ប្រែសម្រួលៈបំណង(ស្ត្រេតថែមស៍)៖ សហរដ្ឋអាម៉េរិកមិនពិភាក្សាការធ្វើសមយុទ្ធប្រើនុយក្លេអ៊ែរជាមួយកូរ៉េខាងត្បូងទេ នេះបើតាមការបញ្ជាក់ពីប្រធានាធិបតីចូ បៃដិន កាលពីថ្ងៃចន្ទ ដោយច្រានចោលការលើកឡើងរបស់ប្រធានាធិបតីកូរ៉េខាងត្បូងកាលពីមួយថ្ងៃមុននេះនៅពេលភាពតានតឹងជាមួយកូរ៉េខាងជើងបន្តកើនឡើង។

ក្នុង​កិច្ចសម្ភាសន៍​មួយ ប្រធានាធិបតី​កូរ៉េខាងត្បូង​លោក យូ​ន ស៊ុក​យ៉ូល បាន​និយាយថា កូរ៉េ​ខាងត្បូង​និង​អាម៉េរិក​កំពុង​ពិភាក្សា​អំពី​ផែនការ​ធ្វើ​សមយុទ្ធ​រួមគ្នា​ដោយ​ប្រើ​​ទ្រព្យ​នុយក្លេអ៊ែរ​អាម៉េរិកក្នុងការ​ប្រឈម​នឹង​ការ​គំរាម​ប្រើ​កាំជ្រួច​និង​សព្វាវុធនុយក្លេអ៊ែរ​កាន់តែ​ខ្លាំង​ឡើង​ពី​កូរ៉េខាងជើង​បន្ទាប់ពីមេដឹកនាំកូរ៉េខាងជើង គីម ជុងអ៊ុន ហៅកូរ៉េខាងត្បូងថា«សត្រូវគ្មានមន្ទិល»របស់ខ្លួន។

ជេក ស៊ុលលីវ៉ាន( Jake Sullivan)ទីប្រឹក្សាសន្តិសុខជាតិអាម៉េរិក ដែលបានអមដំណើរលោកបៃដិនទៅកាន់កោះ វៀជីន អាឡឹនស៍ សំរាប់វិសមកាល បាននិយាយថាលោកប្រធានាធិបតីបានបញ្ជាក់ថា«ទេ »នៅពេលត្រូវបានសួរថាតើអាម៉េរិកកំពុងពិភាក្សាអំពីការធ្វើសមយុទ្ធនុយគ្លេអ៊ែររួមគ្នាជាមួយកូរ៉េខាងត្បូងឬ។

ការលើកឡើងរបស់លោកយូន កើតឡើងបន្ទាប់ពីលោកបានអំពាវនាវអោយ«ត្រៀមធ្វើសង្រ្គាម»ជាមួយនឹងសមត្ថភាព«លើសលប់»មួយក្រោយពីកូរ៉េខាងជើងបានធ្វើការសាកល្បងកាំជ្រួចពេញមួយឆ្នាំ២០២២ក្នុងចំនួនដ៏ច្រើនមិនធ្លាប់មាន និងប្តេជ្ញាបង្កើនការអភិវឌ្ឍកាំជ្រួចព្រមទាំងពង្រីកឃ្លាំងសព្វាវុធនុយក្លេអ៊ែររបស់ខ្លួនថែមទៀតនៅឆ្នាំថ្មីនេះ។

​លោក​យូ​ន​បាន​និយាយថា​«សព្វាវុធ​នុយក្លេអ៊ែ​រជារ​បស់​អាម៉េរិក តែការរៀបចំ​ផែនការ ការចែករំលែក​ព័ត៌មាន​និង​ការហ្វឹកហាត់​គួរធ្វើ​រួមគ្នា​​ដោយ​កូរ៉េ​ខាងត្បូង​និង​អាម៉េរិក​»ក្នុងបំណងអនុវត្តដោយប្រសិទ្ធភាព«ការរារាំងរបស់អាម៉េរិក»។ពាក្យ«រារាំង»នេះមានន័យថាលទ្ធភាពរបស់អាម៉េរិក ជាពិសេសកងកម្លាំងនុយគ្លេអ៊ែររបស់ខ្លួន ក្នុងការរារាំងការវាយប្រហារមកលើសម្ពន្ធមិត្តអាម៉េរិក៕

លោកយូន ចង់អោយកូរ៉េខាងត្បូងហាត់សមប្រើនុយក្លេអ៊ែរជាមួយកងកម្លាំងអាម៉េរិកដើម្បីទប់ទល់នឹងកូរ៉េខាងជើង និងថាបញ្ហានេះកំពុងត្រូវបានពិភាក្សាគ្នាតែបៃដិនថា«អត់ទេ»