​ប្រែ​សម្រួល : កញ្ញា​ដា​លី​ស (VNExpress) ៖ ឈុត​កន្ទេល​ប្រពៃណី ដែល​ពាក់​ដោយ​នាង ង្វៀន ធី​ង៉ុក​ចាវ​(Nguyen Thi Ngoc Chau) ក្នុង​កម្មវិធី​ប្រឡង​បវរកញ្ញា​ចក្រវាល​វៀត​ណា​ម​ឆ្នាំ ២០២២ បាន​ទទួល​រង​មតិ​រិះគន់​អវិជ្ជមាន បន្ទាប់ពី​មាន​ការកែប្រែ​រូប​សញ្ញា​នៅលើ​ដៃ​អាវ​។​

​អ្នក​រៀបចំ​កម្មវិធី​ប​វរ​កញ្ញា​ចក្រវាល​វៀត​ណា​ម​បាន​បញ្ជា​ឱ្យ​កែប្រែ​ឈុត​នេះ​នៅ​នាទីចុងក្រោយ មុនពេល​នាង​ចាវ​ហោះ​ទៅ​សហរដ្ឋ​អាម៉េរិក​នៅ​ថ្ងៃទី ២៦ ខែ​ធ្នូ​ដើម្បី​ត្រៀម​ខ្លួន​សម្រាប់​ការប្រឡង​បវរកញ្ញា​​ចក្រវាល​ឆ្នាំ ២០២៣ បន្ទាប់ពី​មាន​មតិ​រិះគន់​ទៅ​លើ​រូប​សញ្ញា​នៅលើ​ដៃ​អាវ​ដែល​តំណាងឱ្យ​ទ្រព្យសម្បត្តិ និង​ភាពរុងរឿង​។​

​ដោយ​មិន​ចង់​តំណាងឱ្យ​វប្បធម៌​វៀតណាម​បែប​នោះ អ្នក​រៀបចំ​បាន​កែ​ឈុត​សម្លៀក​បំពាក់​នេះ​ឡើងវិញ​ដើម្បី​ឱ្យដៃ​អាវ​ត្រូវបាន​តុបតែង​ដោយ​ផ្កាឈូក​ជំនួស​វិញ​ដែល​ជា​ការផ្សព្វផ្សាយ​វប្បធម៌​វៀតណាម​​ដែល​មិនសូវ​ចម្រូងចម្រាស​។​ប៉ុន្តែ​បន្ទាប់​មក អ្នក​រិះគន់​បាន​និយាយថា រូប​សញ្ញា​ថ្មី​នេះ​គឺ​ឆ្គង ហើយ​មិន​ត្រូវ​គ្នា​នឹង​គំនិត​ដើម​នៃ​ការ​រចនា​រ៉ូប​នេះ​នោះ​ទេ​។​

​នាយក​បវរកញ្ញា​ចក្រ​វាល​វៀតណាម លោក ហ៊ុញ តាន់​ហ្វាត់ (Huynh Tan Phat) បាន​និយាយថា ផ្កាឈូក​ហាក់​ដាក់​ខុស​កន្លែង​ក្រៅពី​ចំណុច​លម្អិត​ផ្សេងទៀត​នៅ​កែងដៃ​អាវ​។ ពួក​អ្នក​រិះគន់​បាន​និយាយថា បើ​គ្មាន​រូប​សញ្ញា​ដើម​ដែល​តែងតែ​តុបតែង​នៅលើ​កន្ទេល​ប្រពៃណី​របស់​វៀតណាម នោះ​សម្លៀកបំពាក់​នេះ​បាន​បាត់បង់​អត្ថន័យ​និង​តម្លៃ​របស់​វា​ហើយ​។​

​ប៉ុន្តែ​វា​មិនមែន​គ្រាន់តែ​ជា​ការកែប្រែ​ចំណុច​លម្អិត​ទេ​ដែល​បង្កើន​ចម្ងល់ សម្លៀក​បំពាក់​ខ្លួនឯង​ផ្ទាល់​ក៏​ទទួល​បាន​មតិ​អវិជ្ជមាន​ផងដែរ​។ អ្នក​រិះគន់​មួយចំនួន​បាន​លើកឡើង​ថា កន្ទេល​មិនមែនជា​អ្វី​ដែល​គួរ​ដាក់​បញ្ចូល​ក្នុង​សម្លៀកបំពាក់​នោះទេ​។​

​ចំ​ពេល​មាន​ភាពចម្រូងចម្រាស​នេះ អ្នក​រចនា​ម៉ូត លោក ឡេ ឡុង​យុង (Le Long Dung) ដែល​បាន​ជ្រើសរើស​ឈុត Chieu Ca Mau (​កន្ទេល​កាមូ​) សម្រាប់​នាង​ចាវ​បាន​ឆ្លើយតប​វិញ​ដោយ​និ​​យាយ​ថា ឈុត​នេះ​ត្រូវបាន​សន្មត់​ថា​ជា​ការរម្លឹក​ឡើងវិញដ​ល់​ប្រជាជន​វៀតណាម​នៅ​តំបន់​ភាគ​អាគ្នេយ៍ និង​ពណ៌​ត្រូពិច​នៃ​ភូមិ​សិប្បកម្ម​ប្រពៃណី​ក្នុង​តំបន់​។​

​លោក​យុង​បន្តថា កន្ទេល​នេះ​មាន​ទំនាក់ទំនង​ជាមួយ​ជីវិត​មនុស្ស​តាំងពី​កើត​រហូតដល់​ស្លាប់​។ ដូច្នេះ​កន្ទេល​មិន​ត្រឹមតែ​មាន​ន័យ​ថា​ទីបញ្ចប់​ប៉ុណ្ណោះ​ទេ ប៉ុន្តែ​ក៏​ជា​ការចាប់ផ្តើម​ផងដែរ​។ គាត់​តវ៉ា​ថា គ្មាន​អ្វី​ខុស​ជាមួយ​អ្នក​រចនា​ម៉ូត​ដែល​ប្រើ​កន្ទេល​ជាការ​បំផុសគំនិត​នោះឡើយ​៕

​ឈុត​កន្ទេល​ប្រពៃណី​របស់​នាង​ចាវ​កំពុង​រង​ការរិះគន់​