​ប្រែ​សម្រួល : កញ្ញា​ដា​លី​ស (​ស្ត្រេត​ថែមស៍​) ៖ ទាហាន​នៃ​កងពលធំ​ទ័ពអាកាស​លេខ ១០១ របស់​កងទ័ព​អាម៉េរិក បាន​ហូបចុក​និង​ដេក​នៅលើ​ទីតាំង​ព្រំដែន​ដ៏​ស្ងាត់​មួយ​នៅ​ភាគ​អាគ្នេយ៍​ប្រទេស​រូ​ម៉ា​នី ដែល​ស្ថិត​ក្នុង​ចម្ងាយ​ហោះ​ដល់​នៃ​រ៉ុក្កែត​ត្រឹមតែ​ប្រាំពីរ​នាទី​ពី​កន្លែង​ដែល​រុស្ស៊ី​បាន​ស្តុក​ទុក​គ្រាប់​នៅ​តំបន់​គ្រី​ម៉េ​។​

​នៅ​ភាគ​ខាងជើង​ឆ្ងាយ​ពី​ទីនោះ ក្នុង​សមយុទ្ធ​យោធា​ជាមួយ​កងទ័ព​រ៉ូ​ម៉ានី​នៅ​តែ​ប៉ុន្មាន​គីឡូម៉ែត្រ​ពី​ព្រំដែន​អ៊ុ​យក្រែន ទាហាន​អាម៉េរិក​មកពី​កងពលធំ​លេខ ១០១ ដែរនោះ កំពុង​បាញ់កាំភ្លើង​ធំ​បើក​​ការវាយប្រហារ​ដោយ​ប្រើ​ឧទ្ធម្ភាគចក្រ និង​ជីក​លេណដ្ឋាន​ស្រដៀង​ទៅ​នឹង​សមរភូមិ​ជួរ​មុខ​ក្នុង​ទីក្រុង​ឃើ​សុន ដែល​ជា​ទីក្រុង​កំពង់ផែ​អ៊ុ​យក្រែន ដែល​ទាហាន​រុស្ស៊ី​បាន​ដកថយ​ចេញ​កាលពី​ខែ​វិច្ឆិកា​។​

​វា​ជា​លើកទីមួយ​ហើយ ដែល​កងពលធំ​ទ័ពអាកាស​លេខ​១០១​ត្រូវបាន​ដាក់ពង្រាយ​ទៅកាន់​ទ្វីបអឺរ៉ុប ចាប់តាំងពី​សង្គ្រាមលោក​លើក​ទី​ពីរ ហើយ​ជាមួយនឹង​វត្តមាន​របស់​ពួកគេ​នៅក្នុង​ប្រទេស​រូ​ម៉ា​នី​ដែល​​ជា​សមាជិក​អង្គការ​ណា​តូ ទាហាន​របស់​អាម៉េរិក​ឥឡូវ​នេះ​កំពុង​នៅ​ជិត​តំបន់​សង្គ្រាម​នៅ​អ៊ុយ​ក្រែន​ជាង​អង្គភាព​កងទ័ព​អាម៉េរិ​ក​ណាៗ​ទាំងអស់​។​

​បេសកកម្ម​របស់​ពួកគេ​ត្រូវបាន​ចាត់ទុក​ថា​ជា​គំរូ​មួយ​សម្រាប់​យោធា​អាម៉េរិក​ដែល​ទើបនឹង​ដកខ្លួន​ចេញពី​សង្គ្រាម​យ៉ាង​សកម្ម​រយៈពេល​ពីរ​ទសវត្សរ៍ និង​ចូល​ទៅក្នុង​យុគសម័យ​នៃ​ការព្យាយាម​រារាំង​សត្រូវ ដោយ​ប្រើការ​សម្ញែង​កម្លាំង​ក៏ដូចជា​ការហ្វឹកហ្វឺន ការដឹកជញ្ជូន​អាវុធ និង​ជំនួយ​ផ្សេងទៀត​ដើម្បី​ជំរុញ​ហេតុផល​របស់ខ្លួន​នៅក្នុង​ស្រុក​។​

​ឧត្តមសេនីយ៍ ជែម​ស៍ ស៊ី ម៉ាក​ខុន​វី​ល (James C. McConville)​នាយសេនាធិការ​នៃ​កងទ័ពជើងគោក​អាម៉េរិក​បាន​និយាយ​នៅក្នុង​បទសម្ភាសន៍​កាលពី​ពាក់កណ្តាល​ខែ​ធ្នូ​នៅឯ​មូលដ្ឋានទ័ព​​អាកាស​ដែល​ចែករំលែក​ផ្លូវ​រត់​ជាមួយ​អាកាសយានដ្ឋាន​ពាណិជ្ជកម្ម​នៅ​ជាប់​នោះ​ថា “​នេះ​គឺជា​ជម្លោះ​ក្នុង​តំបន់​ប៉ុន្តែ​វា​មាន​ផលប៉ះពាល់​ជា​សកល​”​។​

​ការ​ដាក់​ពង្រាយ​កងទ័ព​នៅក្នុង​ប្រទេស​រូ​ម៉ា​នី​គឺ​មានន័យថា​ជា​ការព្រមាន​ដល់​រដ្ឋាភិបាល​ក្រុង​មូ​ស្គូ ដែល​ជា​ផ្នែក​មួយ​នៃ​ការសន្យា​របស់​ប្រធានាធិបតី​ចូ បៃ​ដិន​ក្នុង​ការការពារ “​គ្រប់​អ៊ី​ញ​” នៃ​ទឹកដី​ណា​តូ ដោយ​ធ្វើយ៉ាងណា​កុំ​ឱ្យ​ប្រធានាធិបតី វ្ល៉ា​ឌី​មៀ ពូ​ទីន ខឹង​ហើយ​បង្កើន​ជម្លោះ​បន្ថែមទៀត​។ ប៉ុន្តែ​ការធ្វើ​សមយុទ្ធ​រួមគ្នា​នេះ​ក៏​ជា​មធ្យោបាយ​មួយ​ក្នុង​ការធានា​ថា​សម្ពន្ធមិត្ត​នៅ​អឺរ៉ុប​ភាគ​អាគ្នេយ៍​ត្រៀមខ្លួន​ជា​ស្រេច​ដើម្បី​ធ្វើ​សមយុទ្ធ​ផងដែរ​។​

​គេ​មិន​ច្បាស់​ទេ​ថា​តើ​អាម៉េរិក​នឹង​រក្សា​ដានជើង​ប្រភេទ​ណា​នៅ​មូលដ្ឋាន​នេះ​។ ​មន្ទីរ​បញ្ច​កោណ​នឹង​សម្រេច​ក្នុងពេល​ឆាប់ៗ​នេះ​ថា​តើ​ត្រូវ​រក្សា​ចំនួន​ទាហាន​និង​មេបញ្ជាការ​ជាន់ខ្ពស់​អាម៉េរិក​នៅ​ទីនោះ​ដែរ​ឬ​អត់​។​

​អ្នក​ខ្លះ​នៅក្នុង​សភា​មាន​ការព្រួយបារម្ភ​ចំពោះ​ការចំណាយ​ច្រើន​ឡើង​ក្នុង​ការបំពេញ​តាម​ការទាមទារ​ជា​បន្ត​របស់​អ៊ុយ​ក្រែន​សម្រាប់​ការគាំទ្រ​ពួកគេ​ដោយ​សមាជិក​សភា​ជាន់ខ្ពស់​ខាង​គណបក្ស​សា​ធារ​​ណ​រដ្ឋ លោក ខេ​វិន ម៉ាក​ខា​ធី (Kevin McCarthy)​បាន​លើកឡើង​កាល​ពី​ខែ​តុលា​ថា គណបក្ស​របស់​គាត់​ប្រហែលជា​មិន​ចង់​សរសេរ “​មូល​ប្បទាន​ប័ណ្ណ​ចំហ​” ដល់​អ៊ុយ​ក្រែនទេ​។​

​ប៉ុន្តែ​អ្នកគាំទ្រ​នៃ​ការរក្សា​វត្តមាន​ដ៏​រឹងមាំ​នៅ​អឺរ៉ុប​ខាងកើត​បាន​ចង្អុល​ទៅ​ការឈ្លានពាន​របស់​រុស្ស៊ី​លើ​អ៊ុយ​ក្រែន​ក្នុង​ខែ​កុម្ភៈ​ជា​ភស្តុតាង​បង្ហាញថា សហរដ្ឋ​អាម៉េរិក​និង​សម្ពន្ធមិត្ត​ណា​តូ​មិនបាន​ធ្វើ​​គ្រប់គ្រាន់​ដើម្បី​រារាំង​មូ​ស្គូ​កាល​ពី​រដូវរងា​ឆ្នាំមុន​ទេ​៕

​កងទ័ព​អាម៉េរិក​ដើរ​ដង្ហែ​ក្នុងអំឡុងពេល​ដង្ហែ​ក្បួន​យោធា​ក្នុង​ថ្ងៃ​បុណ្យ​ជាតិ​របស់​រូ​ម៉ា​នី នៅ​ទីក្រុង​ប៊ូ​ការ៉េ​ស​នៅ​ថ្ងៃទី​១ ខែ​ធ្នូ ឆ្នាំ​២០២២