​ប្រែ​សម្រួល : កញ្ញា​ដា​លី​ស (​ដេល្លី​ម៉េល​) ៖ អេ​ហ្ស៊ី​បបាន​ប្រកាស​កាលពី​ថ្ងៃ​ចន្ទ​ទី​២​មករា​អំពី​ការទទួល​បាន​មក​វិញ​នូវ​គម្រប​មឈូស​បុរាណ​អាយុកាល​ជិត ២.៧០០ ឆ្នាំ​ដែល​ខ្លួន​និយាយថា​ត្រូវ​បាន​លួច​យក​​ចេញពី​ប្រទេស​ហើយ​ដាក់​តាំង​បង្ហាញ​នៅ​សារមន្ទីរ​ក្នុង​សហរដ្ឋ​អាម៉េរិក​។​

​រដ្ឋមន្ត្រីការបរទេស​អេ​ហ្ស៊ី​ប លោក សា​មេ ស៊ូ​គ្រី (Sameh Shoukry)​បាន​ប្រកាស​ពី​ការទទួល​បាន​មក​វិញ​នូវ​វត្ថុ​បុរាណ​នេះ ដែល​គេ​ស្គាល់​ថា ហ្គ្រី​ន សាខ​ប​ហ្វា​ហ្គឹស​(Green Sarcophagus)(​មឈូស​ថ្ម​​បៃតង​)​ក្នុងអំឡុងពេល​សន្និសីទ​សារព័ត៌មាន​តាម​ទូរទស្សន៍​កាលពី​ថ្ងៃ​ចន្ទ​។​

​លោក​បាន​និយាយថា វា​ត្រូវ​បាន​នាំ​ចេញ​ដោយ​លួចលាក់​ពី​ប្រទេស ហើយ​ការ​យក​វា​បាន​មក​វិញ​គឺជា​ផ្នែក​នៃ​កិច្ចខិតខំ​ប្រឹងប្រែង​ដើម្បី “​ការពារ​បេតិកភណ្ឌ​របស់អេ​ហ្ស៊ី​ប​”​។​

​រដ្ឋមន្ត្រី​ទេសចរណ៍​និង​វត្ថុ​បុរាណ លោក អា​ម៉េត អ៊ី​ស​សា (Ahmed Issa)​បាន​និយាយ​នៅក្នុង​សន្និសីទ​សារព័ត៌មាន​ថា គម្រប​ដែល​មាន​បណ្តោយ​ជិត ៣ ម៉ែត្រ និង​ទទឹង ៩០​សង់ទីម៉ែត្រ​គឺ​ស្ថិតក្នុង​​ចំណោម​វត្ថុ​បុរាណ​ចំនួន ១៧ ដែល​ទើប​ទទួលបាន​មកវិញ​ពី​សហរដ្ឋ​អាម៉េរិក​។​

​យោងតាម​ប្រព័ន្ធ​ផ្សព្វផ្សាយ​រដ្ឋ​បានឱ្យដឹងថា គម្រប​មឈូស​បៃតង​នេះ​ត្រូវ​គេ​លួច​ពី​ផ្នូ​រអា​ប៊ូ​សឺ (Abusir)​នៅ​ភាគខាងត្បូង​ទីក្រុង​គែរ បន្ទាប់មក​បាន​ដឹក​ជញ្ជូន​ទៅកាន់​សហរដ្ឋ​អាម៉េរិក​ក្នុង​ឆ្នាំ ២០០៨ ហើយ​ទីបំផុត​បាន​ធ្វើដំណើរ​ទៅកាន់​សារមន្ទីរ​វិទ្យាសាស្ត្រ​ធម្មជាតិ​ហ៊ូស្តុន​ក្នុង​ឆ្នាំ ២០១៣៕

​គម្រប​មឈូស​បៃតង​ទីបំផុត​វិលត្រឡប់​មក​អេ​ហ្ស៊ី​បវិញ​កាលពី​ថ្ងៃ​ចន្ទ​