​ប្រែ​សម្រួល : កញ្ញា​ដា​លី​ស (​ដេល្លី​ម៉េល​) ៖ រុស្ស៊ី​បាន​ទទួលស្គាល់ថា ទាហាន​របស់ខ្លួន​រាប់សិប​នាក់​ត្រូវបាន​សម្លាប់​នៅក្នុង​ការវាយប្រហារ​ដ៏​សាហាវ​បំផុត​មួយ​ក្នុង​សង្គ្រាម​អ៊ុយ​ក្រែន​ដោយ​បង្កកំហឹង​ដល់​អ្នក​​ជាតិនិយម​រុស្ស៊ី រួមទាំង​សមាជិក​សភា និង​ទាក់ទាញ​ការទាមទារ​ឱ្យ​ដាក់​ទណ្ឌកម្ម​លើ​ពួក​មេបញ្ជាការ​ចំពោះ​ការដាក់​ទាហាន​នៅ​ក្បែរ​ឃ្លាំង​គ្រាប់​។​

​នៅក្នុង​ការ​លាតត្រដាង​ដ៏​កម្រ​មួយ ក្រសួងការពារជាតិ​រុស្ស៊ី​បាន​និយាយថា ទាហាន ៦៣​នាក់​បាន​ស្លាប់​នៅ​ថ្ងៃ​ចូលឆ្នាំ​សកល​នៅក្នុង​ការផ្ទុះ​ដ៏​ខ្លាំង​មួយ​ដែល​បាន​បំផ្លាញ​បន្ទាយ​បណ្តោះអាសន្ន​នៅ​ក្នុង​​អតីត​មហាវិទ្យាល័យ​វិជ្ជាជីវៈ​នៅ​ទីក្រុង​ម៉ា​គី​អ៊ីវ​កា (Makiivka) ជា​ទីក្រុង​ភ្លោះ​នៃ​ទី​រួម​ខេត្ត​ក្នុង​តំបន់​កាន់កាប់​ដោយ​រុស្ស៊ី​គឺ ខេត្ត​ដូណិត​ស​ខ៍នៅ​ភាគ​ខាងកើត​អ៊ុ​យក្រែ​ន​។​

​ក្រសួង​ការពារជាតិ​បាន​និយាយថា គ្រាប់​រ៉ុក្កែត​ចំនួន​បួន​គ្រាប់​ដែល​បាញ់​ចេញ​ពី​ប្រព័ន្ធ HIMARS ផលិត​ដោយ​សហរដ្ឋ​អាម៉េរិក​បាន​វាយប្រហារ​ចំ​ទីតាំង​នោះ​។ ក្រសួង​បាន​និយាយ​ថា​រ៉ុក្កែត​ពីរ​គ្រាប់​​ត្រូវ​បាន​បាញ់​ទម្លាក់​។ អ៊ុយ​ក្រែន​បាន​និយាយថា ចំនួន​អ្នក​ស្លាប់​របស់​រុស្ស៊ី​មាន​រាប់រយ​នាក់ ប៉ុន្តែ​មន្ត្រី​គាំទ្រ​រុស្ស៊ី​បាន​ហៅ​វា​ថា​ជាការ​បំផ្លើស​។​

​អ្នកសរសេរ Blog របស់​យោធា​រុស្ស៊ី​បាន​និយាយថា ការបំផ្លិចបំផ្លាញ​ដ៏​ធំ​នេះ​គឺជា​លទ្ធផល​នៃ​ការ​រក្សាទុក​គ្រាប់​នៅក្នុង​អគារ​តែ​មួយ​ជាមួយ​បន្ទាយ​បើទោះបីជា​ពួក​មេបញ្ជាការ​ដឹង​ថា​វា​ស្ថិតនៅ​ក្នុង​រយៈ​​ចម្ងាយ​បាញ់​ដល់​នៃ​គ្រាប់​រ៉ុក្កែត​របស់​អ៊ុយ​ក្រែន​ក៏ដោយ​។​

​ដោយឡែក អ៊ុយ​ក្រែន​បាន​និយាយ​កាលពី​ថ្ងៃ​ចន្ទ​ថា ខ្លួន​បាន​បាញ់​ទម្លាក់ដ្រូន​ទាំង ៣៩​គ្រឿង​ដែល​រុស្ស៊ី​បាន​បង្ហោះ​ក្នុង​យប់​ទី​បី​ជាប់ៗ​គ្នា​នៃ​ការវាយប្រហារ​តាម​អាកាស​ប្រឆាំងនឹង​គោលដៅ​ជន​ស៊ីវិល​​នៅក្នុង​រដ្ឋធានី​គៀវ​និង​ទីក្រុង​ដទៃទៀត​។​

​មន្ត្រី​អ៊ុយ​ក្រែន​បាន​និយាយថា ជោគជ័យ​របស់​ពួកគេ​បានបង្ហាញ​ថា​យុទ្ធសាស្ត្រ​របស់​រុស្ស៊ី​ក្នុង​ប៉ុន្មាន​ខែ​ថ្មីៗ​នេះ​ក្នុងការ​បាញ់ស្រោច​មី​ស៊ី​ល​និង​ដ្រូ​ន​ដើម្បី​បំផ្លាញ​ហេដ្ឋារចនាសម្ពន្ធ​ថា​ម​ពលរ​បស់​អ៊ុ​យក្រែន​​គឺ​កាន់តែ​បរាជ័យ ខណៈ​រដ្ឋាភិបាល​ក្រុង​គៀវ​បង្កើន​ការការពារ​ដែនអាកាស​របស់​ខ្លួន​នៅ​ជាង ១០ ខែ​ចាប់តាំងពី​កងកម្លាំង​រុស្ស៊ី​បាន​ឈ្លានពាន​៕

ទាហាន ៦៣ នាក់​បាន​ស្លាប់​នៅ​ថ្ងៃ​ចូលឆ្នាំ​សកល​នៅក្នុង​ការផ្ទុះ​ដ៏​ខ្លាំង​មួយ​ដែល​បាន​បំផ្លាញ​បន្ទាយ​បណ្តោះអាសន្ន​នៅ​ក្នុង​អតីត​មហាវិទ្យាល័យ​វិជ្ជាជីវៈ​នៅ​ទីក្រុង​ម៉ា​គី​អ៊ីវ​កា​