​ប្រែ​សម្រួល : កញ្ញា​ដា​លី​ស (​ដេល្លី​ម៉េល​) ៖ បុរស ដែល​ធ្វើឱ្យ​ក្តី​ស្រមៃ​របស់លោក វ្ល៉ា​ឌី​មៀ ពូ​ទីន ក្នុង​ការរុករក​ទី​អវកាស​ក្លាយជា​ការពិត បាន​ស្លាប់​នៅ​អាយុ​៧៤​ឆ្នាំ​។​

​លោក វ្ល៉ា​ឌី​មៀ ណេ​ស្តេ​រ៉ូវ (Vladimir Nesterov) គឺជា​អ្នក​ស្លាប់​ចុងក្រោយ​បង្អស់​ក្នុង​ឆ្នាំ​២០២២ ក្នុងចំណោម​ឥស្សរជន​របស់​រុស្ស៊ី​និង​ជា​មន្ត្រី​ទី​៤​ដែល​គេ​រាយការណ៍​ថា​ស្លាប់​ក្នុង​រយៈពេល​ប៉ុន្មាន​ថ្ងៃ​ចុង​​ក្រោយ​នៃ​ឆ្នាំ​២០២២​។​

​គាត់​បាន​ត្រួសត្រាយ​បង្កើត​រ៉ុក្កែត Angara ថ្មី​បំផុត​របស់​ពិភពលោក និង​ជា​អតីត​អគ្គនាយក​នៃ​មជ្ឈមណ្ឌល​គ្រូ​ស​ឆេវ (Khrunichev)​ដែល​លោកពូ​ទីន​សង្ឃឹមថានឹង​ជួយ​សម្រួល​ដល់​បេសកកម្ម​​មនុស្ស​ដំបូង​បំផុត​របស់​រុស្ស៊ី​ទៅ​កាន់​ឋាន​ព្រះ​ចន្ទ​។​

​ចាប់តាំងពី​ឆ្នាំ ២០១៤ មក លោក​ណេ​ស្តេ​រ៉ូវ​បាន​រង​ការចោទប្រកាន់​ជា​បន្តបន្ទាប់​អំពី​ការ​ឆបោក​និង​ការកេងបន្លំ​។​

​អាជ្ញាធរ​បាន​ចោទប្រកាន់​គាត់​ពីបទ​ស៊ីសំណូក​រហូតដល់ ៥៧ លាន​ផោន ហើយ​គាត់​ត្រូវបាន​ឃុំខ្លួន​ក្នុងផ្ទះ​ដើម្បី​រង់ចាំ​ការស៊ើបអង្កេត​បន្ថែម​។​

​មូលហេតុ​នៃ​ការស្លាប់​របស់​លោក​ណេ​ស្តេ​រ៉ូវ​មិន​ត្រូវ​បាន​បង្ហាញ​ឱ្យ​ដឹង​នោះ​ទេ​។​

​លោក អា​ឡិច​សាន់​ឌឺ ប៊ូ​ហ្សា​កូវ (Alexander Buzakov) អាយុ ៦៥ ឆ្នាំ ជា​អគ្គនាយក​នៃ​ក្រុមហ៊ុន Admiralty Shipyards ដែល​ទទួលបន្ទុក​សាង​សង់​នាវាមុជទឹក​ថ្មី​បំពាក់​ដោយ​កាំជ្រួច Kalibr ដ៏​ប្រល័យ ក៏​ស្លាប់​មិន​បាន​រំពឹងទុក​កាលពីដើម​សប្តាហ៍​មុន​ផងដែរ​។​

​ហើយ​ឧត្តមសេនីយ៍ អា​ឡិច​សី ម៉ា​ស្លូវ (Alexei Maslov) អាយុ ៦៩ ឆ្នាំ ជា​អតីត​មេបញ្ជាការ​កងកម្លាំង​ជើងគោក​រុស្ស៊ី​ដែល​មាន​ទំនាក់ទំនង​ជិតស្និទ្ធ​ជាមួយ​អ៊ុយ​ក្រែន​បាន​ទទួលមរណភាព​ភ្លាមៗ​​នៅ​ថ្ងៃបុណ្យ​ណូអែល បន្ទាប់ពី​លោក​ពូ​ទី​ន​បាន​លុបចោល​ការធ្វើដំណើរ​ទៅកាន់​សហគ្រាស​ផលិត​រថក្រោះ ដែល​គាត់​ធ្វើការ​ជា​ឯកអគ្គរដ្ឋទូត​ផ្នែក​លក់​អន្តរជាតិ​។​

​លោក​ប៊ូ​ហ្សា​កូវ​មាន​សុខភាព​ល្អ​ធម្មតា នៅ​មួយ​ថ្ងៃ​មុនពេល​គាត់​ស្លាប់ ហើយ “​គ្មាន​ដំណឹង​ណា​និយាយ​អំពី​បញ្ហា​សុខភាព​របស់​លោក​ម៉ាស្លូវ​នោះដែរ​”​។​

​លោក​ម៉ាស្លូវ​ធ្លាប់​ជា​មេបញ្ជាការកង​ទ័ពជើងគោក​រុស្ស៊ី​ចន្លោះ​ឆ្នាំ ២០០៤ ដល់ ២០០៨​។​

​ដូចគ្នានេះដែរ មហាសេដ្ឋី​សាច់ក្រក​និង​ជា​សមាជិក​សភា​រុស្ស៊ី​លោក ផាវែល អាន​តូ​វ (Pavel Antov) អាយុ ៦៥​ឆ្នាំ​បាន​ធ្លាក់​ស្លាប់​ពី​បង្អួច​ក្នុង​សណ្ឋាគារ​ឥណ្ឌា​នៅក្នុង​ករណី​មួយ​ផ្សេង​ទៀត​ដែល​បង្ក​​ឱ្យ​មាន​ការសង្ស័យ​យ៉ាងខ្លាំង​។​

​កាលពី​ខែ​មិថុនា លោក​អាន​តូ​វ​បាន​រិះគន់​សង្គ្រាម​នៅ​អ៊ុ​យក្រែន និង​ការវាយប្រហារ​តាម​អាកាស​លើ​ទីក្រុង​គៀវ​ថា​ជា “​អំពើ​ភេរវកម្ម​” របស់​រុស្ស៊ី ដែល​ធ្វើឱ្យ​ជន​ស៊ីវិល​អ៊ុយ​ក្រែន​ស្លាប់​និង​របួស​។​

​គាត់​បាន​គូសបញ្ជាក់​ពី​ការវាយប្រហារ​ដោយ​មី​ស៊ី​ល​របស់​រុស្ស៊ី ថា “​ក្មេងស្រី​ម្នាក់​ត្រូវ​បាន​ទាញ​ចេញ​ពី​ក្រោម​គំនរ​បាក់បែក ឪពុក​របស់​ក្មេងស្រី​ទំនង​ជា​បាន​ស្លាប់​ហើយ​”​។​

“​ម្តាយ​កំពុង​ត្រូវ​គេ​ព្យាយាម​ទាញ​ចេញ​ដោយ​ប្រើ​ដង​ស្ទូច នាង​ជាប់​នៅក្រោម​បន្ទះ​បេតុង​។ និយាយ​ប្រាប់​ការពិត​ទៅ​ចុះ វា​ពិតជា​ពិបាក​ណាស់​ក្នុង​ការហៅ​វា​ថា​ជា​ទង្វើ​អ្វី​ផ្សេង​ក្រៅតែពី​អំពើ​ភេរវកម្ម​”៕

លោក វ្ល៉ា​ឌី​មៀ ណេ​ស្តេ​រ៉ូវ ស្លាប់​យ៉ាង​អាថ៌កំបាំង​កាលពី​ថ្ងៃទី ៣០ ខែ​ធ្នូ ឆ្នាំ​២០២២​