូន​ប្រជា​ជា​ពលរដ្ឋ ខណៈ​គិត​ត្រឹម​ចុងខែ​មេសា កម្ពុជា​នៅសល់​វ៉ាក់សាំង​ក្នុង​ឃ្លាំង​ប្រមាណ​ជាង ៨​លាន​ដូ​ស សម្រាប់​បន្ត​ចាក់​ជូន​ប្រជាពលរដ្ឋ​។

៨០-​សម្ដេច​តេ​ជោ ហ៊ុន សែន អញ្ជើញ​ទទួល​ជួបពិភាក្សា​ការងារ​ជាមួយ​ក្រុមប្រឹក្សា​ធុរកិច្ច​សហរដ្ឋអាមេរិក​-​អាស៊ាន

​សម្ដេច​តេ​ជោ នាយករដ្ឋមន្ត្រី ហ៊ុន សែន បានទទួល​ជួបពិភាក្សា​ការងារ​ជាមួយ​ក្រុមប្រឹក្សា​ធុរកិច្ច​សហរដ្ឋអាមេរិក​-​អាស៊ាន ដឹកនាំ​ដោយ​ឯកឧត្តម ឯកអគ្គរដ្ឋទូត ឯកឧត្តម ម៉ៃ​ខើ​ល មី​ចា​ឡាក់ ( Michael Michalak ) អនុប្រធាន​ជាន់ខ្ពស់​នៃ​នាយក​គ្រប់គ្រង​ប្រចាំ​តំបន់ នៃ​ក្រុមប្រឹក្សា​ធុរកិច្ច​អាមេរិក​-​អាស៊ាន​។ កិច្ចប្រជុំ​នេះ បានធ្វើ​ឡើង នៅ​វិមាន​សន្តិភាព នៅ​ព្រឹក ថ្ងៃ​ព្រហស្បតិ៍ ទី​៥ ខែឧសភា​។

៨១-​សម្តេច​តេ​ជោ ហ៊ុន សែន សោកស្តាយ​ចំពោះ​ការបាត់បង់​លោក ហ៊ុន ណេង ជា​បងប្រុស​បង្កើត

​លោក ហ៊ុន ណេង សមាជិក​អចិន្ត្រៃយ៍​គណបក្ស​ប្រជាជន​កម្ពុជា ប្រធាន​គណៈកម្មការ​ទី​៤ រដ្ឋសភា និង​ជា​តំណាងរាស្ត្រ​មណ្ឌល​ខេត្តកំពង់ចាម ដែល​បងប្រុស​បង្កើតរ​បស់​សម្តេច​តេ​ជោ ហ៊ុន សែន នាយករដ្ឋមន្ត្រី​នៃ​កម្ពុជា បានទទួល​មរណភាព ដោយ​ជំងឺ​បេះដូង កាលពី​រសៀល​ថ្ងៃទី​៥ ខែឧសភា ឆ្នាំ​២០២២ ។ សម្តេច​តេ​ជោ ហ៊ុន សែន បាន​សំដែង​ការសោកស្តាយ ចំពោះ​ការបាត់បង់​បងប្រុស និង​ថា ការ​បែក​គ្នា​លើក​នេះ គឺ​លា​រហូត​។ ចំណែក​ឥស្សរជន​នយោបាយ និង​ប្រជាពលរដ្ឋ ក្នុងនោះ ក៏មាន​លោក​កឹម​សុខា ផងដែរ បាន​ផ្ញើ​សារ​រំលែក​មរណទុក្ខ​ដ៏​ក្រៀមក្រំ​នេះ​។ តាម​កម្មវិធី​បុណ្យ សព​ឯកឧត្តម ហ៊ុន ណេង បាន​តម្កល់​ធ្វើបុណ្យ​តាម​ប្រពៃណី នៅ​គេហដ្ឋាន​របស់លោក ក្នុង​ក្រុង​កំពង់ចាម ហើយ​នៅ​ថ្ងៃទី​៩ ខែឧសភា សព​ឯកឧត្តម ហ៊ុន ណេង នឹងត្រូវ​ដង្ហែ​យកទៅ​បញ្ចុះ​នៅ​វត្តភ្នំ​ប្រុស​។ ប៉ុន្មាន​ថ្ងៃ​ក្រោយមក ព្រះករុណា ព្រះមហាក្សត្រ បាន​ត្រាស់បង្គាប់​ផ្តល់​គោរមងារ «​សម្តេច​ឧ​ត្ត​ម​ទេព​ញាណ​» ជូន​លោក ហ៊ុន ណេង ដែលជា​បងប្រុស​បង្កើត​របស់​សម្តេច​តេ​ជោ ហ៊ុន សែន​។​

៨២- ភាគី​ពាក់ព័ន្ធ​ឯកភាព ចែក​ជំនួយ​មនុស្សធម៌​របស់​អាស៊ាន ភ្ជាប់​នឹង​ការចាក់​វ៉ាក់សាំង​កូ​វីដ ដល់​ប្រជាជន​មី​យ៉ាន់​ម៉ា

​ដូច​ការគ្រោងទុក កិច្ចប្រជុំ​ពិគ្រោះ​យោបល់ ស្តីពី ជំនួយ​មនុស្សធម៌​រប​ស់អា​ស៊ាន សម្រាប់​មី​យ៉ាន់​ម៉ា ដែល​កម្ពុជា​ធ្វើជា​សហប្រធាន បានធ្វើ​ឡើង នៅ​ថ្ងៃទី​៦​ឧសភា​។ ជា​លទ្ធផល ភាគី​ពាក់ព័ន្ធ បាន​ឯកភាព​ថា ការចែក​ជំនួយ​មនុស្សធម៌​របស់​អាស៊ាន ត្រូវ​ផ្សារភ្ជាប់​នឹង​ការចាក់​វ៉ាក់សាំង​បង្ការ​ជំងឺ​កូ​វីដ​១៩ ដល់​ប្រជាជន​មី​យ៉ាន់​ម៉ា ក្នុងពេល​តែមួយ​តែម្តង​។​

៨៣- សម្តេច​តេ​ជោ ហ៊ុន សែន​៖ ក្នុងនាម​ប្រធាន​អាស៊ាន កម្ពុជា​ត្រូវ​ធ្វើជា​សហប្រធាន​នៃ​កិច្ចប្រជុំ​កំពូល​ពិសេស​អាស៊ាន -​អាមេរិក

​ប្រមុខ​រាជរដ្ឋាភិបាល​កម្ពុជា សម្តេច​តេ​ជោ ហ៊ុន សែន នៅ​ព្រឹក​ថ្ងៃទី​១០​ឧសភា​នេះ បាន​ដឹកនាំ​គណៈប្រតិភូ​ជាន់ខ្ពស់ អញ្ជើញ​ចាកចេញ​ពី​ភ្នំពេញ ទៅកាន់​សហរដ្ឋអាមេរិក ដើម្បី​ចូលរួម​កិច្ចប្រជុំ​កំពូល​ពិសេស​អាស៊ាន​-​អាមេរិក​។ មុន​ធ្វើដំណើរ​ទៅកាន់​សហរដ្ឋអាមេរិក សម្តេច​តេ​ជោ ហ៊ុន សែន បាន​ផ្ញើ​សារ​ជា​សំឡេង​ជូន​ជនរួមជាតិ ដោយ​បញ្ជាក់ថា ក្នុងនាម​ប្រធាន​អាស៊ាន កម្ពុជា​ត្រូវ​ធ្វើជា​សហប្រធាន​នៃ​កិច្ចប្រជុំ​កំពូល​ពិសេស​អាស៊ាន -​អាមេរិក ដែល​ប្រព្រឹត្តទៅ​រយៈពេល ២​ថ្ងៃ គឺ​ចាប់ពី​ថ្ងៃទី​១២-១៣​ឧសភា​នេះ​។​

៨៤- សម្តេច​តេ​ជោ ហ៊ុន សែន​៖ ទិវា​កាកបាទក្រហម ថ្ងៃ​៨​ឧសភា ទទួលបាន​ថវិកា​ពី​សប្បុរសជន ជាង ១៦​លាន​ដុល្លារ

​ក្នុង​សារ​សំឡេង អំពី​ដំណើរ​ឆ្ពោះទៅកាន់​សហរដ្ឋអាមេរិក នៅពេល​ចូល​ចាក់​សាំង​យន្តហោះ នៅ​ទីក្រុង​សេ​អ៊ូ​ល សាធារណរដ្ឋ​កូរ៉េ នា​រសៀល​ថ្ងៃទី​១០ ខែឧសភា​នេះ សម្តេច​សម្តេច​តេ​ជោ ហ៊ុន សែន បានប្រកាសថា កាកបាទក្រហមកម្ពុជា ទទួលបាន​ថវិកា​ពី​សប្បុរសជន​ជាង ១៦​លាន​ដុល្លារ​អាមេរិក នៅក្នុង​ទិវា​កាកបាទក្រហម អឌ្ឍចន្ទ​ក្រហម ថ្ងៃ​៨​ឧសភា​។​

៨៥- រដ្ឋសភា ច្រានចោល​សេចក្តីសម្រេច​របស់​សភា​អឺរ៉ុប ស្តីពី «​ការបង្ក្រាប​ជា​បន្តបន្ទាប់​ទៅលើ​ក្រុម​អ្នក នយោបាយ​ប្រឆាំង​នៅ​កម្ពុជា​»

​រដ្ឋសភា​កម្ពុជា បានចេញ​សេចក្តីថ្លែងការណ៍ ដោយ​សំដែង​នូវ​ការខកចិត្ត​ជាខ្លាំង ចំពោះ​សេចក្តីសម្រេច​របស់​សភា​អឺរ៉ុប ស្តីពី “​ការបង្ក្រាប​ជា​បន្តបន្ទាប់ ទៅលើ​ក្រុម​អ្នកនយោបាយ​ប្រឆាំង​នៅ​កម្ពុជា​” ដែល​បានអនុម័ត នៅ​ថ្ងៃទី​៥ ខែឧសភា ឆ្នាំ​២០២២​។ ក្នុង​សេចក្តីថ្លែងការណ៍ រដ្ឋសភា​កម្ពុជា ក៏បាន​ប្រកាស​ច្រានចោល​នូវ​សេចក្តីសម្រេច​របស់​សភា​អឺរ៉ុប​នេះ​ទាំងស្រុង ដោយ​ផ្អែកលើ​មូលដ្ឋានចំនួន ១៣​ចំនុច​។​

៨៦-​សម្តេច​តេ​ជោ ហ៊ុន សែន និង​គណៈប្រតិភូ​ជាន់ខ្ពស់​កម្ពុជា អញ្ជើញ​ដល់​សហរដ្ឋអាមេរិក ទទួល​ការស្វាគមន៍​យ៉ាង​កក់ក្តៅ​ពី​ពលរដ្ឋ​ខ្មែរ​-​អាមេរិក

​ប្រមុខ​រាជរដ្ឋាភិបាល​កម្ពុជា សម្តេច​តេ​ជោ ហ៊ុន សែន និង​គណៈប្រតិភូ​ជាន់ខ្ពស់​កម្ពុជា បាន​អញ្ជើញ​ទៅដល់​រដ្ឋធានី​វ៉ាស៊ីនតោន សហរដ្ឋអាមេរិក​ហើយ នៅ​ព្រឹក​ថ្ងៃទី​១១​ឧសភា​នេះ​។ ពលរដ្ឋ​ខ្មែរ កំពុង​រស់នៅ​សហរដ្ឋអាមេរិក និង​កាណាដា​ជាច្រើន​នាក់ បាន​អញ្ជើញ​មក​ស្វាគមន៍​នូវ​ការអញ្ជើញ​ដល់​របស់​សម្តេច​តេ​ជោ យ៉ាង​កក់ក្តៅ​។​

៨៧- សម្តេច​តេ​ជោ ហ៊ុន សែន អំពាវនាវ ៨​ចំណុច ឱ្យ​ពលរដ្ឋ និង​ស្ថាប័ន​ពាក់ព័ន្ធ​អនុវត្ត ដើម្បី​ធានា​នូវ​សុខដុម​នីយកម្ម​គ្រួសារ​ទាំងអស់ នៅ​កម្ពុជា

​ក្នុងឱកាស​ទិវា​អន្តរជាតិ ស្តីពី គ្រួសារ ខួប​លើក​ទី​២៨ នា​ថ្ងៃទី​១០ ខែឧសភា សម្តេច​តេ​ជោ ហ៊ុន សែន នាយករដ្ឋមន្ត្រី​នៃ​កម្ពុជា បាន​អំពាវនាវ​ឱ្យ​គ្រួសារ និង​សហគមន៍​និ​មួយៗ ត្រូវ​បន្ត​ពង្រឹង​នូវ​ស្មារតី​សាមគ្គី​ភាពល្អ យកចិត្តទុកដាក់​អប់រំ​សីលធម៌ និង​ប្រពៃណី​ទំនៀមទម្លាប់​ល្អ​របស់​យើង ប្រកបដោយ​មនសិការ​ខ្ពស់​។ ទន្ទឹមនឹងនោះ សម្តេច​ក៏បាន​ស្នើ​សូមឱ្យ​ពលរដ្ឋ និង​ស្ថាប័ន​ពាក់ព័ន្ធ បន្ត​អនុវត្ត​នូវ​សំខាន់ៗ ៨​ចំណុច ដើម្បី​ធានា​ឱ្យបាន​នូវ​សុខដុម​នីយកម្ម​គ្រួសារ​ទាំងអស់ នៅ​កម្ពុជា​។​

៨៨-​សម្តេច​តេ​ជោ ហ៊ុន សែន ជួបពិភាក្សា​ការងារ​ជាមួយ​នាយករដ្ឋមន្ត្រី​វៀតណាម

​មុនពេល​ចូលរួម​កិច្ចប្រជុំ​កំពូល​ពិសេស​អាស៊ាន​-​អាមេរិក នា​ថ្ងៃទី​១២ ខែឧសភា​នេះ សម្ដេច​តេ​ជោ ហ៊ុន សែន នាយករដ្ឋមន្ត្រី​កម្ពុជា បាន​ជួបពិភាក្សា​ការងារ​ជាមួយ​ឯកឧត្តម​នាយករដ្ឋមន្ត្រី​វៀតណាម​។ ជំនួប​រវាង​ប្រមុខ​រដ្ឋាភិបាល​ទាំងពីរ នៅ​ទីក្រុង​វ៉ាស៊ីនតោន នា​ថ្ងៃនេះ ផ្ដោតទៅលើ​ការប្រយុទ្ធប្រឆាំង​ជំងឺ​កូ​វីដ​១៩ ការស្តា​វិស័យ​ទេសចរណ៍ ការធ្វើ​ពាណិជ្ជកម្ម ការបោះឆ្នោត កិច្ចការ​ព្រំដែន បញ្ហា​អាស៊ាន តំបន់ និង​ពិភពលោក ដែលជា​ក្តី​ព្រួយបារម្ភ​រួម​។​

៨៩- សម្តេច​តេ​ជោ ហ៊ុន សែន ពន្យល់​ពលរដ្ឋ​ខ្មែរ រស់នៅ​អាមេរិក និង​កាណាដា អំពី​សភាពការណ៍​នយោបាយ និង​សេដ្ឋកិច្ចកម្ពុជា

​ក្នុងឱកាស​អញ្ជើញ​ជា​សហប្រធាន ក្នុង​កិច្ចប្រជុំ​កំពូល​អាស៊ាន​-​អាមេរិក នៅលើ​ទឹកដី​សហរដ្ឋអាមេរិក នៅ​ទី​១២ ខែឧសភា​នេះ សម្តេច​តេ​ជោ ហ៊ុន សែន នាយករដ្ឋមន្ត្រី​នៃ​កម្ពុជា បាន​អញ្ជើញ​ជួប​សំណេះសំណាល​ជាមួយ​ប្រជាពលរដ្ឋ​ខ្មែរ រស់នៅ​សហរដ្ឋអាមេរិក និង​កាណាដា ប្រមាណ​ជាង ២​ពាន់​នាក់​។ ក្នុង​ពិធី ដែល​រៀបចំ​ធ្វើ​នៅ​ទីក្រុង​វ៉ាស៊ីនតោន សម្តេច​តេ​ជោ បាន​ពន្យល់​ពលរដ្ឋ​អាមេរិកកាំង និង​កាណាដា ដើមកំណើត​ខ្មែរ អំពី​សភាពការណ៍​ពិត ពាក់ព័ន្ធ​នឹង​នយោបាយ និង​សេដ្ឋកិច្ច​នៅ​កម្ពុជា ក៏ដូចជា​សភាពការណ៍​វិវត្តន៍​ថ្មីៗ រឿង​ជំងឺ​កូ​វីត​១៩ ស្ថានភាព​នយោបាយ​ផ្ទៃក្នុង​ប្រទេស បញ្ហា​ព្រំដែន​ជាមួយ​ប្រទេសជិតខាង ក៏ដូចជា​បញ្ហា​ទាក់ទង​នឹង​ការរក្សា​អធិបតេយ្យភាព​ជាតិ ក្នុង​ចន្លោះ​រវាង​មហាអំណាច​ចិន និង​អាមេរិក ជាដើម​។​

៩០-​អាមេរិក ប្តេជ្ញា​ធ្វើការ​ជិតស្និទ្ធ​ជាមួយ​អាស៊ាន និង​សន្យា​ផ្តល់ជំនួយ ១៥០​លាន​ដុល្លារ សម្រាប់​ថាមពល​ស្អាត និង​សន្តិសុខ​ដែនសមុទ្រ

​កិច្ចប្រជុំ​កំពូល​អាស៊ាន​-​សហរដ្ឋអាមេរិក បាន​ប្រារព្ធ​ធ្វើជា​ផ្លូវការ កាលពី​ថ្ងៃទី​១២ ខែឧសភា នៅ​រដ្ឋធានី​វ៉ាស៊ីនតោន សហរដ្ឋអាមេរិក ក្រោម​វត្តមាន​សហប្រធាន គឺ​សម្តេច​តេ​ជោ ហ៊ុន សែន នាយករដ្ឋមន្ត្រី​កម្ពុជា និង​លោក ចូ បៃ​ឌិន ប្រធានាធិបតី​សហរដ្ឋអាមេរិក​។ សម្តេច​តេ​ជោ ហ៊ុន សែន និង​មេដឹកនាំ​បណ្តា​ប្រទេស​សមាជិក​អាស៊ាន​ទាំងអស់ ត្រូវ​បានទទួល​ស្វាគមន៍​យ៉ាង​កក់ក្តៅ ពី​សំណាក់​ប្រធានាធិបតី​សហរដ្ឋអាមេរិក នៅ​សេត​វិមាន ក្នុងជំនួប​ទល់មុខ​គ្នា ជា​ប្រវត្តិសាស្ត្រ​។ ជាមួយ​ការស្វាគមន៍ និង​ប្តេជ្ញាចិត្ត​ធ្វើ​ការងារ​ជិតស្និទ្ធ​ជាមួយ​អាស៊ាន អាមេរិក​ក៏បាន​សន្យា​ផ្តល់ជំនួយ​ប្រហែល ១៥០​លាន​ដុល្លារ សម្រាប់​ប្រទេស​អាស៊ាន ដើម្បី​ធ្វើ​ការងារ​ពាក់ព័ន្ធ​នឹង​ថាមពល​ស្អាត និង​សន្តិសុខ​ដែនសមុទ្រ​។​

៩១- មេដឹកនាំ​អាស៊ាន​-​អាមេរិក ប្តេជ្ញា​បង្កើត​ភាពជា​ដៃគូ​យុទ្ធសាស្ត្រ​គ្រប់​ជ្រុងជ្រោយ និង​រក្សា​សន្តិភាព សន្តិសុខ ស្ថិរភាព​ក្នុង​តំបន់

​ក្នុង​កិច្ចប្រជុំ​កំពូល​ពិសេស កាលពី​សប្តាហ៍​មុន មេដឹកនាំ​អាស៊ាន និង​ប្រធានាធិបតី​សហរដ្ឋអាមេរិក អះអាង​ជាថ្មី​នូវ​ការប្តេជ្ញាចិត្ត​រួមគ្នា ក្នុងការ​ពង្រឹង និង​កសាង​ទំនាក់ទំនង​ដៃគូ​សន្ទនា​អាស៊ាន​-​សហរដ្ឋអាមេរិក ឱ្យ​យ​កាន់តែ​ទូលំទូលាយ​ថែមទៀត ដែល​មិនអាច​ខ្វះ​បាន ចំពោះ​អាស៊ាន និង​សហរដ្ឋអាមេរិក ក៏ដូចជា​សម្រាប់​តំបន់ និង​សហ​គន៍​អន្តរជាតិ​។ ភាគី​ទាំងពីរ អាស៊ាន​-​សហរដ្ឋអាមេរិក យល់ឃើញថា ទំនាក់ទំនង​ទាំងនេះ គឺជា​មូលដ្ឋានគ្រឹះ សម្រាប់​លើកកម្ពស់ និង​រក្សា​សន្តិភាព សន្តិសុខ ស្ថិរភាព និង​វិបុលភាព​ក្នុង​តំបន់​។​

៩២- សម្តេច​តេ​ជោ ហ៊ុន សែន ជួប​សំណេះសំណាល​ជាមួយ​ក្រុមគ្រូពេទ្យ​ស្ម័គ្រចិត្ត​យុវជន​សម្តេច​តេ​ជោ ប្រយុទ្ធ​នឹង​ជំងឺ​កូ​វីដ

​កាលពី​ថ្ងៃទី​១៧ ខែឧសភា សម្ដេច​តេ​ជោ ហ៊ុន សែន នាយករដ្ឋមន្ត្រី​កម្ពុជា បាន​អញ្ជើញ​ជួប​សំណេះសំណាល​ជាមួយ​ក្រុមគ្រូពេទ្យ​ស្ម័គ្រចិត្ត​យុវជន​សម្ដេច​តេ​ជោ​ប្រឆាំងនឹង​ជំងឺ​កូ​វីដ​១៩​។ ពិធី​សំណេះសំណាល នៅ​សាល​ពិព័រណ៍​ជ្រោយចង្វារ ក្នុង​រាជធានី​ភ្នំពេញ បានធ្វើ​ឡើង ដើម្បី​ជាការ​លើកទឹកចិត្ត​ដល់​ក្រុមគ្រូពេទ្យ​ស្ម័គ្រចិត្ត​ទាំងអស់ ដែល​បាន​ចូលរួមចំណែក​ប្រកបដោយ​ការទទួលខុសត្រូវ ក្នុង​បេសកកម្ម​ប្រយុទ្ធ​ប្រឆាំងនឹង​ជំងឺ​កូ​វីដ​១៩ នាពេល​កន្លងមក ដែល​បច្ចុប្បន្ន​រាជរដ្ឋាភិបាល​កម្ពុជា អះអាងថា បានទទួល​ជោគជ័យ​មួយ​ភាគ​ធំ​រួចជាស្រេច​ហើយ​។

៩៣- សម្ដេច​តេ​ជោ ហ៊ុន សែន ពន្យល់​សាធារណជន និង​រម្លឹក​សហរដ្ឋអាមេរិក ពី​ទិដ្ឋភាព​ច្បាប់ និង​នយោបាយ ពាក់ព័ន្ធ​នឹង​អ្នក​គប់​ស្បែកជើង មកលើ​សម្ដេច នៅ​សហរដ្ឋ​អា​មេ​រិច

​ក្នុង​ពិធី​សំណេះសំណាល ជាមួយ​ក្រុមគ្រូពេទ្យ​ស្ម័គ្រចិត្ត​យុវជន​សម្ដេច​តេ​ជោ នៅ​មជ្ឈមណ្ឌល​ពិព័រណ៍​ជ្រោយចង្វារ កាលពី​ថ្ងៃទី​១៧ ខែឧសភា សម្ដេច​តេ​ជោ ហ៊ុន សែន នាយករដ្ឋមន្ត្រី បាន​មានប្រសាសន៍​ពន្យល់​សាធារណជន និង​រម្លឹក​សហរដ្ឋអាមេរិក ពី​ទិដ្ឋភាព​ច្បាប់ និង​នយោបាយ ពាក់ព័ន្ធ​នឹង​បុរស​ម្នាក់ ដែល​បាន​គប់​ស្បែកជើង លើ​រូប​សម្ដេច នៅ​សហរដ្ឋអាមេរិក​។ ពលរដ្ឋ​ខ្មែរ​ភាគច្រើន បាន​ថ្លែង​ប្រតិកម្ម​ថ្កោលទោស និង​ប្រកាសថា​ជា​ទង្វើ ដែល​មិនអាច​អត់ឱន​ឲ្យ​បាន​។ បុរស​ដែល​គប់​ស្បែកជើង​លើស​ម្ដេច​តេ​ជោ ហ៊ុន សែន ត្រូវបាន​គេ​ស្គាល់ ឈ្មោះថា អ៊ុក ទូច វ័យ ៧១​ឆ្នាំ ជា​ពលរដ្ឋ​ខ្មែរ រស់នៅ​រដ្ឋ​កាលីហ្វ័រ​ញ៉ា សហរដ្ឋអាមេរិក​។ បុរស​រូបនេះ បាន​គប់​ស្បែកជើង​សំដៅ​មក​សម្ដេច​តេ​ជោ ហ៊ុន សែន នៅ​យប់​ថ្ងៃទី​១១ ខែឧសភា ឆ្នាំ​២០២២ គ្រា​ដែល​សម្ដេចនាយក​រដ្ឋមន្ត្រី កំពុង​ត្រូវបាន​ស្វាគមន៍ និង​ថតរូប​អនុ​ស្សវ​រី​យ៍​ជាមួយ​ពលរដ្ឋ​ខ្មែរ​ជាច្រើន ដែល​គាំទ្រ​សម្ដេច អញ្ជើញ​ចូលរួម​កិច្ចប្រជុំ​ពិសេស​អាស៊ាន​-​សហរដ្ឋ​អា​មេ​រិច នៅ​ទីក្រុង​វ៉ាស៊ីនតោន សហរដ្ឋអាមេរិក កាលពី​សប្តាហ៍​មុន​។​

៩៤-​សម្តេច​ក្រឡាហោម ស ខេង ពិនិត្យ​លទ្ធភាព​បើក​ច្រកព្រំដែន និង​បញ្ជាក់​ពី​គម្រោង​កសាង​ស្ពាន​កម្ពុជា​-​ឡាវ

​ក្នុង​ពិធី​សម្ពោធ​ដាក់​ឲ្យ​ប្រើប្រាស់​ជា​ផ្លូវការ​វេទិកា​អុំទូក និង​សំណង់​សិល្បការ​ផ្សេងៗ ស្ថិតក្នុង​ភូមិ​កំពង់​ស្រឡៅ ឃុំ​កំពង់​ស្រឡៅ​មួយ ស្រុក​ឆែប ខេត្តព្រះវិហារ កាលពី​ថ្ងៃទី​១៧ ខែឧសភា សម្ដេច​ក្រឡាហោម ស ខេង ឧបនាយករដ្ឋមន្ត្រី រដ្ឋមន្ត្រី​ក្រសួងមហាផ្ទៃ បាន​បញ្ជាក់ថា សម្តេច​នឹង​ពិនិត្យ​លទ្ធភាព​បើក​ច្រកព្រំដែន​ជាមួយ​ភាគី​ឡាវ​ឡើងវិញ​។ ក្នុងនោះ ក៏មាន​គម្រោង​កសាង​ស្ពាន​ឆ្លង​ព្រំដែន​រវាង​ប្រទេស​ទាំងពីរ​ផងដែរ​។​

៩៥-​សម្តេច​តេ​ជោ ហ៊ុន សែន នឹង​អញ្ជើញ​ទៅ​ចូលរួម​កិច្ចប្រជុំ​នៃ​វេទិកា​សេដ្ឋកិច្ចពិភពលោក នៅ​ប្រទេស​ស្វី​ស ចាប់ពី​ថ្ងៃទី​២២-២៦ ខែឧសភា​

​ក្រសួងការបរទេស បានប្រកាសថា សម្តេច​តេ​ជោ ហ៊ុន សែន នាយករដ្ឋមន្ត្រី​កម្ពុជា នឹង​ដឹកនាំ​គណៈប្រតិភូ​ជាន់ខ្ពស់ អញ្ជើញ​ទៅ​ចូលរួម​កិច្ចប្រជុំ ប្រចាំឆ្នាំ​២០២២ នៃ​វេទិកា​សេដ្ឋកិច្ចពិភពលោក ចាប់ពី​ថ្ងៃទី​២២ ដល់​ថ្ងៃទី​២៦ ខែឧសភា ឆ្នាំ​២០២២ នៅ​ទីក្រុង​ដា​វ៉ស​-​ក្លូ​ស្ទ័​រ ប្រទេស​ស្វី​ស​។ កិច្ចប្រជុំ​នៃ​វេទិកា​សេដ្ឋកិច្ចពិភពលោក នឹង​រៀបចំ​ធ្វើ ក្រោម​ប្រធានបទ «​ការត្រៀមខ្លួន សម្រាប់​យុគសម័យ ក្រោយ​ជំងឺ​កូ​វីដ​»​។ កាលពី​ម៉ោង ១​កន្លះ កណ្តាល​អា​ធ្រា​ត្រ យប់​ថ្ងៃទី​២០ ឈានចូល​ថ្ងៃទី​២១ ខែឧសភា​នេះ សម្តេច​តេ​ជោ ហ៊ុន សែន បាន​អញ្ជើញ​ចាក​ចេញពី​ភ្នំពេញ ឆ្ពោះទៅកាន់​ប្រទេស​ស្វី​ស​ហើយ​។ នៅពេល​ទៅដល់​ប្រទេស​ស្វី​ស សម្តេច នឹង​ជួប​ជាមួយ​ប្រជាពលរដ្ឋ​ខ្មែរ រស់នៅ​អឺរ៉ុប​។​

៩៦- កម្ពុជា ស្នើ​ឥណ្ឌា ព​ន្លឿ​ន​ដំណើរ​ការចុះ​កិច្ចព្រមព្រៀង​ពាណិជ្ជកម្ម​សេរី​ទ្វេភាគី

​ក្នុងឱកាស​ទទួល​ជួបពិភាក្សា​ការងារ​ជាមួយ​ឯកឧត្តម ណារិន​ដ្រា ម៉ូ​ឌី (Narendra Modi) នាយករដ្ឋមន្ត្រី​ឥណ្ឌា តាមរយៈ​ប្រព័ន្ធ​វីដេអូ ពី​ភូមិគ្រឹះ​ក្រុង​តាខ្មៅ ខេត្តកណ្តាល កាលពី​ល្ងាច​ថ្ងៃទី​១៨ ខែឧសភា​ម្សិលមិញ​នេះ សម្តេច​តេ​ជោ ហ៊ុន សែន នាយករដ្ឋមន្ត្រី​កម្ពុជា បានស្នើ​ឱ្យ​ឥណ្ឌា ព​ន្លឿ​ន​ការចុះ​កិច្ចព្រមព្រៀង​ពាណិជ្ជកម្ម​សេរី​រវាង​ប្រទេស​ទាំងពីរ ឱ្យបាន​ឆាប់ ដើម្បី​ជំរុញ​កំណើន​ពាណិជ្ជកម្ម ដែលជា​ប្រយោជន៍​រួម​រវាង​ប្រទេស​ទាំងពីរ​។ ក្នុងជំនួប​កាលពី​ម្សិលមិញ ថ្នាក់ដឹកនាំ​ប្រទេស​ទាំងពីរ កម្ពុជា​-​ឥណ្ឌា ក៏បាន​ពិភាក្សា​បញ្ហា​ជាច្រើន​ទៀត ពាក់ព័ន្ធ​នឹង​ទំនាក់ទំនង​ទ្វេភាគី បញ្ហា​សមុទ្រ​ចិន​ខាងត្បូង បញ្ហា​មី​យ៉ាន់​ម៉ា បញ្ហា​រុស្សី និង​អ៊ុយ​ក្រែ​ន ក៏ដូចជា បញ្ហា​ពាក់ព័ន្ធ​ដទៃ​ផ្សេងទៀត ដែលជា​ប្រយោជន៍ និង​ជា​ក្តី​ព្រួយបារម្ភ​
​រួម​។​

៩៧- សម្តេច​តេ​ជោ ហ៊ុន សែន ជំរុញ​បណ្តា​ប្រទេស​អាស៊ាន និង BRICS ស្តារឡើងវិញ នូវ​ពហុភាគី​និយម ដើម្បី​រួមគ្នា​ដោះស្រាយ​បញ្ហា​ប្រឈម​នានា ទាំង​ក្នុង​តំបន់ និង​ពិភពលោក

​សម្តេច​តេ​ជោ ហ៊ុន សែន នាយករដ្ឋមន្ត្រី​កម្ពុជា បាន​ជំរុញ​ឱ្យ​បណ្តា​ប្រទេស​អាស៊ាន និង ប្រ៊ី​ក ស្តារឡើងវិញ​នូវ​ពហុភាគី​និយម ដើម្បី​រួមគ្នា​ដោះស្រាយ​បញ្ហា​ប្រឈម​នានា ខណៈដែល​ពិភពលោក កំពុងមាន​បញ្ហា​ប្រែប្រួល និង​ស្មុគស្មាញ​។ សម្តេច​តេ​ជោ​នាយករដ្ឋមន្ត្រី បាន​ថ្លែង​បែបនេះ នៅក្នុង​បទ​អន្តរាគមន៍ «​វេទិកា​លើក​ទី​២ នៃ​គណបក្សនយោបាយ ក្រុម​ស្រាវជ្រាវ និង​អង្គការ​សង្គម​ស៊ីវិល មកពី​បណ្តា​ប្រទេស​ប្រ៊ី​ក (BRICS) ក្រោម​មូលបទ «​សាមគ្គីភាព និង​កិច្ចសហប្រតិបត្តិការ ឆ្ពោះទៅរក​ការអភិវឌ្ឍ​រួម និង​អនាគត​ដ៏​ភ្លឺស្វាង​» ពីថ្ងៃ​ទី​១៩-២០ ខែឧសភា​។​

៩៨- សម្តេចនាយក​រដ្ឋមន្ត្រី ហ៊ុន សែន ផ្តល់​សុន្ទរកថា​គន្លឹះ​អំពី​ការយក​ឈ្នះ​លើ​សមរភូមិ​ប្រយុទ្ធប្រឆាំង​ជាមួយ​កូ​វីដ ១៩

​ក្នុង​សុន្ទរកថា​គន្លឹះ កាលពី​ថ្ងៃទី​២៣ ខែឧសភា ក្នុង​កម្មវិធី​បើក​សន្និបាត​ប្រចាំឆ្នាំ លើក​ទី​៧៨ របស់​គណៈកម្មការ​សេដ្ឋកិច្ច និង​សង្គមកិច្ច​សម្រាប់​អាស៊ី និង​ប៉ាស៊ីហ្វិក នៃ​អង្គការ​សហ​ប្រជា​តិ (UN ESCAP) សម្តេច​តេ​ជោ នាយករដ្ឋមន្ត្រី ហ៊ុន សែន បាន​គូសបញ្ជាក់ថា អាទិភាព​ចម្បង​នៃ​របៀបវារៈ​រួម​នៅក្នុង​តំបន់​អាស៊ី​និង​ប៉ាស៊ីហ្វិក ក៏ដូចជា​សកលលោក​ទាំ​ង​មូល នៅតែ​ផ្តោតលើ​ការយក​ឈ្នះ​លើ​សមរភូមិ​ប្រយុទ្ធ​នឹង​ជំងឺ​កូ​វីដ​-១៩ ដោយ​ប្រើប្រាស់​វ៉ាក់សាំង ជា​អាវុធ​យុទ្ធសាស្ត្រ​គន្លឹះ​។​

៩៩- ជំងឺ​អុត​ស្វា អាច​បង្ក​ជាការ​គំរាមកំហែង​ជាស​កល ខណៈ​មន្ត្រី​ជំនាញ បញ្ជាក់ថា កម្ពុជា​នៅ​មិនទាន់មាន​ជំងឺ​នេះ នៅឡើយ​ទេ

​អង្គការ​សុខាភិបាល​ពិភពលោក (WHO) បានប្រកាស​ពី​ការផ្ទុះ​ជំងឺ​អុត​ស្វា ដែលមាន​ប្រភពពី​ចក្រភព អង់គ្លេស ដោយ​បញ្ជាក់ថា ជំងឺ​នេះ អាចមាន​ការគំរាមកំហែង​សុខភាព​ជាស​កល​។ ការលើកឡើង​នេះ ធ្វើឡើង ក្នុង​កិច្ចប្រជុំ​បន្ទាន់​មួយ​របស់ WHO កាលពី​ថ្ងៃទី​២០ ខែឧសភា ឆ្នាំ​២០២២ បន្ទាប់ពី​មានការ​រាយការណ៍​ពី​ករណី​ឆ្លង​រាលដាល​ជំងឺ​អុត​ស្វា នៅក្នុង​សហគមន៍​មួយ ក្នុងប្រទេស​អង់គ្លេស ដោយ​មិនដឹង​ពី​ប្រភព​ច្បាស់លាស់​។ យ៉ាងណាក៏ដោយ មន្ត្រី​ជំនាញ​សុខាភិបាល​កម្ពុជា បាន​បញ្ជាក់ថា ជំងឺ​អុត​ស្វា នៅ​មិនទាន់មាន​វត្ត​មាននៅ​កម្ពុជា​នៅឡើយ​ទេ ប៉ុន្តែ​ទាមទារ​អោយ​ពលរដ្ឋ មាន​វិធានការ​ការពារ​អោយបាន​ហ្មត់ចត់​។​

១០០-​សម្តេច​តេ​ជោ ហ៊ុន សែន អញ្ជើញ​ចូលរួម​វេទិកា​សេដ្ឋកិច្ចពិភពលោក នៅ​ប្រទេស​ស្វី​ស

​កាលពី​ខែឧសភា សម្តេច​តេ​ជោ នាយករដ្ឋមន្ត្រី ហ៊ុន សែន បាន​អញ្ជើញ​ចូលរួម​វេទិកា​សេដ្ឋកិច្ចពិភពលោក ដា​វ៉ូស ឆ្នាំ​២០២២ នៅ​ប្រទេស​ស្វី​ស​។ វេទិកា​សេដ្ឋកិច្ចពិភពលោក ដា​វ៉ូស ឆ្នាំ​២០២២ បានកំណត់​របៀបវារៈ​សំខាន់ៗ ជាច្រើន ដូចជា បញ្ហា​អសន្តិសុខ​ថាមពល ទស្សនវិស័យ​សេដ្ឋកិច្ច​សកល បញ្ហា​សកលភាវូបនីយកម្ម និង​យុវជន ការមិនទុកចិត្ត និង​ប្រព័ន្ធ​សុខភាព​ពិភពលោក ជាដើម​។ យ៉ាងណាក៏ដោយ សង្គ្រាម​រវាង​រុស្ស៊ី និង​អ៊ុយ​ក្រែ​ន បាន​ក្លាយជា​ប្រធានបទ​សំខាន់​ទី​១ ក្នុង​វេទិកា​សេដ្ឋកិច្ចពិភពលោក ដា​វ៉ូស ឆ្នាំ​២០២២​នេះ​។

១០០១-​សម្តេច​តេ​ជោ ហ៊ុន សែន បង្ហាញ​ក្តីកង្វល់​ខ្លាំង ចំពោះ​សង្គ្រាម​របស់​រុស្ស៊ី លើ​អ៊ុយ​ក្រែ​ន ដែល​អាចឈាន​ទៅដល់​វិបត្តិ​ស្បៀងអាហារ​ជាស​កល

​ក្នុង​វេទិកា​សេដ្ឋកិច្ចពិភពលោក ដែល​ទើប​បិទ​បញ្ចប់ នៅ​ប្រទេស​ស្វី​ស កាលពី​ថ្ងៃទី​២៤ ខែឧសភា សម្តេច​តេ​ជោ នាយករដ្ឋមន្ត្រី ហ៊ុន សែន បានបង្ហាញ​ក្តីកង្វល់​ខ្លាំង សម្រាប់​ពិភពលោក និង​អាស៊ាន ចំពោះ​សង្គ្រាម​របស់​រុស្ស៊ី នៅ​ប្រទេស​អ៊ុយ​ក្រែ​ន​។ សម្តេច​តេ​ជោ បញ្ជាក់ថា វិបត្តិ​រុស្ស៊ី និង​អ៊ុយ​ក្រែ​ន មិន​ត្រឹមតែ​ជា​វិបត្តិ​ថាមពល​ប៉ុណ្ណោះ​ទេ តែ​នឹង​ប្រែ​ក្លាយទៅជា​វិបត្តិ​ស្បៀងអាហារ​ថែមទៀត​។​

១០២-​សម្តេច​តេ​ជោ ហ៊ុន សែន អំពាវនាវ​ដល់​ប្រជាពលរដ្ឋ និង​គ្រប់​គណបក្សនយោបាយ បន្តធ្វើ​សកម្មភាព​ឃោសនាបោះឆ្នោត ប្រកបដោយ​ភាពថ្លៃថ្នូរ

​កាលពី​ថ្ងៃទី​២៥ ខែឧសភា សម្តេច​តេ​ជោ ហ៊ុន សែន នាយករដ្ឋមន្ត្រី​នៃ​កម្ពុជា បានចេញ​សារ​សំឡេង​ជូន​ជនរួមជាតិ​ពី​ការបញ្ចប់​បេសកកម្ម​របស់​សម្តេច នៅ​ទីក្រុង​ដា​វ៉ូស ប្រទេស​ស្វី​ស និង​ត្រៀម​រៀបចំ​ធ្វើដំណើរ​ត្រឡប់​មកកាន់​មាតុភូមិ​វិញ​។ ក្នុង​សារ​ពិសេស​នេះ សម្តេច​តេ​ជោ បាន​គូសបញ្ជាក់​ពី​ដំណើរការ​នៃ​ការឃោសនាបោះឆ្នោត​ក្នុង​រយៈពេល​កន្លងមក​នេះ បាន​ប្រព្រឹត្តិ​ទៅ​យ៉ាង​ល្អប្រសើរ និង​មាន​អ​ព្យា​ក្រឹត្យ ភាព​ខាង​នយោបាយ​។ សម្តេច​តេ​ជោ ហ៊ុន សែន អំពាវនាវ​ដល់​ប្រជាពលរដ្ឋ និង​គ្រប់​គណបក្សនយោបាយ បន្តធ្វើ​សកម្មភាព​ឃោ​នា​បោះឆ្នោត ប្រកបដោយ​ភាពថ្លៃថ្នូរ និង​ចាស់ទុំ​ខាង​នយោបាយ​តទៅទៀត​។​

១០៣-​ដំណើរ​ទស្សនកិច្ច​បំពេញការងារ ៥​ថ្ងៃ នៅ​ប្រទេស​ស្វី​ស​របស់​សម្តេច​តេ​ជោ ហ៊ុន សែន បាន​បិទ​បញ្ចប់ ដោយ​ជោគជ័យ

​ដំណើរ​ទស្សនកិច្ច​បំពេញការងារ ៥​ថ្ងៃ​របស់​សម្តេច​តេ​ជោ ហ៊ុន សែន ដើម្បី​ចូលរួម​កិច្ចប្រជុំ​នៃ​វេទិកា​សេដ្ឋកិច្ចពិភពលោក នៅ​ប្រទេស​ស្វី​ស បាន​បិទ​បញ្ចប់​ដោយ​ជោគជ័យ​។ សម្តេច​តេ​ជោ នាយករដ្ឋមន្ត្រី​កម្ពុជា​បាន​ដឹកនាំ​គណៈប្រតិភូ​ជាន់ខ្ពស់ អញ្ជើញ​ធ្វើដំណើរ​វិលត្រឡប់ មកដល់​ប្រទេស​កម្ពុជា​វិញ ដោយ​សុវត្ថិភាព​ហើយ កាលពី​ព្រឹក​ថ្ងៃទី​២៦ ខែឧសភា​។

១០៤-​សម្តេច​តេ​ជោ ហ៊ុន សែន ចែករំលែក​ទស្សនៈ​សំខាន់ៗ ជុំវិញ​អនាគត​អាស៊ី ក្នុងស្ថានភាព​ពិភពលោក​បែកខ្ញែក

​សម្តេច​តេ​ជោ ហ៊ុន សែន នាយករដ្ឋមន្ត្រី​នៃ​កម្ពុជា និង​ជា​ប្រធាន​អាស៊ាន នៅ​ថ្ងៃទី​២៧ ខែឧសភា តាមរយៈ​សន្និសីទ​អន្តរជាតិ លើក​ទី​២៧ ស្តីពី «​អនាគត​របស់​អាស៊ី​» បាន​ចែករំលែក​ទស្សនៈ​សំខាន់ៗ​មួយចំនួន ដើម្បី​ធានាបាន​អនាគត​ល្អ​របស់​អាស៊ី ដែល​ទាមទារ​ឱ្យ​មេដឹកនាំ​បណ្តា​ប្រទេស​ក្នុង​តំបន់​អាស៊ី​ទាំងមូល ត្រូវមាន​គោលជំហរ​រួម គោរព​អធិបតេយ្យភាព និង​ឯករាជ្យភាព​គ្នា​ទៅវិញទៅមក អនុវត្តន៍​គោលការណ៍​ពហុភាគី​និយម ក៏ដូចជា រក្សា និង​ពង្រឹង​នូវ​ការឯកភាព និង​សាមគ្គីភាព និង​ធ្វើ​ការព្រម​គ្នា ជំរុញ​កិច្ចសហការ​ក្នុង​តំបន់ ជាដើម​។​

១០៥- រាជរដ្ឋាភិបាល​កម្ពុជា ប្រកាស​កែសម្រួល​បែងចែក​ដីធ្លី​នៅ​តំបន់​បឹង​ទន្លេសាប​ឡើងវិញ

​កាលពី​ថ្ងៃទី​២៧ ខែឧសភា សម្តេច​តេ​ជោ ហ៊ុន សែន ប្រមុខ​រាជរដ្ឋាភិបាល​កម្ពុជា បាន​អញ្ជើញ​ថ្លែង​សារ​ពិសេស ផ្សាយ​ផ្ទាល់​តាម​ទូរទស្សន៍​ជាតិ​កម្ពុជា បញ្ជាក់​ពី​ការកែសម្រួល​បែងចែក​ដី​ធ្លី នៅ​តំបន់​បឹង​ទន្លេសាប​ឡើងវិញ ដើម្បី​បង្កើន​ប្រសិទ្ធភាព​ក្នុងការ​គ្រប់គ្រង អភិរក្ស និង​ប្រគល់​ដី​ជូន​ពលរដ្ឋ​អាស្រ័យ​ផល​។ ការបែងចែក​ដីធ្លី​ឡើងវិញ នៅ​តំបន់​បឹង​ទន្លេសាប​នេះ នឹងត្រូវ​កំណត់​សាជាថ្មី តាមរយៈ​អនុក្រឹត្យ ដោយមាន​ការបោះបង្គោល​កំណត់​ឡើងវិញ ភ្ជាប់​ជាមួយនឹង​វិធានការ​ស្តារ​ទឹក​បឹង​ឡើងវិញ​។

១០៦-​គណៈកម្មការ​ជាតិ​ប្រយុទ្ធ​នឹង​ជំងឺ​កូ​វីដ​១៩ ចែកចាយ​ឱសថ PAXLOVID ព្យាបាល​កូ​វីដ​១៩ សម្រាប់​អាយុ ១២​ឆ្នាំ​ឡើង

​កាលពី​ថ្ងៃទី​៣០ ខែឧសភា ក្រុមការងារ​ចំពោះ​កិច្ច​គ្រប់គ្រង បែងចែក និង​ផ្គត់ផ្គង់​ឱសថ​យុទ្ធសាស្ត្រ សម្រាប់​ប្រយុទ្ធ​នឹង​ជំងឺ​កូ​វីដ​១៩ បានប្រកាសថា ចាប់ពី​ថ្ងៃទី​៣០​ឧសភា ឆ្នាំ​២០២២ ក្រុមការងារ នឹង​ចែកចាយ​បន្ថែម​នូវ​ឱសថ PAXLOVID (​ផាក​ឡូ​វីដ​) សម្រាប់​ព្យាបាល​ជំងឺ​កូ​វីដ​១៩ ចំពោះ​មនុស្ស​អាយុ​ចាប់ពី ១២​ឆ្នាំ​ឡើងទៅ​។ ការផ្សព្វផ្សាយ​នេះ បានធ្វើ​ឡើង ខណៈដែល​ជំងឺ​កូ​វីដ​១៩ នៅ​កម្ពុជា មិនមាន​អ្នក​ឆ្លង​សោះ ជិត ១​ខែ​មកហើយ​។​

១០៧- កម្ពុជា សម្រេច​ទិញ​ថ្នាំ​វ៉ាក់សាំង​ផលិត​ក្នុងស្រុក ជាង ១០៤​លាន​ដូ​ស សម្រាប់​ប្រើប្រាស់ ៣​ឆ្នាំ ពី​ឆ្នាំ​២០២៤-២០២៦

​ក្នុង​សារ​ជា​សំឡេង​ពិសេស​ជូន​ជនរួមជាតិ កាលពី​ព្រលប់​ថ្ងៃទី​១ ខែមិថុនា សម្តេច​តេ​ជោ នាយករដ្ឋមន្ត្រី ហ៊ុន សែន បានប្រកាស​ពី​ការសម្រេច​របស់​រាជរ​ដ្ឋា​ភិ​បាល បញ្ជា​ទិញ​ថ្នាំ​វ៉ាក់សាំង បង្ការ​ជំងឺ​កូ​វីដ​១៩ ដែល​ផលិត​ក្នុងស្រុក ចំនួន​ជាង ១០៤​លាន​ដូ​ស សម្រាប់​តម្រូវការ​ប្រើប្រាស់ ៣​ឆ្នាំ គឺ​នៅ​ឆ្នាំ​២០២៤ ដល់​ឆ្នាំ​២០២៦​។ សម្តេច​តេ​ជោ ហ៊ុន សែន បញ្ជាក់ថា ទោះជា​កម្ពុជា​យើង មិនមាន​អ្នក​ឆ្លង និង​ស្លាប់​ដោយសារ​កូ​វីដ​១៩ យូរថ្ងៃ​មកហើយ​ក៏ដោយ តែ​កូ​វីដ មិនទាន់​ទៅណា​ឆ្ងាយ​ទេ​។ ជម្រើស​តែមួយ គឺ​សូម​ទៅ​ទទួល​ថ្នាំ​វ៉ាក់សាំង ដើម្បី​ការពារ​ខ្លួន គ្រួសារ និង​សហគមន៍​។​

១០៨-​កម្ពុ​ជាមាន​ករណី​សង្ស័យ​ជំងឺ​អុត​ស្វា ៦​ករណី តែ​ក្រោយ​ធ្វើតេស្ត​នៅ​មន្ទីរពិសោធន៍ គឺ​អវិជ្ជមាន​ទាំងអស់

​នាយកដ្ឋាន​ប្រយុទ្ធ​នឹង​ជំងឺឆ្លង (CDC) នៃ​ក្រសួងសុខាភិបាល បានប្រកាស កាលពី​ថ្ងៃទី​២ ខែមិថុនា ពី​ករណី​សង្ស័យ​ជំងឺ​អុត​ស្វា ៦​ករណី នៅ​កម្ពុជា​។ ករណី​សង្ស័យ​ជំងឺ​អុត​ស្វា ទាំ​អ ៦​ករណី ដែល​ក្នុងនោះ ៥​នាក់ ជា​មនុស្ស​ធំ និង​ម្នាក់​ជា​កូនក្មេង ស្ថិតក្នុង​ប្រទេស​កម្ពុជា ហើយ​មាន​រោគសញ្ញា ដូចជា កន្ទួល ពងបែក​លើ​ដៃ បាតដៃ​ជើង បាតជើង ឬ​លើ​មុខ និង​គ្រុនក្តៅ ជាដើម​។ ក៏ប៉ុន្តែ​ជា​លទ្ធផល គឺ​អវិជ្ជមាន​ទាំងអស់ ក្រោយ​ធ្វើតេស្ត​នៅ​មន្ទីរពិសោធន៍​។​

១០៩- គ​.​ជ​.​ប ប្រកាសថា ការបោះឆ្នោត​ជ្រើសរើស​ក្រុមប្រឹក្សាឃុំ​សង្កាត់ កាលពី​ថ្ងៃទី​៥​មិថុនា មាន​ពលរដ្ឋ​ចូលរួម​បោះឆ្នោត​ជាង ៧​លាន​នាក់

​ការបោះឆ្នោត​ជ្រើសរើស​ក្រុមប្រឹក្សាឃុំ​សង្កាត់ អាណត្តិ​ទី​៥ ឆ្នាំ​២០២២ កាលពី​ថ្ងៃអាទិត្យ ទី​៥ ខែមិថុនា ត្រូវ​បានគ​.​ជ​.​ប ប្រកាសថា មាន​ប្រជាពលរដ្ឋ បាន​ទៅ​បោះឆ្នោត​ជាង ៧​លាន​នាក់ ស្មើនឹង​ជាង ៨០% ក្នុងចំណោម​អ្នក​ដែលមាន​ឈ្មោះ​ក្នុង​បញ្ជី​ឈ្មោះ​បោះឆ្នោត សរុប​ជាង ៩​លាន ២០​ម៉ឺន​នាក់​។ ទន្ទឹមនឹងនេះ ដំណើរការ​នៃ​ការបោះឆ្នោត​ប្រព្រឹត្ត​ឃុំ​សង្កាត់ កាលពី​ថ្ងៃអាទិត្យ នៅ​ទូទាំងប្រទេស ត្រូវបាន គជប គណបក្ស​ចូលរួម​ការបោះឆ្នោត និង​អ្នកសង្កេតការណ៍​ជាតិ​-​អន្តរជាតិ ប្រកាស​ដាច់ដោយឡែក​ពីគ្នា​ថា បាន​ប្រព្រឹត្តិ​ទៅដោយ​ល្អប្រសើរ ប្រកបដោយ​តម្លាភាព និង​ក្នុង​បរិយាកាស សេរី ត្រឹមត្រូវ និង​យុត្តិធម៌​។ ប៉ុន្តែ​គណបក្ស​ភ្លើងទៀន និង​គណបក្ស​ប្រជាធិបតេយ្យ​មូលដ្ឋាន បានលើកឡើង​ពី​ភាពមិនប្រក្រតី​មួយចំនួន ក្នុងពេល​បោះឆ្នោត​។ ប៉ុន្តែ​គណបក្ស​ទាំងពីរ​នេះ បានប្រកាស​ទទួលយក​លទ្ធផល​បោះឆ្នោត​ឃុំ​សង្កាត់ កាលពី​ថ្ងៃទី​៥​មិថុនា ដោយ​គ្មាន​ការប្រមូលផ្តុំ​អ្នកគាំទ្រ ធ្វើបាតុកម្ម​តវ៉ា​អ្វី​ឡើយ​។​

១១០- អ្នកសង្កេតការណ៍​អន្តរជាតិ ប្រមាណ ២០​ស្ថាប័ន​ធំៗ វាយតម្លៃថា ការបោះឆ្នោត​នៅ​កម្ពុជា មាន​យុត្តិធម៌ សន្តិភាព អហឹ​ង្សា និង​គោរព​តាម​ក្បួនច្បាប់​អន្តរជាតិ​

​អ្នកសង្កេតការណ៍​អន្តរជាតិ​ប្រមាណ ២០​ស្ថាប័ន​ធំៗ នៅ​ថ្ងៃទី​៦ ខែមិថុនា​នេះ បានរួម​គ្នា ធ្វើ​សន្និសីទ​សារព័ត៌មាន បញ្ជាក់​ជំហរ​របស់ខ្លួន ជុំវិញ​ការបោះឆ្នោត​ក្រុមប្រឹក្សាឃុំ​សង្កាត់ នៅ​កម្ពុជា កាលពី​ថ្ងៃទី​៥ ខែមិថុនា​ម្សិលមិញ​ថា បាន​បិទ​បញ្ចប់​ដោយ​ជោគជ័យ ក្រោម​បរិយាកាស​ជារួម មាន​យុត្តិធម៌ សន្តិភាព អហិង្សា និង​គោរព​តាម​ក្បួនច្បាប់​អន្តរជាតិ​។​

១១១-​សម្តេច​ពិជ័យ​សេនា ទៀ បាញ់ ធានា​អះអាងថា មូលដ្ឋានទ័ព​សមុទ្រ​រាម មិន​បង្ក​ការគំរាមកំហែង​ដល់​ប្រទេស​ណាមួយ​ទេ ហើយក៏​មិនមែន​ឱ្យ​ចិន​ប្រើប្រាស់​ផ្តាច់មុខ​នោះដែរ

​កាលពី​ព្រឹក​ថ្ងៃទី​៨ ខែមិថុនា សម្តេច​ពិជ័យ​សេនា ទៀ បាញ់ ឧបនាយករដ្ឋមន្ត្រី រដ្ឋមន្ត្រី​ក្រសួងការពារជាតិ និង​ឯកឧត្តម វ៉ាង វិ​ន​ធាន ឯកអគ្គរដ្ឋទូត​ចិន​ប្រចាំ​កម្ពុជា បាន​អញ្ជើញ​បើក​ការដ្ឋាន​សាងសង់​រោង​ជាង​ជួសជុល​នាវា ២​គ្រឿង ផែ​សំចត និង​ស្តារ​ឃ្លង នៅ​មជ្ឈមណ្ឌល​ទំនើបកម្ម​មូលដ្ឋាន​សមុទ្រ​រាម​។ ក្នុង​ពិធី​នោះ សម្តេច​ពិជ័យ​សេនា ទៀ បាញ់ ឧបនាយករដ្ឋមន្ត្រី រដ្ឋមន្ត្រី​ក្រសួងការពារជាតិ បាន​អះអាងថា មូលដ្ឋានទ័ព​សមុទ្រ​រាម មិនមែន​ប្រគល់ឱ្យ​ចិន​ប្រើប្រាស់​ផ្តាច់មុខ ដូច​ការចោទប្រកាន់​នោះទេ​។ សម្តេច​ប្រមុខ​ការពារជាតិ ក៏​ធានាថា ការបង្កើន​សមត្ថភាព​មូលដ្ឋានទ័ព​សមុទ្រ​រាម គឺ​គ្មាន​ចេតនា បង្ក​ការគំរាមកំហែង​ដល់​ប្រទេស​ណាមួយ​នោះទេ​។​

១១២- ប្រមុខ​ការទូត​កម្ពុជា ច្រានចោល​ការចោទប្រកាន់​អំពី​មូលដ្ឋាន​កងទ័ពជើងទឹក​រាម

​ពាក់ព័ន្ធ​នឹង​ការកែលំអ​មូលដ្ឋាន​កង​ទ័ពជើងទឹក​រាម នាពេលនេះ ប្រមុខ​ការទូត​កម្ពុជា ឯកឧត្តម ប្រាក់ សុខុន បានបញ្ជាក់​ជាថ្មី​ថា ការកែលំអ​មូលដ្ឋាន​ក​ង​ទ័ពជើងទឹក​រាម​នេះ គឺធ្វើឡើង ដើម្បី​ពង្រឹងសមត្ថភាព​កងទ័ព​ជើង​ទឹក​របស់​កម្ពុជា ដើម្បី​ការពារ​បូរណភាព​ដែនសមុទ្រ​របស់ខ្លួន និង​ដើម្បី​ប្រយុទ្ធ​ប្រឆាំងនឹង​ឧក្រិដ្ឋកម្ម​តាម​ដែនសមុទ្រ​ប៉ុណ្ណោះ​។ មិនមែន​អនុ​ញ្ញ​ត​ឱ្យមាន​មូលដ្ឋាន ឬ​វត្តមាន​កងទ័ព​បរទេស នៅលើ​ទឹកដី​កម្ពុជា​នោះឡើយ​។ ប្រមុខ​ការទូត​កម្ពុជា បានលើកឡើង​ដូច្នេះ ក្នុងពេល​ជួប​សន្ទនា​តាម​ទូរស័ព្ទ ជាមួយ​រដ្ឋមន្ត្រីការបរទេស​ថ្មី​របស់​អូស្ត្រាលី កាលពី​ថ្ងៃទី​៧​មិថុនា​។​

១១៣-​យុទ្ធនា​ការចាក់​វ៉ាក់សាំង​កូ​វីដ​១៩ ដូ​ស​ទី​៥ ចាប់ផ្តើម​ចាក់​ជូន​ក្រុមមន្ត្រី​រដ្ឋាភិបាល និង​មន្ត្រី​ជួរមុខ នា​ព្រឹក​ថ្ងៃទី​៩​មិថុនា​នេះ

​កាលពី​ព្រឹក​ថ្ងៃទី​៩​មិថុនា គណៈកម្មការ​ចំពោះ​កិច្ច ចាក់​វ៉ាក់សាំង​កូ​វីដ​១៩ ក្នុង​ក្របខណ្ឌ​ទូទាំងប្រទេស បានចាប់ផ្តើម​យុទ្ធនា​ការចាក់​វ៉ាក់សាំង​កូ​វីដ​១៩ ដូ​ស​ទី​៥ ជូន​ដល់​ក្រុមមន្ត្រី​រាជរដ្ឋាភិបាល និង​មន្ត្រី​ជួរមុខ​។ ការចាក់​វ៉ាក់សាំង ដូ​ស​ទី​៥ នាពេលនេះ បាន​ធ្វើឡើង​ខណៈដែល​ស្ថានភាព​ជំងឺ​កូ​វីដ​១៩ នៅ​កម្ពុជា​យើង លែងមាន​អ្នក​ឆ្លង និង​មិនមាន​អ្នកស្លាប់ ប្រមាណ ១​ខែ​មកហើយ​។​

១១៤- ក្រសួងសុខាភិបាល ណែ​នាំឱ្យ​ពលរដ្ឋ ការពារ​ការចម្លង​ជំងឺ​ពងបែក​ដៃជើង និង​ក្នុង​មាត់ លើ​កុមារ​តូចៗ

​កាលពី​ថ្ងៃទី​៩ ខែមិថុនា ក្រសួងសុខាភិបាល បាន​ណែនាំ​ឱ្យ​ប្រជាពលរដ្ឋ ការពារ​ការចម្លង​ជំងឺ​ពងបែក​ដៃជើង និង​ក្នុង​មាត់​លើ​កុមារ​តូចៗ​។ សេចក្តីណែនាំ​នេះ បានធ្វើ​ឡើង បន្ទាប់ពី​ជំងឺ​ពងបែក​ដៃជើង និង​ក្នុង​មាត់ ត្រូវបាន​រកឃើញថា បាន​កើតឡើង​រប៉េះរប៉ោះ នៅតាម​បណ្តា​ខេត្ត​មួយចំនួន​។​

១១៥- សម្តេច​តេ​ជោ ហ៊ុន សែន ប្រតិកម្ម​ចំពោះ​ការចោទប្រកាន់​អំពី​ការ​លួច​សន្លឹកឆ្នោត

​កាលពី​ព្រឹក​ថ្ងៃទី​១៣ ខែមិថុនា សម្តេច​តេ​ជោ ហ៊ុន សែន នាយករដ្ឋមន្ត្រី​កម្ពុជា បាន​អញ្ជើញ​ជា​អធិបតី​ដ៏​ខ្ពង់ខ្ពស់​ក្នុង​ពិធី​ចែក​សញ្ញាបត្រ​ជូន​ដល់​សិស្សសាលា​ភូមិន្ទ​រដ្ឋបាល ជាង ២​ពាន់​នាក់​។ ក្នុង​ពិធី​នៅ​មជ្ឈមណ្ឌល​ជ្រោយចង្វារ សម្ដេច​តេ​ជោ ហ៊ុន សែន បាន​មានប្រសាសន៍​ប្រមាណ ២​ម៉ោង​កន្លះ ដោយ​ផ្តោតលើ​បញ្ហាសំខាន់​ជាច្រើន រួមមាន បញ្ហា​ពាក់ព័ន្ធ​នឹង​កូ​វីដ​១៩ បញ្ហា​សេដ្ឋកិច្ច រឿងរ៉ាវ​វិវឌ្ឍន៍​ថ្មីៗ​ក្នុង​តំបន់ និង​ពិភពលោក ក៏ដូចជា​ការផ្ដល់​នូវ​អនុសាសន៍​គន្លឹះ​មួយចំនួន ដល់​និស្សិត ដែល​ទទួលបាន​ជោគជ័យ​ក្នុងការ​សិក្សា​ផងដែរ​។ សម្តេច​តេ​ជោ ហ៊ុន សែន ក៏បាន​បញ្ចេញ​ប្រតិកម្ម​ចំពោះ​ការចោទប្រកាន់​អំពី​ការ​លួច​សន្លឹកឆ្នោត​ផងដែរ​។

១១៦-​គ​.​ជ​.​ប ត្រួតពិនិត្យ និង​ផ្ទៀងផ្ទាត់​លទ្ធផល​បោះឆ្នោត​ឃុំ​សង្កាត់

​ក្រោយពី​ទទួលបាន​សម្ភារ និង​ឯកសារ​ពាក់ព័ន្ធ​ពី​គណៈកម្មការ​រាជធានី​ខេត្ត​រៀបចំ​ការបោះឆ្នោត (​គ​ធ​.​ខ​ប​) ទាំង ២៥ នៅ​ព្រឹក​ថ្ងៃទី​១៣ ខែមិថុនា​នេះ គណៈកម្មាធិការ​ជាតិ​រៀបចំ​ការបោះឆ្នោត (​គជប​) បានចាប់ផ្តើម​ត្រួតពិនិត្យ និង​ផ្ទៀងផ្ទាត់​ឡើងវិញ នូវ​លទ្ធផល​នៃ​ការបោះឆ្នោត​តាម​ឃុំ​សង្កាត់​ទាំងអស់​។ ការពិនិត្យ​ផ្ទៀងផ្ទាត់​នេះ ធ្វើឡើង​នៅ​ទីស្តីកា​រគ​.​ជ​.​ប ស្ថិតនៅក្រោម​ក្រសែភ្នែក​តំណាង​គណបក្សនយោបាយ អ្នកសង្កេតការណ៍ និង​អ្នកសារព័ត៌មាន​។

១១៧-​សម្តេច​តេ​ជោ ហ៊ុន សែន ប្រកាស​ដំឡើង​ប្រាក់បៀវត្សរ៍​មន្ត្រីរាជកា​រ និង​កងកម្លាំងប្រដាប់អាវុធ ចាប់ពី​ខែមករា ឆ្នាំ​២០២៣ ខាងមុខ

​កាលពី​ថ្ងៃទី​១៤ ខែមិថុនា សម្តេច​តេ​ជោ ហ៊ុន សែន នាយករដ្ឋមន្ត្រី​កម្ពុជា បានប្រកាស​ពី​កាលបរិច្ឆេទ​ជាក់លាក់ ក្នុង​ការដំឡើងប្រាក់បៀវត្សរ៍ ជូន​មន្ត្រីរាជការ និង​កងកម្លាំងប្រដាប់អាវុធ គឺធ្វើឡើង​នៅ​ដើមខែ​មករា ឆ្នាំ​២០២៣ ខាងមុខ​។ នៅ​ដើមឆ្នាំ​២០២៣​ខាងមុខ គ្រូបង្រៀន និង​គ្រូពេទ្យ អាច​នឹងត្រូវ​ដំឡើង​ប្រាក់​ប្រៀ​វត្សរ៍ ពី​ប្រមាណ​ជាង ១​លាន ២​សែន ទៅដល់ ១​លាន ៥​សែន​រៀល គ្រា​ដែល​មន្ដ្រី​ដទៃទៀត អាច​នឹងត្រូវ​ដំឡើង​ដូចគ្នា ពី​ប្រមាណ​ជាង ១​លាន ១​សែន ទៅ​ប្រមាណ ១​លាន ៤​សែន​រៀល​។​

១១៨- គណបក្ស​ប្រជាជន​កម្ពុជា ដាក់ពាក្យ​បណ្តឹង​ជា​ផ្លូវការ ប្តឹង​លោក សុន ឆ័យ ពាក់ព័ន្ធ​នឹង​ការបោះឆ្នោត​ឃុំ​សង្កាត់

​កាលពី​ថ្ងៃទី​១៤ ខែមិថុនា គណបក្ស​ប្រជាជន​កម្ពុជា តាមរយៈ​លោក​មេធាវី គី តិច បានដាក់​ពាក្យបណ្តឹង ជា​ផ្លូវការ ទៅកាន់​តុលាការ​សាលាដំបូង​រាជធានី​ភ្នំពេញ ប្តឹង​ឱ្យ​តុលាការ ផ្តន្ទាទោស និង​ទារ​សំណង​ជំងឺ​ចិ ត្ត​ចំនួន ១​លាន​ដុល្លារ ពី​លោក សុន ឆ័យ អនុប្រធាន​គណបក្ស​ភ្លើងទៀន ពាក់ព័ន្ធ​នឹង​អ្វីដែល​បក្ស​ប្រជាជន​កម្ពុជា​អះអាងថា ជាការ​ចោទ និង​បំភ្លៃ​ព័ត៌មាន ជុំវិញ​ដំណើរការ​បោះឆ្នោត​ជ្រើសរើស​ក្រុមប្រឹក្សាឃុំ​សង្កាត់​កន្លង ទៅ​តាមរយៈ​សារព័ត៌មាន ឌឹ ខែម​បូ​ឌា ដេលី​។ នោះ​គឺ​លោក សុន ឆ័យ លើកឡើងថា ការបោះឆ្នោត​ឃុំ​សង្កាត់ កាលពី​ថ្ងៃទី​៥ ខែមិថុនា​កន្លងមក មិន​ត្រឹមត្រូវ និង​មិន​យុត្តិធម៌ ហើយ​មិន​ឆ្លុះបញ្ចាំង​ពី​ឆន្ទៈ​ប្រជាពលរដ្ឋ​ឡើយ​។​

១១៩- គជប បញ្ចប់​ដំណើរការ​ត្រួតពិនិត្យ និង​ផ្ទៀងផ្ទាត់​លទ្ធផល​បោះឆ្នោត​ឃុំ​សង្កាត់

​គ​.​ជ​.​ប បានបញ្ចប់​ដំណើរការ​ត្រួតពិនិត្យ និង​ផ្ទៀងផ្ទាត់​លទ្ធផល​បោះឆ្នោត​ឃុំ​សង្កាត់ បន្ទាប់ពី​ចំណាយ​អស់​រយៈពេល ២​ថ្ងៃ គឺ​នៅ​ថ្ងៃទី​១៣ និង​ថ្ងៃទី​១៤ ខែមិថុនា​នេះ​។ តាម​ការត្រួតពិនិត្យ និង​ផ្ទៀងផ្ទាត់​ដោយ​ក្រុមមន្ត្រី​ជំនាញ​រួចមក គ​.​ជ​.​ប ប្រកាសថា លទ្ធផល​បោះឆ្នោត​ឃុំ​សង្កាត់ ថ្ងៃ​៥​មិថុនា ដែល​គ​.​ជ​.​ប ប្រកាស​ជា​បណ្តោះអាសន្ន កន្លងមក គឺមាន​ភាពត្រឹមត្រូវ​។​

១២០-​សម្ដេច​តេ​ជោ ហ៊ុន សែន បង្ហាញ​ស្នាមញញឹម​លើក​ពានមាស និង​ប្រកាស​ផ្ដួចផ្ដើម​ឱ្យ​អាស៊ាន ដេញថ្លៃ ធ្វើ​ម្ចាស់ផ្ទះ រៀបចំ​ព្រឹត្តិការណ៍​បាល់ទាត់​ពិភពលោក

​សម្ដេច​តេ​ជោ ហ៊ុន សែន នាយករដ្ឋមន្ត្រី​កម្ពុជា នៅ​ថ្ងៃទី​១៥ ខែមិថុនា ឆ្នាំ​២០២២ បានបង្ហាញ​មោទកភាព និង​ស្នាមញញឹម​ដ៏​ស្រស់ស្រាយ លើក​ពានមាស​បាល់ទាត់​ពិភពលោក FIFA ដែល​បាន​ប្រារព្ធ​ពិធី​ដង្ហែ​ឆ្លងកាត់​កម្ពុជា​។ ជាមួយនឹង​ការលើកទឹកចិត្ត និង​គាំទ្រ​ការរៀបចំ​ព្រឹត្តិការណ៍​កីឡាបាល់ទាត់​ពិភពលោក នៅ​ប្រទេស កាតា នា​ឆ្នាំ​២០២២ នេះ សម្ដេច ហ៊ុន សែន ប្រធាន​អាស៊ាន ក៏បាន​ប្រកាស​គំនិត​ផ្ដួចផ្ដើម ឱ្យ​រដ្ឋ​ជា​សមាជិក​អាស៊ាន រៀបចំ​ធ្វើការ​ដេញថ្លៃ ធ្វើជា​ម្ចាស់ផ្ទះ រៀបចំ​ការប្រកួត​បាល់​ទាត់​ពិភពលោក នៅពេល​ខាងមុខ​ផងដែរ​។

១២១- ប្រជាពលរដ្ឋ ចូល​ទស្សនា និង​ថតរូប​ជាមួយ​ពានរង្វាន់​បាល់ទាត់​ពិភពលោក ដោយ​សេរី នៅ​ពហុ​កីឡដ្ឋាន​ជាតិ​មរតក​តេ​ជោ

​បន្ទាប់ពី​ដង្ហែ​មកដល់​រាជធានី​ភ្នំពេញ កាលពី​ព្រឹក​ថ្ងៃទី​១៥ ខែមិថុនា ពានរង្វាន់​បាល់ទាត់​ពិភពលោក ( FIFA WORLD CUP) ត្រូវ​បានដាក់​បង្ហាញ​មហាជន ចូល​ទស្សនា​ដោយ​សេរី ហើយ​ប្រជាពលរដ្ឋ និង​យុវជន​-​យុវនារី អ្នក​ស្នេហា​វិស័យ​កីឡាបាល់ទាត់​ទាំងអស់ ក៏​អាច​ថតរូប​ជាមួយ​ពានរង្វាន់​ពិភពលោក​នេះ នៅឯ​ពហុ​កីឡដ្ឋាន​ជាតិ​មរតក​តេ​ជោ ចាប់ពី​រសៀល ១ ដល់​ម៉ោង ១០​យប់ នា​ថ្ងៃទី​១៥ ខែមិថុនា ផងដែរ​។​

១២២- សម្តេច​តេ​ជោ ហ៊ុន សែន ប្រកាស​ជាថ្មី ចំពោះមុខ​នាយករដ្ឋមន្ត្រី និង​ថ្នាក់ដឹកនាំ​វៀតណាម ពី​ការមិន​ប្រគល់​ដី​ឱ្យ​វៀតណាម សូម្បី ១​មី​លី​ម៉ែត្រ

​ក្នុងឱកាស​អញ្ជើញ​ចូលរួម​អបអរសាទរ ខួប​លើក​ទី ៤៥​ឆ្នាំ​ដំណើរ​ឆ្ពោះទៅ​ផ្តួលរំលំ​របប​ខ្មែរក្រហម នៅ​ថ្ងៃទី​២០ ខែមិថុនា​នេះ សម្តេច​តេ​ជោ ហ៊ុន សែន នាយករដ្ឋមន្ត្រី​កម្ពុជា បានប្រកាស​ជា​ផ្លូវការ នៅ​ចំពោះមុខ​នាយករដ្ឋមន្ត្រី និង​ថ្នាក់ដឹកនាំ​វៀតណាម​ថា សម្តេច នឹងមិន​ប្រគល់​ដី​ឱ្យ​វៀតណាម សូម្បី ១​មី​លី​ម៉ែត្រ​។ ទន្ទឹមនឹងនេះ សម្តេច​តេ​ជោ ហ៊ុន សែន ក៏បាន​លើកឡើងថា កម្ពុជា​ក៏​មិន​ចង់បាន​ដី​ពី​វៀតណាម​ដូចគ្នា​ដែរ ។ សម្តេចនាយក​រដ្ឋមន្ត្រី​កម្ពុជា ប្រកាស​បន្ត​រក្សា​កិច្ចសហការ​ល្អ ជាមួយ​វៀតណាម​ពិសេស​ការបង្កើត​តំបន់​ព្រំដែន​ជា​តំបន់​សន្តិភាព និង​ការអភិវឌ្ឍន៍ ដោយ​ក្នុងនោះ តំបន់​យោធា​តេ​ជោ​កោះ​ថ្ម X16 ដែលមាន​ព្រំប្រទល់​ជាប់​នឹង​ខេត្ត​ប៉ិ​ញ​ភឿ​ក របស់​វៀតណាម ក៏​គ្រោង​នឹង​អភិវឌ្ឍ៍​ជា​តំបន់​សេដ្ឋកិច្ច​ពិសេស​ពហុ​បំណង់ ផងដែរ នៅពេល​ខាងមុខ​។

១២៣- សម្តេច​ក្រឡាហោម ស ខេង ស្នើ​ក្រុមប្រឹក្សាឃុំ សង្កាត់ ដែល​ឈ្នះឆ្នោត កុំ​ឌឺដង​អ្នកចាញ់​ឆ្នោត

​ក្នុងឱកាស​អញ្ជើញ​ជា​អធិបតី ក្នុង​ពិធីបុណ្យ​បញ្ចុះ​ខណ្ឌសីមា​ព្រះវិហារ វត្ត​ពោធិ​រង្សី ហៅ វត្ត​ត្រពាំង​ទទឹម ស្ថិត​ក្នុងភូមិ​ត្រពាំង​ទឹម ឃុំ​ព្រាល ស្រុក​កញ្ជ្រៀច ខេត្តព្រៃវែង កាលពី​ថ្ងៃអាទិត្យ ទី​១៩ ខែមិថុនា សម្ដេច​ក្រឡាហោម ស ខេង មានប្រសាសន៍ថា ក្រុមប្រឹក្សាឃុំ​សង្កាត់ ដែល​ឈ្នះ​ការបោះឆ្នោត​ត្រូវ​សងគុណ​ប្រជាពលរដ្ឋ ព្រោះ​ម្ចាស់​សិទ្ធិ ម្ចាស់​អំណាច​ឱ្យ​យើង ធ្វើ​មេឃុំ​នេះ គឺ​ពលរដ្ឋ​។ ដូច្នេះ​ត្រូវ​បម្រើ​ពួកគាត់​ឱ្យ​អស់ពី​លទ្ធភាព​។ សម្តេច​ក៏បាន​ណែនាំ​ដល់​ក្រុមប្រឹក្សាឃុំ​សង្កាត់ ដែល​ឈ្នះ​ការបោះឆ្នោត កុំ​អួតអាង និង​កុំ​ឌឺដង​អ្នក​ចាញ់ឆ្នោត ដែល​សម្តេច ចាត់ទុក​ទង្វើ​នេះ​ថា គ្មាន​បាន​ប្រយោជន៍​នោះទេ​។​

១២៤-​អង្គការ​សម្ព័ន្ធ​ពិភព​ឥស្លាម ចាត់ទុក​កម្ពុជា ជា​ប្រទេស​សន្តិ​សហ​វិជ្ជមាន​ខាង​សាសនា

​អង្គការ​សម្ព័ន្ធ​ពិភព​ឥស្លាម តាមរយៈ​អគ្គលេខាធិការ លោក​បណ្ឌិត មហាម៉ាត់ អាប់​ឌុល​ការី​ម អាល់​អ៊ី​សា បានចាត់ទុក​ប្រទេស​កម្ពុជា ជា​ប្រទេស​គំរូ​មួយ​លើ​ពិភពលោក ដែល​ផ្តល់​សេរីភាព​គ្រប់គ្រាន់ សម្រាប់​ពលរដ្ឋ​គោរព​ជំនឿ​សាសនា​រៀងៗ​ខ្លួន ដោយ​មិន​ការ​រឹតត្បិត​។ លោក​បណ្ឌិត​អគ្គលេខាធិការ​អង្គការ​សម្ព័ន្ធ​ពិភព​ឥស្លាម បានលើកឡើង នៅ​ចំពោះមុខ​សម្តេច​តេ​ជោ ហ៊ុន សែន នាយករដ្ឋមន្ត្រី​កម្ពុជា កាលពី​ថ្ងៃទី​២១ ខែមិថុនា​ថា អង្គការ​សម្ព័ន្ធ​ពិភព​ឥស្លាម នឹង​យក​បទពិសោធន៍​ល្អៗ ពី​កម្ពុជា ទៅ​ចែករំលែក នៅតាម​វេទិកា​ផ្សេងៗ ជាមួយ​ថ្នាក់ដឹកនាំ​ដទៃទៀត​ផងដែរ​។​

១២៥- សម្ដេច​តេ​ជោ ហ៊ុន សែន ទទួល​ជួបពិភាក្សា​ការងារ​ជាមួយ​ឯកអគ្គរដ្ឋទូត​អាល្លឺម៉ង់ ចប់​អាណត្តិ​ការងារ​ការទូត​ពី​កម្ពុជា

​សម្ដេច​តេ​ជោ ហ៊ុន សែន នាយករដ្ឋមន្ត្រី កាលពី​ថ្ងៃទី​២១ ខែមិថុនា បាន​ជួបពិភាក្សា​ការងារ​ជាមួយ​ឯកឧត្តម Christian Berger ឯកអគ្គរដ្ឋទូត​អាល្លឺម៉ង់ ប្រចាំ​នៅ​កម្ពុជា ដែល​បានបញ្ចប់​អាណត្តិ​ការងារ​ការទូត​របស់​ខ្លួន ពី​ព្រះរាជាណាចក្រ​កម្ពុជា​។ ជំនួប​ពិភាក្សា​ការងារ កាលពី​ព្រឹក​មិញ​នេះ បានធ្វើ​ឡើង​នៅ​វិមាន​សន្តិភាព ក្នុង​រាជធានី​ភ្នំពេញ​។

១២៦- សម្តេច​តេ​ជោ ហ៊ុន សែន​៖ រាជរដ្ឋាភិបាល ចងចាំ​ជានិច្ច​នូវ​ការលះបង់ និង​គុណបំណាច់​របស់​អតីតយុទ្ធជន

​នៅក្នុង​ឱកាស​ខួប​លើក​ទី​១៥ ទិវា​អតីតយុទ្ធជន ថ្ងៃទី​២១ ខែមិថុនា ឆ្នាំ​២០២២ នេះ សម្តេច​តេ​ជោ ហ៊ុនសែន នាយករដ្ឋមន្ត្រី​នៃ​កម្ពុជា និង​ជា​ប្រធាន​សមាគម​អតីតយុទ្ធជន​កម្ពុជា បានចេញ​សារលិខិត ចូលរួម​អបអរសាទរ ដោយ​សម្តេច លើកឡើងថា ទាំង​រាជរដ្ឋាភិបាល ទាំង​ប្រជាជន​ទូទាំងប្រទេស នៅតែ​ចងចាំ​ជានិច្ច​នូវ​ការលះបង់ និង​គុណបំណាច់​ដ៏​ធំធេងរ​បស់បង​ប្អួ​ន​អតីតយុទ្ធជន​គ្រប់រូប ចំពោះ​ជាតិ​មាតុភូមិ​។​

១២៧-​សម្តេច​តេ​ជោ ហ៊ុន សែន ស្នើឱ្យ​ជប៉ុន បន្ត​ពង្រីក​បន្ថែមទៀត លើ​កិច្ចសហការ​ផ្នែក​យោធា​ជាមួយ​កម្ពុជា

​កាលពី​ថ្ងៃទី​២២ ខែមិថុនា សម្តេច​តេ​ជោ ហ៊ុន សែន នាយករដ្ឋមន្ត្រី​កម្ពុជា តាមរយៈ​រដ្ឋមន្ដ្រី​ការពារជាតិ​ជប៉ុន បានស្នើ​ឱ្យ​ជប៉ុន បន្ត​ពង្រឹងពង្រីក​កិច្ចសហការ​ផ្នែក​យោធា​បន្ថែមទៀត​ជាមួយ​កម្ពុជា​។ បើតាម​សម្តេចនាយក​រដ្ឋមន្ត្រី កិច្ចសហការ​រវាង​ប្រទេស​ទាំងពីរ ល្អប្រសើរ​ហើយ នាពេល​បច្ចុប្បន្ន តែ​សម្តេច​ចង់ឃើញ​កម្រិត​នៃ​សហប្រតិបត្តិការ​ផ្នែក​យោធា​រវាង​ប្រទេស​ទាំងពីរ កាន់តែ​ល្អប្រសើរ​មួយកម្រិត​ថែមទៀត ពិសេស​ការផ្លាស់ប្តូ​រទ​ស្សន​កិច្ច ការបណ្ដុះបណ្ដាល​នាយទាហាន​វ័យក្មេង លើ​ការងារ​មនុស្សធម៌ និង​សង្គ្រោះ​គ្រោះមហន្តរាយ ជាដើម​។​

១២៨-​សម្តេច​តេ​ជោ ហ៊ុន សែន អញ្ជើញ​ចូលរួម​កិច្ចប្រជុំ BRICS Plus ដែល​ចិន ធ្វើជា​ម្ចាស់ផ្ទះ

​សម្តេច​តេ​ជោ ហ៊ុន សែន នាយករដ្ឋមន្ត្រី​កម្ពុជា អញ្ជើញ​ចូលរួម​កិច្ចប្រជុំ «BRICS Plus» ដែល​រៀបចំ​ធ្វើ​នៅ​ទីក្រុង​ប៉េកាំង ប្រទេស​ចិន កាលពី​យប់​ថ្ងៃទី​២៤ ខែមិថុនា​។ នៅ​ចំពោះមុខ​មេដឹកនាំ​មក​ប្រទេស​ប្រេ​ស៊ី​ល រុស្ស៊ី ឥណ្ឌា អាហ្វ្រិក​ខាងត្បូង និង​ប្រទេស​កំពុងអភិវឌ្ឍន៍​មួយចំនួន​ផ្សេងទៀត សម្តេចនាយក​រដ្ឋមន្ត្រី​កម្ពុជា អញ្ជើញ​ថ្លែង​សុន្ទរកថា​គន្លឹះ ផ្តោតលើ​ការរួម​គ្នា​ស្តារ​សេដ្ឋកិច្ច​ទ្បើង​វិញ ក្រោយ​វិបត្តិ​កូ​វីដ​-១៩ ក៏ដូចជា​ការអនុវត្ត​ន៍​គោលការណ៍​ពហុភាគី​និយម និង​កិច្ចសហប្រតិបត្តិការ​អន្តរជាតិ ដោយ​ផ្អែកលើ​វិធាន​ច្បាប់ ជាដើម​។​

១២៩- ៩​គណបក្ស ជាប់ឆ្នោត នៅក្នុង​ការបោះឆ្នោត​ឃុំ​សង្កាត់ អាណត្តិ​ទី​៥ កាលពី​ថ្ងៃទី​៥​មិថុនា

​កាលពី​ថ្ងៃទី​២៤ ខែមិថុនា គ​.​ជ​.​ប បានប្រកាសថា ការបោះឆ្នោត​ជ្រើសរើស​ក្រុមប្រឹក្សាឃុំ​សង្កាត់ អាណត្តិ​ទី​៥ ដែល​បាន​បោះឆ្នោត កាលពី​ថ្ងៃទី​៥ ខែមិថុនា ឆ្នាំ​២០២២ មាន​គណបក្សនយោបាយ ចំនួន ៩ គណបក្ស បាន​ជាប់ឆ្នោត ទទួលបាន​អាសនៈ​នៅ​ក្រុមប្រឹក្សាឃុំ​សង្កាត់ ទូទាំងប្រទេស​។ ក្នុងនោះ គណបក្ស​ប្រជាជន​កម្ពុជា ទទួលបាន​ច្រើនជាងគេ រហូតដល់​ជាង ៩០០០​អាសនៈ បន្ទាប់មក​គណបក្ស​ភ្លើងទៀន ជាង ២០០០​អាសនៈ និង​តិចជាងគេ គឺ​គណបក្ស​កម្ពុជា​និយម និង​គណបក្ស​សំបុក​ឃ្មុំ​សង្គម​ប្រជាធិបតេយ្យ ទទួលបាន​ក្នុង​គណបក្ស​និ​មួយៗ តែ ១​អាសនៈ​ប៉ុណ្ណោះ​។​

១៣០-​បក្ស​កាន់អំណាច ប្រកាស​បន្ត​អនុវត្តន៍​គោលនយោបាយ​លើកកម្ពស់​ជីវភាព​ពលរដ្ឋ និង​មិន​ទុក​បក្សនយោបាយ​ផ្សេង ជាស​ត្រូវ​ឡើយ

​គណបក្ស​ប្រជាជន​កម្ពុជា បាន​ប្រារព្ធ​មេ​ទ្ទីង​រម្លឹក​ខួប ៧១​ឆ្នាំ ថ្ងៃ​បង្កើត​គណបក្ស​ប្រជាជន​កម្ពុជា ថ្ងៃទី​២៨ ខែមិថុនា ឆ្នាំ​១៩៥១​។ នៅក្នុង​ពិធី​ជួបជុំ កាលពី​ព្រឹក​ថ្ងៃទី​២៨ ខែមិថុនា នៅ​ទីស្នាក់ការ​កណ្តាល​គណបក្ស នា​វិមាន​៧​មករា សម្តេច​តេ​ជោ នាយករដ្ឋមន្ត្រី ហ៊ុន សែន បានប្រកាស​ជាថ្មី ក្នុងនាម​ប្រធាន​គណបក្ស​ដឹកនាំ​រាជរដ្ឋាភិបាល​ថា នឹង​បន្ត​អនុវត្តន៍ ដោយ​យកចិត្តទុកដាក់​នូវ​គោលនយោបាយ​នានា ដើម្បី​ធានា​រួមចំណែក កែប្រែ​កម្រិតជីវភាពរ​ស់​នៅ​របស់​ប្រជាពលរដ្ឋ​ខ្មែរ អោយ​កាន់តែ​ល្អប្រសើរ​។ ជាមួយនេះ សម្តេច​ប្រធាន​បក្ស​កាន់អំណាច ក៏​ប្រកាស​ផងដែរ​ថា នឹង​បន្ត​អនុវត្តន៍ អោយបាន​ខ្ជាប់ខ្ជួន​ដូចគ្នា​នូវ​គោលការណ៍​ប្រជាធិបតេយ្យ សេរី​ពហុបក្ស និង​នីតិរដ្ឋ ដោយ​មិន​ទុក​បក្សនយោបាយ​ណាមួយ ជាស​ត្រូវ​នោះឡើយ​។​

១៣១- ប្រមុខ​ការទូត​កម្ពុជា ធ្វើដំណើរ​ចាកចេញ​ពី​កម្ពុជា​ហើយ នៅ​ព្រឹក​នេះ ក្នុងនាម​ប្រេសិត​ពិសេស​របស់​ប្រធាន​អាស៊ាន ទៅ​បំពេញ​ទស្សនកិច្ច នៅ​មី​យ៉ាន់​ម៉ា

​ប្រមុខ​ការទូត​កម្ពុជា ឯកឧត្តម​ឧបនាយករដ្ឋមន្ត្រី ប្រាក់ សុខុន ក្នុងនាម​ប្រេសិត​ពិសេស​របស់​ប្រធាន​អាស៊ាន កាលពី​ថ្ងៃទី​២៩ ខែមិថុនា បាន​អញ្ជើញ​ធ្វើដំណើរ​ចាកចេញ​ពី​កម្ពុជា ដើម្បី​ទៅ​បំពេញ​ទស្សនកិច្ច នៅ​មី​យ៉ាន់​ម៉ា​។ ដំណើរ​ទស្សនកិច្ច​រប​ស់​ឯកឧត្តម​ឧបនាយករដ្ឋមន្ត្រី ប្រាក់ សុខុន នៅ​ប្រទេស​មី​យ៉ាន់​ម៉ា ជា​លើក​ទី​២ នេះ ត្រូវបាន​ក្រសួងការបរទេស​កម្ពុ​ជា ប្រកាសថា ដើម្បី​តាមដាន​វឌ្ឍនភាព នៃ​ការអនុវត្ត​កិច្ចព្រមព្រៀង​ជា​ឯកច្ឆន្ទ ៥​ចំណុច និង​លទ្ធផល​នៃ​កិច្ចប្រជុំ​ពិគ្រោះ​យោបល់ ស្តីពី ជំនួយ​មនុស្សធម៌​រប​ស់អា​ស៊ាន​សម្រាប់​មី​យ៉ាន់​ម៉ា​។​

១៣២-​សម្ដេច​តេ​ជោ ហ៊ុន សែន ដោះស្រាយ​បញ្ហា​រ៉ាំរ៉ៃ​ធំ ២ ជូន​ពលរដ្ឋ នៅ​ឃុំ​ប៉ោយចារ ស្រុក​ភ្នំស្រុក ខេត្តបន្ទាយមានជ័យ

​កាលពី​ថ្ងៃទី​១ ខែកក្កដា សម្តេច​តេ​ជោ ហ៊ុន សែន នាយករដ្ឋមន្ត្រី​កម្ពុជា បាន​បាន​អញ្ជើញ​ជា​អធិបតី ក្នុង​ទិវា​មច្ឆជាតិ នៅ​តំបន់​អាងទឹក​ត្រពាំងថ្ម ស្ថិតនៅ​ឃុំ​ប៉ោយរ​ចា ស្រុក​ភ្នំស្រុក ខេត្តបន្ទាយមានជ័យ​។ សម្តេច​តេ​ជោ បាន​ដោះស្រាយ​បញ្ហា​រាំ​រ៉ៃ​ធំ ២ ជូន​ពលរដ្ឋ រស់នៅ​ទីតាំង​នោះ​។ ទីមួយ គឺ​បញ្ហា​ផ្លូវ​ប្រវែង​ជិត ១០​គីឡូម៉ែត្រ លើ​ខ្នង​ទំនប់​អាងទឹក​ត្រពាំងថ្ម ដែលជា​ចំណុច​ប្រទាញប្រទង់​នៃ​ការទទួលខុសត្រូវ​រវាង​ក្រសួង​សាធារណការ និង​ដឹកជញ្ជូន និង​ក្រសួង​ធនធានទឹក និង​ឧតុនិយម ធ្វើឱ្យ​ផ្លូវ​មួយ​ខ្សែ​នេះ អូសបន្លាយ មិនបាន​សាងសង់ ចាប់តាំងពី​ឆ្នាំ​២០១៣ មកទល់​ពេល​បច្ចុប្បន្ននេះ​។ រីឯ​បញ្ហា​ទី ២ វិញ គឺ​ការដោះស្រាយ​បញ្ហា​គ្រាប់មីន និង​គ្រាប់​យុទ្ធ​ភ័​ណ្ឌ​មិនទាន់​ផ្ទុះ ដែល​នៅ​បន្ត​សេសសល់ ក្នុង​ឃុំ​ប៉ោយចារ ស្រុក​ភ្នំស្រុក ខេត្តបន្ទាយមានជ័យ នាពេល​បច្ចុប្បន្ន ប្រមាណ ២៤០០​ហិកតា​។

១៣៣- សម្ដេច​តេ​ជោ ហ៊ុន សែន ព្រមាន​ចាត់វិធានការ​ច្បាប់​តឹងរឹង​បំផុត ចំពោះ​ជន​ទាំងឡាយណា ដែល​ប្រឌិត​ព័ត៌មាន ពាក់ព័ន្ធ​នឹង​បញ្ហា​កូ​វីដ

​នៅក្នុង​ឱកាស​អញ្ជើញ​ជា​អធិបតី ក្នុង​ទិវា​មច្ឆជាតិ ថ្ងៃ​១​កក្កដា សម្តេច​តេ​ជោ ហ៊ុន សែន ក៏បាន​ប្រកាស​ព្រមាន​ចាត់វិធានការ​ច្បាប់​តឹងរឹង​បំផុត ចំពោះ​ជន​ទាំងឡាយណា ដែល​ប្រឌិត​ព័ត៌មាន​ពាក់ព័ន្ធ​នឹង​ជំងឺ​កូ​វីដ បំផ្លាញ​ក្តី​សុខ​របស់​ប្រជាពលរដ្ឋ ប៉ះពាល់​ដល់​សន្តិសុខ​សណ្ដាប់ធ្នាប់​សាធារណៈ​បង្ក​ឲ្យ​មានការ​ភ័យ និង​បំភាន់​ការពិត​។ ការព្រមាន​របស់​សម្ដេច​នាយករដ្ឋមន្ត្រី​ដូច្នេះ ខណៈដែល​ប៉ូលិស បាន​ចាប់ខ្លួន​យុវជន​ម្នាក់​រស់នៅ​ខេត្ត​ត្បូងឃ្មុំ ដែល​បាន​ប្រឌិត​ព័ត៌មាន ស្ដីពី ករណី​ស្លាប់​ថ្មី នៃ​អ្នក​កើត​ជំងឺ​កូ​វីដ នៅ​ខេត្តកោះកុង​។ បន្ទាប់ពី​ចាប់ខ្លួន នៅ​ព្រឹក​ថ្ងៃទី​១​កក្កដា យុវជន ដែលជា​សកម្មជន​គណ​បក្ស​ភ្លើងទៀន​នោះ ត្រូវបាន​បញ្ជូនមក​តុលាការ​សាលាដំបូង​រាជធានី​ភ្នំពេញ ដើម្បី​ចាត់វិធានការ​តាមច្បាប់​។​

១៣៤- សម្តេច​តេ​ជោ ហ៊ុន សែន បង្កើត «​គម្រោង​សម្តេច​តេ​ជោ សម្រាប់​សកម្មភាព​មីន​» ដើម្បី​កម្ពុជា ឈានទៅ​គ្មាន​គ្រាប់មីន នៅ​ឆ្នាំ​២០២៥

​កាលពី​ថ្ងៃទី​៣ កក្កដា ឆ្នាំ​២០២២ សម្តេច​តេ​ជោ ហ៊ុន សែន នាយករដ្ឋមន្ត្រី​កម្ពុជា និង​ជា​ប្រធាន​អាជ្ញាធរ​មីន​កម្ពុជា បានសម្រេច​បង្កើត «​គម្រោង​សម្តេច​តេ​ជោ សម្រាប់​សកម្មភាព​មីន Samdech Techo Project for Mine Action_STP – MA” ក្រោម​មូលបទ “​ផ្តល់​ដី​សុវត្ថិភាព បង្កើត​ស្នាមញញឹម​»​។ តាមរយៈ​គម្រោង​នេះ សប្បុរសជន អាច​ចូលរួម​វិភាគទាន​ជាមួយ​រាជរដ្ឋាភិបាល ដើម្បី​បោសសម្អាត​មីន នៅក្នុង​ប្រទេស​កម្ពុជា​យើង ដូច​អ្វីដែល​សម្តេច​តេ​ជោ បានប្រកាស​ក្នុង​ទិវា​មច្ឆជាតិ ថ្ងៃ​១​កក្កដា នៅក្នុង​ខេត្តបន្ទាយមានជ័យ​។​

១៣៥- សម្តេច​តេ​ជោ ហ៊ុន សែន អនុញ្ញាតឱ្យ​រថយន្ត​ចង្កូត​ស្តាំ មិនចាំបាច់​ប្តូរ​ចង្កូត តែ​ត្រូវ​បង់ពន្ធ​ជា​ចាំបាច់

​កាលពី​ព្រឹក​ថ្ងៃទី​៦ ខែកក្កដា សម្តេច​តេ​ជោ ហ៊ុន សែន បាន​អញ្ជើញ​សំណេះសំណាល​ជាមួយ​ប្រតិភូ​កីឡា​អាស៊ាន​ប៉ា​រ៉ា​ហ្គេម នៅ​វិមាន​សន្តិភាព​។ ក្នុង​ពិធី​នេះ សម្តេច​តេ​ជោ ហ៊ុន សែន ប្រកាស​អនុញ្ញាតឱ្យ​រថយន្ត​ចង្កូត​ស្តាំ ដែលមាន​វត្ត​មាននៅ​កម្ពុជា​ស្រាប់​បច្ចុប្បន្ន អាចធ្វើ​ចរាចរណ៍​បាន ដោយ​មិនចាំបាច់​ប្តូរ​ចង្កូត​ពីស្តាំ ទៅ​ឆ្វេង​ទេ តែ​តម្រូវឱ្យ​បង់ពន្ធ​ជា​ចាំបាច់​។ ក្រៅពី​បានសម្រេច​ដូច្នេះ សម្តេចនាយក​រដ្ឋមន្ត្រី ក៏បាន​ព្រមាន​ចាត់វិធានការ​ក្តៅ ចំពោះ​ការ​លួច​នាំចូល​រថយន្ត​ចង្កូត​ស្តាំ ដោយ​គ្មាន​ការលើកលែង​ឡើយ​។

១៣៦-​សម្តេច ហ៊ុន សែន ណែ​នាំឱ្យ​បង្កើត​កុង​ធនាគារ សម្រាប់​ពលរដ្ឋ​ទូទៅ ចូលរួម​ថវិកា ដើម្បី​បោសសម្អាត​មីន

​ក្នុងឱកាស​អញ្ជើញ​សំណេះសំណាល​ជាមួយ​ប្រតិភូ​កីឡា​អាស៊ាន​ប៉ា​រ៉ា​ហ្គេម នៅ​វិមាន​សន្តិភាព នា​ព្រឹក​ថ្ងៃទី​៦ ខែកក្កដា សម្តេច​តេ​ជោ ហ៊ុន សែន នាយករដ្ឋមន្ត្រី បាន​ណែនាំ​ឱ្យ​បង្កើត​កុង​គណនី​ធនាគារ សម្រាប់​ពលរដ្ឋ​ទូទៅ ចូលរួម​ថវិកា ដើម្បី​បោសសម្អាត​មីន និង​គ្រាប់​យុទ្ធភណ្ឌ​មិនទាន់​ផ្ទុះ​។ សេចក្តីណែនាំ​ផ្ទាល់មាត់​ដូច្នេះ បានធ្វើ​ឡើង ក្រោយពី​ពលរដ្ឋ​ទូទៅ ក្រៅពី​អ្នកជំនួញ និង​ឧកញ៉ា មានបំណង​ចង់​ចូលរួម​ថវិកា​ជាមួយ​រាជរដ្ឋាភិបាល​ដែរ តែ​មិនដឹង​ធ្វើ​ដូចម្តេច​។ ភ្លាមៗ កុង​ធនាគារ នៅ ៣​ធនាគារ ត្រូវបាន​បង្កើតឡើង នៅ​ធនាគារ ABA ធនាគារ អេស៊ីលីដា និង​នៅ​ធនាគារ កាណាឌីយ៉ា ដោយមាន​ទទួល​ប្រាក់រៀល និង​ប្រាក់​ដុល្លារ​។

១៣៧-​វ៉ាក់សាំង Pfizer ជិត ២០​ម៉ឺន​ដូ​ស ដែលជា​ជំនួយ​របស់​អូស្ត្រាលី បាន​ដឹក​មកដល់​កម្ពុជា​ហើយ

​វ៉ាក់សាំង Pfizer ជិត ២០​ម៉ឺន​ដូ​ស ដែលជា​ជំនួយ​របស់​ប្រទេស​អូស្ត្រាលី បាន​ដឹក​មកដល់​កម្ពុជា​ហើយ នៅ​ព្រឹក​ថ្ងៃ​សុក្រ ទី​០៨ ខែកក្កដា ឆ្នាំ​២០២២​នេះ​។ ពិធី​ប្រគល់ និង​ទទួល​ជំនួយ​វ៉ាក់សាំង​នេះ បានធ្វើ​ឡើង ក្រោម​អធិបតីភាព​ឯកឧត្តម ម៉ម ប៊ុនហេង រដ្ឋមន្ត្រី​ក្រសួងសុខាភិបាល និង​ឯកអគ្គរដ្ឋទូត​អូស្ត្រាលី ប្រចាំ​នៅ​កម្ពុជា ឯកឧត្តម ប៉ាប​ប្លូ កាំ​ង ( Pablo Kang ) នៅ​អាកាសយានដ្ឋាន​អន្តរជាតិ​ភ្នំពេញ​។​

១៣៨- អាជ្ញាធរ​មីន​កម្ពុជា ដាក់​ផែនការ​បោសសម្អាត​គ្រាប់មីន​នៅ​ខេត្ត​ត្បូងឃ្មុំ តាកែវ និង​កំពត ឲ្យ​អស់​ត្រឹម​ដើមឆ្នាំ​២០២៣

​កាលពី​ថ្ងៃទី​៧ ខែកក្កដា អាជ្ញាធរ​មីន​កម្ពុជា បានប្រកាស​ដាក់​ផែនការ​បោសសម្អាត​គ្រាប់មីន និង​យុទ្ធភណ្ឌ​មិនទាន់​ផ្ទុះ ឱ្យអស់​នៅ​ខេត្ត​ត្បូងឃ្មុំ ខេត្តតាកែវ និង​ខេត្តកំពត យ៉ាងយូរ​នៅត្រឹម​ឆ្នាំ​២០២៣​។ ជាមួយគ្នានេះ អាជ្ញាធរ​មីន​កម្ពុជា កំណត់​ខេត្ត​ត្បូងឃ្មុំ ដែលមាន​ផ្ទៃដី​មាន​គ្រាប់មីន​ជាង ៤​គីឡូម៉ែត្រ​ក្រឡា ប្រគល់ជូន​កងទ័ព​មួក​ខៀវ ជា​អ្នកទទួលខុសត្រូវ​ប្រតិ​ប​ត្តិ​ការ​បោសសម្អាត រីឯ​ខេត្តតាកែវ និង​ខេត្តកំពត ប្រគល់ជូន​អង្គភាព​ស៊ីម៉ាក​។​

១៣៩- សម្តេច​តេ​ជោ អញ្ជើញ​គោរព​វិញ្ញាណក្ខន្ធ​អតីត​នាយករដ្ឋមន្ត្រី​ជប៉ុន នៅ​ស្ថានទូត​ជប៉ុន ប្រចាំ​កម្ពុជា​នៅ​រសៀល​ថ្ងៃទី​១១​កក្កដា

​នៅ​រសៀល​ថ្ងៃទី​១១ ខែកក្កដា ឆ្នាំ​២០២២ សម្តេច​តេ​ជោ ហ៊ុន សែន នាយករដ្ឋមន្ត្រី​កម្ពុជា បាន​ដឹកនាំ​មន្ត្រីជាន់ខ្ពស់ ក្នុង​ជួរ​រាជរដ្ឋាភិបាល អញ្ជើញ​ចូលរួម​គោរព​វិញ្ញាណក្ខន្ធ​អតីត​នាយករដ្ឋមន្ត្រី​ជប៉ុន ស៊ិន​ហ្សូ អា​បេ នៅ​ស្ថានទូត​ជប៉ុន ប្រចាំ​កម្ពុជា​។ តាម​សម្តេច​តេ​ជោ មរណភាព​របស់លោក ស៊ិន​ហ្សូ អា​បេ គឺ​រឿង​រាវ​ដ៏​គួរអោយ​សោកស្តាយ តក់ស្លុត រន្ធត់ និង​អាឡោះអាល័យ​បំផុត​។ ដើម្បី​ចូលរួម​រំលែក​មរណទុក្ខ​ជាមួយ​ក្រុមគ្រួសារ ប្រជាជន និង​រាជ​រដ្ឋ​ភិ​បាលជ​ប៉ុន រាជរដ្ឋាភិបាល​កម្ពុជា ក៏បាន​ជ្រើស​រើសយក​ថ្ងៃទី​១០ ខែកក្កដា​ជា​ថ្ងៃ​កាន់ទុក្ខ​ជា​ផ្លូវការ ដោយ​បង្ហូតទង់ជាតិ ត្រឹម​ពាក់កណ្តាល​ដង និង​ធ្វើ​ពិធី​ស្មឹង​ស្មា​ត នៅមុន​កិច្ចប្រជុំ​នានា​ផងដែរ​។​

១៤០-​ក្រុមប្រឹក្សាធម្មនុញ្ញ ទូលថ្វាយ​ព្រះមហាក្សត្រ​ថា ការធ្វើ​វិសោធនកម្ម​ច្បាប់​ធម្មនុញ្ញ ពុំ​ប៉ះពាល់​ដល់​ប្រជាធិបតេយ្យ សេរី​ពហុបក្ស និង​របបរាជានិយម​ឡើយ

​ក្រុមប្រឹក្សាធម្មនុញ្ញ នៅ​ព្រឹក​ថ្ងៃទី​១៣ ខែកក្កដា ឆ្នាំ​២០២២ បាន​បើក​កិច្ចប្រជុំពេញអង្គ ដើម្បី​ពិនិត្យ និង​រៀបចំ​សេចក្តីក្រាបបង្គំទូលថ្វាយ​ព្រះករុណា ព្រះមហាក្សត្រ ចំពោះ​សេចក្តីព្រាងច្បាប់​ធម្មនុញ្ញ ស្តីពី​វិសោធនកម្ម​មាត្រា​១៩ ថ្មី​(​មួយ​) មាត្រា​៨៩ មាត្រា​៩៨ ថ្មី មាត្រា​១០២ ថ្មី មាត្រា​១១៩ ថ្មី​(​មួយ​) និង​មាត្រា​១២៥ ថ្មី នៃ​រដ្ឋធម្មនុញ្ញ និង​មាត្រា​៣ ថ្មី និង​មាត្រា​៤ ថ្មី នៃ​ច្បាប់​ធម្មនុញ្ញ​បន្ថែម សំដៅ​ធានា​នូវ​ដំណើរការ​ជា​ប្រក្រតី​នៃ​ស្ថាប័ន​ជាតិ​។ ក្រោយ​កិច្ចប្រជុំ ក្រុមប្រឹក្សាធម្មនុញ្ញ​បានទូល​ថ្វាយ​ព្រះមហាក្សត្រ​ថា រាជ​រដ្ឋ​ឋា​ស្នើ​ធ្វើ​វិសោធនកម្ម​ច្បាប់​ធម្មនុញ្ញ លើក​ទី​១០​នេះ ពុំ​ប៉ះពាល់​ដល់​ប្រជាធិបតេយ្យ សេរី​ពហុបក្ស និង​របបរាជានិយម​ឡើយ​។​

១៤១- រដ្ឋមន្ត្រី​យុត្តិធម៌ បង្ហាញ​ពី​គោលបំណង និង​ខ្លឹមសារ​នៃ​ការធ្វើ​វិសោធនកម្ម​ច្បាប់​ធម្មនុញ្ញ

​កាលពី​រសៀល​ថ្ងៃទី​១៤ ខែកក្កដា រដ្ឋមន្ត្រី​ក្រសួងយុត្តិធម៌ ឯកឧត្តម កើត រិ​ទ្ធ បានធ្វើ​សន្និសីទកាសែត បង្ហាញ​ពី​គោលបំណង និង​ខ្លឹមសារ​នៃ​ការធ្វើ​វិសោធនកម្ម​ច្បាប់​ធម្មនុញ្ញ លើក​ទី​១០ នាពេលនេះ​។ ឯកឧត្តម កើត រិ​ទ្ធ បាន​បញ្ជាក់ថា គោលបំណង​នៃ​ធ្វើ​វិសោធនកម្ម​ច្បាប់​ធម្មនុញ្ញ ចំនួន ៨​មាត្រា លើក​ទី​១០​នេះ គឺ​ដើម្បី​បំពេញបន្ថែម​ចំនុច​ខ្វះខាត​រដ្ឋធម្មនុញ្ញ ដែល​បានប្រកាស​ឲ្យ​ប្រើប្រាស់​កាលពី​ឆ្នាំ​១៩៩៣ និង​ដើម្បី​បម្រើ​ដល់​ឧ​ត្ត​ម​ប្រយោជន៍​ជាតិ និង​មាតុភូមិ​កម្ពុជា​។

១៤២- គណបក្ស​ប្រជាជន​កម្ពុជា ណែនាំ​ដល់​មន្ត្រី​របស់ខ្លួន​ទាំងអស់ បន្ត​ខិតខំ​បម្រើប្រជាជន​អោយអស់​ពី​ចិត្ត​ពី​ថ្លើម

​សន្និបាត​វិសាមញ្ញ​របស់​គណៈកម្មាធិការ​កណ្ដាល​គណបក្ស​ប្រជាជន​កម្ពុជា ដែល​ដឹកនាំ​ដោយ​សម្តេច​តេ​ជោ ហ៊ុន សែន ប្រធាន​គណបក្ស និង​ជា​នាយករដ្ឋមន្ត្រី កាលពី​ថ្ងៃ​សៅរ៍ និង​ថ្ងៃអាទិត្យ ទី​១៦ និង​ថ្ងៃទី​១៧ ខែកក្កដា សម្រេចបាន​ជោគជ័យ និង​ផ្លែផ្កា គួរអោយកត់សម្គាល់​។ ក្នុងនោះ គណបក្ស​ប្រជាជន​កម្ពុជា នៅតែ​ណែនាំ​ដល់​មន្ត្រី​របស់ខ្លួន​ទាំងអស់ រួមគ្នា​លើកកម្ពស់​សាមគ្គីភាព ឯកភាព​ផ្ទៃក្នុង​របស់​គណបក្ស ដោយ​បន្ត​ជំរុញ​អនុវត្ត​កម្មវិធី​នយោបាយ​នានា ដោយ​ឥត​ថមថយ និង​ខិតខំ​បម្រើប្រជាជន ឱ្យ​អស់ពី​ចិត្ត​ពី​ថ្លើម​។​

១៤៣- ព្រះមហាក្សត្រ និង​សម្តេចម៉ែ ប្រទាន​ព្រះរាជ​ទ្រព្យ ១​លាន ៥​សែន​ដុល្លារ ចូលរួម​ដោះស្រាយ​បញ្ហា​គ្រាប់មីន នៅ​កម្ពុជា

​កាលពី​ចុងខែ​កក្កដា ព្រះមហាក្សត្រ និង​សម្តេចម៉ែ បាន​ប្រោស​ប្រទាន​នូវ​ព្រះរាជ​ទ្រព្យ សរុប​ចំនួន ១​លាន ៥​សែន​ដុល្លារ​សហរដ្ឋអាមេរិក ចូលរួម​ជាមួយ​រាជរដ្ឋាភិបាល សម្រាប់​ដោះស្រាយ​បញ្ហា​គ្រាប់មីន នៅ​ទូទាំងប្រទេស​កម្ពុជា​។ ក្នុងនោះ ព្រះករុណា​ព្រះមហាក្សត្រ សម្តេចព្រះ​បរមនាថ នរោត្តម សីហមុនី បាន​ប្រោស​ប្រទាន នូវ​ព្រះរាជ​ទ្រព្យ​ចំនួន ៥០​ម៉ឺន​ដុល្លារ​អាមេរិក​។ រីឯ​សម្តេចព្រះ​មហាក្សត្រី ព្រះវររាជ​មាតា នរោត្តម មុនិនាថ សីហនុ ក៏បាន​ប្រោស​ប្រទាន​នូវ​ព្រះរាជ​ទ្រព្យ​ចំនួន ១​លាន​ដុល្លារ​អាមេរិក ផងដែរ​។​

១៤៤- អ្នកជំនាញ​ផ្នែក​សុខាភិបាល អះអាងថា ជំងឺ​អុត​ស្វា មិន​ឆ្លង​ដូច​កូ​វីត​១៩ ទេ តែ​ពលរដ្ឋ ត្រូវ​ប្រុងប្រយ័ត្ន​ខ្ពស់ ព្រោះ​អុត​ស្វា មិនទាន់មាន​ថ្នាំ​ព្យាបាល​ទេ

​អ្នកជំនាញ​ផ្នែក​សុខាភិបាល​កម្ពុជា អះអាងថា ជំងឺ​អុត​ស្វា មិន​ឆ្លង​ដូច​កូ​វីត​១៩​ទេ​។ ពោលគឺ​វា​ឆ្លង លុះត្រាតែ​ប៉ះពាល់​ផ្ទាល់​លើ​ដំបៅ ទឹករងៃ វត្ថុ​រាវ ឬ​រួមភេទ​ជាមួយ​អ្នកជំងឺ ដែល​កើត​អុត​ស្វា ផ្ទុយ​ពី​ជំងឺ​កូ​វីត​១៩ ដែល​ឆ្លង តាមផ្លូវ​ដង្ហើម​។ ទោះជា​កម្ពុជា រក​មិនទាន់​ឃើញ​ជំងឺ​អុត​ស្វា​នៅឡើយ លើកលែង​តែមួយ​ករណី​ដែល​រកឃើញ​លើ​បុរស​នី​ហ្សេ​រី​យ៉ា ដែល​បាន​រត់គេច​ពី​ប្រទេស​ថៃ ចូលមក​កម្ពុជា​យ៉ាងណាក៏ដោយ ក៏​អ្នកជំនាញ​ផ្នែក​សុខាភិបាល នៅតែ​បន្ត​អំពាវ​ឱ្យ​ពលរដ្ឋ ថែរក្សា​សុខភាព យកចិត្ត​ទុក​ខ្ពស់​ចំពោះ​វិធានការ​ការពារ​ជំងឺ​អុត​ស្វា​នេះ ក្រោម​ហេតុផល​ថា ជំងឺ​អុត​ស្វា គ្មាន​ថ្នាំ​ព្យាបាល​នៅឡើយ​ទេ បច្ចុប្បន្ននេះ​។​

១៤៥-​ប្រធាន​អាស៊ាន តក់ស្លុត និង​សោកសៅ ចំពោះ​ការប្រហារជីវិត​សកម្មជន​បក្សប្រឆាំង ៤​នាក់ នៅ​មី​យ៉ាន់​ម៉ា

​ក្នុងនាម​ជា​ប្រធាន​អាស៊ាន សម្តេច​តេ​ជោ ហ៊ុន សែន បាន​សម្តែង​ការតក់ស្លុត និង​សោកសៅ​យ៉ាង​ក្រៃលែង ចំពោះ​ការប្រហារជីវិត​សកម្មជន​បក្សប្រឆាំង ៤​នាក់ នៅ​មី​យ៉ាន់​ម៉ា​។ ការអនុវត្ត​ទោស​ប្រហារជីវិត​នេះ ធ្វើឡើង​តែមួយ​សប្ដាហ៍ មុន​កិច្ចប្រជុំ​រដ្ឋមន្ត្រីការបរទេស​អាស៊ាន លើក​ទី​៥៥ ដែលជា​ទង្វើ​មិនអាច​អត់ឱន​អោយបាន ព្រោះ​វា​បាន​ទាញ​ថយក្រោយ​នូវ​វឌ្ឍនភាព និង​ថែមទាំង​សបញ្ជាក់​ច្បាស់​ពី​កង្វះ​ឆន្ទៈ​គាំទ្រ​កិច្ចខិតខំ​ប្រឹងប្រែង ជាពិសេស​របស់​ប្រធាន​អាស៊ាន ក្នុង​ការជួយ​ព​ន្លឿ​ន​វឌ្ឍនភាព​នៃ​ការអនុវត្ត​កិច្ចព្រមព្រៀង​ជា​ឯកច្ឆន្ទ ៥​ចំណុច​។

១៤៦-​រាជរដ្ឋាភិបាល បង្កើត​ក្រុមការងារ​ដោះស្រាយ​សំណង់​ខុសច្បាប់ និង​ដីធ្លី ក្នុង​តំបន់​អង្គរ

​រាជរដ្ឋាភិបាល បានចេញ​សេចក្តីសម្រេច ស្តីពី ការតែងតាំង​សមាសភាព​ក្រុមការងារ​តម្រង់ទិស ដើម្បី​ដោះស្រាយ​បញ្ហា​សំណង់​ខុសច្បាប់ និង​ដីធ្លី​ក្នុង​តំបន់​រមណីយដ្ឋាន​អង្គរ និង​តំបន់​ដទៃទៀត ស្ថិតក្រោម​ការគ្រប់គ្រង​របស់​អាជ្ញាធរ​ជាតិ​អប្សរា​។​

១៤៧- កម្ពុជា ធ្វើជា​ម្ចាស់ផ្ទះ រៀបចំ​កិច្ចប្រជុំ​រដ្ឋមន្ត្រីការបរទេស​អាស៊ាន និង​កិច្ចប្រជុំ​ពាក់ព័ន្ធ ចាប់ពី​ថ្ងៃទី​២៩​កក្កដា ដល់​ថ្ងៃទី​៥​សីហា​

​ក្រសួងការបរទេស បានប្រកាសថា កម្ពុជា ក្នុងនាម​ជា​ប្រធាន​អាស៊ាន នឹង​ធ្វើជា​ម្ចាស់ផ្ទះ រៀបចំ​កិច្ចប្រជុំ​រដ្ឋមន្ត្រីការបរទេស​អាស៊ាន លើក​ទី​៥៥ និង​កិច្ចប្រជុំ​ពាក់ព័ន្ធ​ក្នុង​ក្របខណ្ឌ​អាស៊ាន ពីថ្ងៃ​ទី​២៩ ខែកក្កដា ដល់​ថ្ងៃទី​៥ ខែសីហា ឆ្នាំ​២០២២ នៅ​រាជធានី​ភ្នំពេញ​។ សម្តេច​តេ​ជោ នាយករដ្ឋមន្ត្រី ហ៊ុន សែន នឹង​អញ្ជើញ​ជា​អធិបតី​ក្នុង​ពិធី​បើក​ជា​ផ្លូវការ​នៃ​កិច្ចប្រជុំ​រដ្ឋមន្ត្រីការបរទេស​អាស៊ាន លើក​ទី​៥៥ និង​កិច្ចប្រជុំ​ពាក់ព័ន្ធ​ក្នុង​ក្របខណ្ឌ​អាស៊ាន ហើយនឹង​ទទួល​ការ​ចូលជួប​សម្តែង​ការគួរសម​រួមគ្នា ដោយ​រដ្ឋមន្ត្រីការបរទេស និង​អគ្គលេខាធិការ​អាស៊ាន​។​

១៤៨- សម្តេច​តេ​ជោ ហ៊ុន សែន ស្នើ​សហគមន៍​អឺរ៉ុប ពិចារណា​ឡើងវិញ នូវ​ទណ្ឌកម្មសេដ្ឋកិច្ច​លើ​រុស្ស៊ី​

​សម្តេច​ត​ជោ ហ៊ុន សែន នាយករដ្ឋមន្ត្រី​កម្ពុជា នៅ​ថ្ងៃទី​៤ ខែសីហា​នេះ បាន​ស្នើឱ្យ​សហគមន៍​អឺរ៉ុប​ពិចារណា​ឡើងវិញ​នូវ​ទណ្ឌកម្មសេដ្ឋកិច្ច​លើ​រុស្ស៊ី​។ ក្រៅពី​សំណើរ​អោយ​សហគមន៍​អឺរ៉ុប​ពិចារណា​ឡើងវិញ​ចំពោះ​ទណ្ឌកម្មសេដ្ឋកិច្ច​លើ​រុស្សី ក្នុងជំនួប​ពិភាក្សា​ការងារ​ជាមួយ​លោក ជូ​ស៊េ​បបូ​រ៉ែ​ល សង់​តែ​ល តំណាង​ជាន់ខ្ពស់​សហគមន៍​អឺរ៉ុប​ទទួលបន្ទុក​នយោបាយ កិច្ចការបរទេស និង​សន្តិសុខ នៅ​វិមាន​សន្តិភាព ក្នុង​រាជធានី​ភ្នំពេញ សម្តេច តេ​ជោ ហ៊ុន សែន ក៏បាន​លើកឡើង និង​ពិភាក្សា​ការងារ​ជាច្រើន​ជា​តំណាង​សហគមន៍​អឺរ៉ុប​ផងដែរ ដូចជា បញ្ហា EBA និង​រឿង​មី​យ៉ាន់​ម៉ា ជាដើម​។​

១៤៩- ប្រធាន​អាស៊ាន​សម្ដេច​តេ​ជោ ហ៊ុន សែន ចង់ឃើញ​រុស្ស៊ី និង​អ៊ុយ​ក្រែ​ន ដោះស្រាយ​បញ្ហា​តានតឹង បច្ចុប្បន្ន​ដោយ​សន្តិវិធី​

​សម្ដេច​តេ​ជោ ហ៊ុន សែន បានបង្ហាញ​ជំហ​របស់​កម្ពុជា និង​ជា​ប្រធាន​អាស៊ាន ជុំវិញ​បញ្ហា​សង្គ្រាម​រុស្ស៊ី និង​អ៊ុយ​ក្រែ​ន ដែល​បច្ចុប្បន្ន បាន​ក្លាយជា​ក្តី​ព្រួយ​កង្វល់​រួម​រួចជាស្រេច​ទៅហើយ​របស់​តំបន់ និង​ពិភពលោក តាមរយៈ​ការកើនឡើង​នៃ​វិបត្តិ​ស្បៀង និង​ថាមពល​។ សម្តេច​ប្រធាន​អាស៊ាន ក្នុងជំនួប​ពិភាក្សា​ការងារ​ជាមួយ​ឯកឧត្តម Sergey Lavrov រដ្ឋមន្ត្រីការបរទេស​រុស្ស៊ី នៅ​វិមាន​សន្តិភាព នា​ថ្ងៃទី​៤ ខែសីហា បាន​បញ្ជាក់ថា កម្ពុជា ក៏ដូចជា​អាស៊ាន​ទាំងមូល ចង់ឃើញ​ភាគី​ប្រឈមមុខ​ដាក់គ្នា រុស្ស៊ី​-​អ៊ុយ​ក្រែ​ន ស្វែងរក​ការចរចា ដោះស្រាយ​បញ្ហា​ដោយ​សន្តិវិធី ជៀសវាង​ការបន្ត​ប្រើប្រាស់​កម្លាំង​។​

១៥០- រដ្ឋមន្ត្រីការបរទេស​អាស៊ាន សម្តែង​ការព្រួយបារម្ភ​នូវ​ភាពផុយស្រួយ​នៃ​ស្ថានការណ៍​តំបន់ និង​អន្តរជាតិ

​រដ្ឋមន្ត្រីការបរទេស​អាស៊ាន បានចេញ​សេចក្តីថ្លែងការណ៍​រួមគ្នា ស្តីពី ការវិវឌ្ឍ​ឆ្លង​ច្រក​សមុទ្រ ដោយបាន​សម្តែង​ការព្រួយបារម្ភ​ភាពផុយស្រួយ​នៃ​ស្ថានការណ៍​តំបន់ និង​អន្តរជាតិ ជាពិសេស​ការវិវឌ្ឍ​ថ្មីៗ​នេះ នៅ​តំបន់​ក្បែរ​អាស៊ាន ដែល​រដ្ឋមន្ត្រីការបរទេស​អាស៊ាន ចាត់ទុកថា អាច​បង្ក​អស្ថិរភាព​ដល់​តំបន់​អាស៊ាន​។ សេចក្តីថ្លែងការណ៍​នេះ បានធ្វើ​ឡើង ខណៈដែល​ភាព​តានតឹង បានកើត​ឡើង នៅ​ច្រក​សមុទ្រ​តៃវ៉ាន់ បន្ទាប់ពី​ប្រធានសភា​អាមេរិក បំពេញ​ទស្សនកិច្ច នៅ​កោះ​តៃវ៉ាន់ កាលពី​ថ្ងៃទី​២ និង​ថ្ងៃទី​៣​សីហា​។​

១៥១- រដ្ឋមន្ត្រី​ការ​បរ​ទស​អាស៊ាន ជួបប្រជុំ​ជាមួយ​រដ្ឋមន្ត្រីការបរទេស​ប្រទេស​ដៃគូ​ផ្សេងៗ​គ្នា ១១​ប្រទេស

​នៅ​ថ្ងៃទី​៤ ខែសីហា កិច្ចប្រជុំ​រដ្ឋមន្ត្រីការបរទេស​អាស៊ាន បានចាប់ផ្តើម​ប្រជុំ​ជាមួយ​រដ្ឋមន្ត្រីការបរទេស និង​តំណាង​ប្រទេស​ដៃគូ ក្នុង​កិច្ចប្រជុំ​ដាច់ដោយឡែកៗ​ពីគ្នា ចំនួន ១១​ប្រទេស​។ ចាប់​ផ្តើមដំបូង ជា​កិច្ចប្រជុំ​រដ្ឋមន្ត្រីការបរទេស​អាស៊ាន និង​រដ្ឋមន្ត្រីការបរទេស​ចិន​។ កិច្ចប្រជុំ​នេះ មាន​អញ្ជើញ​ដឹកនាំ​កិច្ចប្រជុំ​ដោយផ្ទាល់​ពី​លោក​ឧបនាយករដ្ឋមន្ត្រី ប្រាក់ សុខុន រដ្ឋមន្ត្រី​ក្រសួងការបរទេស​កម្ពុជា ក្នុងនាម​ជា​ប្រធាន​អាស៊ាន និង​លោក វ៉ាង យី រដ្ឋមន្ត្រីការបរទេស​ចិន​។ បន្ទាប់មក មាន​កិច្ចប្រជុំ​អាស៊ាន​-​កូរ៉េ អាស៊ាន​-​ជប៉ុន អាស៊ាន​-​អាមេរិក និង​អាស៊ាន​-​រុស្ស៊ី ជាដើម​។​

១៥២-​សម្ដេច ហ៊ុន សែន អរគុណ​សត្រូវ និង​ដៃគូ​នយោបាយ​របស់ខ្លួន ដែល​ធ្វើអោយ​សម្តេច

​កាលពី​ថ្ងៃទី​៥ ខែសីហា សម្តេច​តេ​ជោ ហ៊ុន សែន បានទទួល​សញ្ញាបត្រ​ប​ណ្ឌិ​ត​កិត្តិយស​ផ្នែក​អភិវឌ្ឍន៍ ពី​សាកលវិទ្យាល័យ​ភូមិន្ទ​ភ្នំពេញ​។ ក្នុង​ពិធី​នេះ សម្តេច​តេ​ជោ ហ៊ុន សែន នាយករដ្ឋមន្ត្រី​នៃ​កម្ពុជា បាន​ថ្លែងថា សត្រូវ និង​ដៃគូ​នយោបាយ​របស់​សម្តេច ដែល​បានធ្វើ​សកម្មភាព​ប្រឆាំង​គ្រប់​វិធី​ជាមួយ​សម្តេច និង​គណបក្ស​ប្រជាជន​កម្ពុជា នាពេល​កន្លងមក បានរួម​ចំណែក​ធ្វើអោយ​សម្តេច​មាន​ភាពខ្លាំង ក្នុងការ​ដឹកនាំ និង​អភិវឌ្ឍន៍​ប្រទេស​កម្ពុជា ដោយ​ក្រុម​អ្នកប្រឆាំង​បាន​បង្រៀន​សម្ដេច​ឱ្យដឹងពី​របៀប​នៃ​ការរក្សា​ស្ថិរភាព និង​ទប់ស្កាត់​បញ្ហា​បង្ក​អសន្តិសុខ​ក្នុងប្រទេស ដើម្បី​ឈាន​រក​ការអភិវឌ្ឍន៍ ការពារ​នូវ​សន្តិភាព ស្ថិរភាព​នយោបាយ និង​ការពារ​ជីវិត​ប្រជាជន​កម្ពុជា​។​

១៥៣- រដ្ឋមន្ដ្រីការបរទេស​អាស៊ាន និង​រដ្ឋមន្ត្រីការបរទេស​ប្រទេស​ដៃគូ​សន្ទនា​របស់​អាស៊ាន ចូលរួម​កិច្ចប្រជុំ​កំពូល​អាស៊ី​-​បូព៌ា លើក​ទី​១២ និង​វេទិកា​តំបន់​អាស៊ាន លើក​ទី​២៩

​នៅ​ថ្ងៃទី​៥​សីហា ជា​ថ្ងៃ​ចុងក្រោយ​នៃ​កិច្ចប្រជុំ​រដ្ឋមន្ត្រីការបរទេស​អាស៊ាន និង​កិច្ចប្រជុំ​ពាក់ព័ន្ធ​។ នាពេល​ព្រឹក រដ្ឋមន្ដ្រីការបរទេស​អាស៊ាន និង​រដ្ឋមន្ត្រីការបរទេស​ប្រទេស​ដៃគូ​សន្ទនា​របស់​អាស៊ាន បាន​ចូលរួម​កិច្ចប្រជុំ​កំពូល​អាស៊ី​-​បូព៌ា លើក​ទី​១២ និង​ពេល​រសៀល ជា​កិច្ចប្រជុំ វេទិកា​តំបន់​អាស៊ាន លើក​ទី​២៩​។​

១៥៤- កិច្ចប្រជុំ​រដ្ឋមន្ត្រីការបរទេស​អាស៊ាន និង​កិច្ចប្រជុំ​ពាក់ព័ន្ធ ដែល​កម្ពុជា​ធ្វើជា​ម្ចាស់ផ្ទះ បាន​បិទ​បញ្ចប់​ហើយ ដោយ​សម្រេចបាន​ជោគជ័យ គួរអោយកត់សំគាល់

​កិច្ចប្រជុំ​រដ្ឋមន្ត្រីការបរទេស​អាស៊ាន និង​កិច្ចប្រជុំ​ពាក់ព័ន្ធ ដែល​កម្ពុជា​ធ្វើជា​ម្ចាស់ផ្ទះ នៅ​ថ្ងៃទី​៥ ខែសីហា បាន​បិទ​បញ្ចប់​ហើយ ដោយ​នាំមក​នូវ​ជោគជ័យ​ជាច្រើន គួរអោយកត់សំគាល់​។ តាមរយៈ​កិច្ចប្រជុំ​អាស៊ាន​នៅ​កម្ពុជា ក្នុង​ឆ្នាំ​២០២២​នេះ មេដឹកនាំ​អាស៊ាន មេដឹកនាំ​តំបន់ និង​ពិភពលោក បាន​ប្រើប្រាស់​វេទិកា​នេះ ដើម្បី​រិះរក​មធ្យោបាយ​រួម ក្នុងការ​ដោះស្រាយ​បញ្ហា​ធំៗ​ជា​ក្តីកង្វល់​រួម ដូចជា បញ្ហា​សង្គ្រាម​រុស្ស៊ី​-​អ៊ុយ​ក្រែ​ន បញ្ហា​តានតឹង​នៅ​កោះ​តៃវ៉ាន់ បញ្ហា​មី​យ៉ាន់​ម៉ា ការពង្រឹង និង​ស្តារ​សេដ្ឋកិច្ច​ពី​វិបត្តិ​កូ​វីត​១៩ បញ្ហា​វិបត្តិ​ស្បៀងអាហារ ក៏ដូចជា​បញ្ហា​ប្រែប្រួល​អាកាសធាតុ ជាដើម​។​

១៥៥- សម្តេច​តេ​ជោ ហ៊ុន សែន ដាក់ចេញ​វិធានការ​សង្គ្រោះ​ព្រៃឈើ និង​សត្វព្រៃ នៅ​ភ្នំ​តា​ម៉ៅ

​កាលពីដើម​ខែសីហា សម្តេច​តេ​ជោ ហ៊ុន សែន នាយករដ្ឋមន្ត្រី​កម្ពុជា បានប្រកាស​លុបចោល​គ​ម្រោ​ង​អភិវឌ្ឍ​នានា នៅក្បែរ​ភ្នំ​តា​ម៉ៅ និង​បញ្ជា​ឲ្យ​ក្រុមហ៊ុន ដែល​បាន​ឈូសឆាយ បញ្ឈប់​សកម្មភាព​រប​ស់​ខ្លូន និង​ត្រូវ​ដាំ​ដើមឈើ​ឡើងវិញ ពលរដ្ឋ​កម្ពុជា​ភាគច្រើនបំផុត បានបង្ហាញ​ការគាំទ្រ និង​អរគុណ សម្តេច​តេ​ជោ ហ៊ុន សែន ដែល​បាន​ដាក់ចេញ​វិធានការ​ទាន់ពេលវេលា​ស​ង្គ្រោះ​ព្រៃឈើ និង​សត្វព្រៃ នៅ​តំបន់​នោះ​។ ក្រៅពី​ពលរដ្ឋ​ទូទៅ លោក​ឧកញ៉ា និង​អ្នកមាន​ទ្រព្យ​ធន់​មួយចំនួន ក៏បាន​ប្រកាស​ផ្តល់​កូនឈើ ដើម្បី​យកទៅ​ដាំ​ឡើងវិញ នៅ​តំបន់ ដែល​បាន​ឈូសឆាយ​រួច​នោះ​ផងដែរ​។​

១៥៦- អ្នករាយការណ៍​ពិសេស UN ចាប់ផ្តើម​បំពេញ​ទស្សនកិច្ច នៅ​កម្ពុជា នា​ថ្ងៃនេះ ដើម្បី​វាយតម្លៃ​ពី​ស្ថានភាព​សិទ្ធិមនុស្ស​នៅ​កម្ពុជា

​អ្នករាយការណ៍​ពិសេស​ទទួលបន្ទុក​សិទ្ធិមនុស្ស​របស់​អង្គការសហប្រជាជាតិ ប្រចាំ​កម្ពុជា លោក វី​ទី​ត មុន​តា​ប៊ុន (Vitit MUNTARBHORN ) ចាប់ផ្តើម​បំពេញ​ទស្សនកិច្ច​ផ្លូវការ​រយៈពេល ១២​ថ្ងៃ គឺ​ចាប់ពី​ថ្ងៃទី​១៥-២៦ ខែសីហា ឆ្នាំ​២០២២​នេះ ដើម្បី​វាយតម្លៃ​ពី​ស្ថានភាព​សិទ្ធិមនុស្ស​នៅ​កម្ពុជា​។ តាម​គម្រោង អ្នករាយការណ៍​ពិសេស ជួប​ជជែក​ពី​បញ្ហា​សិទ្ធិមនុស្ស ជាមួយ​មន្ត្រី​រដ្ឋាភិបាល និង​ក្រុម​អង្គការ​សង្គម​ស៊ីវិល ជាពិសេស​ការខិតខំរ​បស់​រដ្ឋាភិបាល ក្នុងការ​ធ្វើ​ឲ្យ​ប្រសើរ​នូវ​លំហរ​សិទ្ធិមនុស្ស ដែល​រួមមាន​សិទ្ធិ​នយោបាយ សិទ្ធិ​ពលរដ្ឋ សិទ្ធិ​សេដ្ឋកិច្ច សង្គម និង​វប្បធម៌​។ នេះ​ជា​ដំណើរ​ទស្សនកិច្ច​លើកដំបូង​របស់លោក វី​ទិ​ត មុន​តា​ប៊ុន មកកាន់​កម្ពុជា បន្ទាប់ពី​លោក​ទទួល​តំណែង ជា​អ្នករាយការណ៍​ពិសេស​ទទួលបន្ទុក​សិទ្ធមនុស្ស​របស់​អង្គការសហប្រជាជាតិ​ប្រចាំ​កម្ពុជា កាលពី​ខែឧសភា ឆ្នាំ​២០២១ ជំនួស​លោកស្រី Rhona Smith​។

១៥៧-​សម្តេច​តេ​ជោ ប្រាប់​អ្នករាយការណ៍​ពិសេស ទទួលបន្ទុក​សិទ្ធិមនុស្ស​ថា សូម​ធ្វើ​របាយការណ៍​ឱ្យមាន​តុល្យភាព​ពី​កម្ពុជា

​នៅក្នុង​ជំនួប​ពិភាក្សា​ការងារ​ជាមួយ​លោក វី​ទិ​ត មុន​តា​ប៊​ន អ្នករាយការណ៍​ពិសេស​អង្គការសហប្រជាជាតិ ទទួលបន្ទុក​សិទ្ធិមនុស្ស នៅ​កម្ពុជា នៅ​ថ្ងៃទី​១៦ ខែសីហា នៅ​វិមាន​សន្តិភាព ក្នុង​រាជធានី​ភ្នំពេញ សម្តេច​តេ​ជោ ហ៊ុន សែន នាយករដ្ឋមន្ត្រី បាន​ប្រា​ប់លោក វី​ទិ​ត មុន​តា​ប៊​ន សូម​ពិចារណា និង​ពិនិត្យ​ឱ្យបាន​ត្រឹមត្រូវ ក្នុង​ការធ្វើ​របាយការណ៍​ឱ្យមាន​តុល្យភាព មិនអាច​ម្ខាង​ថា រក្សា​ការសម្ងាត់ ហើយ​ម្ខាង​ទៀត​ទាមទារ​ឱ្យមាន​ការទទួលខុសត្រូវ និង​តម្លាភាព​នោះទេ​។​

១៥៨-​សម្តេច​តេ​ជោ ហ៊ុន សែន ប្រើប្រាស់​វេទិកា​ចែក​សញ្ញាបត្រ នៅថ្ងៃនេះ ដោះស្រាយ​បញ្ហា​ធំៗ មួយចំនួន ជូន​ពលរដ្ឋ

​សម្តេច​តេ​ជោ ហ៊ុន សែន នាយករដ្ឋមន្ត្រី​កម្ពុជា នៅ​ថ្ងៃទី​១៧ ខែសីហា ក្នុងឱកាស​អញ្ជើញ​ជា​អធិបតី​ប្រគល់​សញ្ញាបត្រ ជូន​ដល់​និស្សិត​សាកលវិទ្យាល័យ​ពុទ្ធ​សាស្ត្រ បានសម្រេច ក៏ដូចជា​ដាក់ចេញ​បទបញ្ជា​មួយចំនួន សំដៅ​ដោះស្រាយ​បញ្ហា​ធំៗ ជូន​ពលរដ្ឋ​។ បញ្ហា​ធំៗ ដែល​សម្តេច​តេ​ជោ បានសម្រេច ក៏ដូចជា​ដាក់ចេញ​បទបញ្ជា នៅថ្ងៃនេះ រួមមាន បង្កើត​អនុក្រឹត្យ​គ្រប់គ្រង​ការពារ​តំបន់​ព្រៃឈើ និង​សត្វ​ព្រៃភ្នំ​តា​ម៉ៅ​,​ដោះស្រាយ​បញ្ហា​ពាក់ព័ន្ធ​នឹង​ការកាប់​ទន្ទ្រាន​យក​ដីព្រៃ​លិច​ទឹក នៅ​ខេត្ត​ព្រះសីហនុ ក៏ដូចជា ដាក់ចេញ​នូវ​ដំណោះស្រាយ​លើ​បញ្ហា​រ៉ាំរ៉ៃ​នៃ​ការតវ៉ា​របស់​កម្មករ​កម្មការិនី​រោងចក្រ​កាត់ដេរ ជាដើម​។

១៥៩- សម្ដេច​តេ​ជោ ហ៊ុន សែន បញ្ជា​ឱ្យ​បញ្ឈប់​ការផ្ដាច់​មុខ​ផ្ដល់​សេវា​ទូរស័ព្ទ និង​អ៊ី​ន​ធើ​ណែ​ត នៅក្នុង​បុរី

​នៅក្នុង​ពិធី​ប្រគល់​សញ្ញាបត្រ​ជូន​និស្សិត​សាកលវិទ្យាល័យ​ពុទ្ធិ​សាស្ត្រ នា​ព្រឹក​ថ្ងៃទី​១៧ ខែសីហា សម្តេច តេ​ជោ ហ៊ុន សែន ក៏បាន​បញ្ជា​ឱ្យ​បញ្ឈប់​កុងត្រា​ផ្ដាច់មុខ រវាង​ក្រុមហ៊ុន​សេវា​ទូរស័ព្ទ និង​សេវា​អ៊ី​ន​ធើ​ណែ​ត ជាមួយ​ក្រុមហ៊ុន​បុរី​ផ្ទះល្វែង ដែល​បាន​បង្ក​ផល​លំបាក​យ៉ាងខ្លាំង ក្នុងការ​រស់នៅ​ប្រចាំថ្ងៃ​របស់​ប្រជាពលរដ្ឋ​រស់នៅក្នុង​បុរី ដោយសារ​បញ្ហា​មិនមាន​សេវា​ទូរស័ព្ទ និង​អ៊ិន​ធើ​ណែ​ត នៅក្នុង​បុរី​។

១៦០-​សម្តេច​តេ​ជោ ហ៊ុន សែន លើកទឹកចិត្ត​ឱ្យ​មេដឹកនាំ​ពិភពលោក បន្ត​យកចិត្តទុកដាក់​លើ​សុខុមាលភាព​ប្រជាជន និង​សុខភាព​សាធារណៈ ជា​អាទិភាព​ខ្ពស់បំផុត

​សម្តេច​តេ​ជោ ហ៊ុន សែន នាយករដ្ឋមន្ត្រី​នៃ​ព្រះរាជាណាចក្រ​កម្ពុជា នៅ​ថ្ងៃទី​១៨ ខែសីហា ក្នុងឱកាស​អញ្ជើញ​ទទួល​អំណោយ​វ៉ាក់សាំង​កូ​វីដ​-១៩ ប្រភេទ​ហ្វៃ​ស័​រ (Pfizer) សម្រាប់​កុមារ ចំនួន ៣០​ម៉ឺន​ដូ​ស ពី​ប្រជាជន និង​រដ្ឋាភិបាល​នៃ​ព្រះរាជាណាចក្រ​អេ​ស្ប៉ា​ញ នៅ​ទីស្តីការគណៈរដ្ឋមន្ត្រី បាន​ជំរុញ​លើកទឹកចិត្ត​ឱ្យ​មេដឹកនាំ​ពិភពលោក​ទាំងអស់ រួមគ្នា​បន្ត​យកចិត្តទុកដាក់​លើ​សុខុមាលភាព​ប្រជាជន និង​សុខភាព​សាធារណៈ​ជា​អាទិភាព​ខ្ពស់បំផុត ដើម្បី​ឆ្លើយតប​ប្រយុទ្ធ​ប្រឆាំងនឹង​ជំងឺឆ្លង​សាកល​កូ​វីត​១៩ ដែល​មិនទាន់មាន​សញ្ញា​ថា អាច​នឹង​រលាយបាត់​ពី​ផែនដី​នៅពេលណា​នោះ​។ តាម​បទពិសោធន៍​របស់​កម្ពុ​ជា សម្តេច​តេ​ជោ ចាត់ទុកថា វិធាន​ការចាក់​វ៉ាក់សាំង​កូ​វីត​១៩ នៅតែ​ជា​ជំរើស​ល្អ មិនអាច​មើលរំលង​បាន សម្រាប់​ថែរក្សា​អាយុជីវិត​ប្រជាជន ,​រក្សា​ប្រក្រតីភាព​នៃ​ដំណើរការ​សេដ្ឋកិច្ច និង​សង្គម​ឡើងវិញ បន្ទាប់ពី​រង​ផលប៉ះពាល់​យ៉ាងដំណំ​ពី​កូ​វីត​១៩​។​

១៦១- ភ្នំពេញ សាងសង់​ស្ពាន​អាកាស​ថ្មី ចំនួន ២​ទីតាំង​បន្ថែមទៀត ដើម្បី​ដោះស្រាយ​ការកកស្ទះ​ចរាចរណ៍

​រាជធានី​ភ្នំពេញ នឹង​សាងសង់​ស្ពាន​អាកាស​ថ្មី ចំនួន ២​ទីតាំង​បន្ថែមទៀត ដើម្បី​កាត់បន្ថយ​ភាព​កកស្ទះ​ចរាចរណ៍​។ ទីតាំង ដែល​ត្រូវ​សាង​សងស្ពាន​អាកាស​ទាំង ២​ទីតាំង​នោះ គឺ​នៅត្រង់ចំណុច​ស្តុ​ប​ស៊ិន​ជូ​រី ប្លា​ស្សា និង​ស្តុ​ប​ច្រមុះជ្រូក​ក្បាលថ្នល់​។ មកដល់ពេលនេះ នៅ​ភ្នំពេញ មាន​ស្ពាន​អាកាស​ចំនួន ៧​ទីតាំង រួមមាន​៖ ស្ពាន​អាកាស​ក្បាលថ្នល់ ស្ពាន​អាកាស​ស្ទឹងមានជ័យ ស្ពាន​អាកាស​៧​មករា ស្ពាន​អាកាស​៥​មករា ស្ពាន​អាកាស​ផ្សារ​ដី​ហុយ ស្ពាន​អាកាស​ចោមចៅ និង​ស្ពាន​អាកាស​កាត់​ផ្លូវជាតិ​លេខ​៥ ក្នុង​ខណ្ឌឫស្សីកែវ កំពុង​សាងសង់​។​

១៦២-​សម្តេច​តេ​ជោ ហ៊ុន សែន បញ្ជា​ឱ្យ​អាជ្ញាធរ និង​កងកម្លាំង​មាន​សមត្ថកិច្ច រក្សា​ភាពស្ងប់ស្ងាត់ ដោយ​ចាត់ទុក​ការជេរប្រមាថ​របស់លោក ខឹម វាសនា ជា​អន្ទាក់​នយោបាយ

​នា​ថ្ងៃទី​៣១ ខែសីហា​នេះ ក្នុងឱកាស​អញ្ជើញ​ជា​អធិបតី​សម្ពោធ​បើក​ការដ្ឋាន​សាងសង់​ស្ពាន​អាកាស​ថ្មី ២​កន្លែង នៅក្នុង​រាជធានី​ភ្នំពេញ សម្តេច​តេ​ជោ ហ៊ុន សែន នាយករដ្ឋមន្ត្រី បាន​ដាក់ចេញ​បទបញ្ជា​ឱ្យ​អាជ្ញាធរ និង​កងកម្លាំង​មាន​សមត្ថកិច្ច រក្សា​ភាពស្ងប់ស្ងាត់ ដោយ​ចាត់ទុក​ការជេរប្រមាថ​របស់លោក ខឹម វាសនា ប្រធាន​គណបក្ស​សម្ព័ន្ធ​ដើម្បី​ប្រជាធិបតេយ្យ LDP ជា​អន្ទាក់​នយោបាយ​។ យ៉ាងណាក៏ដោយ សម្តេច​តេ​ជោ ក៏បាន​ដាក់ចេញ​បទបញ្ជា​ដាច់​ណាត់ ឱ្យ​អាជ្ញាធរ និង​កងកម្លាំង​មាន​សមត្ថកិច្ច រក្សា​ឱ្យបាន​នូវ​កិច្ចការពារ​សន្តិសុខ បញ្ជៀ​ស​បាតដៃ​ទី​៣ និង​ទប់ស្កាត់​ឱ្យ​ខាន​តែ​បាន​នូវ​ការទន្ទ្រាន​កាន់កាប់​ដី​ដោយ​ខុសច្បាប់​ផងដែរ​។​

១៦៣- សម្ដេច​តេ​ជោ ហ៊ុន សែន ប្រកាស​សាងសង់​ស្ពាន​ថ្មី ៣​កន្លែង​ទៀត និង​សាងសង់​ផ្លូវ​ក្រោម​ដី​ជំនួស​ឱ្យ​ផ្លូវ​លើ​អាកាស នៅ​ភ្នំពេញ

​ក្នុងឱកាស​អញ្ជើញ​ជា​អធិបតី​បើក​ការដ្ឋាន​សាងសង់​ស្ពាន​អាកាស​ថ្មី ២​កន្លែង នៅ​រាជធានី​ភ្នំពេញ កាលពី​ព្រឹក​ថ្ងៃទី​៣១ ខែសីហា សម្តេច​តេ​ជោ ហ៊ុន សែន បានប្រកាសថា រាជរដ្ឋាភិបាល កំពុង​សិក្សា​លទ្ធភាព និង រៀបចំ​នីតិវិធី​សាងសង់​ស្ពាន​ថ្មី ៣​ទីតាំង​បន្ថែមទៀត ក៏ដូចជា​គ្រោង​សាងសង់​ផ្លូវ​ក្រោម​ដី ជំនួស​អោយ​ផ្លូវ​លើ​អាកាស នៅ​រាជធានី​ភ្នំពេញ នាពេល​អនាគត​។

១៦៤- ពលរដ្ឋ បាន​រំសាយ​ការជួបជុំ​ពី​ដីចំការ​លោក ខឹម វាសនា ហើយ នៅឡើយ​តែ​អ្នក​ស្ម័គ្រស្មោះ​តិចតួច ដែល​អាជ្ញាធរ កំពុង​ពិនិត្យ​តាមដាន​បន្ត

​គិត​ត្រឹម​ថ្ងៃទី​៦ ខែកញ្ញា អាជ្ញាធរ​ខេត្តសៀមរាប បានឱ្យដឹងថា ពលរដ្ឋ ដែល​បានមក​ប្រមូលផ្តុំ​ជួបជុំ​ក្នុង​ដីចំការ​លោក ខឹម វាសនា នៅ​ជើងភ្នំ​គូលែន ក្នុង​ខេត្តសៀមរាប ក្រោម​ហេតុផល​ខ្លាច​ពី​ទឹកជំនន់ ជន់​លិច​ផែនដី បាន​រំសាយ​ការជួបជុំ​ហើយ នៅឡើយ​តែម​នុស្ស​មួយចំនួន ដែលមាន​ជាង ១០០០​នាក់ មិន​ព្រម​ចាកចេញ​។ អ្នក​បន្ត​ស្នាក់នៅ​ចម្ការ​នោះ តាម​ការស្នើសុំ​របស់លោក ខឹម វាសនា អាជ្ញាធរ​ខេត្តសៀមរាប​អះអាងថា នឹងធ្វើ​អត្តសញ្ញាណ​កម្ម ឱ្យបាន​ត្រឹមត្រូវ​តាមផ្លូវ​ច្បាប់​។ ប៉ុន្តែ​តំណាង​លោក ខឹម វាសនា បាន​សរសេរ​លិខិត ស្នើ​សុំឱ្យ​អាជ្ញាធរ​សមត្ថកិច្ច អន្តរាគមន៍ ដេញ​អ្នក ដែល​មិនមែនជា​សមាជិក​គណបក្ស​សម្ព័ន្ធ​ដើម្បី​ប្រជាធិបតេយ្យ ជាង ១​ពាន់​នាក់ ដែល​មិន​ព្រម​ចាក​ចេញពី​ចំការ​របស់លោក ខឹម វាសនា ហើយ​បើក​របាំង ឈប់​បិទ​ខ្ទប់​ដីចំការ​នោះ​ទៀត​។​

១៦៥- សម្តេច​តេ​ជោ ហ៊ុន សែន ដាក់ចេញ​គោលនយោបាយ​គន្លឹះ ដោះស្រាយ​បញ្ហា​ពលរដ្ឋ​រស់នៅ​តំបន់​រមណីយដ្ឋាន​អង្គរ

​កាលពី​ថ្ងៃទី​១៣ ខែកញ្ញា សម្តេច​តេ​ជោ ហ៊ុន សែន បាន​ជួប​សំណេះសំណាល​ជាមួយ​ប្រជាពលរដ្ឋ រស់នៅ​តំបន់​១ និង​តំបន់​២ នៃ​រមណីយដ្ឋាន​អង្គរ ក្នុង​ខេត្តសៀមរាប ដែល​បាន​ស្ម័គ្រចិត្ត ទៅ​រស់នៅ​ទីតាំង​ថ្មី នៅ​តំបន់​រុន​តា​ឯក ក្នុងស្រុក​បន្ទាយស្រី​។ ក្នុង​ពិធី​នោះ សម្តេច​តេ​ជោ បានប្រកាស​ដាក់ចេញ​គោ​នយោបាយ​គន្លឹះ​ជាច្រើន សំដៅ​ដោះស្រាយ​បញ្ហា​ប្រឈម​របស់​ប្រជាពលរដ្ឋ មាន​ជាអាទិ៍ ផ្តល់​ថវិកា​, ការដឹកជញ្ជូន​សម្ភារៈ​ពី​ទីតាំង​ចាស់ ទៅ​ទីតាំង​ថ្មី ការកសាង​ផ្លូវ ប្រព័ន្ធ​លូ ទឹកស្អាត ភ្លើងអគ្គិសនី ប្រព័ន្ធ​សេវា​ទូរស័ព្ទ សាលារៀន មន្ទី​ពេទ្យ ក៏ដូចជា​ការផ្តល់​ប័ណ្ណ​ក្រីក្រ និង​ប័ណ្ណ​ទទួល​ថវិកា​ពី​កូ​វីត​ដ ១៩ ជូន​ប្រជាពលរដ្ឋ​ទាំងនោះ ជាដើម​។​

១៦៦- សម្តេច​តេ​ជោ ហ៊ុន សែន អញ្ជើញ​ចូលរួម​បុណ្យសព និង​គោរព​វិញ្ញាណក្ខន្ធ លោក អា​បេ

​កាលពី​ព្រឹក​ថ្ងៃ​អង្គារ ទី​២៧ ខែកញ្ញា សម្តេច​តេ​ជោ នាយករដ្ឋមន្ត្រី ហ៊ុន សែន បាន​អញ្ជើញ​ចូលរួម​ពិធី​បុណ្យសព​របស់លោក អា​បេ ស៊ិន​ហ្សូ អតីត​នាយករដ្ឋមន្ត្រី​ជប៉ុន ដែល​ត្រូវបាន​ខ្មាន់កាំភ្លើង​បាញ់សម្លាប់ កាលពី​ខែ​ដើមខែ​កក្កដា​កន្លងទៅ​។ ពិធីបុណ្យ​ថ្នាក់ជាតិ​នៅ​ទីក្រុង​តូ​ក្យូ​នេះ ត្រូវបាន​រៀបចំឡើង​យ៉ាង​អធិកអធម នៅ​ទីក្រុង​តូ​ក្យូ ដើម្បី​ជាការ​ផ្តល់​តម្លៃ និង​កិត្តិយស​ជូន​ដល់​សព​របស់លោក អា​បេ ដែលជា​មេដឹកនាំ​ដ៏​ល្បាញ​ល្បី​។​

១៦៧- សម្តេច​តេ​ជោ ហ៊ុន សែន បានប្រកាស​អនុវត្តន៍​វិធានការ​ក្តៅ ចំពោះ​អ្នករស់នៅ​តំបន់​អង្គរ ដែល​ជឿ​តាម​ការ​ញុះញុង​ពី​ជន​អគតិ មិន​ព្រម​ចាកចេញ

​ក្នុង​ពិធី​ចែក​សញ្ញាបត្រ​ដល់​និស្សិត​វិទ្យាស្ថាន​វ៉ាន់ដា​គណនេយ្យ កាលពី​ថ្ងៃ​ចន្ទ ទី​៣ ខែតុលា សម្តេច​តេ​ជោ នាយករដ្ឋមន្ត្រី ហ៊ុន សែន បានប្រកាសថា រាជរដ្ឋាភិបាល​កម្ពុជា នឹង​ដោះស្រាយ​បញ្ហា​នៅ​តំបន់​អង្គរ អោយបាន​ចប់សព្វគ្រប់ ដោយ​មិន​បន្ត​អង្គុយ​បក់ផ្សែង​ទៀត​ទេ​។ សម្តេច​ប្រមុខ​រាជរដ្ឋាភិបាល បានប្រកាស​អនុវត្តន៍​វិធានការ​ក្តៅ ចំពោះ​ពលរដ្ឋ​អ្នករស់នៅ​តំបន់​អង្គរ ដែល​ជឿ​តាម​ការ​ញុះ​ញ៉ុ​ង​ពី​ជន​អគតិ មិន​ព្រម​ចាកចេញ​។ សម្តេច​ព្រមាន​ថា នៅពេល​ប្រើ​វិធានការ​ក្តៅ​នោះ រាជរដ្ឋាភិបាល នឹងមិន​ផ្តល់​សំណង សូម្បីតែ ១​សេន​។ សម្តេច​សង្កត់ធ្ងន់ថា រាជរដ្ឋាភិបាល ត្រូវតែ​សង្គ្រោះ តាមរយៈ​ការបញ្ចប់​បញ្ហា​នៅ​តំបន់​អង្គរ ដោយ​មិន​បណ្តែតបណ្តោយ​រហូតដល់​អង្គរ ត្រូវ​ដកចេញ​ពី​បញ្ជី​របស់​អង្គការ យូ​នី​ស្កូ នោះទេ​។

១៦៨- សម្ដេច​តេ​ជោ ហ៊ុន សែន ជួប​ពិ​ក្សា​ការងារ​ជាមួយ​នាយករដ្ឋមន្ត្រី​គុយបា និង​អញ្ជើញ​ជា​សាក្សី​រួមគ្នា ក្នុង​ពិធី​ចុះហត្ថលេខា​លើ​ឯកសារ​សំខាន់ៗ​មួយចំនួន នៅថ្ងៃនេះ

​នាយករដ្ឋមន្ត្រី​គុយបា ឯកឧត្តម ម៉ា​នូ​អែល ម៉ា​រ៉េ​រ៉ូ គ្រុស បាន​អញ្ជើញ​មក​បំពេញ​ទស្សនកិច្ច ៣​ថ្ងៃ នៅ​កម្ពុជា នា​ថ្ងៃទី​៤ ដល់​ថ្ងៃទី​៦ ខែតុលា​។ នៅពេល​ចុះ​ពី​យន្តហោះ នៅ​រសៀល​ថ្ងៃទី​៤ ខែតុលា ឯកឧត្តម​នាយករដ្ឋមន្ត្រី​គុយបា បាន​អញ្ជើញ​ជួបពិភាក្សា​ការងារ​ជាមួយ​សម្ដេច​តេ​ជោ ហ៊ុន សែន នាយករដ្ឋមន្ត្រី​កម្ពុជា សំដៅ​រិះរក​យន្ត​ការរួម​ថ្មីៗ​បន្ថែមទៀត ក្នុងការ​រួមចំណែក​ព​ង្រឹ​ង​ទំនាក់ទំនង​កិច្ចសហប្រតិបត្តិការ​ទ្វេភាគី​លើ​គ្រប់​វិស័យ ដែលជា​ផលប្រយោជន៍​រួម សម្រាប់​ប្រជាជន និង​ប្រទេសជាតិ​ទាំងពីរ កម្ពុជា និង​សាធារណរដ្ឋ​គុយបា​។ ជាមួយគ្នានេះ សម្ដេច​តេ​ជោ ហ៊ុន សែន និង​ឯកឧត្តម នាយករដ្ឋមន្ត្រី​គុយបា ក៏បាន​អញ្ជើញ​ជា​អធិបតី ធ្វើជា​សាក្សី​រួមគ្នា ក្នុង​ពិធី​ចុះហត្ថលេខា​ទ្វេភាគី ដែលជា​អនុស្សរណៈ​រួមគ្នា រវាង​កម្ពុជា និង​គុយបា ផ្តោតលើ​វិស័យ​កីឡា អប់រំ និង​វប្បធម៌ ផងដែរ​។​

១៦៩- សម្ដេច​តេ​ជោ ប្រកាស​ឱ្យ​ប្រជាពលរដ្ឋ នៅ​ឃុំ​ព្រះ​ដាក់ រក្សា​ភាព​អត់ធ្មត់ ដោយ​រាជរដ្ឋាភិបាល គ្មាន​ផែនការ​បណ្ដេញ​ពលរដ្ឋ​ចេញ​នោះទេ

​ក្នុងឱកាស​អញ្ជើញ​ជា​អធិបតី​ចែករំលែក​ទស្សនទាន ក្នុង​វេទិកា​ស្ដីពី​ចក្ខុវិស័យ​ប្រ​ទេ​កម្ពុជា ឆ្នាំ​២០២២ កាលពី​ថ្ងៃទី​៦ ខែតុលា សម្តេច​តេ​ជោ ហ៊ុន សែន បានប្រកាស​អំពាវនាវ ឱ្យ​ប្រជាពលរដ្ឋ ដែល​បាន​ប្រមូលផ្តុំ​តវ៉ា​នៅក្នុង​ឃុំ​ព្រះ​ដាក់ ស្រុក​បន្ទាយស្រី ខេត្តសៀមរាប កាលពី​ថ្ងៃទី​៥ ខែតុលា សូម​រក្សា​ភាព​អត់ធ្មត់ និង​ស្ងប់ស្ងាត់​។ សម្ដេច​តេ​ជោ បញ្ជាក់​ច្បាស់ៗ​ថា រាជរដ្ឋាភិបាល​កម្ពុជា គ្មាន​ផែនការ​បណ្ដេញ​ប្រជាពលរដ្ឋ នៅ​ឃុំ​ព្រះ​ដាក់ ឱ្យ​ចេញទៅ​រស់នៅក្នុង​តំបន់​ណាមួយ​ផ្សេង​ឡើយ​។​

១៧០- សម្តេច​តេ​ជោ ហ៊ុន សែន បញ្ជាក់ថា ការសម្រេច​ដក​រដ្ឋមន្ត្រី​ក្រសួងកសិកម្ម រុក្ខាប្រមាញ់ និង​នេសាទ គឺ​មិន​ខុស​រដ្ឋធម្មនុញ្ញ​នោះទេ​

​នៅក្នុង​ពិធី​បិទ​សន្និបាត​កាយរឹទ្ធិ​ជាតិ​កម្ពុជា អាណត្តិ​ទី​៤ កាលពី​រសៀល​ថ្ងៃទី​១០ ខែតុលា សម្តេច​តេ​ជោ ហ៊ុន សែន បាន​បញ្ជាក់ថា ការសម្រេច​ដក​រដ្ឋមន្ត្រី​ក្រសួងកសិកម្ម រុក្ខាប្រមាញ់ និង​នេសាទ លោក វេ​ង សាខុន កាលពី​ថ្ងៃទី​៨ ខែតុលា គឺ​មិន​ខុស​នឹង​រដ្ឋធម្មនុញ្ញ​នោះទេ​។​

១៧១-​សម្ដេច​តេ​ជោ ហ៊ុន សែន ស្នើ​តែងតាំង​លោក វេ​ង សាខុន អតីតរដ្ឋមន្ត្រី​ក្រសួង​កសិកម្ម ជា​រដ្ឋមន្ត្រី​ប្រតិភូ​អម​នាយករដ្ឋមន្ត្រី

​សម្ដេច​តេ​ជោ ហ៊ុន សែន នាយករដ្ឋមន្ត្រី​កម្ពុជា ក្នុងឱកាស​អញ្ជើញ​ចែក​សញ្ញាបត្រ​ដល់​និស្សិត​ជ័យលាភី​សាកលវិទ្យាល័យ​ភ្នំពេញ​អន្តរជាតិ កាលពី​ព្រឹក​ថ្ងៃទី​១១ ខែតុលា បានប្រកាស​ពី​គម្រោង ក្នុងការ​ទូលថ្វាយ​ព្រះមហាក្សត្រ ដើម្បី​តែងតាំង​លោក វេ​ង សាខុន អតីតរដ្ឋមន្ត្រី​ក្រសួង​កសិកម្ម ជា​រដ្ឋមន្ត្រី​ប្រតិភូ អម​នាយករដ្ឋមន្ត្រី​។ ការតែងតាំង​នេះ បានធ្វើ​ឡើង បន្ទាប់ពី​លោក វេ​ង សាខុន ត្រូវបាន​ព្រះមហាក្សត្រ ចេញ​ព្រះរាជក្រឹត្យ​បញ្ចប់​មុខតំណែង​ឯកឧត្តម ពី​រដ្ឋមន្ត្រី​ក្រសួងកសិកម្ម កាលពី​ថ្ងៃ​សៅរ៍ ទី​៨ ខែតុលា​កន្លងទៅ​។ ក្រៅពី​ប្រកាស​តែងតាំង​លោក វេ​ង សាខុន ជា​រដ្ឋមន្ត្រី​ប្រតិភូ អម​នាយករដ្ឋមន្ត្រី​សម្ដេច​តេ​ជោ ក៏បាន​បញ្ជាក់​ជា​ផ្លូវការ​ពី​មូលហេតុ​នៃ​ការបញ្ចប់​តំណែង​លោក វេ​ង សាខុន ពី​រដ្ឋមន្ត្រី​ក្រសួងកសិកម្ម ដោយសារតែ​លោក មិន​ធ្វើតាម​ការចង់បាន​រប​ស់ស​ម្តេច​។​

១៧២- សម្តេច​តេ​ជោ ហ៊ុន សែន ប្រកាស​ជោគជ័យ​លើ​ការប្តឹង​ប្រឆាំង​លោក សម រង្ស៊ី នៅ​តុលាការ​បារាំង ជុំវិញ​មរណភាព​លោក ហុក ឡង់ឌី

​សម្ដេច​តេ​ជោ ហ៊ុន សែន នាយករដ្ឋមន្ត្រី ក្នុង​ពិធី​ប្រគល់​សញ្ញាបត្រ ជូន​និស្សិត​សាកលវិទ្យាល័យ​ភ្នំពេញ​អន្តរជាតិ (PPIU) កាលពី​ថ្ងៃទី​១១​តុលា បានប្រកាស​ពី​ភាពជោគជ័យ​ជុំវិញ​ការដាក់​ពាក្យបណ្ដឹង​លោក សម រង្ស៊ី អតីត​មេដឹកនាំ​គណបក្សប្រឆាំង ជុំវិញ​មរណភាព​លោក ហុក ឡង់ឌី នៅ​តុលាការ​ប្រទេស​បារាំង​។ សម្ដេច ហ៊ុន សែន ផ្អែក​តាម​សាលក្រម​តុលាការ​ទីក្រុង​ប៉ារីស ប្រទេស​បារាំង បាន​អះអាងថា តុលាការ បា​នរក​ភាព​ស្អាតស្អំ​ឱ្យ​សម្តេច ដោយ​មិន​ជាប់​ពាក់ព័ន្ធ​នឹង​ករណី​ស្លាប់​របស់លោក ហុក ឡង់ឌី ដោយសារ​ការធ្លាក់​ឧទ្ធម្ភាគចក្រ កាលពី​ឆ្នាំ​២០០៨ នោះទេ​។ សម្ដេច ហ៊ុន សែន បាន​បន្ថែមថា នៅក្នុង​សវនាការ​បារាំង​នោះ លោក សម រង្ស៊ី គ្មាន​ភស្តុតាង​អ្វី​ចោទ​មក​សម្ដេច ជុំវិញ​ករណី​មរណភាព​លោក ហុក ឡង់ឌី ឡើយ​។​

១៧៣-​ទឹកជំនន់ បង្ក​ផលប៉ះពាល់​ដល់ ២៣​ខេត្ត និង​មាន​ប្រជាជន​ជាង ៤​ពាន់​គ្រួសារ ត្រូវ​ជម្លៀស ទៅកាន់​ទីទួល​សុវត្ថិភាព

​យ៉ាង​ណោ​ចណាស់ មាន ២៣​ខេត្តហើយ បាន​រង​ផលប៉ះពាល់​ពី​ជំនន់​ទឹកភ្លៀង និង​មាន​ប្រជាជន​ប្រមាណ ៤៥៥៦​គ្រួសារ ដែល​ស្មើនឹង​ជាង ២​ម៉ឺន​នាក់ ត្រូវបាន​ជម្លៀស​ពី​ផ្ទះ​លិច​ទឹក ទៅកាន់​ទីទួល​សុវត្ថិភាព​។ ក្នុងនោះ ទឹកជំនន់ ក៏បាន​លិច​ដំណាំ​ស្រូវ​ប្រមាណ​ជាង ១៩​ម៉ឺន​ហិកតា ផងដែរ​។

១៧៤-​សម្តេច​តេ​ជោ ហ៊ុន សែន និង​សម្តេច​កិត្តិ​ព្រឹទ្ធ​បណ្ឌិត ចូលរួម​រំលែក​ទុក្ខ​ក្រុមគ្រួសារ​ក្មេងៗ ជនរងគ្រោះ​ក្នុង​ឧបទ្ទវហេតុ​លិច​ទូក​ចម្លង នៅ​ខេត្តកណ្តាល

​សម្តេច​តេ​ជោ ហ៊ុន សែន និង​សម្តេច​កិត្តិ​ព្រឹទ្ធ​បណ្ឌិត កាលពី​ថ្ងៃទី​១៤ ខែតុលា បានប្រកាស ចូលរួម​រំលែក​ទុក្ខ​ដល់​ក្រុមគ្រួសារ​សិស្សសាលា ដែលជា​ជនរងគ្រោះ ក្នុង​ឧបទ្ទវហេតុ​លិច​ទូក​ចម្លង កាលពី​យប់​ថ្ងៃទី​១៣ ខែតុលា នៅក្នុង​ឃុំ​កំពង់​ភ្នំ ស្រុក​លើកដែក ខេត្តកណ្តាល​។ ហេតុការណ៍​នោះ មាន​កុមារ ជា​សិស្ស​ជំទង់ ១១​នាក់ បាន​ស្លាប់​។

១៧៥- ព្រះមហាក្សត្រ ចេញ​ព្រះរាជក្រឹត្យ តែងតាំង​លោក ឌិ​ត ទីណា ជា​រដ្ឋមន្ត្រី​ក្រសួងកសិកម្ម រុក្ខាប្រមាញ់ និង​នេសាទ​

​កាលពី​ព្រឹក​ថ្ងៃទី​១៤ ខែតុលា រដ្ឋសភា​បាន​បើក​កិច្ចប្រជុំពេញអង្គ ដើម្បី​បោះឆ្នោត ផ្តល់​សេចក្តីទុកចិត្ត​ជូន​លោក ឌិ​ត ទីណា រដ្ឋមន្ត្រី​ក្រសួងកសិកម្ម រុក្ខាប្រមាញ់ និង​នេសាទ​។ សមាជិក​រដ្ឋសភា ដែលជា​អ្នកតំណាងរាស្ត្រ ១១១​រូប រួមទាំង​សម្តេច​តេ​ជោ ហ៊ុន សែន ផង បាន​បោះឆ្នោត​ជាសម្ងាត់ ដោយ​គាំទ្រ​ជា​ឯកច្ឆន្ទ ក្នុង​សំឡេង ១១១ លើ ១១១​សំឡេង​។ ប៉ុន្មាន​ម៉ោង​ក្រោយពី​រដ្ឋសភា ប្រជុំ​បោះឆ្នោត​រួចមក គឺ​នៅ​រសៀល​ថ្ងៃទី​១៤ ខែតុលា ព្រះមហាក្សត្រ សម្តេចព្រះ​បរមនាថ នរោត្តម សីហមុនី បានចេញ​ព្រះរាជក្រឹត្យ តែងតាំង​មុខតំណែង​លោក ឌិ​ត ទីណា ជា​រដ្ឋមន្ត្រី​ក្រសួងកសិកម្ម រុក្ខាប្រមាញ់ និង​នេសាទ ជំនួស​លោក វេ​ង សាខុន ដែល​ត្រូវបាន​ដកតំណែង កាលពី​ថ្ងៃទី​៨ ខែតុលា​។​

១៧៦- សម្តេច​តេ​ជោ ហ៊ុន សែន ណែនាំ​មន្ត្រី​ក្រសួងកសិកម្ម និង​អាជ្ញាធរខេត្ត អន្តរាគមន៍​ដោះស្រាយ​បន្ទាន់ ជួយ​ប្រជាពលរដ្ឋ​រងគ្រោះ​ដោយសារ​ទឹកជំនន់

​ក្នុង​កម្មវិធី​ប្រគល់​សញ្ញាបត្រ​ជូន​និស្សិត​ជ័យលាភី​សាកលវិទ្យាល័យ​ជាតិ​គ្រប់គ្រង នៅ​ថ្ងៃទី​១៧ ខែតុលា សម្តេច​តេ​ជោ ហ៊ុន សែន ក៏បាន​ណែនាំ​សាជាថ្មី​ដល់​មន្ត្រី​ក្រសួងកសិកម្ម អាជ្ញាធ​ខេត្ត និង​មន្ត្រី​គណៈកម្មាធិការ​ជាតិ​គ្រប់គ្រង​គ្រោះមហន្តរាយ ត្រូវ​រួមគ្នា ដោះស្រាយ​ជាបន្ទាន់ ជួយ​ប្រជាពលរដ្ឋ​រងគ្រោះ​ដោយសារ​ទឹកជំនន់ តាមរយៈ​ការផ្តល់​ពូជស្រូវ និង​ពូជ​ដំណាំ​រួមផ្សំ ដោយ​មិនត្រូវ បណ្តែតបណ្តោយ​នោះឡើយ​។ ជាមួយគ្នានេះ សម្ត​ច​នាយករដ្ឋមន្ត្រី ក៏បាន​សំណូមពរ អោយ​ធនាគារ និង​គ្រឹះស្ថាន​មីក្រូហិរញ្ញវត្ថុ​ទាំងអស់ យោគយល់ និង​ជួយ​សម្រួល​អត្រា​ការប្រាក់ ជូន​ពលរដ្ឋ ដែល​រង​ផលប៉ះពាល់ ដោយ​ទឹកជំនន់​ផងដែរ​។ សេចក្តីណែនាំ និង​ការអំពាវនាវ​នេះ បានធ្វើ​ឡើង ខណៈដែល​រដ្ឋមន្ត្រី​ថ្មី ក្រសួងកសិកម្ម លោក ឌិ​ត ទីណា ត្រូវបាន​ប្រកាស​ចូលកាន់​តំណែង ជំនួស​លោក វេ​ង សាខុន កាលពី​រសៀល​ថ្ងៃទី​១៧ ខែតុលា​។​

១៧៧- សម្តេច​តេ​ជោ គ្រោង​ចុះ​តាម​ខេត្ត សួរសុខទុក្ខ និង​ដោះស្រាយ​បញ្ហា​ជូន​ពលរដ្ឋ​រងគ្រោះ​ដោយសារ​ទឹកជំនន់ នៅ​ជុំវិញ​បឹង​ទន្លេសាប

​កាលពី​ខែតុលា សម្តេច​តេ​ជោ ហ៊ុន សែន បានប្រកាស​ពី​គម្រោង​របស់​សម្តេច អញ្ជើញ ធ្វើដំណើរ​ទៅកាន់​ខេត្ត​ចំនួន​៤ នៅ​ជុំវិញ​បឹង​ទន្លេសាប ដើម្បី​ជួប និង​ដោះស្រាយ​បញ្ហា​ជូន​ពលរដ្ឋ ដែល​រងគ្រោះ​ដោយសារ​ទឹកជំនន់​។ បេសកកម្ម​នេះ បានចាប់ផ្តើម​នៅ​ថ្ងៃ​២០​តុលា មុនគេ នៅ​ខេត្តសៀមរាប ដោយ​សម្តេច​តេ​ជោ ចំណាយពេល ៥​ថ្ងៃ ៤​យប់ មុននឹង​បន្តទៅ​កាន់​ខេត្តបន្ទាយមានជ័យ បាត់ដំបង និង​ខេត្តពោធិ៍សាត់​។​

១៧៨-​ប្រធានាធិបតី ទី​ម័​រ​ឡេ​ស្តេ ផ្តើម​បំពេញ​ទស្សនកិច្ច​រយៈពេល ៣​ថ្ងៃ នៅ​កម្ពុជា ចាប់ពី​ថ្ងៃទី​១៩ ខែតុលា

​កាលពី​ថ្ងៃទី​១៩ ខែតុលា ប្រធានាធិបតី​ទី​ម័​រ​ឡេ​ស្តេ ឯកឧត្តម ចូ​ហ្សេ ម៉ា​នូ​អែល រ៉ា​មូស អរ​តា បានចាប់ផ្តើម​បំពេញ​ទស្សនកិច្ច​ផ្លូវការ រយៈពេល ៣​ថ្ងៃ នៅ​កម្ពុជា​។ ក្នុង​រយៈពេល ៣​ថ្ងៃ​នៃ​ដំណើរ​បំពេញ​ទស្សនកិច្ច​ផ្លូវរដ្ឋ​របស់ខ្លួន នៅ​កម្ពុជា ប្រធានាធិបតី​ទី​ម័​រ​ឡេ​ស្តេ ចូល​ក្រាបបង្គំ​គាល់​ព្រះមហាក្សត្រ​កម្ពុជា ជួបពិភាក្សា​ការងារ​ជាមួយ​សម្តេច​ប្រធានព្រឹទ្ធសភា សម្តេច​ប្រធានរដ្ឋសភា សម្តេច​តេ​ជោ ហ៊ុន សែន នាយករដ្ឋមន្ត្រី និង​ជួប​ឯកឧត្តម ហ៊ុន ម៉ា​ណែ​ត មេបញ្ជាការ​កងទ័ពជើងគោក ក៏ដូចជា អញ្ជើញ​ធ្វើ​បាឋកថា​ជា​សាធារណៈ នៅ​សាកលវិទ្យាល័យ​ល្បីៗ នៅ​រាជធានី​ភ្នំពេញ ព្រមទាំង​អញ្ជើញ​ថ្លែង​សុន្ទរកថា នៅក្នុង​វេទិកា​កម្ពុជា​-​ទី​ម័​រ​ខាងកើត និង​អញ្ជើញ​ជា​អ​ធីប​តី​សាក្សី​ជាមួយ​សម្តេច​តេ​ជោ ហ៊ុន សែន ក្នុង​ពិធី​ចុះហត្ថលេខា លើ​ឯកសារ​ទ្វេភាគី​សំខាន់ៗ​មួយចំនួន ដើម្បី​ពង្រឹងពង្រីក​ទំនាក់ទំនង​រវាង​កម្ពុ​ជា និង​ទី​ម័​រ​ខាងកើត ផងដែរ​។​

១៧៩-​សម្តេច​តេ​ជោ ហ៊ុន សែន អញ្ជើញ​ប្តូរ​ព័ត៌មាន​ថ្ងៃខែ​ឆ្នាំ​កំណើត ក្នុង​បញ្ជី​ឈ្មោះ​បោះឆ្នោត

​កាលពី​ថ្ងៃទី​២០ ខែតុលា សម្តេច​តេ​ជោ ហ៊ុន សែន បាន​អញ្ជើញ​ទៅ​ប្តូរ​ព័ត៌មាន​ថ្ងៃខែ​ឆ្នាំ​កំណើត ក្នុង​បញ្ជី​ឈ្មោះ​បោះឆ្នោត នៅ​សាលាសង្កាត់​តាខ្មៅ ក្រុង​តាខ្មៅ ខេត្តកណ្ដាល ដោយ​ប្តូរ​ពីថ្ងៃ​ទី​០៤ ខែមេសា ឆ្នាំ​១៩៥១ ទៅ​ថ្ងៃទី​០៥ ខែសីហា ឆ្នាំ​១៩៥២ វិញ​។ សម្តេច​តេ​ជោ ក៏បាន​ប្រកាស​អំពាវនាវ​ឱ្យ​ប្រជាពលរដ្ឋ​ខ្មែរ គ្រប់​អាយុ​បោះឆ្នោត គឺ​អាយុ ១៨​ឆ្នាំ​ឡើងទៅ សូម​ទៅ​ចុះឈ្មោះ​បោះឆ្នោត និង​ពិនិត្យ​ឈ្មោះ​បោះឆ្នោត នៅតាម​សាលាឃុំ​សង្កាត់ ដែល​ខ្លួន​រស់នៅ ចាប់ពី​ថ្ងៃទី​២០ ខែតុលា រហូតដល់​ថ្ងៃទី​៨ ខែធ្នូ ឆ្នាំ​២០២២​។​

១៨០-​សម្ដេច​តេ​ជោ ហ៊ុន សែន ប្រកាស​ផ្តល់​ប័ណ្ណកម្មសិទ្ធិ​ស្របច្បាប់​ជូន​ពលរដ្ឋ ដែល​បាន​ស្ម័គ្រចិត្ត​រើចេញ​ពី​តំបន់​អង្គរ ដោយ​មិន​រង់ចាំ ៥​ឆ្នាំ ដូច​មុន​ឡើយ

​នៅ​ថ្ងៃទី​២១ ខែតុលា សម្ដេច​តេ​ជោ ហ៊ុន សែន នាយករដ្ឋមន្ត្រី​កម្ពុជា បានប្រកាស​ផ្ដល់នូវ​ប័ណ្ណ​កម្ម​ដីធ្លី​សិទ្ធិ​ស្របច្បាប់​ជូន​ពលរដ្ឋ អតីត​អ្នក​រស់នៅក្នុង​តំបន់​អង្គរ ដែល​បាន​ស្ម័គ្រចិត្ត ចាក​ចេញមក​រស់នៅ​តំបន់​ថ្មី នៅក្នុង​ឃុំ​រុន​តា​ឯក ដោយ​មិន​រង់ចាំ​រហូតដល់ ៥​ឆ្នាំ ក្នុងនាម​ជា​អ្នកកាន់កាប់​ដី​សម្បទាន​សង្គមកិច្ច​នោះទេ​។ ក្រៅពី​ប្រកាស​ផ្ដល់​ប័ណ្ណកម្មសិទ្ធិ​ស្របច្បាប់​ជូន​ពលរដ្ឋ​ហើយ​នោះ សម្ដេចនាយក​រដ្ឋមន្ត្រី​ហ៊ុនសែន នៅថ្ងៃនេះ ក៏បាន​ប្រកាស​រុះរើ​សាលាស្រុក​បន្ទាយស្រី បច្ចុប្បន្ន​មក នៅក្នុង​ឃុំ​រុន​តា​ឯក នឹង​រុះរើ​សាលាស្រុក​អង្គរធំ បច្ចុប្បន្ន​មក​នៅ​តំបន់​ពាក់​ស្នែង​វិញ​។ រីឯ​ឃុំ​ព្រះ​ដាក់ ក្នុងស្រុក​បន្ទាយស្រី នៅ​បន្ត​រក្សា​ដូចដើម​ដដែល​តែ​ហាមឃាត់ មិន​ឲ្យ​សាងសង់​សំណង់​ថ្មី ដែល​ផ្ទុយ​ពី​គោលការណ៍​អនុញ្ញាត​របស់​អាជ្ញាធរ​ជាតិ​អប្សរា​។

១៨១- សម្តេច​តេ​ជោ ហ៊ុន សែន ណែនាំ​មន្ត្រី​ពាក់ព័ន្ធ​ទាំងអស់ រួមគ្នា​បន្ត​ចុះជួយ​ពលរដ្ឋ​រងគ្រោះ​ដោយ​ទឹកជំនន់ និង​ពិនិត្យ​លទ្ធភាព​ផលិត​ពូជស្រូវ

​ក្នុងឱកាស​អញ្ជើញ​ជួប​សំណេះសំណាល សួរសុខទុក្ខ និង​ដោះស្រាយ​បញ្ហា​ជូន​ពលរដ្ឋ ដែល​រង​ផលប៉ះពាល់​ដោយ​ជំនន់​ទឹកភ្លៀង​ជាង ១​ម៉ឺន ១​ពាន់​គ្រួសារ នៅ​ខេត្តបាត់ដំបង កាលពី​ព្រឹក​ថ្ងៃទី​២៤ ខែតុលា សម្តេច​តេ​ជោ ហ៊ុន សែន នាយករដ្ឋមន្ត្រី​កម្ពុជា បាន​ជំរុញ​ឱ្យ​មន្ត្រី​ពាក់ព័ន្ធ​ទាំងអស់ រួមគ្នា បន្ត​ចុះជួយ​ពលរដ្ឋ​រងគ្រោះ​ដោយ​ទឹកជំនន់​បន្តទៀត​។ បន្ថែម​លើសពីនេះ ក្រសួងកសិកម្ម ក៏ត្រូវ​នាំមុខ ក្នុងការ​ពិនិត្យ​លទ្ធភាព​ផលិត​ពូជស្រូវ ទុក​ជូន​ប្រជាកសិក​បន្ថែម​ផងដែរ​។

១៨២- សម្តេច​តេ​ជោ ហ៊ុន សែន អបអរសាទរ​ឯកឧត្តម ស៊ី ជីន​ពីង ដែល​ជាប់ឆ្នោត​ជាថ្មី ជា​អគ្គលេខាធិការ​គណបក្ស​កុម្មុយនីស្ត​ចិន

​សម្តេច​តេ​ជោ ហ៊ុន សែន នាយករដ្ឋមន្ត្រី​នៃ​កម្ពុជា និង​ជា​ប្រធាន​គណបក្ស​ប្រជាជន​កម្ពុជា កាលពី​ថ្ងៃទី​២៣ ខែតុលា បាន​ផ្ញើ​សារ​អបអរសាទរ​ជូន​ឯកឧត្តម ស៊ី ជីន​ពីង ដែល​ជាប់ឆ្នោត ជា​អគ្គលេខាធិការ​គណបក្ស​កុម្មុយនីស្ត​ចិន​ជាថ្មី នៅក្នុង​សមាជជាតិ​របស់​គណបក្ស​កុម្មុយនីស្ត​ចិន លើក​ទី​២០​។ ក្នុង​សារលិខិត សម្តេច​តេ​ជោ ហ៊ុន សែន បាន​លើកឡើងថា ការបិទ​បញ្ចប់​ដោយ​ជោគជ័យ នៃ សមាជជាតិ លើក​ទី​២០ នៃ​គណបក្ស​កុម្មុយនីស្ត​ចិន នឹង​ផ្ដល់​កម្លាំង​ថ្មី ដល់​ការកសាង​ប្រទេស​ចិន ក្លាយជា​ប្រទេស​សង្គមនិយម​ទំនើប​។​

១៨៣- សម្ដេច​តេ​ជោ ហ៊ុន សែន គាំទ្រ​អ៊ុយ​ក្រែ​ន ប្រឆាំង​ការឈ្លានពាន តែ​បន្ត​ជំរុញ​លើកទឹកចិត្ត​ឱ្យមាន​ការចរចា​

​កាលពី​រសៀល​ថ្ងៃទី​១ ខែវិច្ឆិកា សម្ដេច​តេ​ជោ ហ៊ុន សែន នាយករដ្ឋមន្ត្រី​កម្ពុជា និង​ជា​ប្រធាន​អាស៊ាន ក្នុងជំនួប​តាម​ទូរ​សព្ទ​ជាមួយ​ឯកឧត្តម​ប្រធានាធិបតី​អ៊ុយ​ក្រែ​ន សម្តេច​បានបញ្ជាក់​នូវ​ជំហរ​របស់​កម្ពុជា​សាជាថ្មី​ម្ដងទៀត គឺ​កម្ពុជា​គោរព​គោលការណ៍ ដែល​មានចែង​ក្នុង​ធម្មនុញ្ញ​អង្គការសហប្រជាជាតិ និង​ច្បាប់​អន្តរជាតិ ប្រឆាំងនឹង​ការឈ្លានពាន ការគំរាមកំហែង ឬ​ការប្រើប្រាស់​កម្លាំង​លើ​អធិបតេយ្យភាព​បូរណភាព​ដែនដី​របស់​រដ្ឋ​ឯករាជ្យ និង​មិន​គាំទ្រ​ដល់​ការ​បំបែក​រដ្ឋ ឬ​ការទន្ទ្រាន​យក​ទឹកដី​ពី​ប្រទេស​ណាមួយ​នោះឡើយ​។ ទោះជា​យ៉ាងនេះ​ក្តី សម្ដេចនាយក​រដ្ឋមន្ត្រី​កម្ពុជា និង​ជា​ប្រធាន​អាស៊ាន ក៏​នៅតែ​ទទូច​ឲ្យ​ភាគី​ទំនាស់​ស្រួចស្រាវ​ទាំងពីរ អ៊ុយ​ក្រែ​ន និង​រុស្ស៊ី ស្វែងរក​កិច្ចចរចា ដើម្បី​បញ្ចប់​ស្ថាន​ភាពលំបាក​ស្មុគស្មាញ​នាពេល​បច្ចុប្បន្ន ដែល​បង្ក​ពី​សង្គ្រាម​។

១៨៤- សម្តេច​តេ​ជោ ហ៊ុន សែន និង​មេដឹកនាំ​អាស៊ាន ជួបប្រជុំ​ជាមួយ​អន្តរ​សភា​អាស៊ាន

​កាលពី​រសៀល​ថ្ងៃទី​១០ ខែវិច្ឆិកា ថ្នាក់ដឹកនាំ​ប្រទេស​សមាជិក​អាស៊ាន ដឹកនាំ​ដោយ​សម្តេច​តេ​ជោ ហ៊ុន សែន ជា​ប្រធាន​អាស៊ាន​ប្តូរ​វេន បាន​អញ្ជើញ​ចូលរួម​ប្រជុំ​ជាមួយ​ថ្នាក់ដឹកនាំ​អន្តរ​សភា​អាស៊ាន ហៅ​កាត់​ថា អាយ​ប៉ា (AIPA)​។ ជំនួប​ប្រចាំឆ្នាំ​រវាង​ថ្នាក់ដឹកនាំ​អាស៊ាន និង​ថ្នាក់ដឹកនាំ​សភា​អាស៊ាន​អាយ​ប៉ា បានរៀបចំ​ធ្វើ នៅ​សណ្ឋាគារ​សុខា​ភ្នំពេញ មុន​កិច្ចប្រជុំ​កំពូល​អាស៊ាន និង​កិច្ចប្រជុំ​ពាក់ព័ន្ធ លើក​ទី​៤០ និង​លើក​ទី​៤១ ដែល​កម្ពុជា​ធ្វើជា​ម្ចាស់ផ្ទះ​។ កិច្ចប្រជុំ​កំពូល​អាស៊ាន ប្រារព្ធ​ពិធី​បើក​ជា​ផ្លូវការ កាលពី​ព្រឹក​ថ្ងៃទី​១១ ខែវិច្ឆិកា​។ រីឯ​កិច្ចប្រជុំ​កំពូល​អាស៊ាន និង​ប្រទេស​ដៃគូ​អាស៊ាន បានធ្វើ​ឡើងជា​បន្តបន្ទាប់ ចាប់ពី​រសៀល​ថ្ងៃទី​១១​វិច្ឆិកា រហូតដល់​ថ្ងៃទី​១៣ ខែវិច្ឆិកា​។​

១៨៥- អ្នកសារព័ត៌មាន​ជាតិ និង​អន្តរជាតិ ប្រមាណ​ជិត ២​ពាន់​នាក់ ចូលរួម​យក​ព័ត៌មាន ក្នុង​កិច្ចប្រជុំ​កំពូល​អាស៊ាន និង​កិច្ចប្រជុំ​ពាក់ព័ន្ធ នៅ​ភ្នំពេញ

​អ្នកសារព័ត៌មាន​ជាតិ និង​អន្តរជាតិ ប្រមាណ​ជាង ១៧០០​នាក់ បាន​ចុះឈ្មោះ ចូលរួម​យក​ព័ត៌មាន ក្នុង​កិច្ចប្រជុំ​កំពូល​អាស៊ាន និង​កិច្ចប្រជុំ​ពាក់ព័ន្ធ នៅ​រាជធានី​ភ្នំពេញ​។ ដើម្បី​ធានា​ដល់​ដំណើរការ​ផ្សព្វផ្សាយ​អំពី​កិច្ចប្រជុំ​ឲ្យ​ប្រព្រឹត្ត​ទៅដោយ​រលូន និង​ទទួលជោគជ័យ ក្រសួង​ព័ត៌មាន បានរៀបចំ​មណ្ឌល​ព័ត៌មាន នៅ​សណ្ឋាគារ សុខា ភ្នំពេញ ដែលជា​កន្លែង​រៀបចំ​កិច្ចប្រជុំ ដោយ​ផ្តល់​សេវា​អ៊ី​ន​ធឺ​ណែ​ត ផ្តល់ព័ត៌មាន​អំពី​កិច្ចប្រជុំ ទាំង​ខ្លឹមសារ ទាំង​រូបភាព និង​ផ្តល់​អាហារ ដល់​អ្នកសារព័ត៌មាន ជាដើម​។

១៨៦- ផ្លូវ​ល្បឿន​លឿន ភ្នំពេញ​-​ព្រះសីហនុ ដាក់ឱ្យ​ប្រើប្រាស់ ខណៈ​ផ្លូវ​ល្បឿន​លឿនទី​២ ត​ភ្ជាប់​ពី​ភ្នំពេញ​-​បាវិត គ្រោង​សាងសង់ នៅ​ឆ្នាំ​២០២៣

​កាលពី​ថ្ងៃទី​១ ខែតុលា ផ្លូវ​ល្បឿន​លឿន ភ្នំពេញ​-​ក្រុងព្រះសីហនុ ត្រូវបាន​ដាក់ឱ្យ​ប្រើប្រាស់​សាកល្បង ដោយ​ឥតគិតថ្លៃ រយៈពេល ១​ខែ​។ ចាប់ពី​ថ្ងៃទី​១​វិច្ឆិកា ផ្លូវ​ល្បឿន​លឿន​នេះ គិតថ្លៃ​ពី​អ្នកដំណើរ​។ ដោយឡែក កាលពី​ថ្ងៃទី​១០​វិច្ឆិកា លោក​ទេសរដ្ឋមន្ដ្រី ស៊ុន ចាន់ថុល រដ្ឋមន្ដ្រីក្រសួង​សាធារណការ និង​ដឹកជញ្ជូន និង​ភាគី​ក្រុមហ៊ុន សាជីវកម្ម​ស្ពាន និង​ថ្នល់​ចិន (CRBC) បាន​ចុះហត្ថលេខា​រួមគ្នា​មួយ លើ​កិច្ចព្រមព្រៀង ស្ដីពី គម្រោង​សាងសង់​ផ្លូវ​ល្បឿន​លឿន ត​ភ្ជាប់​ពី​ភ្នំពេញ​ទៅ​ក្រុង​បាវិត​។ តាមរយៈ​កិច្ចព្រមព្រៀង​នេះ គម្រោង​សាងសង់​ផ្លូវ​ល្បឿន​លឿន ភ្នំពេញ​-​បាវិត នៅ​ឆ្នាំ​២០២៣ ដោយ​ត្រូវ​ចំណាយ​ថវិកា​សាងសង់​ប្រមាណ ១៦៣៨ លាន​ដុល្លារ​អាម៉េរិក​។​

១៨៧- សម្តេច​តេ​ជោ ដឹកនាំ​គណៈប្រតិភូ​ជាន់ខ្ពស់​កម្ពុជា អញ្ជើញ​ទៅ​ចូលរួម​កិច្ចប្រជុំ​កំពូល G20 នៅ​ប្រទេស​ឥណ្ឌូនេស៊ី និង​កិច្ចប្រជុំ APEC នៅ​ប្រទេស​ថៃ

​បន្ទាប់ពី​ដឹកនាំ និង​រៀបចំ​កិច្ចប្រជុំ​កំពូល​អាស៊ាន និង​កិច្ចប្រជុំ​ពាក់ព័ន្ធ​បញ្ចប់​ដោយ​ជោគជ័យ​រួចមក នៅ​រសៀល​ថ្ងៃទី​១៤ ខែវិច្ឆិកា ឆ្នាំ​២០២២ សម្តេច​តេ​ជោ ហ៊ុន សែន នាយករដ្ឋមន្ត្រី​នៃ​កម្ពុជា បាន​ដឹកនាំ​គណៈប្រតិភូ​ជាន់ខ្ពស់ ចាក​ចេញពី​រាជធានី​ភ្នំពេញ តាម​ជើងយន្តហោះ​ពិសេស​ដើម្បី​អញ្ជើញ​ទៅ​ចូលរួម​កិច្ចប្រជុំ​កំពូល G20 នៅ​ប្រទេស​ឥណ្ឌូនេស៊ី និង​កិច្ចសន្ទនា​ក្រៅផ្លូវការ​របស់​មេដឹកនាំ APEC នៅ​ទីក្រុង​បាងកក ប្រទេស​ថៃ​។ កិច្ចប្រជុំ​ទាំងពីរ​នេះ ចាប់ផ្តើម​ពីថ្ងៃ​ទី​១៥ ដល់​ថ្ងៃទី​១៨ ខែវិច្ឆិកា​។ ក៏ប៉ុន្តែ​នៅ​ព្រឹក​ថ្ងៃទី​១៥ ខែវិច្ឆិកា សម្តេច​តេ​ជោ ហ៊ុន សែន ប្រកាស​ពី​ប្រទេស​ឥណ្ឌូនេស៊ី​មក​ថា សម្តេច​ត្រូវបាន​ធ្វើតេស្ត រកឃើញ​វិជ្ជមាន​កូ​វីដ​១៩​។ ដូច្នេះ​សម្តេច និង​គណៈប្រតិភូ​កម្ពុជា បាន​វិល​ត្រឡប់មក​កម្ពុជា​វិញ ជាបន្ទាន់ នៅ​ល្ងាច​ថ្ងៃទី​១៥ ខែវិច្ឆិកា​។ យ៉ាងណាក៏ដោយ កាលណោះ សម្តេច​តេ​ជោ ហ៊ុន សែន បន្ត​មាន​សុខភាព​ល្អ ក្រោយ​រកឃើញ​វិជ្ជមាន​កូ​វីត​១៩​។

១៨៨- សម្តេច​តេ​ជោ ហ៊ុន សែន អញ្ជើញ​បើក​ការប្រកួត​កីឡា​ជាតិ លើក​ទី​៣

​នៅ​ព្រលប់​ថ្ងៃទី​២១ ខែវិច្ឆិកា សម្តេច​តេ​ជោ នាយករដ្ឋមន្ត្រី ហ៊ុន សែន បាន​អញ្ជើញ​បើក​ការប្រកួត​កីឡា​ជាតិ លើក​ទី​៣ និង​កីឡា​ជនពិការ លើក​ទី​១ នៅ​ពហុ​កីឡដ្ឋាន​ជាតិ​មរតក​តេ​ជោ ដែល​ស្ថិតនៅក្នុង​តំបន់​អភិវឌ្ឍ​របស់​អ្នកឧកញ៉ា លី យ៉ុង​ផាត់ ទល់មុខ​នឹង​វិមាន​ឈ្នះ​ឈ្នះ ជិត​ស្ពាន​ព្រែក​ព្នៅ​។ ព្រឹត្តិការណ៍​ប្រកួត​កីឡា​ជាតិ លើក​ទី​៣ និង​កីឡា​ជនពិការ លើក​ទី​១ នឹង​បន្ត​រហូតដល់​ថ្ងៃទី​៣០ ខែវិច្ឆិកា​។​
១៨៩- គ្រួសារ​ងាយ​រង​ហានិភ័យ នៅ​ទូទាំងប្រទេស ដែល​កំណត់ដោយ​ក្រសួងផែនការ ទទួលបាន​ប្រាក់ឧបត្ថម្ភ លើក​ទី​១ ចាប់ពី​ថ្ងៃទី ១០​ធ្នូ​តទៅ

​ក្រុមគ្រួសារ​ងាយ​រង​ហានិភ័យ​នៅ​ទូទាំងប្រទេស ដែល​ត្រូវបាន​កំណត់ដោយ​ក្រសួងផែនការ ចាប់ផ្តើម​ទទួលបាន​ប្រាក់ឧបត្ថម្ភ​ពី​កម្មវិធី​ឧបត្ថម្ភ​សាច់ប្រាក់​ជូន​គ្រួសារ​ងាយ​រង​ហានិភ័យ ចាប់ពី​ថ្ងៃទី ១០​ធ្នូ​នេះ​តទៅ​។ គ្រួសារ​នីមួយៗ ទទួលបាន​ចំនួន​ទឹកប្រាក់​ផ្សេងៗ​គ្នា ទៅតាម​តំបន់ ដែល​ត្រូវ​បានកំណត់ ដូចជា នៅ​រាជធានី​ភ្នំពេញ នៅតាម​ទីប្រជុំជន និង​នៅតាម​ជនបទ​។

១៩០-​កូរ៉េខាងត្បូង ផ្តល់​ថវិកា ១៥០០​លាន​ដុល្លារ ដើម្បី​សាងសង់​ស្ពាន​ភ្នំពេញ​-​ជ្រោយចង្វា​-​អរិយ​ក្សត្រ និង​អភិវឌ្ឍន៍​វិស័យ​បញ្ជូន​អគ្គិសនី នៅ​ខេត្ត​ព្រះសីហនុ

​រដ្ឋាភិបាល​នៃ​សាធារណរដ្ឋ​កូរ៉េ ឬ​ប្រទេស​កូរ៉េខាងត្បូង បានសម្រេច​ផ្តល់នូវ​កម្ចីសម្បទាន ១៥០០​លាន​ដុល្លារ ដល់​រាជរដ្ឋាភិបាល​កម្ពុជា ដើម្បី​ប្រើប្រាស់​ក្នុងការ​អភិវឌ្ឍ​ប្រទេស ក៏​ដូច​ចា​ការសាងសង់​ស្ពាន​មិត្តភាព​កម្ពុជា​-​សាធារណរដ្ឋ​កូរ៉េ ភ្ជាប់​ពី​ផ្សារ​ចាស់​-​ជ្រោយចង្វា និង​ពី​ជ្រោយចង្វារ ទៅ​អរិយ​ក្សត្រ រួមទាំង​អភិវឌ្ឍ​វិស័យ​អគ្គិសនី នៅ​ខេត្ត​ព្រះសីហនុ​។ ពិធី​ចុះ​ហេ​ត្ថ​លេខា ប្រគល់ និង​ទទួល​ថវិកា​ទាំងនេះ បានរៀបចំ​ធ្វើ នៅ​វិមាន​សន្តិភាព នៅ​ព្រឹក​ថ្ងៃទី​៩ ខែធ្នូ ឆ្នាំ​២០២២ ក្រោម​អធិបតីភាព ជា​សាក្សី​របស់​សម្តេច​តេ​ជោ ហ៊ុន សែន នាយករដ្ឋមន្ត្រី​កម្ពុជា និង​លោក ប៉ាក ហឹ​ង​ឃ្យង (PARK Heung-kyeong) ឯកអគ្គរដ្ឋទូត​នៃ​សាធារណរដ្ឋ​កូរ៉េ ប្រចាំ​កម្ពុជា​។​

១៩១- សម្តេច​តេ​ជោ ហ៊ុន សែន អញ្ជើញ​ទៅ​ដឹកនាំ​កិច្ចប្រជុំ​អាស៊ាន​-​អឺរ៉ុប និង​ទស្សនកិច្ច នៅ​បារាំង

​កាលពី​ថ្ងៃទី​១១ ខែធ្នូ សម្តេច​តេ​ជោ ហ៊ុន សែន នាយករដ្ឋមន្ត្រី​នៃ​កម្ពុជា និង​ជា​ប្រធាន​អាស៊ាន បានធ្វើ​ដំណើរ​ចាក​ចេញពី​កម្ពុជា ទៅកាន់​ទីក្រុង​ព្រុ​ច​សែ​ល ប្រទេស​បែ​ល​ហ្ស៉ិ​ក ដើម្បី​ដឹកនាំ​កិច្ចប្រជុំ​កំពូល​រំលឹក​ខួប​អនុស្សាវរីយ៍​អាស៊ាន​-​សហភាព​អឺរ៉ុប នៅ​ថ្ងៃទី​១៤ ខែធ្នូ​។ នៅពេល​ទៅដល់​ទឹកដី​អឺរ៉ុប​ភ្លាម ក្រៅពី​កម្ម​វី​ធី​ដែល​បាន​គ្រោងទុក សម្តេច​ក៏បាន​ជួប​សំណេះសំណាល​សួរសុខទុក្ខ​ពលរដ្ឋ​ខ្មែរ​ស់ នៅ​បែ​ល​ហ្ស៉ិ​ក និង​នៅ​តំបន់​អឺរ៉ុប មុននឹង​សម្តេច ធ្វើដំណើរ​ទៅ​ទីក្រុង​ប៉ារីស ប្រទេស​បារាំង ដើម្បី​ចូលរួម​កិច្ចប្រជុំ និង​បំពេញ​ទស្សនកិច្ច​ផ្លូវការ​នៅ​ទីនោះ​។​

១៩២- សម្តេច​តេ​ជោ ហ៊ុន សែន​៖ វត្តមាន​របស់​សម្តេច នៅ​អឺរ៉ុប ពេលនេះ ជាការ​ធ្វើដំណើរ ទៅ​វាយ​ដល់ផ្ទះ​ក្រុមប្រឆាំង

​សម្តេច​តេ​ជោ ហ៊ុន សែន នាយករដ្ឋមន្ត្រី​នៃ​កម្ពុជា នៅ​ថ្ងៃទី​១៣ ខែធ្នូ បានធ្វើ​ដំណើរ ទៅដល់​ប្រទេស​បារាំង ដោយ​សុវត្ថិ​ហើយ ដើម្បី​ចូលរួម​សន្និសីទ គាំទ្រ​ភាព​ធន់​នៃ​ប្រជាជន​អ៊ុយ​ក្រែ​ន កិច្ចប្រជុំ​ក្រុមប្រឹក្សា​សហគ្រាស​កម្ពុជា​-​បារាំង និង​ចូលរួម​កម្មវិធី​សំខាន់ៗ​មួយចំនួនទៀត ជាមួយ​ប្រធានាធិបតី​បារាំង​។ មុន​ធ្វើដំណើរ​ទៅដល់​បារាំង ក្នុង​ពិធី​សំណេះសំណាល​ជាមួយ​ប្រជា​ពល​ខ្មែរ​ជិត ២​ពាន់​នាក់ នៅ​ទ្វីបអឺរ៉ុប ដែល​រៀបចំ​ធ្វើ នៅ​ទីក្រុង​ព្រុ​ច​ស៊ែ​ល ប្រទេស​ប៊ែ​ល​ហ្ស៉ិ​ក សម្តេច ហ៊ុន សែន អះអាងថា វត្តមាន​របស់​សម្តេច​នៅ​អឺរ៉ុប ជាពិសេស​នៅ​ប្រទេស​បារាំង ជាការ​ធ្វើដំណើរ​ទៅ​វាយ​ដល់ផ្ទះ​ក្រុមប្រឆាំង ដែល​ទំនង​សម្តេច ហ៊ុន សែន ចង់​សំដៅ​ដល់​លោក សម រង្ស៊ី ដែល​កំពុង​រស់នៅ​ប្រទេស​បារាំង​។​

១៩៣- សម្តេច​តេ​ជោ ហ៊ុន សែន ប្រកាស​ជំហរ​កម្ពុជា គាំទ្រ​កិច្ចខិតខំ​ប្រឹងប្រែង​រប​ស់​បារាំង ក្នុងការ​ស្វែងរក​ដំណោះស្រាយ​បញ្ចប់សង្គ្រាម នៅ​អ៊ុយ​ក្រែ​ន តាមរយៈ​ការចរចា

​សម្តេច​តេ​ជោ ហ៊ុន សែន នាយករដ្ឋមន្ត្រី​កម្ពុជា និង​ជា​ប្រធាន​អាស៊ាន​ប្តូរ​វេន ក្នុង​សន្និសីទ​អន្តរជាតិ ស្តីពី អ៊ុយ​ក្រែ​ន នៅក្នុង​ទីក្រុង​ប៉ារីស កាលពី​យប់​ថ្ងៃទី​១៣ ខែធ្នូ បានបញ្ជាក់​សាជាថ្មី​នូវ​ជំហរ​កម្ពុជា គឺ​ប្រឆាំងនឹង​ការរំលោភបំពាន​ពី​ប្រទេសមួយ ទៅលើ​បូរណភាព​ទឹកដី​របស់​ប្រទេសមួយ​ផ្សេងទៀត​។ សម្តេច បានប្រកាស​គាំទ្រ​នូវ​កិច្ចខិតខំ​ប្រឹងប្រែង​រប​ស់លោក​ប្រធានាធិបតី​បារាំង អេ​ម៉ា​នុយ​អែល ម៉ា​ក្រុង ក្នុងការ​ស្វែងរក​ដំណោះស្រាយ​បញ្ចប់សង្គ្រាម រុស្ស៊ី​-​អ៊ុយ​ក្រែ​ន តាមរយៈ​ការចរចា​។​

១៩៤- សម្តេច​តេ​ជោ ហ៊ុន សែន ទទួល​ពានរង្វាន់ “​សមិទ្ធផល​ពេញ​មួយជីវិត​របស់​មេដឹកនាំ​ឆ្នើម​ពិភពលោក​»

​កាលពី​ថ្ងៃ​ចន្ទ ទី​១៩ ខែធ្នូ សម្តេច​តេ​ជោ ហ៊ុន សែន នាយករដ្ឋមន្ត្រី​នៃ​កម្ពុជា បានទទួល​ពានរង្វាន់ “​សមិទ្ធផល​ពេញ​មួយជីវិត​របស់​មេដឹកនាំ​ឆ្នើម​ពិភពលោក​»​។ ពានរង្វាន់​នេះ ផ្តល់ជូន​ពី​វិទ្យាស្ថាន​យុទ្ធសាស្ត្រ​សម្រាប់​អាស៊ី​-​ប៉ាស៊ីហ្វិក​។ ពានរង្វាន់​នេះ ត្រូវបាន​ផ្តល់ជូន​សម្តេច​តេ​ជោ​ក្រោម​ហេតុផល​ថា សម្តេច ហ៊ុន សែន បាន​លះបង់ និង​បង្កើត​ស្នាដៃ​ល្អៗ​ជាច្រើន ចំពោះ​ប្រជាជន​កម្ពុជា និង​តំបន់​អាស៊ាន ក្នុង​រយៈពេល​ជាង ៤ ទសវត្សរ៍​កន្លងទៅនេះ​។

១៩៥- លទ្ធផល​ប្រឡង​បាក់​ឌុប​៖ ឆ្នាំនេះ សិស្ស​ប្រឡង​ជាប់​ច្រើនជាង​ឆ្នាំមុន តែ​និទ្ទេស A ថយចុះ

​កាលពី​រសៀល​ថ្ងៃទី​២២ ខែធ្នូ ក្រសួង​អប់រំ យុវជន និង​កីឡា បានប្រកាស​លទ្ធផល​ប្រឡង​បាក់​ឌុប​។ ក្នុងចំណោម​បេក្ខជន​ជិត ១៣​ម៉ឺន​នាក់ គឺ​ឆ្នាំនេះ មាន​សិស្ស​ប្រលង​ជាប់​ជាង ៩​ម៉ឺន​នាក់ ស្មើនឹង​ជាង ៧២%​។ ក្នុងនោះ និទ្ទេស A ១០៤៩​នាក់​, និទ្ទេស B ៧២៣២​នាក់​, និទ្ទេស C ១៩០៥៣​នាក់​, និទ្ទេស D ៣១ ១៦៦​នាក់ និង​និទ្ទេស E ៣២ ៤៥០​នាក់​។ ចំនួន​បេក្ខជន​ប្រឡង​បាក់​ឌុប នៅ​ឆ្នាំនេះ ជាប់​ច្រើនជាង​ឆ្នាំមុន ប៉ុន្តែ​សិស្ស​ពូកែ ឆ្នើម ប្រឡង​ជាប់​និទ្ទេស A ថយចុះ​ប្រមាណ ៧០០​នាក់ បើ​ធៀប​នឹង​ឆ្នាំ​២០២១​។ ក្រោយ​ប្រកាស​លទ្ធផល មាន​បេក្ខជន​មួយចំនួន តវ៉ា ដោយ​ស្នើឱ្យ​ក្រសួង​ពិនិត្យ​ផ្ទៀងផ្ទាត់​លទ្ធផល​ពិន្ទុ​របស់ខ្លួន​ឡើងវិញ​។​

១៩៦-​សម្តេច​តេ​ជោ ហ៊ុន សែន ប្រកាស​ឱ្យ​ចាក់​វ៉ាក់សាំង​ដូ​ស​ជំរុញ ទី​៦ ដើម្បី​ការពារ​កូ​វីដ​

​កាលពី​យប់​ថ្ងៃទី​២៩ ខែធ្នូ សម្តេច​តេ​ជោ ហ៊ុន សែន បានចេញ​សារ​ជា​សំឡេង​ជូន​ជនរួមជាតិ ដោយ​សម្តេច ប្រកាស​ឱ្យ​ចាក់​វ៉ាក់សាំង ដូ​ស​ទី​៦ សម្រាប់​អ្នក​ពេញវ័យ ហើយ​ថ្នាំ​វ៉ាក់សាំង ត្រូវ​ចាក់​រៀងរាល់ ៦​ខែម្តង ដោយសារតែ​នៅក្នុង​តំបន់ និង​ពិភពលោក ចាប់ផ្តើម​ឆ្លង​ឡើងវិញ​។ វ៉ាក់សាំង ជួយ​យើង មិនឱ្យ​ឆ្លង ហើយ​បើ​ឆ្លង មិនឱ្យ​ធ្ងន់ធ្ងរ​។ «​កុមារ អាយុ​ចាប់ពី ៣​ឆ្នាំ ដល់ ៥​ឆ្នាំ ត្រូវ​ចាក់​ដូ​ស​ទី​៤​។ ការ​វ៉ាក់សាំង ដូ​ស​ទី​៥ ដល់​កុមារ ពី​អាយុ ៥​ឆ្នាំ ដល់​ក្រោម ១២​ឆ្នាំ​។ ការចាក់​វ៉ាក់សាំង​ដូ​ស​ទី​៦ ជូន​មន្ត្រីរាជការ​ជួរមុខ អាជ្ញាធរ និង​ប្រជាជន​ទូទៅ​»​។​
​ក្រសួងសុខាភិបាល បានប្រកាស​យក​ថ្ងៃទី​៩ ខែមករា ឆ្នាំ​២០២៣ ចាប់ផ្តើម​យុទ្ធនា​ការចាក់​វ៉ាក់សាំង​ដូ​ស​ទី​៦ សម្រាប់​មនុស្សពេញវ័យ មន្ត្រីរាជការ​ជួរមុខ និង​អាជ្ញាធរ​សមត្ថកិច្ច រួមទាំង​ចាក់​ដូ​ស​ជំរុញ​ទី​៤ ដល់​កុមារ​អាយុ ៣​ឆ្នាំ ដល់​ក្រោម ៥​ឆ្នាំ និង​ដូ​ស​ទី​៥ ដល់​កុមារ​អាយុ​ចាប់ពី ៥​ឆ្នាំ ដល់​ក្រោម ១២​ឆ្នាំ នៅតាម​មន្ទីរពេទ្យ​រដ្ឋ​ធំៗ ជាច្រើន នៅ​រាជធានី​ភ្នំពេញ​។​

១៩៧-​ឆេះ​កាស៊ីណូ នៅ​ប៉ោយប៉ែត សម្លាប់​មនុស្ស ២៦​នាក់ និង​របួស ៥៧​នាក់​
​អគ្គិភ័យ បាន​ឆេះ​កាស៊ីណូ នៅជាប់​ព្រំដែន​ប៉ោយប៉ែត ក្នុង​ខេត្តបន្ទាយមានជ័យ កាលពី​ម៉ោង ១១ និង​៣០​នាទី​យប់​ថ្ងៃទី​២៨ ខែធ្នូ ឆ្នាំ​២០២២​។ មូលហេតុ ត្រូវបាន​គេ​រាយការណ៍​ជំហាន​ដំបូង​ថា បណ្តាលមកពី​ឆ្លង​ចរន្ដអគ្គិសនី ហើយ​បាន​រីក​រាលដាល​តែម្ដង​។ ភ្លើង​ឆេះ​កាស៊ីណូ​នេះ បាន​បន្ត​រហូតដល់​ល្ងាច​ថ្ងៃទី​២៩ ខែធ្នូ ឆ្នាំ​២០២២​។ ទីតាំង​ដែល​ឆេះ​នេះ មាន​ពីរ​អគារ ដោយ​ក្នុងនោះ ឆេះ​ផ្ដើមដំបូង​ចេញពី​អគារ ហ្គេ​ន​ដាយ​មិន និង​រីក​រាលដាល​ទៅកាន់​អគារ​ប៉ោយប៉ែត រី​សត​។ កាស៊ីណូ​នេះ មាន​បុគ្គលិក​បម្រើការ​ប្រុស​ស្រី​ប្រហែល​ជាង ៤០០​នាក់​។ ក្រោយ​បិទ​បញ្ចប់​ប្រតិបត្តិ​ការរុករក និង​ជួយសង្គ្រោះ អាជ្ញាធរ​សមត្ថកិច្ច បាន​រកឃើញ​អ្នកស្លាប់​សរុប ២៦​នាក់ និង​អ្នករបួស​ចំនួន ៥៧​នាក់​។ ក្នុងនោះ ទាំង​អ្នករបួស និង​ទាំង​អ្នកស្លាប់ មិនមាន​ជនជាតិខ្មែរ​ឡើយ​៕/V​