​ប្រែ​សម្រួល : កញ្ញា​ដា​លី​ស (​ដេល្លី​ម៉េល​) ៖ ការវាយលុក​ថ្ងៃ​ចូល​ឆ្នាំ​ថ្មី​របស់​រុស្ស៊ី​លើ​អ៊ុយ​ក្រែន​បាន​បណ្តាលឱ្យ​មនុស្ស​បួន​នាក់​ស្លាប់ និង​រាប់សិប​នាក់​រងរបួស​នៅ​ចុង​សប្តាហ៍​ខណៈ​រដ្ឋាភិបាល​ក្រុង​មូ​ស្គូ​កាល​​ពី​ថ្ងៃអាទិត្យ​ទី​១​មករា​បាន​អះអាងថា​បាន​រារាំង “​ការវាយប្រហារ​ភេរវកម្ម​” របស់​រដ្ឋាភិបាល​ក្រុង​គៀវ​មកលើ​មាតុភូមិ​របស់​ខ្លួន​។​

​រដ្ឋធានី​អ៊ុយ​ក្រែ​ន​និង​ទីក្រុង​ផ្សេងទៀត​បាន​រង​ការបាញ់ប្រហារ​ពី​មី​ស៊ី​ល​និង​ដ្រូ​ន​ដែល​ផលិត​ដោយ​អ៊ីរ៉ង់​កាលពី​ថ្ងៃ​សៅរ៍ ដោយ​បាន​សម្លាប់​មនុស្ស​បីនាក់​។​

​យ៉ាងហោច​ណាស់​មាន​ដ្រូ​ន​មួយ​មាន​ពាក្យ​រុស្ស៊ី​ថា “​សួស្តី​ឆ្នាំ​ថ្មី​” គូរ​លើ​វា​ពណ៌​ក្រហម នេះ​បើ​យោង​តាម​រូបភាព​ដែល​ចេញផ្សាយ​ដោយ​អាជ្ញាធរ​អ៊ុ​យក្រែន​។​

​អាជ្ញាធរ​បាន​និយាយថា ការវាយប្រហារ​ថ្មី​កាលពី​ថ្ងៃអាទិត្យ​បាន​សម្លាប់​មនុស្ស​ម្នាក់​នៅ​ក្នុង​តំបន់​ហ្សា​ផូ​រី​ហ្ស​ហ្សា​ភាគ​ខាងត្បូង​និង​បី​នាក់​ទៀត​រងរបួស​។​

​លោក មី​ខា​អ៊ី​ឡូ ផូ​ដូល​យ៉ាក់ (Mykhailo Podolyak) ទីប្រឹក្សា​ប្រធានាធិបតី​អ៊ុ​យក្រែន លោក វ៉ូ​ឡូ​ឌី​មៀ ហ្សេ​លេន​ស្គី​បាន​សង្កត់ធ្ងន់ថា​ការវាយប្រហារ​ក្នុង​ឆ្នាំ​ថ្មី​របស់​រុស្ស៊ី​បានកំណត់​គោលដៅ​លើ​​តំបន់​កណ្តាល​ក្រុង​ធំៗ ហើយ​បាន​ចង្អុលបង្ហាញ​ពី​ការផ្លាស់ប្តូរ​យុទ្ធសាស្ត្រ​របស់​មូ​ស្គូ​។​

​លោក​បាន​សរសេ​រលើ Twitter ថា “​រុស្ស៊ី​លែងមាន​គោលដៅ​យោធា​ទៀតហើយ ហើយ​កំពុង​ព្យាយាម​សម្លាប់​ជន​ស៊ីវិល​ឱ្យបាន​ច្រើន​តាម​ដែល​អាច​ធ្វើទៅបាន និង​បំផ្លាញ​ទីតាំង​ស៊ីវិល​បន្ថែមទៀត​។ វា​ជា​សង្គ្រាម​ដើម្បី​សម្លាប់​មនុស្ស​”​។​

​ក្រុមមន្ត្រី​បាន​និយាយថា នៅក្នុង​ការវាយប្រហារ​ឆ្នាំ​ថ្មី​នៅ​តំបន់​ឃើ​សុន​ភាគខាងត្បូង ក្មេងប្រុស​អាយុ ១៣ ឆ្នាំ​ម្នាក់​បាន​ស្ថិតក្រោម​ការវាយប្រហារ​របស់​រុស្សី​ពីរដង ហើយ​ការវាយប្រហារ​លើក​ទី​ពីរ​កើត​ឡើង​នៅ​ពេល​ដែល​រូប​គេ​កំពុង​ស្ថិត​ក្នុង​បន្ទប់​សង្គ្រោះ​បន្ទាន់​។​

​ការវាយប្រហារ​នេះ​បាន​កើតឡើង​នៅពេលដែល​ការ​លុកលុយ​របស់​ប្រធានាធិបតីវ្ល៉ា​ឌី​មៀ ពូ​ទីន ឈាន​ចូល​ខែ​ទី ១១ របស់ខ្លួន​៕

រដ្ឋធានី​អ៊ុយ​ក្រែ​ន​និង​ទីក្រុង​ផ្សេងទៀត​បាន​រង​ការបាញ់ប្រហារ​ពី​មី​ស៊ី​ល​និង​ដ្រូ​ន