​ប្រែ​សម្រួល : កញ្ញា​ដា​លី​ស (VNExpress) ៖ សេដ្ឋកិច្ច​របស់​សិង្ហ​បុរី​បាន​កើនឡើង​លឿន​ជាង​ការព្យាករណ៍​ផ្លូវការ​នៅ​ឆ្នាំ ២០២២​ប៉ុន្តែ​សកម្មភាព​យឺតយ៉ាវ​នៅក្នុង​ត្រីមាស​ទី​បួន​ចង្អុលបង្ហាញ​អំពី​ហា​​និភ័យ​សំខាន់ៗ​នៅខាងមុខ​សម្រាប់​រដ្ឋ​ទីក្រុង​មួយ​នេះ​ក្នុង​ឆ្នាំ​ថ្មី​២០២៣ ខណៈ​តម្រូវការ​ពិភពលោក​ចុះ​ខ្សោយ​និង​សម្ពាធ​អតិផរណា​មាន​ទម្ងន់​ធ្ងន់​។​

​ទិន្នន័យបឋម​របស់​ក្រសួង​ពាណិជ្ជកម្ម​និង​ឧស្សាហកម្ម​បាន​បង្ហាញ​នៅ​ថ្ងៃ​អង្គារ​ទី​៣​មករា​នេះ​ថា សេដ្ឋកិច្ច​របស់​សិង្ហ​បុរី​បាន​កើនឡើង ៣,៨ ភាគរយ​ក្នុង​ឆ្នាំ ២០២២​ដោយ​ផ្តួល​ការព្យាករណ៍​របស់​​រដ្ឋាភិបាល​សម្រាប់​កំណើន ៣,៥ ភាគរយ និង​ធ្លាក់ចុះ​ពី ៧,៦ ភាគរយ​ក្នុង​ឆ្នាំ ២០២១​។​

​ទិន្នន័យ​របស់​រដ្ឋាភិបាល​បានបង្ហាញ​ថា ផលិតផល​ក្នុងស្រុក​សរុប (GDP)​បាន​កើនឡើង ២,២ ភាគរយ​ក្នុង​ខែតុលា​ដល់​ខែ​ធ្នូ​ធៀប​ឆ្នាំមុន ដោយ​ឃើញ​ការកើនឡើង​ស្ទើរតែ​ពាក់កណ្តាល​នៃ​កំណើន ៤,២ ភាគរយ​ក្នុង​ត្រីមាស​ទី​បី​។ សេដ្ឋវិទូ​ចំនួន​ប្រាំបី​រូប ដែល​ត្រូវបាន​ស្ទង់​មតិ​ដោយ​ទីភ្នាក់ងារ​សារព័ត៌មាន​រ៉​យ​ទ័រ រំពឹងថា​នឹង​មាន​កំណើន ២,១ ភាគរយ​។​

​លោក ជេ​ហ្វ ង៉ អ្នកវិភាគ​មក​ពី​ក្រុមហ៊ុន MUFG បាន​និយាយថា “​វា​ពិតជា​គួរឱ្យ​ព្រួយបារម្ភ​ដែល​មាន​ការធ្លាក់ចុះ​នៃ​សេវាកម្ម​ប្រចាំត្រីមាស​…​នេះ​បាន​បង្ហាញ​ពី​ផលប៉ះពាល់​នៃ​ការធ្លាក់​ចុះ​ជា​សកល​ទៅលើ​វិស័យ​សេវាកម្ម​តម្រង់​ទិស​ខាងក្រៅ ហើយ​ថា​កំណើន​បន្ថែម​ទៀត​ពី​កម្រិត​បច្ចុប្បន្ន​នឹង​ពិបាក​សម្រេច​បាន​ណាស់​នៅ​ឆ្នាំ ២០២៣”​។​

GDP បាន​កើនឡើង ០,២ ភាគរយ​ផ្អែកលើ​មូលដ្ឋាន​ដែល​បានកែតម្រូវ​តាម​រដូវ​កាល​ប្រចាំត្រីមាស​ក្នុង​ខែតុលា​ដល់​ខែ​ធ្នូ​។​

​នាយករដ្ឋមន្ត្រី​សិង្ហ​បុរី លោក លី សៀន​ឡុង បាន​និយាយ​នៅក្នុង​សារ​ឆ្នាំ​ថ្មី​របស់​លោក​កាលពី​ថ្ងៃ​សៅ​រ៍ថា ទស្សនវិស័យ​អន្តរជាតិ​នៅតែ​មាន​បញ្ហា​ដែល​នឹង​ប៉ះពាល់​ដល់​សេដ្ឋកិច្ច​របស់​រដ្ឋ​។ រដ្ឋាភិបាល​រំពឹង​មាន​កំណើន​ពី ០,៥ ភាគរយ ទៅ ២,៥ ភាគរយ​នៅ​ឆ្នាំនេះ​៕

​កប៉ាល់​ចូល​ចត​នៅ​កំពង់ផែ Keppel ក្នុងប្រទេស​សិង្ហ​បុរី នៅ​ថ្ងៃទី ១៧ ខែវិច្ឆិកា ឆ្នាំ ២០២០