​ប្រែ​សម្រួល : កញ្ញា​ដា​លី​ស (​ដេល្លី​ម៉េល​) ៖ ការិយាល័យ​រដ្ឋអាជ្ញារ​បស់​រដ្ឋ​ឈី​ហួ​ហួ (Chihuahua) បាន​និយាយថា ខ្មាន់កាំភ្លើង​បាន​វាយប្រហារ​ពន្ធនាគារ​មួយ​ក្នុង​ទីក្រុង​ស្យូ​ដាដ វ៉ា​រ៉េ​ស (Ciudad Juarez) ភាគ​ខាងជើង​ប្រទេស​ម៉ិក​ស៊ិក កាលពី​ថ្ងៃអាទិត្យ​ទី​១​មករា ដោយ​បណ្តាល​ឱ្យ​មនុស្ស ១៤ នាក់​ស្លាប់ និង​អនុញ្ញាត​ឱ្យ​អ្នកទោស ២៤ នាក់​រត់​គេចខ្លួន​។​

​ការិយាល័យ​បាន​និយាយ​នៅក្នុង​សេចក្តីថ្លែងការណ៍​មួយ​ថា ខ្មាន់កាំភ្លើង​មិន​ស្គាល់​មុខ​ប៉ុន្មាន​នាក់​នៅ​លើ​រថពាសដែក​បាន​ចូលរួម​ក្នុង​ការវាយប្រហា​រហើយ​អ្នកស្លាប់​រួម​មាន​ឆ្មាំ​ពន្ធនាគារ​និង​​ភ្នាក់ងារ​សន្តិសុខ​ចំនួន ១០ នាក់​។​

​ប្រហែល​ប្រាំ​ម៉ោង​បន្ទាប់ពី​ការវាយប្រហារ​ទាំង​ព្រលឹម​បានចាប់ផ្តើម កងកម្លាំង​សន្តិសុខ​បាន​គ្រប់គ្រង​ស្ថានការណ៍​ដែល​បាន​ផ្ទុះ​ឡើង​ទៅ​ជា​ការប្រយុទ្ធ​គ្នា​ផងដែរ​រវាង​អ្នកទោស​នៅក្នុង​ពន្ធនាគារ​​រដ្ឋ​ដ៏​ធំ​នៅ​ជិត​ព្រំដែន​ម៉ិក​ស៊ិកជា​មួយ​សហរដ្ឋអាម៉េរិក​។​

​សេចក្តីថ្លែងការណ៍​បាន​បន្ថែមថា នៅ​ប៉ុន្មាន​នាទី​មុន​ការវាយប្រហារ បុរស​ប្រដាប់អាវុធ​បាន​បាញ់​ទៅ​លើ​ប៉ូលិស​ក្រុង​នៅ​តាម​មហាវិថី​ក្បែរ​នោះ ដោយ​ដេញ​តាម​រថយន្ត​មួយ ដែល​ចុងបញ្ចប់​បាន​ចាប់​យក​រថយន្ត​នោះ​និង​បុរស​បួន​នាក់​។​

​ការិយាល័យ​បាន​និយាយថា ក្រោយមក ជន​វាយប្រហារ​នៅក្នុង​រថយន្ត Hummer បាន​បាញ់​ទៅលើ​ភ្នាក់ងារ​សន្តិសុខ​មួយ​ក្រុម​ផ្សេង​ទៀត​នៅ​ខាងក្រៅ​ពន្ធនាគារ​។​

​ទិដ្ឋភាព​នៃ​ភាពចលាចល​បាន​បន្ត​កើតមាន ខណៈ​សាច់ញាតិ​របស់​អ្នកទោស​មួយចំនួន​បាន​រង់ចាំ​ការចូលរួម​អបអរ​ឆ្នាំ​ថ្មី​នៅ​ខាងក្រៅ​បរិវេណ​ពន្ធនាគារ​។​

​ប្រព័ន្ធ​ផ្សព្វផ្សាយ​ក្នុងស្រុក​បាន​រាយការណ៍​ថា នៅ​ខាងក្នុង​អ្នកទោស​មួយចំនួន​បាន​ដុត​បំផ្លាញ​វត្ថុ​ផ្សេងៗ ហើយ​បាន​ប៉ះទង្គិច​ជាមួយ​ឆ្មាំ​ពន្ធនាគារ​។​

​រដ្ឋ​អាជ្ញា​បាន​និយាយថា ការវាយប្រហារ​នៅ​ពន្ធនាគារ ដែល​ជា​កន្លែង​អ្នកទោស​មក​ពី​ក្រុម​ឧក្រិដ្ឋជន​និង​ក្រុម​ជួញដូរ​គ្រឿងញៀន​ផ្សេងគ្នា ត្រូវបាន​ដាក់​នៅក្នុង​គុក​ដាច់ដោយឡែក​ក៏​បាន​បណ្តាលឱ្យ​​មនុស្ស ១៣ នាក់​រងរបួស​ផងដែរ​។​

​រដ្ឋ​អាជ្ញា​បាន​និយាយថា មនុស្ស​បួន​នាក់​ត្រូវបាន​ឃុំខ្លួន ដោយ​មិន​បាន​បញ្ជាក់ថា​តើ​ពួកគេ​ជា​អ្នកទោស​ឬ​ជន​វាយប្រហារ​ប្រដាប់អាវុធ​នោះទេ​។​

​មិន​មាន​ព័ត៌មាន​លម្អិត​អំពី​របៀប​ដែល​អ្នកទោស​ដែល​រត់គេចខ្លួន​ទាំង ២៤ នាក់​នោះ​អាច​រត់​ចេញ​បាន​នោះទេ​៕

​សមាជិក​នៃ​កងទ័ព​ម៉ិក​ស៊ិក​ការពារនៅ​ខាងក្រៅ​ពន្ធនាគារ​ក្នុងក្រុង​ស្យូ​ដាដ វ៉ា​រ៉េ​ស បន្ទាប់​ពី​ការវាយប្រហារ​នៅ​ថ្ងៃទី ១ ខែ​មករា ឆ្នាំ ២០២៣