​ប្រែ​សម្រួលៈ​បំណង​(​ស៊ីន​ហួរ​)៖​នៅពេល​តំបន់​ជាច្រើន​នៅ​ចិន​កំពុង​ជួប​កំណើន​នៃ​ការ​ឆ្លងកូវី​ដ​១៩ បណ្តា​មន្ទីរពេទ្យ​មូលដ្ឋាន​ក៏កំពុង​ខិតខំ​ព្យាបាល​អ្នកជំងឺ​ពេញទំហឹង ជាពិសេស​អ្នកជំងឺ​កូវី​ដ​១៩​ធ្ងន់ៗ​។​

​មន្ទីរពេទ្យ​ចិន​ជាច្រើន​ឥឡូវ​កំពុង​សកម្ម​ប្រមូល​និង​លៃ​ទុក​ប្រភពធនធាន​ហើយ​បន្ថែម​គ្រែ​អ្នកជំងឺ នៅពេល​បុគ្គលិក​ពេទ្យ​កំពុងធ្វើការ​ពេញ​ម៉ោង​ដើម្បី​ព្យាបាល​មើល​ថែម​អ្នកជំងឺ​ធ្ងន់ៗ​និង​សង្គ្រោះ​​អាយុជីវិត​មនុស្ស​។​

​នៅ​ក្រុង​ហា​ប៊ីន​(Harbin)​ក្នុង​ខេត្ត​ហៃ​ឡុង​ជាំ​ង​(Heilongjiang)​ភាគ​ខាងជើង មន្ទីរពេទ្យ​នៃ​សកល​វិទ្យាល័យ​វេជ្ជសាស្ត្រ បាន​បន្ថែម​គ្រែ​អ្នកជំងឺ​ធ្ងន់ធ្ងរ​និង​ឧបករណ៍​ជំនួយ​ដង្ហើម​ចំ​ពេល​អ្នកជំងឺ​​កូ​វីដ​ចូល​សម្រាក​នៅ​មន្ទីរពេទ្យ​នេះ​កើនឡើង​ក្នុងពេល​ខ្លួន​ក៏​កំពុង​ប្រឈម​ការ​ខ្វះ​បុគ្គលិក​ពេទ្យ​។​

​យូ កាយ​ជាំ​ង​(Yu Kaijiang)​ប្រធាន​មន្ទីរពេទ្យ​ខាងលើ​បាន​និយាយថា​«​វេជ្ជបណ្ឌិត​ជាច្រើន​កំពុង​ធ្វើការ​និង​ព្យាបាល​អ្នកជំងឺ​នៅពេល​ខ្លួនឯង​ក៏​ឈឺ ហើយយើង​ខិតខំ​អស់​ពី​សមត្ថភាព​ដើម្បី​សង្គ្រោះ​​គ្រប់​អ្នកជំងឺ​»​។​​មន្ទីរពេទ្យ​នេះ​បាន​បង្កើត​ក្រុម​អ្នកជំនាញ​វេជ្ជសាស្ត្រ​មួយ​ដើម្បី​បង្ការ​កុំអោយ​អ្នកជំងឺ​ធ្ងន់​វិវត្ត​ទៅ​កាន់តែ​ធ្ងន់ធ្ងរ​ឡើង​។​នៅ​ប៉ុន្មាន​ថ្ងៃ​មកនេះ​វា​បាន​ទទួល​អ្នកជំងឺ​ធ្ងន់​ជាង​១៤០​នាក់​។​

​នៅ​ក្រុង​ថា​យ​យូ​អ៊ែន​(Taiyuan)នៃ​ខេត្ត​សាន់​ស៊ី (Shanxi) ផ្នែក​អ្នកជំងឺ​ធ្ងន់​ICU​នៃ​មន្ទីរពេទ្យ​សាន់​ស៊ី បេ​ធូន​(Shanxi Bethune)​បាន​អស់​កន្លែង​ទទួល​អ្នកជំងឺ​ថ្មី ទោះ​ជា​បាន​បន្ថែម​គ្រែ​​ពី​៣០​មក​៤៥​ហើយ​។​

​នៅពេល​ចំនួន​អ្នកជំងឺ​ធ្ងន់​កើនឡើង បណ្តា​មន្ទីរពេទ្យ​នៅ​រដ្ឋធានី​ប៉េកាំង​ក៏​បាន​និង​កំពុង​ខិតខំ​បង្កើន​ចំនួន​គ្រែ​ពេទ្យ ត្រៀម​និង​លៃ​ទុក​ប្រភព​ធនធាន​វេជ្ជសាស្ត្រ​អោយ​កាន់តែ​ល្អ និង​ថែម​ទាំង​ហ្វឹកហាត់​​អំពី​ការសង្គ្រោះ​អ្នកជំងឺ​ធ្ងន់​ដើម្បី​ធានា​ថា គ្រប់​អ្នកជំងឺ​ធ្ងន់​ទទួលបាន​ការព្យាបាល​ទាន់ពេល​។​

​សូមបញ្ជាក់​ថា ក្រោយ​ពី​ចិន​ដូរ​របៀប​ឆ្លើយតប​នឹង​ជំងឺ​កូវី​ដ​១៩ ចំណុច​ផ្តោត​សំខាន់​របស់​ចិន​ឥឡូវ​ដូរ​ពី​ការបង្ការ​ការឆ្លង​មក​ជា​ការព្យាបាល​ជំងឺ​វិញ​។​

​លៀង វ៉ាន់នៀន​(Liang Wannian)​ប្រធាន​ក្រុម​អ្នកជំនាញ​ការឆ្លើយតប​កូវី​ដ​១៩​នៅក្រោម​គណៈកម្មាធិការ​សុខាភិបាល​ជាតិ បាន​និយាយថា​« ការផ្តោត​បច្ចុប្បន្ន​បាន​ដូរ​ពី​ការបង្ការ​ជំងឺឆ្ល​មកកាន់​​ការព្យាបាល​វេជ្ជសាស្ត្រ​។​នឹង​មាន​កិច្ចខិតខំ​រារាំង​កុំអោយ​អ្នកជំងឺ​ធ្លាក់ខ្លួន​ឈឺ​ខ្លាំង​ឡើង​និង​ការស្លាប់​»​។​

​ចំណែក​លោក​ចាវ យ៉ាវី​( Jiao Yahui)មន្ត្រី​នៅ​គណៈកម្មាធិការ​សុខាភិបាល​ជាតិ បាន​និយាយថា ខេត្ត​ចិន​ជាច្រើន​កំពុង​ជួប​កំណើន​នៃ​អ្នកជំងឺ​កូវី​ដ​១៩​ធ្ងន់ធ្ងរ​នៅពេល​គ្រប់​មន្ទីរពេទ្យ​កំពុង​ព្យាយាម​​បំពេញ​សេចក្តីត្រូវការ​សំរាប់​អ្នកជំងឺ​ធ្ងន់ៗ​កាន់តែច្រើន​។​

​នៅ​ក្រុង​ប៉េកាំ​ង អាជ្ញាធរ​មូលដ្ឋាន​ក៏​បើក​គ្លីនិច​ជំងឺ​ក្តៅខ្លួន​នៅ​តាម​មន្ទីរពេទ្យ​បណ្តោះអាសន្ន​ជាច្រើន នៅ​កីឡាដ្ឋាននិង​សាល​តាំងពិព័រណ៍​ដើម្បី​ផ្តល់​សេវា​វេជ្ជសាស្ត្រ​សំរាប់​អ្នកជំងឺ​កូវី​ដ​១៩​ក្នុង​បំណង​សម្រា​​ល​សម្ពាធ​លើ​បណ្តា​ស្ថាប័ន​វេជ្ជសាស្ត្រ​៕

​រដ្ឋាភិបាល​ទីក្រុង​ប៉េកាំង​ទទួលស្គាល់​ទំហំ​នៃ​ការផ្ទុះកូ​វីដ​១៩ និង​ថា​ខ្លួន​លែង​អាច​តាមដាន​ចំនួន​ឆ្លង​ប្រចាំ​ថ្ងៃ​បាន​ក្រោយ​លុបចោល​វិធានការ​ធ្វើតេស្តិ៍​រក​កូ​វីដ​​ទ្រង់ទ្រាយ​ធំៗ​កាលពី​ខែ​មុន​ហើយ​​មន្ទីរពេទ្យ​ជោរជន់​ដោយ​អ្នកជំងឺ​ធ្ងន់ ជាពិសេស​មនុស្ស​ចាស់​(រូបដេល្លីម៉េល)