​ប្រែ​សម្រួល : កញ្ញា​ដា​លី​ស (​ដេល្លី​ម៉េល​) ៖​កាលពី​ថ្ងៃ​ចន្ទ​ទី​២​មករា​ប្រជាជន​ប្រេ​ស៊ីលដ៏​រំជួលចិត្ត​បានចាប់ផ្តើម​គោរព​ជា​លើក​ចុង​ក្រោយ​ដល់​វីរបុរស​បាល់ទាត់​ប៉េឡេ​នៅឯ​កីឡដ្ឋា​ន​ដែល​គាត់​​ធ្លាប់​ធ្វើ​ឱ្យ​ពិភពលោក​ភ្ញាក់ផ្អើល​ជាមួយនឹង​ជំនាញ​ដ៏​អស្ចារ្យ​របស់គាត់​។​ពេញ​មួយ​ថ្ងៃ​ចន្ទ អ្នកគាំទ្រ​និង​ឥស្សរជន​កីឡាបាល់ទាត់​រាប់ពាន់នាក់​បាន​តម្រង់​ជួរ​ដាក់​បាច់ផ្កា​នៅឯ​ពិធី​បុណ្យ​សព​នៅ​កីឡដ្ឋាន Vila Belmiro ដែល​ជា​ផ្ទះ​យូរ​ឆ្នាំ​របស់​ក្លិប Santos របស់​ប៉េឡេ​។​

​មនុស្ស​ច្រើន​ឡើង​បាន​បន្ត​តម្រង់​ជួរ​ទាំងយប់ ដោយ​រង់ចាំ​វេន​របស់​ពួកគេ​ដើម្បី​ដើរកាត់​សាកសព “​អូ​រៃ​” ឬ “O Rei” (​ស្តេច​) ដែល​តម្កល់​នៅ​កណ្តាល​ទីលាន​បាល់ទាត់​។​

​មឈូស​របស់​ប៉េឡេ​ត្រូវបាន​រុំ​ដោយ​ទង់ជាតិ​ប្រេ​ស៊ី​ល​និង​ទង់​របស់​ក្លិប Santos ហើយ​ហ៊ុម​ព័ទ្ធ​ជុំវិញ​ដោយ​ផ្កា​ពណ៌​ស រួម​ទាំង​ភួងផ្កា​ពី​ក្លិប Real Madrid និង​តារា​ប្រេ​ស៊ីល​បច្ចុប្បន្ននីម៉ា ដែល​ឪពុក​របស់​គេ​ក៏​បាន​ចូលរួម​ផងដែរ​។​

​ប្រព័ន្ធ​ផ្សព្វផ្សាយ​ក្នុងស្រុក​បាន​រាយការណ៍​ថា ប្រធានាធិបតី ល្វីស អ៊ី​ណា​ស៊ី​អូ លូ​ឡា ដា ស៊ី​ល​វ៉ា (Luiz Inacio Lula da Silva) និង​ភរិយា​ក៏​បាន​ផ្ញើ​កម្រងផ្កា​ផងដែរ​។​

​ការិយាល័យ​របស់​លោក​លូ​ឡា​បាន​ប្រកាស​មុន​នេះ​ថា លោក​នឹង​ចូលរួម​ក្នុង​ពិធី​បុណ្យ​សព​នៅ​ព្រឹក​ថ្ងៃ​អង្គារ គឺ​តិចជាង ៤៨ ម៉ោង​បន្ទាប់ពី​ការស្បថ​ចូលកាន់​តំណែង ដើម្បី “​គោ​រពព​វិញ្ញាណក្ខន្ធ​” មុន​ពេល​ពិធី​ដង្ហែ​សព និង​ពិធី​បញ្ចុះ​សព​នៅពេល​ក្រោយ​។​

​ប៉េ​ឡេ ជា​ម្ចាស់​ជើងឯក​វើល​ខាប់​បី​សម័យ ដែល​គេ​ចាត់ទុកជា​កីឡាករ​បាល់ទាត់​ដ៏​អស្ចារ្យ​បំផុត​គ្រប់​ពេល​នោះ បាន​ទទួលមរណភាព​កាលពី​ថ្ងៃ​ព្រហស្បតិ៍​ក្នុង​អាយុ ៨២ ឆ្នាំ​បន្ទាប់ពី​ការតស៊ូ​ជាមួយនឹង​ជំងឺមហារីក​។​

​ប្រធាន FIFA លោក ជី​យ៉ាន​នី អ៊ី​ហ្វាន​ទីណូ (Gianni Infantino) ដែល​បាន​ចូលរួម​ក្នុង​ពិធី​ជាមួយ​ប្រធាន​សហព័ន្ធ​បាល់ទាត់​អាម៉េរិក​ខាងត្បូង​និង​ប្រេ​ស៊ីល បាន​និយាយថា ស្ថាប័ន​គ្រប់គ្រង​កីឡា​បាល់ទាត់​នេះ​នឹង​ស្នើ​ឱ្យ​ប្រទេស​សមាជិក​ទាំងអស់​ដាក់​ឈ្មោះ​កីឡដ្ឋាន​ថា​ប៉េឡេ​ដើម្បី​ជា​កិត្តិយស​ដល់​គាត់​។​

​លោក​អ៊ី​ហ្វាន​ទីណូ​បានប្រាប់​អ្នកកាសែត​នៅ​ទីក្រុង​កំពង់ផែ Santos ស្ថិតនៅ​ចម្ងាយ ៧៥ គីឡូម៉ែត្រ​ពី​ទីក្រុង​សៅ​ប៉ូ​ឡូ ថា “​ប៉េឡេ​គឺ​អមតៈ​។ គាត់​គឺជា​និមិត្តរូប​នៃ​កីឡាបាល់ទាត់​ពិភពលោក​”៕

​ប្រជាជន​ប្រេ​ស៊ីល​រួម​ទាំង​ប្រធាន​បាល់ទាត់​ពិភពលោក​ចូល​គោរព​សព​លោក​ប៉េឡេ