​ប្រែ​សម្រួល : កញ្ញា​ដា​លី​ស (​ដេល្លី​ម៉េល​) ៖ លោក ល្វីស អ៊ី​ណា​ស្យូ លូ​ឡា ដា ស៊ី​ល​វ៉ា (Luiz Inacio Lula da Silva) បាន​ស្បថ​ចូលកាន់​តំណែង​ជា​ប្រធានាធិបតី​ប្រេ​ស៊ីល​កាលពី​ថ្ងៃអាទិត្យ​ទី​១​មករា ដោយ​ថ្លែង​អំពី​ការចោទប្រកាន់​របស់​អតីត​មេដឹកនាំ​ស្តាំនិយម​លោក ជែរ បូល​សូ​ណារ៉ូ (Jair Bolsonaro)​និង​បាន​ប្តេជ្ញា​ផ្លាស់ប្តូរ​ទាំង​ស្រុង​នូវ​វិធី​ឆ្ពោះទៅរក​ការជួយ​សង្គ្រោះ​ប្រទេស​ដែល​ញាំញី​ដោយ​​ភាពអត់ឃ្លាន ភាពក្រីក្រ និង​ការរើសអើង​ជាតិ​សាសន៍​។​

​នៅក្នុង​សុន្ទរកថា​ទៅ​កាន់​សភា​បន្ទាប់ពី​ការចូល​កាន់តំណែង​ជា​ផ្លូវការ​នៃ​ប្រទេស​ដ៏​ធំ​បំផុត​នៅ​អាម៉េរិក​ឡាទីន ជន​ឆ្វេងនិយម​រូបនេះ​បាន​និយាយ​ថា​លទ្ធិប្រជាធិបតេយ្យ​គឺជា​អ្នកឈ្នះ​ពិតប្រាកដ​នៃ​ការ​​បោះឆ្នោត​ប្រធានាធិបតី​ខែតុលា នៅពេល​ដែល​គាត់​បាន​បណ្តេញ​លោក​បូល​សូ​ណារ៉ូ​នៅក្នុង​ការបោះ​ឆ្នោត​ដ៏​តានតឹង​បំផុត​សម្រាប់​មនុស្ស​មួយ​ជំនាន់​។​

​លោក​បូល​សូ​ណារ៉ូ ដែល​បាន​ចាកចេញ​ពីប្រេ​ស៊ីល​ទៅ​កាន់​សហរដ្ឋអាម៉េរិក​កាលពី​ថ្ងៃ​សុក្រ​បន្ទាប់ពី​បដិសេធ​មិន​ព្រម​ទទួលស្គាល់​បរាជ័យ​នោះ​បាន​អង្រួន​ទ្រុង​លទ្ធិប្រជាធិបតេយ្យ​វ័យក្មេង​របស់​ប្រេ​ស៊ីល​​ជាមួយ​នឹង​ការអះអាង​ដោយ​គ្មាន​មូលដ្ឋាន​អំពី​ភាពទន់ខ្សោយ​នៃ​ការបោះឆ្នោត ដែល​បង្កើត​ឱ្យមាន​ចលនា​ដ៏​ហិង្សា​នៃ​អ្នក​បដិសេធ​ការបោះឆ្នោត​។​

​លោក​លូ​ឡា​បាន​ប្រាប់​សមាជិកសភា​ថា “​លទ្ធិប្រជាធិបតេយ្យ​គឺជា​អ្នកឈ្នះ​ដ៏​អស្ចារ្យ​នៅ​ក្នុង​ការបោះឆ្នោត​នេះ ដោយ​បាន​យក​ឈ្នះ​លើ … ការគំរាមកំហែង​ដ៏​ឃោរឃៅ​បំផុត​ចំពោះ​សេរីភាព​ក្នុង​ការបោះឆ្នោត និង​យុទ្ធនាការ​ដ៏​ឃោរឃៅ​បំផុត​នៃ​ការ​កុហក​និង​ការ​ស្អប់ខ្ពើម​ដែល​រៀបចំឡើង​ដើម្បី​ក្រឡុក និង​ធ្វើឱ្យ​អាម៉ាស់មុខ​ដល់​អ្នកបោះឆ្នោត​”​។​

​លោក​លូ​ឡា ដែល​ជាប់​ពន្ធនាគារ​ក្នុងអំឡុងពេល​ស្បថ​កាន់​អំណាច​របស់​លោក​បូល​សូ​ណារ៉ូ​ក្នុង​ឆ្នាំ ២០១៩ អំពី​ការផ្តន្ទាទោស​ពី​បទ​ពុករលួយ​ដែល​ក្រោយមក​ត្រូវ​បាន​លុបចោល​វិញ​នោះ​បាន​ផ្ញើ​ការ​គំរាម​​កំហែង​ដោយ​ប្រយោល​ទៅកាន់​អ្នក​កាន់​តំណែង​មុន​របស់​គាត់​។​

​ទោះបីជា​ការធ្វើដំណើរ​ទៅ​រដ្ឋ​ផ្លរីដា​របស់​លោក​បូល​សូ​ណារ៉ូ​បាន​រារាំង​គាត់​ពី​ហានិភ័យ​ផ្នែក​ច្បាប់​ភ្លាមៗ​នៅក្នុង​ប្រទេសប្រេ​ស៊ីល​ក៏​ដោយ​ក៏​ប៉ុន្តែ​ឥឡូវ​នេះ​គាត់​ប្រឈម​មុខ​នឹង​ហានិភ័យ​ផ្នែក​តុលាការ​ដែល​​ទាក់ទង​នឹង​វោហា​សាស្ត្រ​ប្រឆាំង​លទ្ធិប្រជាធិបតេយ្យ និង​ការដោះស្រាយ​ជំងឺ​រាតត្បាត​របស់គាត់ បន្ទាប់​ពី​បាត់បង់​អភ័យឯកសិទ្ធិ​ជា​ប្រធានាធិបតី​។​

​លោក​លូ​ឡា​បាន​និយាយ​ចំឈ្មោះ​លោក​បូល​សូ​ណារ៉ូ យ៉ាង​ដូច្នេះ​ថា “​យើង​មិន​អនុវត្ត​ស្មារតី​សងសឹក​ចំពោះ​អ្នក​ដែល​ព្យាយាម​បំផ្លាញ​ជាតិ​ដើម្បី​តែ​ប្រយោជន៍​ផ្ទាល់ខ្លួន​និង​មនោគមវិជ្ជា​របស់​ពួកគេ​នោះទេ ប៉ុន្តែ​យើង​នឹង​ធានា​នូវ​នីតិរដ្ឋ​។ អ្នក​ដែល​ធ្វើ​ខុស​នឹង​ឆ្លើយ​ចំពោះ​កំហុស​របស់​ខ្លួន​”​។​

​គាត់​ក៏បាន​ចោទប្រកាន់​រដ្ឋបាល​រប​ស់លោក​បូល​សូ​ណារ៉ូថា​បាន​ប្រព្រឹត្ត “​អំពើ​ប្រល័យពូជសាសន៍​” ផងដែរ ព្រោះ​ខកខាន​ក្នុងការ​ឆ្លើយតប​ឱ្យបាន​ត្រឹមត្រូវ​ចំពោះកូ​វីដ​១៩​ដែល​បាន​សម្លាប់​ប្រជាជន​​ប្រេ​ស៊ីល​ជា​ង ៦៨០.០០០ នាក់​។​

​លោក​បាន​និយាយថា “​ការទទួលខុសត្រូវ​ចំ​ពោះ​អំពើ​ប្រល័យពូជសាសន៍​នេះ​ត្រូវតែ​ត្រូវ​បាន​ស៊ើបអង្កេត ហើយ​មិន​ត្រូវ​រួចខ្លួន​ពី​ការផ្ដន្ទាទោស​នោះឡើយ​”​។​

​ផែនការ​របស់​លោក​លូ​ឡា​សម្រាប់​រដ្ឋាភិបាល​បាន​ផ្តល់​នូវ​ភាព​ផ្ទុយស្រឡះ​ពី​ការ​កាន់តំណែង​រយៈពេល​បួន​ឆ្នាំ​របស់​លោក​បូល​សូ​ណារ៉ូ​ដែល​បានកត់សម្គាល់​ដោយការ​ដើរ​ថយក្រោយ​លើ​ការការពារ​បរិស្ថាន​​នៅក្នុង​ព្រៃ​អា​ម៉ា​ហ្សូ​ន ច្បាប់​កាំភ្លើង​ធូររលុង និង​ការការពារ​ទន់ខ្សោយ​សម្រាប់​ជនជាតិដើម​ភាគតិច​និង​ជនជាតិ​ភាគតិច​។​

​លោក​លូ​ឡា​បាន​និយាយថា គាត់​ចង់​ប្រែក្លាយ​ប្រេ​ស៊ីល ដែល​ជា​ប្រទេស​ផលិត​អាហារ​កំពូល​មួយ​របស់​ពិភពលោក ទៅ​ជា​មហាអំណាច​បៃតង​។​

​នៅក្នុង​ការសម្រេចចិត្ត​ដំបូង​របស់​គាត់​ក្នុងនាម​ជា​ប្រធានាធិបតី លោក​លូ​ឡា​បាន​ស្ដារឡើងវិញ​នូវ​សិទ្ធិ​អំណាច​របស់​ទីភ្នាក់ងារ​ការពារ​បរិ​ស្ថាន​របស់​រដ្ឋាភិបាល ឈ្មោះថា Ibama​ដើម្បី​ប្រយុទ្ធប្រឆាំង​នឹង​​ការកាប់បំផ្លាញ​ព្រៃឈើ​ខុសច្បាប់​ដែល​ត្រូវបាន​រំលាយ​ចោល​ដោយ​លោក​បូល​សូ​ណារ៉ូ ហើយ​បាន​ដកហូត​វិធានការ​ដែល​លើកទឹកចិត្ត​ឱ្យ​មាន​ការជីក​យក​រ៉ែ​ខុសច្បាប់​លើ​ដី​ការពារ​របស់​ជន​ជាតិ​ដើម​ភាគតិច​។​

​លោក​ក៏​បាន​ដោះលែង​មូលនិធិ​អា​ម៉ា​ហ្សូ​ន​រាប់​ពាន់​លាន​ដុល្លារ​ដែល​ផ្តល់​ហិរញ្ញប្បទាន​ដោយន័​រវែ​សនិង​អាល្លឺម៉ង់​ផង​ដែរ​ដើម្បី​គាំទ្រ​គម្រោង​និរន្តរភាព ដោយ​ពង្រឹង​ការប្តេជ្ញា​ចិត្ត​របស់​គាត់​ក្នុង​ការបញ្ចប់​ការកាប់បំផ្លាញ​ព្រៃឈើ​នៅក្នុង​ព្រៃ​អា​ម៉ា​ហ្សូ​ន ដែល​បាន​កើនឡើង​ដល់​កម្រិត​ខ្ពស់​មិន​ធ្លាប់​មាន​ក្នុង​រយៈពេល ១៥ ឆ្នាំ​ក្រោម​ការដឹកនាំ​របស់​លោក​បូល​សូ​ណារ៉ូ​។​

​រដ្ឋបាល​របស់​ប្រធានាធិបតី​អាម៉េរិក ចូ បៃ​ដិន ដែល​ចែករំលែក​ភាពដូចគ្នា​តិចតួច​ជាមួយ​លោក​បូល​សូ​ណារ៉ូ​និង​ខឹងសម្បា​ចំពោះ​គោលនយោបា​យ​បរិស្ថាន​ខ្វះ​ពន្លឺ​របស់គាត់ បាន​ជូនពរ​លោក​លូ​ឡា​និង​អនុ​ប្រធានាធិបតី​របស់គាត់ លោក ជើ​រ៉ាល់​ដូ អាល់​គ្មីន (Geraldo Alckmin) ទទួលបាន​ជោគជ័យ​៕

លោក​លូ​ឡា​ស្បថ​ចូលកាន់​តំណែង​ប្រធានាធិបតី​ប្រេ​ស៊ីល​កាលពី​ថ្ងៃអាទិត្យ