ដោយ៖ដេប៉ូ/ភ្នំពេញ៖លោក អ៊ាង សុផល្លែត រដ្ឋលេខាធិការ ក្រសួង​បរិស្ថាន និងជាប្រធានក្រុមការងាររាជរដ្ឋាភិបាល ចុះមូលដ្ឋាន​ស្រុក​អូររាំងឳ ខេត្ត ត្បូងឃ្មុំ បានថ្លែងថា៖វិស័យអប់រំ និងបរិស្ថានត្រូវ​ផ្សារភ្ជាប់គ្នា។ លើសពីនេះសិស្សានុសិស្ស អាចសិក្សារៀនសូត្រ​បាននៅក្នុងថ្នាក់រៀន ដែលមានអនាម័យ និងបរិយាកាសល្អ។

ថ្លែងក្នុងពិធី បើកបវេសនកាលឆ្នាំសិក្សា ២០២២ – ២០២៣ នៅ​វិទ្យាល័យពាមជាំង ក្នុងឃុំព្រះធាតុ ស្រុកអូររាំងឪ ខេត្តត្បូងឃ្មុំ នាថ្ងៃអង្គារ ទី២ ខែមករា លោក អ៊ាង សុផល្លែតបានបញ្ជាក់ថា សិស្សានុសិស្ស នឹងធ្វើជាយុវជនបរិស្ថានគំរូ ដែលចូលរួមមិន​បង្កើតសំណល់ ជាពិសេសសំណល់ប្លាស្ទិក (ដោយប្រើថង់បរិស្ថាន ប្រើដបទឹកឬសម្ភារដែលអាចប្រើប្រាស់ឡើងវិញ ជាដើម) ចេះ​គ្រប់គ្រងសំណល់ឱ្យបានល្អ ចូលរួមអនាម័យបរិស្ថាននៅផ្ទះ សាលារៀន វត្តអារាម និងទីសាធារណៈ និងអាចជួយផ្សព្វផ្សាយ​បន្តដល់អ្នកជុំវិញខ្លួន អំពីអនាម័យបរិស្ថាន ដែលនាំឱ្យ មានសុខភាពល្អ និងមូលដ្ឋានស្អាត និងបៃតង។

ជាមួយគ្នានេះ លោក អ៊ាង សុផល្លែត បានបញ្ជាក់ថា ការអប់រំគឺ​គន្លឺះនៃការអភិវឌ្ឍ និងជាអាទិភាព១ ក្នុងចំណោមអាទិភាពទាំងបួន របស់រាជរដ្ឋាភិបាល (មនុស្ស ទឹក ផ្លូវ ភ្លើង) គ្មានប្រទេសណា អាចអភិវឌ្ឍជឿនលឿនរុងរឿង បានដោយគ្មានធនធានមនុស្ស ប្រកបដោយសមត្ថភាព និងចំណេះដឹងទេ។ លើសពីនេះទៀត លោកបានចែករំលែកចំណុចគ្រឹះចំនួន៨ ដែលផ្តោត​សំខាន់​លើការសិក្សាឱ្យមានលទ្ធផលល្អ និងទទួលបានជោគជ័យ។

សូមបញ្ជាក់ថា ពិធីបើកបវេសនកាលឆ្នាំសិក្សាថ្មី នៅវិទ្យាល័យ​ពាមជាំង នាពេលនេះ បានប្រព្រឹត្តទៅជាមួយការរៀបចំ​យុទ្ធនា​ការអនាម័យបរិស្ថាន ក្រោមប្រធានបទ «មាតុភូមិយើង កាតព្វកិច្ច​យើង ស្អាត និងបៃតង»។ ជាមួយគ្នានេះ លោក អ៊ាង សុផល្លែត បានចែកជូនសម្ភារសិក្សា និងថវិកាដល់គណ:គ្រប់គ្រងសាលា លោកគ្រូអ្នកគ្រូ និងសិស្សានុសិស្ស ទទួលបានជ័យលាភីប្រចាំឆ្នាំ ពីលេខ ១ ដល់លេខ៥ គ្រប់កម្រិតសិក្សា និងសិក្សានុសិស្ស ចូលរួមជាង៧០០នាក់ផងដែរ។ លោក ប្រធានក្រុម​ការងារចុះមូលដ្ឋានស្រុកអូររាំងឪ បានផ្តល់ការលើកទឹកចិត្ត ដល់សិស្សចំនួន២ នាក់​នៃវិទ្យាល័យពាមជាំង ទើបប្រឡងជាប់សញ្ញាបត្រមធ្យមសិក្សាទុតិយភូមិ (បាក់ឌប់) និទ្ទេស A ចំនួន២នាក់ ម្នាក់ៗថវិកា៥០០ ដុល្លារ និងសម្ភារសិក្សាមួយចំនួន ព្រមទាំងបានចែកជូនធុងសំរាម និងសម្ភារសំអាតអនាម័យ ដល់សាលារៀន និងអាជ្ញាធរមូលដ្ឋានផងដែរ៕សរន / N