ដោយ៖រ៉ាម៉ន/ភ្នំពេញ៖ លោក ឃួង ស្រេង អភិបាលរាជធានីភ្នំពេញបានផ្តាំផ្ញើអោយក្មួយៗសិស្សានុសិស្សខិតខំក្រេបជញ្ជក់ចំណេះដឹងពីលោកគ្រូ-អ្នកគ្រូ ឱ្យបានជ្រៅជ្រះ និងសូមអោយ ក្មួយៗប្រុងប្រយ័ត្ន គេចឱ្យឆ្ងាយពីសកម្មភាពមិនគប្បី និង ឥទ្ឋិពលអវិជ្ជមានទាំងឡាយ ដែលបានកើតមានក្នុងសង្គម ដូចជា ការលេងល្បែងស៊ីសង ការប្រព្រឹត្ត អំពើពាលាអាវាសែ ការប្រើប្រាស់គ្រឿងញៀន ការប្រព្រឹត្តបទល្មើសផ្សេងៗ ក្មេងទំនើង បងតូចបងធំ និងទង្វើខុសច្បាប់ផ្សេងៗ ដើម្បីអនាគតដ៏ ភ្លឺថ្លាត្រចះត្រចង់ នាពេលអនាគត សមនឹងពាក្យស្លោក “ទំពាំងស្នងប្ញស្សី យុវជនប្រុសស្រីស្នែងជាតិ”។


ការផ្តាំផ្ញើបែបនេះរបស់លោកឃួង ស្រេង បានធ្វើឡើងនាព្រឹកថ្ងៃទី០២ មករា ឆ្នាំ២០២៣នេះ ក្នុងពិធីបើកបវសនកាលឆ្នាំសិក្សា ២០២២-២០២៣ និងចែករង្វាន់ដល់សិស្សពូកែសម្រាប់ក្របខ័ណ្ឌអប់រំទូទាំងរាជធានីភ្នំពេញជាង៤ ០០០នាក់នៅវិទ្យាល័យ ហ៊ុនសែនប៊ុនរ៉ានីវត្តភ្នំ ក្នុងសង្កាត់ស្រះចកខណ្ឌដូនពេញ។
លោកឃួង ស្រេង បានមានប្រសាសន៍ថា៖ ក្រោយថ្ងៃរំដោះ ៧ មករា ១៩៧៩ រដ្ឋាភិបាលក្នុងសម័យកាលនោះ បានបើកបវេសនកាលឱ្យសិស្សានុសិស្ស បានចូលរៀនសូត្រឡើងវិញ សម្រាប់ឆ្នាំសិក្សា១៩៧៩-១៩៨០ ជាលើកដំបូង កាលពីថ្ងៃទី២៤ ខែកញ្ញា ឆ្នាំ១៩៧៩ នៅ រាជធានីភ្នំពេញ ហើយចាប់តាំងពីពេលនោះមក រហូតដល់ពេលបច្ចុប្បន្ននេះ សម្ដេចតេជោនាយករដ្ឋមន្ត្រី តែងតែណែនាំដល់ក្រសួងជំនាញ និងរដ្ឋបាលរាជធានី-ខេត្ត ឱ្យរៀបចំពិធីបើកបវេសនកាលជារៀងរាល់ឆ្នាំ ដោយហេតុថា សម្តេចតេជោនាយករដ្ឋមន្ត្រី បានយល់ដឹងយ៉ាងច្បាស់អំពីតម្លៃនៃការអប់រំ និងបានចាត់ទុកវិស័យនេះ គឺជាឆ្អឹងខ្នង សម្រាប់ទ្រទ្រង់ការអភិវឌ្ឍសេដ្ឋកិច្ចជាតិ ព្រមទាំងការអភិវឌ្ឍវិស័យដទៃៗទៀត ដូចបានកំណត់នៅក្នុងកម្មវិធីនយោបាយ និងយុទ្ធសាស្ត្រចតុកោណរបស់រាជរដ្ឋាភិបាល ដែលមានធាតុចូលចាំបាច់បំផុតចំនួន ៤ ក្នុងការអភិវឌ្ឍសេដ្ឋកិច្ចជាតិ ប្រកបដោយនិរន្តរភាព នោះគឺ “មនុស្ស ទឹក ផ្លូវ និងភ្លើង”។
លោកឃួង ស្រេងបន្តថា ពិធីបើកបវេសនកាលឆ្នាំសិក្សា២០២២-២០២៣នេះ បានប្រព្រឹត្តទៅជាប្រក្រតី និងជាបវេសនកាល ឆ្នាំទី២ បន្ទាប់ពីរាជរដ្ឋាភិបាលកម្ពុជា បានបើកដំណើរការសកម្មភាពសេដ្ឋកិច្ច-សង្គមពេញលេញឡើងវិញលើគ្រប់វិស័យ តាមគន្លងប្រក្រតីភាពថ្មី ចាប់តាំងពីថ្ងៃទី១ ខែវិច្ឆិកា ឆ្នាំ២០២១ រហូតមកដល់ពេលនេះ ។សមិទ្ធផលដ៏ធំធេងទាំងនេះ គឺផ្តើមចេញអំពីការដាក់ចេញនូវយុទ្ធសាស្ត្រនិងវិធានការនានា ប្រកបដោយ ប្រសិទ្ធភាពរបស់ សម្ដេចតេជោនាយករដ្ឋមន្ត្រី ទន្ទឹមគ្នាទៅនឹងការដាក់ចេញនូវ “យុទ្ធនាការជាតិចាក់វ៉ាក់សាំង” ការពារជំងឺកូវីដ-១៩ ក្នុងក្របខ័ណ្ឌទូទាំងប្រទេស ស្របតាម “អភិក្រមផ្ការីក” ទាំងដួសមូលដ្ឋាន និងដូសជំរុញ ចាក់ជូន ប្រជាពលរដ្ឋពោលគឺ សម្ដេចតេជោនាយករដ្ឋមន្រ្តី បានបន្តស្រោចស្រង់អាយុជីវិតប្រជាជនកម្ពុជា លោកគ្រូ-អ្នកគ្រូ និងបុគ្គលិកអប់រំគ្រប់លំដាប់ថ្នាក់ ជាពិសេសក្មួយៗសិស្សានុសិស្សទាំងអស់ និងក្រុមគ្រួសារ ពីមាត់ជ្រោះ មរណៈនៃជំងឺកូវីដ-១៩ យ៉ាងពិតប្រាកដ។បន្ថែមលើនេះ ក្នុងឆ្នាំ២០២២នេះ រាជរដ្ឋាភិបាលកម្ពុជា ដែលមាន សម្តេចតេជោនាយករដ្ឋមន្ត្រី ជាប្រមុខ ក្នុងនាមជាប្រធានប្ដូរវេនអាស៊ាន បានដឹកនាំកិច្ចប្រជុំកំពូលអាស៊ានលើកទី៤០-៤១ និងកិច្ចប្រជុំកំពូលពាក់ព័ន្ធ ប្រកបដោយ ភាពជោគជ័យយ៉ាងត្រចះត្រចង់ ទាំងលើទិដ្ឋភាពនយោបាយ ការទូត សេដ្ឋកិច្ច សង្គមកិច្ច និងកិច្ចសហប្រតិបត្តិការ ទន្ទឹមគ្នាទៅនឹងការចូលរួមយ៉ាងសកម្មរបស់បងប្អូនប្រជាពលរដ្ឋ គណៈគ្រប់គ្រង លោកគ្រូ-អ្នកគ្រូ បុគ្គលិកអប់រំ និង ក្មួយៗសិស្សានុសិស្សទាំងអស់ ក្នុងការទទួលស្វាគមន៍គណៈប្រតិភូជាន់ខ្ពស់នៃបណ្តាប្រទេសជាមិត្ត អញ្ជើញមកចូលរួមកិច្ច ប្រជុំនៅរាជធានីភ្នំពេញ ដែលនេះ ពិតជាបានបង្ហាញឱ្យឃើញកាន់តែច្បាស់ អំពីតម្លៃដ៏មហាសាលនៃ “សន្តិភាព” និងអ្វី ដែលជា “កម្ពុជាពិត” ក្រោមការដឹកនាំប្រកបដោយភាពឈ្លាសវៃ ប៉ិនប្រសប់ និងគតិបណ្ឌិតរបស់ សម្តេចតជោ នាយករដ្ឋមន្ត្រី ធ្វើឱ្យកិត្យានុភាពកម្ពុជា កាន់តែល្បីរន្ទឺសុះសាយទៅក្នុងតំបន់ និងពិភពលោក ស័ក្តិសមបំផុតទៅនឹងការ ទទួលបានពានរង្វាន់ “សមិទ្ធផលពេញមួយជីវិតរបស់មេដឹកនាំឆ្នើមពិភពលោក” ដែលវិទ្យាស្ថានយុទ្ធសាស្ត្រ សម្រាប់អាស៊ីប៉ាស៊ីហ្វិក បានប្រគល់ជូនសម្តេច កាលពីថ្ងៃទី១៩ ខែធ្នូ ឆ្នាំ២០២២ ថ្មីៗនេះ។

លោកបន្តថា នៅឆ្នាំ២០២៣ ខាងមុខនេះប្រទេសកម្ពុជាយើងនឹងត្រូវទទួលបន្ទុកធ្វើជាម្ចាស់ផ្ទះររៀបចំការប្រកួត កីឡាអាស៊ានប៉ារាំហ្គេមលើកទី១២ និងព្រឹត្តិការណ៍ថ្នាក់តំបន់អាស៊ីអាគ្នេយ៍ ស៊ីហ្គេម លើកទី៣២ ដែល សុទ្ធសឹងតែជាមុខមាត់ជាប្រវត្តិសាស្ត្ររបស់ប្រទេសកម្ពុជា ហើយរាជធានីភ្នំពេញ គឺជាមូលដ្ឋានដ៏សំខាន់ ក្នុងការរៀបចំព្រឹត្តិការណ៏ទាំងនេះ ដូច្នេះ ថ្នាក់ដឹកនាំមន្ទីរអប់រំ យុវជន និងកីឡារាជធានីភ្នំពេញ ក៏ដូចជា គណៈគ្រប់គ្រងសាលា លោកគ្រូ-អ្នកគ្រូ និងក្មួយៗសិស្សានុសិស្សទាំងអស់ ត្រូវត្រៀមលក្ខណះ ខិតខំ ហ្វឹកហាត់ ដណ្ដើមជ័យលាភី នឹងចូលរួមអនុវត្តកិច្ចការទាំងឡាយ ដើម្បីគាំទ្រព្រឹត្តិការណ៏ទាំងអស់នេះ ឱ្យប្រព្រឹត្តទៅដោយរលូននិងទទួលបានជោគជ័យនៅគ្រប់ដំណាក់កាលទាំងអស់។
ក្នុងឱកាសនោះដែរលោកហែម ស៊ីណារ៉េត ប្រធានមន្ទីរអប់រំយុវជននិងកីឡារាជធានីភ្នំពេញ បានមានប្រសាសន៍ថា៖ សិស្សពូកែសម្រាប់ក្របខ័ណ្ឌអប់រំទូទាំងរាជធានីភ្នំពេញដែលបានទទួលរង្វាន់នៅពេលនេះបានចំនួនជាង៤០០០នាក់ ក្នុងនោះសិស្សពូកែថ្នាក់អន្តរជាតិចំនួន៨០នាក់ ។ លោកក៏បានផ្តាំផ្ញើអោយសិស្សនុសិស្សទាំងអស់បន្តការខិតខំប្រឹងប្រែងក្រេបជញ្ជក់ចំណេះដឹងពីលោកគ្រូ-អ្នកគ្រូ ឱ្យបានជ្រៅជ្រះបន្ថែមទៀត ដើម្បីអនាគតដ៏ភ្លឺថ្លា សមនឹងពាក្យស្លោក ទំពាំងស្នងប្ញស្សីយុវជនប្រុសស្រីស្នែងជាតិ៕ N

រូប ( លេាក អភិបាលរាជធានីភ្នំពេញប្រគល់រង្វាន់សិស្សពូកែ )

រូប ( លេាក ប្រធានមន្ទីរអប់រំ )